Category: Job

1 Insapatak a pulos a diak matmatan

a sidederrep ti maysa a balasang.

2 Ania ti ipaay ti Dios a Mannakabalin-amin kadatayo?

Kasano ti panangsupapakna kadagiti aramid ti tao?

3 Yegna ti didigra ken pannakadadael

kadagiti agaramid iti dakes.

4 Ammo ti Dios ti amin nga aramidko;

makitana ti amin nga addangko.

5 Isapatak nga awan dakes nga inaramidko,

ket pulos nga awan ti inallilawko.

6 Timbangennak koma ti Dios iti husto a timbangan,

ket awan duadua a makitana nga awan basolko.

7 No simmiasiak iti nalinteg a dalan,

wenno simmurotak iti kinadakes,

no namansaan dagiti imak iti basol,

8 madadael koma dagiti mulak,

wenno kanen ti sabali a tao dagiti apitko.

9 No nasulisogak iti asawa ti sabali a tao,

ket naglemmengak nga agur-uray iti likudan ti ridaw ti balayna,

10 isagana koma ti asawak ti kanen ti sabali a tao,

ket makikaidda iti sabali a lalaki.

11 Nakaal-alinggaget ti kasta nga aramid

ket rumbeng a mapapatay ti akin-gapuanan.

12 Kasla apuy a gumilgil-ayab

nga agkayamkam a mangikisap iti amin a kukuak.

13 No agasug kaniak ti maysa kadagiti adipenko,

ipangagko ket itedko ti kalinteganna.

14 Ania ti rupak iti Dios no diak aramiden ti kasta?

Anianto ti makunak,

inton maisaklangak iti pangukomanna?

15 Ti Dios a namarsua kaniak,

isu met laeng ti namarsua kadagiti adipenko.

16 Tinulongakdagiti napanglaw;

diak impalubos nga agbiag

a nakaay-ay-ay dagiti balo a babbai.

17 Diak met impalubos a mabisinan dagiti ulila;

no la ket adda taraonko, pakanek met ida.

18 Intedko ti masapulda bayat ti panagbiagko.

19 No adda masarakak a nakapangpanglaw

a di pay makagatang iti kawesna,

20 ikkak iti pagan-anayna a de lana

a nagtaud iti dutdot dagiti karnerok.

Iti kasta, idaydayawnak iti amin a pusona.

21 No adda sinaurko nga ulila

ta ammok a mangabakak iti pangukoman,

22 matukkol koma dagiti takkiagko,

ket masip-akda iti abagak.

23 Kabutengko ti pannusa ti Dios

isut’ gapuna a diak maaramid ti kasta.

24 Pulosa diak nagtalek iti kinabaknangko

25 wenno pinagtangsit ti sanikuak.

26 Diak nagdaydayaw iti naraniag nga init

wenno iti napintas a bulan.

27 Diak nasulisog a nagdaydayaw kadakuada

ket inagkak ti imak

kas pakakitaan ti innak panagrukbak.

28 Ti agbasol iti kasta,

rumbeng a mapapatay,

ta laksidenna ti Dios a Mannakabalin-amin.

29 Diak naragsakan iti panagsagaba dagiti kabusorko;

iti pannakadidigrada diak met nagrag-o,

30 Diak nagbasol babaen iti panangidawatko iti pannakapapatayda.

31 Ammo dagiti amin a nagserserbi kaniak

a siaayatak a mangpasangbay kadagiti ganggannaet.

32 Pinagdagusko dagiti agbibiahe,

ket diak impalubos a maturogda iti kalsada.

33 Saanak a kas kadagiti dadduma

a mangilemmeng iti basolda.

34 Diak nagbuteng uray ania ti kuna dagiti tattao;

diak nagulimek wenno nagyan iti balayko

gapu iti butengko iti pananglaisda.

35 Awan kadi ti dumngeg iti saok?

Isapatak a pudno ti amin nga ibagbagak.

Sungbatannak koma ngarud

ti Dios a Mannakabalin-amin.

No naisurat koma dagiti pammabasol ti kabusorko

tapno makitak ida,

36 ikabilko dagitoy iti bukodko nga abaga

ket isaadko iti ulok a kas iti korona.

