Category: Job

Suoten ni Satanas ni Job

1 Adda idi maysa a tao nga agnagan iti Job nga agnanaed idiay Uz.Agdaydayaw iti Dios ket napudno kenkuana. Naimbag a tao ni Job ket saan nga agaramid iti dakes.

2 Sangapulo ti annakna: pito a lallaki ken tallo a babbai.

3 Adu ti animal a tarakenna: 7,000 a karnero, 3,000 a kamelio, 1,000 a baka ken 500 nga asno. Adu met ti adipenna ket isu ti kabaknangan iti deppaar ti Daya.

4 Agsisinnublat nga agpadaya dagiti lallaki nga annak ni Job ket kanayon met nga awisenda a dumar-ay dagiti kakabsatda a babbai.

5 Tunggal malpas ti padaya, bumangon a masapa ni Job ket agpuor kadagiti daton a maipaay iti pannakadalus dagiti annakna. Naipaugali nga aramidenna daytoy ta kunkunana iti bagina, “Amangan no nagbasol dagiti annakko babaen iti pananglaisda iti Dios iti unegda.”

6 Ididumteng ti aldaw a panagparang dagiti nailangitan a parsuaiti saklang ni Yahweh, kimmuyog met kadakuada ni Satanas.

7 Sinaludsod ni Yahweh kenkuana, “Sadino ti naggapuam?”

“Sinursursorko ti entero a daga,” insungbat ni Satanas.

8 “Napaliiwmo kadi ni adipenko a Job?” sinaludsod ni Yahweh. “Awan iti daga ti napudno ken awan pakapilawanna a kas kenkuana. Managbuteng kaniak ket saan nga agaramid iti dakes.”

9 Kinunani Satanas, “Agdaydayaw ngata kenka ni Job no awan ti imbag a magun-odna?

10 Sinalaknibam ni Job agraman ti familiana ken ti amin a sanikuana. Bendisionam ti amin nga aramidna ket inikkam iti adu unay nga animalna a mangsaknap iti entero a pagilian.

11 Ngem padasem man nga alaen ti amin a sanikuana ta kitaem no dinakanto ilunod!”

12 Kinuna ni Yahweh ken ni Satanas, “Ala wen, aramidem ti aniaman a kayatmo kadagiti amin nga adda kenkuana, ngem saanmo a dangran ni Job.” Ket pimmanaw ni Satanas iti imatang ni Yahweh.

Matay dagiti Annak ni Job ken Mapukaw ti Kinabaknangna

13 Iti maysa nga aldaw, idi agrarambak dagiti annak ni Job iti balay ti inauna a kabsatda a lalaki,

14 nagtartaray ti maysa a babaonen a napan ken ni Job. Kinunana, “Agar-aradokami iti talon ket agar-arab met dagiti asno iti asidegmi.

15 Pagammoan, rimmaut dagiti taga-Sabeket intalawda dagiti amin nga animal. Pinatayda dagiti amin nga adipenmo! Siak laeng ti nakalibas a mangipakaammo kenka iti napasamak.”

16 Agsasao pay laeng ti adipen idi dumteng ti sabali nga adipen ket kinunana, “Nakimat dagiti karnero ken dagiti agpaspastor ket natayda amin! Siak laeng ti nakalasat a mangipakaammo kenka iti napasamak.”

17 Agsasao pay laeng ti adipen idi dumteng ti sabali pay nga adipen ket kinunana, “Adda tallo a grupo dagiti Caldeoa nangdarup kadakami. Innalada amin a kamelio ket pinatayda amin nga adipenmo! Siak laeng ti nakalibas a mangibaga kenka iti napasamak.”

18 Saan pay a nalpas a nagsao ti adipen idi dumteng ti sabali manen nga adipen ket kinunana, “Agrarambak dagiti annakmo iti balay ti inauna a kabsatda.