37 Ipakaammok iti Dios ti amin nga inaramidko,

ket diak agbain nga agparang kenkuana.

38 No tinakawko ti daga a taltalonek,

ket inagawko kadagiti pudno nga akinkukua;

39 no kinnanko ti naapit sadiay,

ket binay-ak ti nagmula a mabisinan

40 iti talonko, agtubo koma

dagiti barsanga ken siitan,

imbes a dagiti trigo ken sebada.

Daytoy ti gibus ti bitla ni Job.

Dagiti Bitbitla ni Elihu

1 Gapu ta mamati unay ni Job nga awan ti basolna, insardeng dagiti tallo a lallaki ti mangsungsungbat kenkuana.

2 Ngem adda nga agbuybuya sadiay ti maysa a tao a saanen a nakaigawid iti pungtotna ta ikalkalintegan ni Job ti bagina ket pabpabasolenna ti Dios. (Isu ni Elihu nga anak ni Barakel a kaputotan ni Buz, iti familia ni Ram.)

3 Nakapungtot met kadagiti tallo a gagayyem ni Job agsipud ta awan masarakanda a naimbag a pangsungbatda kenkuana ket agparang a ti Dios ti nagbiddut.

4 Agsipud ta ni Elihu ti kaubingan kadakuada, nagur-uray agingga a nalpasda amin a nagsao.

5 Ngem nakapungtot idi makitana nga awanen ti maisungbat dagiti tallo ken ni Job,

6 isut’ gapuna a nagsao.

Nagamakak a nangibaga iti kapanunotak

ta ubingak idinto a lallakaykayo.

7 Kinunak iti bagik a dakayo ti rumbeng nga agsao;

ket dakay a lallakay ti mangibingay iti siribyo.

8 Ngem ti espiritu iti tao, ti anges ti Mannakabalin-amin,

ti mangted kenkuana iti pannakaawat.

9 Saan a ti panaglakay ti mangpasirib kadagiti tattao

wenno tumulong kadakuada a mangammo iti nalinteg.

10 Dawatek ngarud a denggendak,

ket ibagak kadakayo ti kapanunotak.

11 Siaanusak a nagdengngeg bayat ti panagsaoyo;

dimngegak bayat ti panagsapsapulyo

iti nainsiriban a pagsasao.

12 Sipapasnekak a dimngeg kadakayo,

ket nakitak a diyo mapaneknekan a biddut ti sinao ni Job.

13 Kasano ngarud ti panagkunayo a ti kinasirib ket nasarakanyo?

Ti Dios ti mangsungbat ken ni Job ta diyo nasungbatan.

14 Dakayo ti kasasao ni Job, saan a siak,

ngem no siak ti sumungbat saan a kas iti wagasyo.

15 Job, awan ti naisaoda;

awanen ti maisungbatda kenka.

16 Agurayak kadi pay laeng bayat ti panagulimekda?

Addada dita ket awanen ti maibagada.

17 Diak agulimek, ket ibagak ti sungbatko;

yebkasko met ti kapanunotak.

18 Diak maibturanen ti di agsao;

adu ti kayatko nga ibaga.

19 No saanak nga agsao ita

amangan no bumtakak a kas iti baro a supot a lalat.

20 Masapul nga agsaoak tapno mapalag-ananak.

21 Awan ti kanunongak,

awan met ti patiray-okak.

22 Diak ammo ti mangpatiray-ok;

awan duadua a dusaennak ti Dios no kasta ti aramidek.

1 Job, denggem ngarud a naimbag

dagiti amin nga innak isawang.

2 Yebkasko ti adda iti panunotko.

3 Pudno amin a sasawek, diak agul-ulbod.

4 Ti espiritu ti Dios ti nangaramid kaniak; inikkannak iti biag.

5 No kabaelam sungbatannak,

isaganam dagiti pakisuppiatmo kaniak.

6 Job, iti imatang ti Dios, agpadpadata;

nabukelak met iti pitak a kas kenka.

7 Awan ngarud ti panggapuam nga agbuteng kaniak;

saanka a parukmaen.

8 Kastoy ti nangngegko a kinunam;

9 “Awan basolko, ket diak naglabsing.

Nadalusak, ket awan dakes nga aramidko.

10 Ngem agsapul ti Dios

iti panggapuanna a mangdangran kaniak,

ket ibilangnak a kas maysa a kabusor.

11 Kawarannadagiti sakak;

sipsiputanna ti amin a tignayko.”

12 Ngem ibagak kenka, Job, nga agbiddutka.

Natantan-ok ti Dios ngem ti tao!

13 Apay a makisuppiatka iti Dios?

Apay a kunam a dina ipangag ti asug ti tao?

14 Nadumaduma a wagas ti panagsao ti Dios,

ngem saan latta nga ikaskaso dagiti tattao.

15 Agsaoti Dios no matmaturog dagiti tattao iti rabii

babaen kadagiti tagtagainep ken parmata.

16 Ipangngegna kadakuada ti saona,

ket mabutengda kadagiti ballaagna.

17 Agsao ti Dios tapno pagsardengenna ida nga agbasol

ken tapno saanda nga agtangtangsit.

18 Saanna nga ipalubos a madadaelda;

iti mismo a patay, isalakanna ida.

19 Disiplinaenna ti tao.

Yegna kadakuada ti sakit ken ti nasaem nga ut-ot.

20 Ti masakit mapukaw ti ganasna a mangan

ket dina sagiden ti naimas a taraonna.

21 Main-inut nga umres ti bagina

ket kudil laengen ti mangbungon iti tulangna;

22 asidegen ti ipapanna iti tanemna.

23 Nalabit nga adda anghel a tumulong kenkuana—

maysa kadagiti rinibu nga angheles ti Dios—

a mangipalagip kadagiti tattao ti rebbengda.

24 Agpakpakaasinto ti anghel ket kunana:

“Ruk-atam! Saan a mapan iti lubong dagiti natay.

Adtoy ti pangsubbotko kenkuana.”

25 Umubingto manen ti bagina,

sumubli ti pigsana kas idi kabambanuaganna.

26 Sungbatanto ti Dios ti kararagna,

ket sirarag-onto nga agdaydayaw kenkuana.

Pagbalinento manen ti Dios a nalinteg.

27 Kunananto kadagiti tattao,

“Nagbasolak; saan a naimbag ti inaramidko,

ngem inispalnak ti Dios.

28 Dina impalubos a mapanak

iti lubong dagiti natay,

ket ita, addaak pay la a biag.”

29 Kanayon a kasta ti ar-aramiden ti Dios;

30 ispalenna ti biag ti tao,

ket ipaayna kenkuana ti rag-o ti panagbiag.

31 Job, ipangagmo ti sasawek;

agulimekka ket pagsawennak.

32 Ngem ibagam kaniak no adda maisungbatmo;

siaayatak a mangannugot a sika ti pudno.

33 Ngem no awan, agulimekka ket denggennak,

ta isuroka nga agbalin a masirib.

1-2 Denggenyo ti sawek, dakayo a masirib

ken nasikap a lallaki.

3 Ammoyo ti naimas a taraon no maramananyo;

ngem apay a diyo mailasin

ti nainsiriban a sao no mangngegyo?

4 Mailasintayo koma ti nalinteg.

Ket pilientayo ti naimbag.

5 Kuna ni Job nga awan basolna,

nga inikkat ti Dios ti kalinteganna.

6 Kunana, “Nupay awan basolko, naibilangak nga ulbod;

nasaem ti sugatko, uray awan salungasingko.”

7 Nakakitakayo kadin iti tao

a kas iti daytoy a Job?

Inumenna ti panangumsi a kasla danum.

8 Makikadkadua kadagiti dakes a tattao

ken makikuykuyog kadagiti managbasol.

9 Kunana nga awan a pulos ti magunggona

iti panangtungpal iti pagayatan ti Dios.

10 Denggendak ngarud, dakay a mannakaawat!

Agaramid kadi iti saan a naimbag ti Dios a Mannakabalin-amin?

11 Gunggonaannadagiti tattao kas mayannurot iti aramidda

ket ukomenna ida kas kaikarianda.

12 Saan nga agaramid ti Dios iti dakes,

ti Mannakabalin-amin dina a ballikugen ti hustisia.

13 Naggapu aya ti pannakabalin ti Dios iti sabali?

Adda aya nangisaad kenkuana

a mangaywan iti lubong?