19 Pagammoan, dimteng ti napigsa nga angin a naggapu iti let-ang. Rinebbana ti balay ket natay amin nga annakmo! Siak laeng ti nabati a mangibaga kenka iti napasamak.”

20 Timmakder ni Job ket rinay-abna ti pagan-anayna gapu iti ladingitna. Kinuskosanna ti ulona sa nagpakleb iti daga ket nagdaydayaw.

21 Kinunana,“Lamolamoak a nayanak ket matayakto met a lamolamo. TiApoti nangted ket ita, isu met laeng ti nangala. Madaydayaw koma ti naganna!”

22 Ngem uray kasta ti naaramid, saan a nagbasol ni Job. Dina pinabasol ti Dios gapu iti napasamak.

Suoten Manen ni Satanas ni Job

1 Idi dumteng ti aldaw a panagparang dagiti nailangitan a parsua iti imatang ni Yahweh, naitallaong manen ni Satanas.

2 “Sadino ti naggapuam?” sinaludsod ni Yahweh ken ni Satanas.

Insungbat ni Satanas, “Sinursorko ti entero a daga.”

3 Sinaludsod ni Yahweh, “Napaliiwmo kadi ni Job nga adipenko? Awan ti masarakan iti daga a kas kenkuana iti kinapudno ken awan pakapilawanna. Managbuteng kaniak ket saan nga agaramid iti dakes. Dinawatmo kaniak tapno palubosanka a mangdangran kenkuana nga awan gapgapuna. Ngem kaskasdi a nagtalinaed a napudno kaniak.”

4 Simmungbat ni Satanas, “Kudil iti kudil.Isalda ti tao ti batogna a langit tapno agbiag.

5 Ngem padasem ita a dangran ti bagina—awan duadua nga ilunodnaka!”

6 “Ala, wen, yawatko kenka ni Job,” kinuna ni Yahweh ken ni Satanas. “Aramidem ti kayatmo kenkuana, ngem saanmo a patpatayen.”

7 Pimmanaw ni Satanas iti sango ni Yahweh. Pinaggaddilna ni Job iti nakaar-arriek iti entero a bagina.

8 Napan nagtugaw ni Job iti pagbasuraan. Nangala iti buong ti banga a pagikkatna kadagiti keggang ti gaddilna.

9 Kinuna ti asawana, “Agtalinaedka pay la kadi iti kinapudnom iti Dios? Apay a dimo ilunod ti Dios tapno mataykan!”

10 “Minamaag ti sasawem,” insungbat ni Job. “No mangted ti Dios iti imbag, awatentayo. Apay nga agreklamotayo no mangyeg iti rigat?”

Ngem iti laksid ti panagsagaba ni Job, saan latta a nagsao iti maibusor iti Dios.

Sumarungkar dagiti Gagayyem ni Job

11 Tallo kadagiti gagayyem ni Job ti nakadamag iti didigra a napagtengna. Isuda da Elifaz a taga-siudad ti Teman, Bildad a taga-Sua ken Zofar a taga-Naama. Nagtutulagda a sarungkaran ni Job tapno liwliwaenda.

12 Nasaripatpatanda ni Job idi adayoda pay laeng ngem dida nabigbig. Idi mailasinda nga isu gayam ni Job, nagsangit ken naganug-ogda. Gapu iti ladingitda, rinay-abda dagiti pagan-anayda sada nagipurruak iti tapok iti ngato ken kadagiti uloda.

13 Kalpasanna, nakitugawda ken ni Job iti daga iti las-ud ti pito nga aldaw ken rabii. Awan ti nagsao kadakuada gapu iti nakitada a nakaro unay a panagsagabana.

Agreklamo ni Job iti Dios

1 Kalpasanti nabayag nga ulimek, nagsao ni Job ket inlunodna ti aldaw a pannakayanakna.

2-3 ODios, ilunodmo koma ti aldaw a pannakayanakko;

ilunodmo koma ti rabii a pannakainawko.

4 Pagsipngetem koma dayta nga aldaw, O Dios;

dimo koma lagipen ken lawaganen dayta nga aldaw.

5 Paglidemem ken pagsipngetem koma dayta nga aldaw;

kumotam kadagiti ulep, ket abbongam ti init.

6 Ikkatem dayta a rabii iti tawen,

ket saanmon nga ibilbilang.

7 Pagbalinem koma dayta a rabii a naliday;

ikkatem ti amin a ragsakna.

8 Bilinem dagiti baglan

a mangilunod iti dayta nga aldaw,

dagiti baglan a makabael a mangbilin iti Leviatan.

9 Dimo koma pagraniagen ti baggak;

dina koma makita ti bannawag.

10 Ilunodmo koma dayta a rabii

ta pinalubosannak a nayanak,

ket inyawatnak iti ladingit ken rigat.

11 Natayak la koman

idi addaak pay la iti tian ni inak,

wenno idi apaman a nayanakak.

12 Apay aya a sinaksaklotnak ni inak?

Apay pay laeng a pinasusonak?

13 No natayak la koma idin,

agin-inanaak koma itan.

14 Matmaturogak koman a kas kadagiti ari ken agtuturay

a nangbangon manen kadagiti nadadael a palasio.

15 Wen, matmaturogak koman a kas kadagiti prinsipe

a nangpunno kadagiti balayda iti balitok ken pirak.

16 Matmaturogak koman a kas kadagiti maladaga

a natay a nayanak,

a dida nakita ti lawag.

17 Idiay tanem, agsardeng ti kinadakes dagiti nakillo,

ket sadiay, aginanan dagiti nabannog iti trabaho.

18 Uray pay dagiti balud adda talnada sadiay;

saandan a maririawan ken mabugbugtak.

19 Addada amin sadiay, dagiti natan-ok ken nanumo,

ket siwawayawayan dagiti tagabu.

20 Apay a maikkan iti silaw ti tao nga agbiag a nakaay-ay-ay?

Apay a maikkan iti biag ti tao a napnoan pait ti kararuana?

21 Tarigagayandani patay,

ngem saan met nga umay.

Kaykayatda ti maitanem,

ngem ti maaddaan iti uray ania a gameng.

22 Saanda a naragsak

agingga a matay ken maitanemda.

23 Saan nga ipakaammo ti Dios ti masakbayanda,

ket likmutenna ida iti alad.

24 Saanak a makapangan ngem agladingitak,

ti panagas-asugko kasla danum a maibuyat.

25 Pumayso ti amin a kabutengko

ken dagiti amin a kaamakko.

26 Awan talna wenno inanak,

pulos a di agpatingga ti panagrigatko.

Ti Umuna a Bitla

1-2 Job, dinak koma kagura no agsaoak,

ta diak magawidanen toy dilak.

3 Adu a tattao ti sinursuroam,

ket pinapigsam dagiti nakapuy nga ima.

4 No adda idi matuang gapu iti kapsut ken bannogna,

tumakder manen no mangngegna ti saom a pammaregta.

5 Ngem ita ta sikan ti marigatan,

ti panagsagaba dimon maibturan.

6 Managbutengka iti Dios ken natan-ok ti panagbiagmo;

rumbeng ngarud a maaddaanka iti talged ken namnama.

7 Lagipem: Adda kadin awan basolna a nadidigra?

wenno nalinteg a nadadael?

8 Napaliiwko a dagiti agmula iti dakes,

dakes met la ti apitenda.

9 Kasla bagio ti pungtot ti Dios

a mangdadael kadakuada.

10 Kasla leon nga agngernger dagiti managdakdakes,

ngem pagulimeken ida ti Dios,

ket pusienna dagiti ngipenda.

11 Kas kadagiti leon nga awan alun-onenda,

matayda ket mawarawara amin nga annakda.

12 Adda nangngegko a sao, kasla arasaas

ket dandani saanko a nangngeg.