14 No alaen ti Dios ti anges ti biag,

15 matay dagiti amin a sibibiag,

ket agbalinda manen a tapok.

16 Ita, Job, denggennak no masiribka.

17 Ipagarupmo aya a guraen

ti Mannakabalin ti hustisia?

Ukomem kadi ti nalinteg a Dios?

18 Dusaen ti Dios dagiti ari ken dagiti agtuturay,

no awan serserbida wenno nadangkokda.

19 Saanna nga ayonan dagiti agtuturay.

Dina idumduma dagiti baknang kadagiti napanglaw

ta pinarsua amin ti Dios ida.

20 Mabalin a kellaat a matay ti tao iti rabii.

Kabilen ti Dios dagiti tattao ket mapukawda;

dagiti mamaingel laklakaenna a patayen ida.

21 Sipsiputanna ti amin nga addang dagiti tattao.

22 Awan ti nasipnget a lugar

a mabalin a paglemmengan dagiti managdakdakes.

23 Saan a masapul nga ituding ti Dios ti aldaw

a pannakaisaklang dagiti tattao iti pangukomanna.

24 Saan a masapul ti pannakausig

tapno ikkatenna dagiti pangulo,

ket isaadna dagiti sabali iti lugarda.

25 Agsipud ta ammona ti aramidda,

ikkatenna ida iti saadda ken parmekenna ida iti rabii.

26 Dusaenna dagiti managbasol

iti imatang dagiti tattao,

27 agsipud ta nagsardengda a sumursurot kenkuana,

ket dida inkankano dagiti amin a bilinna.

28 Pinilitda dagiti napanglaw tapno umasugda iti Dios,

ket impangagna ti dawatda a tulonganna ida.

29 No saan nga agtignay ti Dios,

siasino ti mangbabalaw kenkuana?

No ilingedna ti rupana,

awan ti mabalin nga aramiden ti tao.

30 Saan koma nga agturay dagiti nadangkok

tapno saanda nga isagmak dagiti tattao.

31 Job, impudnom kadin dagiti basolmo iti Dios?

Inkarim kadin kenkuana a saanka nga agbasolen?

32 Dinawatmo kadi iti Dios

nga ipakitana dagiti biddutmo?

Immannugotka kadi nga isardengmon

ti agaramid iti dakes?

33 Gapu ta dimo kayat ti ar-aramiden ti Dios,

namnamaem kadi nga aramidenna ti kayatmo?

Saan a siak ti mangikeddeng no di sika.

Ibagam ngarud no ania ti kapanunotam.

34 Awan duadua a kumanunong dagiti manakem;

ibaga ti siasinoman a masirib a makangngeg kaniak

35 nga agsasao ni Job nga awan ammona,

ket awan mamaay ti sasawenna.

36 Amirisenyo ti amin nga imbaga ni Job;

makitayo nga agsasao

a kas maysa a dakes a tao.

37 Nayonanna ti basolna iti yaalsa;

iti imatangtay amin, lalaisenna ti Dios ken rabrabakenna.

1-2 Job, ipagarupmo aya a nalintegka?

Kunam, “Awan basolko iti imatang ti Dios.”

3 Ken saludsodem kenkuana, “Kasano a maseknanka iti basolko?

Adda kadi magunggonak iti diak panagbasol?”

4 Kastoy ti maisungbatko kenka ken kadagiti gagayyemmo:

5 Kitaem ti tangatang!

Kitaem ti kangato dagiti ulep!

6 Noagbasolka, saan a madangran ti Dios.

Awan pakaan-anoanna no adu ti labsingmo.

7 Matulongam kadi ti Dios no nalintegka?

Awan ti pakasapulan ti Dios kenka.

8 No agbasolka ti laeng padam a tao ti agsagaba;

iti panagaramidmo iti naimbag, makatulongka kenkuana.

9 Agasug dagiti tattao no maidadanesda,

umawagda iti mangisalakan kadakuada.

10 Ngem saanda nga agkamang

iti Dios a namarsua kadakuada,

isu a mangted iti namnamada

iti karigatan a tiempo ti panagbiagda.