13 Kaslanakabutbuteng a tagtagainep

a nangtukay iti turogko.

14 Nagbuteng ken nagpigergerak;

nagkintayeg ti entero a bagik.

15 Nariknak a napul-oyan ti rupak

ket simgar ti dutdotko.

16 Adda nakitak nga agtaktakder sadiay;

miningmingak ngem diak nailasin.

Pagammoan, nangngegko ti bassit a timek a nagkuna:

17 “Adda kadi tao a nalinteg iti imatang tiDios?

Adda aya nadalus iti sangoanan tiNamarsua kenkuana?

18 Saan a talken ti Dios dagiti nailangitan nga adipenna;

uray dagiti anghelesna, adda pangbabalawanna.

19 Pagarupem kadi a talkenna ti naparsua iti pitak,

ti nagtaud iti tapok ket nalaka a marumek

a kas iti balay ti akot-akot?

20 Mabalin a sibibiag ti tao iti bigat,

ngem matay a di mapuotan sakbay ti rabii.

21 Maitalaw ti amin a sanikuana;

matay nga awan pay la ti siribna.”

1 Umawagka, Job, ta kitaem no adda sumungbat.

Adda kadi anghel a mabalinmo a pagkamangan?

2 Patayem la ti bagim gapu iti gura ken sakit ti nakem.

Minamaag daytoy nga ar-aramidem.

3 Nakakitaak kadagiti maag a kasla natalged ti biagda,

ngem dinawatko ti kellaat a pannakailunod dagiti taengda.

4 Saan a natalged dagiti annakda;

iti pangukoman, awan mangikalintegan kadakuada.

5 Kanento dagiti mabisin ti mula ti maag,

uray pay dagiti agtubo kadagiti siitan;

ket apalanto dagiti mawaw ti sanikuana.

6 Saan nga agtubo ti kinadakes iti daga,

wenno ti riribuk iti tapok.

7 Ti tao met laeng ti mangpataud iti rigatna,

a kas met iti panagtaud ti rissik iti beggang.

8 No siak ti sika, agkamangak iti Dios,

ket iparangko kenkuana ti pagtaktakderak.

9 Ditaymaawatan dagiti naindaklan nga aramidna,

ket dagiti milagrona saanda nga agpatingga.

10 Pagtudoenna ditoy daga

ket padanumanna dagiti taltalon.

11 Wen, ti Dios ti mangitan-ok kadagiti napakumbaba,

ken mangliwliwa kadagiti amin nga agladladingit.

12-13 Lapdannati panggep dagiti nasikap,

ket ipalab-ogna dagiti masirib

iti kinasikapda met laeng,

tapno saan nga agballigi ti aramidenda.

14 Agar-arikapda uray iti tengnga ti aldaw.

15 Ngem isalakanna dagiti napanglaw iti pakatayanda,

ispalenna dagiti nakakaasi iti pannakailupitlupitda.

16 Ikkanna iti namnama dagiti napanglaw,

ket pagulimekenna dagiti managdakdakes.

17 Nagasatti tao a ti Dios ti mangdisiplina!

Dimo ngarud guraen no tubngarennaka.

18 Bedbedanti Dios ti sinugatna;

agasanna met laeng ti dinunorna.

19 Kanayon a salaknibannaka

tapno awan ti pakaan-anoam.

20 No dumteng ti bisin, biagennaka;

no adda gubat, iti patay ispalennaka.

21 Salaknibannaka iti pannakapadpadakes;

isalakannaka iti pannakadadael.

22 Katawaamto ti ranggas ken bisin;

dimonto kabuteng dagiti atap nga animal.

23 Awanto ti bato dagiti aradoem a talon;

didakanto darupen dagiti narungsot nga animal.

24 Iti kasta, natalgedkanto iti taengmo;

inton bilangem dagiti karnerom,

awanto ti napukaw kadakuada.

25 Adunto ti kaputotam,

umadudanto a kas ruot iti daga.