11 Dida agkamang iti Dios a mamagsirib kadatayo;

pagbalinennatayo a nasirsirib

ngem iti animal wenno tumatayab.

12 Dumawatda iti tulong ngem awan ti pannakaipangagda,

agsipud ta natangsit ken managdakdakesda.

13 Awan serserbi ti panagas-asugda;

saan a talliawen wenno ipangag ida ti Dios a Mannakabalin-amin.

14 Job, kunam a dimo makita ti Dios;

ngem aganuska, ta ti kasom naidatagen kenkuana.

15 Ipagarupmo a saan a mangdusa ti Dios

ken dina ikaskaso ti basol.

16 Awan serserbi ti sarsaritaem;

nalawag a dimo ammo ti sasawem.

1-2 Aganuska pay bassit a dumngeg

ta adda pay ibagak kenka a paibaga ti Dios.

3 Adu ti ammok, ket usarek

a mangipakita a nalinteg ti Dios a namarsua kaniak.

4 Awan ti ulbod nga ibagbagak;

pudno a masirib daytoy makisasao kenka.

5 Mannakabalin ti Dios! Awan ti laisenna;

awan ti banag a dina maawatan.

6 Dina pagpauten ti biag dagiti managbasol,

ket ipaayna ti hustisia kadagiti napanglaw.

7 Salaknibanna dagiti nalinteg;

pagturayenna ida a kas kadagiti ari,

ket bay-anna a madaydayawda iti agnanayon.

8 Ngem no mabalud ti maysa a tao

ket agsagaba gapu iti inaramidna,

9 ipakaammo ti Dios no ania dagiti labsingna

ken ti kinapalangguadna.

10 Ballaaganna ida, inna ida palagipan;

ibilinna a panawanda ti dakes a dalan.

11 No agtulnogda iti Dios ket agserbida kenkuana,

naragsak ken narang-ay ti panagbiagda.

12 Ngem no dida ikankano ti Dios,

mataydanto iti kampilan,

ket pumusayda nga awan ti ammoda.

13 Agtalinaed latta ti pungtot dagiti awan Diosna,

dida agdawat iti tulong uray no madusada.

14 Uray no agkabannuagda pay laeng, matayda;

napnoan iti bain nga aggibus ti biagda.

15 Ngem isuro ti Dios dagiti tattao babaen iti panagsagaba,

ket aramatenna ti rigat a panglukat kadagiti matada.

16 Inaonnaka ti Dios iti pakarigatam,

ket intedna ti natalged a panagbiagmo;

naglaplapusanan iti makan ti lamisaanmo.

17 Ngem sika, madusdusaka a kas iti kaikariam.

18 Agannadka tapno dika maallilaw iti pasuksok;

agannadka amangan no yaw-awannaka ti kinabaknang.

19 Awan imbag nga ited ti panagpaarayatmo;

dinaka matulonganen ti amin a pigsam.

20 Dimo tarigagayan a dumteng ti rabii,

ti tiempo a maisina dagiti tattao iti lugarda.

21 Kitaem ta dika agaramid iti saan a nasayaat;

nagsagabaka tapno agbalinka a naimbag.

22 Laglagipem ti dakkel a pannakabalin ti Dios;

isu ti katan-okan kadagiti amin a maestro.

23 Awan ti makaibaga kenkuana iti aramidenna

wenno mangpabasol a dakes ti inaramidna.

24 Kanayon a maidaydayaw

gapu iti aramidna;

masapul met ngarud nga idaydayawmo.

25 Nakita ti amin a tao dagiti gapuananna,

ngem ditay maawatan dagiti aramidna.

26 Saan a naan-anay nga ammotayo ti kinatan-okna;

saantay met a mabilang ti kaadu ti tawenna.

27 Ti Dios ti mangala iti danum ditoy daga,

ket pagbalinenna a tudo

28 a maibukbok para iti sangkataoan.

29 Awan ti makaammo no kasano nga aggunay dagiti ulep

wenno agbettak ti gurruod

sadi langit a balay ti Dios.

30 Pagkimatenna ti entero a langit,

ngem nasipnget latta ti lansad ti baybay.

31 Kastoy ti panangpakannakadagiti tattao

ken pannangtedna iti nawadwad a taraonda.

32 Gammatanna ti kimat ket bilinenna

a sal-itenna ti kayatna a puntaan.

33 Ipakaammo ti gurruod ti umay a bagio;

ipakdaar met dagiti arban ti isusungadna.

1 Gapu iti bagio, agtibbayoak ket uray la lumagto toy puso.

2 Dumngegkay amin iti timek ti Dios,

ken iti gurruod nga aggapu iti ngiwatna.

3 Ibulosna ti kimat iti tangatang

ket sal-itenna dagiti pungto ti daga.

4 Kalpasanna, mangngeg ti ungor ti timekna,

ti nadayag a dulluog ti gurruod

bayat ti panagsiwet ti kimat.

5 Agbilin ti Dios, ket maaramid dagiti nakaskasdaaw a banag;

wen, dagiti datdatlag a ditay maawatan.

6 Pagtinnagenna ti niebe ditoy daga,

kasta met ti bumayakabak a tudo.

7 Pagsardengenna ti trabaho dagiti tattao;

ipakitana kadakuada no ania ti maaramidna.

8 Sumrek dagiti atap nga ayup kadagiti rukibda.

9 Aggapu ti bagio iti abagatan

ken ti kasta unay a lam-ek iti amianan.

10 Babaen iti anges ti Dios,

agbalay dagiti danum ket agbalinda a yelo.

11 Aggilap ti kimat kadagiti ulep.

12 Agrikosrikosda iti tangatang,

ket tungpalenda ti pagayatan ti Dios.

Aramidenda amin nga ibilin ti Dios

iti sadinoman a paset ti lubong.

13 Pagtinnagen ti Dios ti tudo a mangpadanum iti daga;

mabalin a pangdusana kadagiti tattao,

wenno pangipakitana iti kaasina kadakuada.

14 Job, agtalnaka bassit ket dumngegka;

utobem dagiti nakaskasdaaw nga aramid ti Dios.

15 Ammom aya no kasano ti panangbilin ti Dios,

ket pagkimatenna dagiti ulep?

16 Ammom aya no kasano nga aglayag dagiti ulep iti tangatang?

Gappuanan daytoy ti nakaskasdaaw a laing ti Dios!

17 Saanmo nga ammo dayta!

Mariknam laeng ti pudot ket agsagabaka

no dumteng ti angin-abagatan a manglanet iti daga.

18 Matulongam kadi ti Dios a mangyukrad iti langit

ken mangpatangken a kas iti napasileng a metal?

19 Isuronakam iti sawenmi iti Dios,

ta nakullaapan ti panunotmi.

20 Diak dawaten iti Dios a pagsawennak.

Apay nga ikkak ti gundawayna a mangdadael kaniak?

21 Ket ita, makapurar ti lawag iti tangatang,

naraniag unay a kitaen;

ket dinalusan ti angin ti langit.

22 Adda makita a nabalitokan nga anaraar iti amianan,

ket lapunosennatayo iti buteng ti dayag ti Dios.

23 Naindaklan unay ti pannakabalin ti Dios

ket ditay makaasideg kenkuana.

Nalinteg ken awan idumdumana iti pannakilangenna.

24 Saan ngarud a pagsiddaawan

nga agbuteng kenkuana ti amin a tao,

ket dina ikankano dagiti mangipagarup a masiribda.

Sumungbat ni Yahweh

Idi madama ti bagio, nagsao ni Yahweh ken ni Job:

1-2 Siasinoka nga agduadua iti siribko?

Ipakpakitam laeng ti kinanengnengmo.

3 Tumakderka ita a kas maysa a lalaki,

ket sungbatam dagiti saludsodko.

4 Addaka kadin idi aramidek ti lubong?

Ala, agsaoka man no adda ammom.

5 Siasino ti nangikeddeng iti kadakkelna?

Siasino ti nangrukod iti kaakabana?

Awan duadua nga ammom!

6 Ania ti nakaikapetan

dagiti adigi a nagbatayan ti daga?

Siasino ti nangisaad

iti pasuli ti lubong?

7 Itiparbangon dayta nga aldaw,

sangsangkamaysa a nagkanta dagiti bituen

ket nagdir-i iti rag-o dagiti nailangitan a parsua.