26 Atiddogto ti panagbiagmo;

napigsakanto pay laeng inton matayka

kas trigo a nadanonan ti pannakaapitna.

27 Job, nasursuromi daytoy

iti nabayag a panangad-adalmi.

Pudno daytoy,

ket ipangagmo ta pagimbagam.

1-2 No matimbang la koma

ti rigat ken ladingitko,

3 nadagdagsenda pay ngem dagiti darat ti baybay.

No nagubsang ti panagsaok dikayo koma masdaaw.

4 Sinalputnak dagiti pana ti Dios a Mannakabalin-amin

ket nagwaras iti bagik ti sabidongda.

Inturongna kaniak dagiti pammutbutengna.

5 Naulimek ti asno no mangmangan iti taraonna,

saan nga agemmak ti baka no madama ti pannanganna.

6 Adda aya mayat a mangan iti awan ramanna?

Adda kadi nanam ti puraw ti itlog no awan asinna?

7 Diak kayat ti kasta a taraon,

agsarwaak no manganak.

8 Apay a di ipangag ti Dios ti dawatko?

Apay a dina patgan ti kararagko?

9 Nasaysayaat laengen a patayennak ti Dios.

10 No ammok nga aramidenna ti kasta,

lumagtoak gapu iti rag-o;

agragsakak uray pay napalalo ti rigatko.

Ammok a nasantoan ti Dios;

pulos a diak pay sinupring ti bilinna.

11 Ania pay ti pigsak nga agbiag?

Ania pay la ti gapuna, awan metten ti namnamak?

12 Naaramidak aya iti bato?

Bronse kadi toy bagik?

13 Awanen pigsak a mangisalakan iti bagik;

awanen ti mabalinko a pagkamangan.

14 Masapulko dagiti napudno a gagayyem

iti kastoy a rigatko,

tinallikudak man ti Dios wenno saan.

15 Allilawendak, dakayo a gagayyemko;

kaskayo la waig a namagaan no awan tudo.

16-17 Adu ti nagbalay a danum

napuskol ti niebe iti waig.

Ngem no tiempo ti pudot, marunawda

ket ti waig agmaga.

18 Mayaw-awan ti bunggoy dagiti agbibiahe

iti panagsapsapulda iti danum nga inumenda;

agalla-allada iti langalang ket matayda.

19 Agbirok iti danum dagiti bunggoy

a naggapu iti Seba ken Tema,

20 ngem mapaayda iti igid dagiti waig a nagmaga.

21 Kadagita a waig ti pangyarigak kadakayo;

makitayo ti rigatko ket makigtotkayo.

22 Dinawatko kadi nga isagutandak?

Kiniddawko kadi nga agpasuksokkayo tapno maisalakanak?

23 Imbagak aya nga ispalendak iti kabusor

wenno iti nadangkok nga agturay?

24 Ala ngarud, isurodak ket ibagayo dagiti biddutko;

agulimekak ket dumngegak kadakayo.

25 Maguyugoydak no nainsiriban ti palawagyo,

ngem minamaag met dagiti sasawenyo.

26 Kunayo nga angin ti agaon iti ngiwatko.

Apay ngarud a sungbatanyo?

27 Pagbibinnunotanyo pay dagiti ulila a tagabu,

ket ilakoyo ti nadekket a gayyemyo!

28 Perrengendak, saanak nga agul-ulbod.

29 Baliwanyo ti panunotyo ket umisu koma ti pangngeddengyo;

didak ukomen, ta awan dakes a naaramidko.

30 Ngem ipagarupyo nga agul-ulbodak—

kunayo a diak mapaglasin ti dakes ken naimbag.

1 Mayarig ti biag ti tao iti kapilitan a panagserbi ti soldado,

kasla biag ti agtartrabaho iti nadagsen,

2 kas tagabu a kalikagumanna ti paglinonganna,

kas mangmangged nga agur-uray iti tangdanna.

3 Binulan nga ubbaw ti panagbibiagko;

rinabii a ladingit ti malakamko.

4 No maturogak, alimbasagenak iti iddak;

saanak a makaturog, sumgaakon nga aglawag.

5 Ig-iggesen ti bagik, nalapunos iti keggang;

bumtak dagiti gaddilko ket agnanada.

6 Aggibusen dagiti aldawko nga awan namnamak,

naparpardas ngem ti barkiliati panaglabasda.

7 Lagipem, O Dios, a kasla anges ti biagko;

naggibusen dagiti ragragsakko.

8 Addaak pay la ita, ngem didakton makita.

No birokendak, didakton masapulan.

9-10 Kasiti ulep nga aglabas ket agpukaw,

kasta ti tao a matay ket dinton agsubli;

malipatan payen dagiti makaam-ammo kenkuana.

11 Diak mabalin ti agulimek!

Madi ti riknak ket makapungtotak.

Masapul nga agsaoak.

12 Apay kadi a pabambantayannak?

Ipagarupmo aya a maysaak a dragon ti taaw?

13 Agiddaak tapno aginanaak;

kayatko nga iliwliwag ti panagsagabak.

14 Ngem sika, pagbutngennak kadagiti tagtagainep;

pagparmataennak ket butbutngennak.

15 Kaykayatko laengen a mabekkelak;

nasaysayaat laengen a matayak

ngem ti agbiag iti kastoy a rigat.

16 Saanko a kayaten ti agbiag!

Awanen serserbi ti biagko.

Baybay-annakon. Awanen serserbi toy biag.

17 Apaya napateg unay ti tao kenka?

Apay nga ikaskasom dagiti aramidna?

18 Binigat a bisitaem,

ket tunggal kanito a suotem.

19 Dimo la aya mayadayo ti panagkitam kaniak,

iti uray apagdarikmat tapno matilmonko ti tuprak?

20 No agbasolak, apay aya a sika ti masakitan,

sika nga agbambantay kaniak?

Apay a siak ti pangipapasam iti pungtotmo?

Makapadagsenak unay aya kenka?

21 Dimo la aya mapakawan ti basolko?

Di la mabalin a punasem dagiti labsingko?

Agiddaakton iti katapokan,

ket no sapulennak awanakton a mabirokam.

1-2 Nalpas kadin ti bukodmo a bitla?

Atiddog ngem awan met ti linaonna.

3 Ballikugen aya ti Dios ti hustisia?

Killoenna aya ti kinalinteg?

4 Nalabit a nakabasol dagiti annakmo;

dinusa ida ti Dios kas maitutop iti aramidda.

5 Agkamangka iti Dios a Mannakabalin-amin,

ket agpakpakaasika kenkuana.

6 No pudno a nalintegka ken awan basolmo,

awan duadua a tulongannaka ti Dios,

ket isublina a kas gunggonam dagiti napukawmo.

7 Dinto maidilig ti napukawmo a kinabaknang

iti itedto kenka ti Dios iti kamaudianan,

8 Amirisemti kinasirib idi punganay;

utobem dagiti nasursuro dagidi ammatayo.

9 Ababa unay ti biagtayo ket ania ti ammotayo?

Ditoy daga, anniniwan laeng ti kayarigantayo.

10 Paisuroka kadagiti mamasirib idi ugma;

ammoem ti pannursuroda, denggem ti ibagada:

11 “Saan nga agtubo dagiti runo iti awan danumna;

iti la kadanuman ti pakasarakan kadakuada.

12 No agmaga ti nagtuboanda,

magangoda idinto a kalanglangtoda,

ken saan pay a mabalin a makeltay,

kadagiti amin a mula, umunada a malaylay.

13 Mayarig dagiti awan Diosna kadagita a runo;

apaman a lipatenda ti Dios, mapukaw metten ti namnamada.

14 Agtalekda iti panait—iti sapot ti lawwalawwa.

15 Matuangda no agsanggirda iti balay ti lawwalawwa;

no kumpetda iti panait, matulonganna aya ida a tumakder?”

16 Kasla barsanga dagiti managdakdakes nga agtubo iti kainitan,

barsanga nga agsaknap iti minuyongan.

17 Kadagiti bato, agkawikaw dagiti ramutda,

kadagiti dadakkel a bato nairut ti ikakapetda.

18 Ngem no parutem ida,

awan ti makaammo a sadiay ti nagtuboanda.

19 Wen, kasta laeng ti ragsak dagiti managdakdakes,

adda dagiti umay a sumublat iti lugarda.

20 Saan a baybay-an ti Dios dagiti napudno a tattao;

dina met tulongan dagiti nakillo.

21 Pagragsakennakanto manen;

agkatawakanto, agriawkanto iti rag-o.

22 Ngem ibabainna dagiti manggura kenka,

ket awanton ti taeng dagiti managdakdakes.

1-2 Wen,nangngegko aminen dagita.

Ngem iti imatang ti Dios,

awan ti makaikalintegan iti bagina.

3 Kasta met nga awan ti makasuppiat kenkuana,

awan makasungbat iti rinibu a saludsodna.

4 Masirib ken nabileg unay ti Dios;

awan ti agballigi a bumusor kenkuana.

5 Di mapakpakadaan a yalisna dagiti bantay;

iti pungtotna dadaelenna ida ket inda margaay.

6 Paggingginedenna ti daga,

ket gunggonenna dagiti fondasionna.

7 Mabalinnaa di palgaken ti init,

ken di pagrimaten dagiti bituen.

8 Awan timmulong kenkuana idi inyukradna ti tangatang

wenno idi nagtalaytay kadagiti dalluyon ti taaw.

9 Binilinnati Oso ken ti Orion iti tangatang,

ken ti Pleiades ken ti grupo dagiti bituen iti abagatan.

10 Ditayo maawatan dagiti nakaskasdaaw nga aramidna;

saan nga agpatingga dagiti milagrona.

11 Lumabas ti Dios, ngem diak makita.

12 Alaenna ti kayatna, ket awan ti makalapped kenkuana;

awan ti makaitured nga agkuna, “Ania ti ar-aramidem?”

13 Saan a medmedan ti Dios ti pungtotna;

pinarukmana dagiti katulongan ni Rahabiti babaenna.

14 Ania ngarud ti masaok,

Ania ti isungbatko iti Dios?

15 Nupay awan basolko, awan maaramidko;

idawdawatko laengen iti Dios a kaasiannak.

16 Uray ikkannak iti gundaway nga agpalawag,

saanak a mamati nga ipangagnak.

17 Mangyeg iti bagio a mangbasnot kaniak,

awan ti gapgapuna a sugatsugatennak.

18 Pulos a saannak a paangsen;

bin-ig a kinapait ti impaayna kaniak.

19 Aramatek ti pigsa? Adda aya makaparmek kenkuana?

Idarumko? Sinno ti makabael.

20 Awan basolko ket napudnoak,

ngem iti panagsaok, kasla nakabasolak,

ket amin a sawek kasla ukomendak.

21-22 Awan basolko ngem awanen aniamanna kaniak;

maumaakon nga agbibiag.

Total, isu met la nga isu:

nakabasoltayo man wenno saan,

agpapadatayo a dadaelento ti Dios.

23 Agkatawa ti Dios no kellaat a matay ti awan basolna.

24 Inyawat ti Dios ti lubong kadagiti managdakdakes.

Kinullaapanna ti mata dagiti amin nga ukom.

No saan a ti Dios ti akin-aramid iti daytoy, siasino ngarud?

25 Napardas ti panaglabas dagiti aldawko;

awan ti naimbag kadakuada, uray la koma no maysa.

26 Lumabas ti biagko a kas iti kapardasan a bangka,

kas iti kapardas ti agila a mangsippayot iti tukmaanna.

27-28 No umisemak ket padasek a lipaten ti rigatko,

agsubli met laeng a mangtuok kaniak dagiti ut-otko.

Ammok nga ikeddeng ti Dios a nakabasolak.

29 Yantangay ta ibilang ti Dios a nakabasolak,

apay pay laeng a maringgorannak?

30 Uray sabonak dagiti basolko, diak maikkat ida.

31 Iti abut a narugit ti nangipurruakan ti Dios kaniak,

ket uray dagiti pagan-anayko, karugitdak.

32 No tao la koma ti Dios, mabalinko a sungbatan;

mabalinmi ti dumatag iti pangukoman

tapno maibanag ti ririmi.

33 Ngem awan mamagkappia kadakami;

awan ukom a mangrisut iti ringgormi.

34 O Dios! sardengannakon a dusaen!

Yadayom kadin kaniak dagiti pammutbuteng!

35 Saanak nga agamak, agsaoak latta!

Ngamin, ammok ti bukodko a karirikna.

1 Naumaakon nga agbibiag.

Ti sakit ti nakemko denggenyo ta ibagak.

2 Saannak koma nga ukomen, O Dios.

Ibagam no ania ti pangpabasolam kaniak.

3 Tumutop kadi kenka ti kasta a kinaranggasmo?

Rumbeng kadi nga umsiem ti pinarsuam a tao?

Kanunongam kadi ti panggep dagiti managdakdakes?

4 Kitaem aya dagiti banag a kas iti panangkita ti tao?

5 Ababa kadi a kas iti biagmi ti biagmo?

6 Apay ngarud a tuntonem dagiti amin a basolko

ken birokem dagiti amin a salungasingko?

7 Ammomnga awan ti basolko;

ammom nga awan ti makaisalakan kaniak iti pannakabalinmo.

8 Dagita imam ti nangsukog ken nangaramid kaniak;

ket ita,dagita met la nga ima ti mangdadael kaniak.

9 Lagipem, O Dios, nga inaramidnak iti pitak;

rumkennak kadi ket agbalinak manen a tapok?

10 Inikkamni amak iti pigsa a mangputot kaniak;

pinadakkelnak iti tian ni inak.

11 Pinagkakamangmo dagiti tulang ken pempennetko;

lasag ken kudil ti imbungonmo kadagiti tulangko.

12 Inikkannak iti biag ken ayat a di agbalbaliw,

ket iti panangaywanmo, tinaginayonmo ti biagko.

13 Ngem ita, ammok a bayat dayta a tiempo,

adda nalimed a panggepmo a mangdangran kaniak.

14 Sinipsiputannak tapno kitaem no agbasolak,

ket adda panggapuam a di mamakawan kaniak.

15 Dakesak iti imatangmo no makabasolak,

ngem no agaramidak iti naimbag awan magunggonak.

Nalapunosak iti bain ket nakakaasiak.

16 No met ngarud adda bassit pagrang-ayak,

kaska la leon a manganup kaniak;

agaramidka pay iti milagro a pakadangrak.

17 Adda latta pammaneknekmo a maibusor kaniak;

umad-adda ti pungtotmo kaniak, ad-adda a gumilgil-ayab;

adda latta baro nga ipabasolmo kaniak!

18 Diosko, apay pay la nga impalubosmo a mayanakak?

Natayak la koman sakbay nga adda nakakita kaniak.

19 Naim-imbag la koman a naglayonak iti tanem apaman a naipasngayak.

Kapada dayta ti pulos a di naitao.

20 Di met aya agpatinggan ti biagko?

Bay-annak nga agragsak kadagiti nabati pay nga aldawko.

21-22 Innakon iti mabiit ket saanakton nga agsubli.

Innak iti nasipnget ken naliday a daga,

daga a nalidem ken awan urnosna,

daga dagiti anniniwan,

nga uray ti lawag ket napnoan sipnget.