8 Siasinoti nangirikep kadagiti ruangan

tapno matengngel ti baybay

idi nagpussuak iti uneg ti daga?

9 Siak ti nangabbong iti taaw kadagiti ulep,

ket kinumotak iti kinasipnget.

10 Insaadkoti beddeng ti baybay,

ket binalunetak dagiti ruanganna.

11 Kinunak iti baybay,

“Aginggaka laeng ditoy a beddeng;

agpatingga ditoy dagiti dadakkel a dalluyonmo.”

12 Job, bayat ti panagbiagmo

adda kadin aldaw a pinagbannawagmo?

13 Nabilinmo kadin ti bannawag tapno gammatanna ti daga

ken gunggonenna dagiti managdakdakes nga iruar kadagiti paglemlemmenganda?

14 Ipannayag ti raniag ti init

dagiti turod ken tanap

a kas iti nabatad a kupin ti pagan-anay.

15 Naraniag unay ti lawag ti aldaw,

ket lapdanna nga agranggas

dagiti managdakdakes.

16 Nakapanka kadin kadagiti ubbog iti uneg ti baybay?

Nagnaka kadin iti lansad ti taaw?

17 Naipakitan aya kenka dagiti ruangan

a mangbantay iti nasipnget a lubong dagiti natay?

18 Ammom kadi ti kadakkel ti lubong?

Sungbatannak man no ammom.

19 Ammom kadi ti paggapuan ti lawag,

wenno ti pagtaudan ti sipnget?

20 Maipakitam kadi kadakuada

ti kaadayo ti papananda?

Mapasublim kadi ida?

21 Ammok a maaramidmo ti kasta ta lakayka unayen,

ket addakan idi maparsua ti lubong!

22 Nastrekmo kadin ti pagiduldulinak

kadagiti niebe ken yelo?

23 Isagsaganak ida iti panawen ti didigra,

kadagiti aldaw ti dangadang ken gubat.

24 Nakapanka kadin iti leleggakan ti init,

wenno iti paggapuan ti angin iti daya?

25 Siasino ti nagkali iti pagayusan ti bumayakabak a tudo?

Siasino ti nangwaknit

iti pagnaan ti gurruod ken kimat?

26 Siasino ti mangted iti tudo

iti lugar nga awan matagtagitao?

27 Siasino ti mangpadanum iti namaga ken natikag a daga

tapno agtubo dagiti ruot?

28 Adda aya ama ti tudo wenno ti linnaaw?

29 Siasino ti ina ti yelo ken uraro,

30 a namagbalay iti danum,

ket timmangken ti rabaw ti baybay?

31 Kabaelamkadi a reppeten

ti bunggoy dagiti Pleiades,

wenno warawaren dagiti galut ti Orion?

32 Maiturongmo aya dagiti bituen iti tunggal panawen?

Maidalanmo aya dagiti bituen a managan iti Dakkel ken iti Bassit nga Oso?

33 Ammom kadi dagiti alagaden a mangituray kadagiti langit?

Maipakatmo kadi dagitoy iti daga?

34 Kabaelam kadi a bilinen dagiti ulep

tapno rusependaka iti tudo?

35 No bilinem nga aggilap ti kimat,

umay kadi kenka ket kunana,

“Madadaanak, apo, nga agserbi kenka”?

36 Siasino ti pakaammoan ti billit nga ibis

nga aglayus ti Karayan Nile?

Siasino ti pakaammoan ti kawitan a dumteng ti tudo?

37 Siasino ti masirib a makabilang kadagiti ulep

ken bangkingenda tapno agbayakabak?

38 Ket agtutukel ti tapok a basaen ti tudo.

39 Yanupam aya dagiti leon iti taraonda?

Mabussogmo kadi dagiti mabisin nga urbonda,

40 no aglemlemmengda iti rukibda

wenno agur-urayda nga agsaneb iti aponda?

41 Siasino ti mangpakan kadagiti wak

no mabisin ken agkalkallautangda?

Siasino ti mangpakan kadagiti urbonda,

no umasugda kaniak gapu iti kaawan kanenda?

1 Ammom kadi no kaano a nayanak

dagiti atap a kalding ti bantay?

Naimatangam kadin ti panagpasngay ti ugsa?

2 Ammom kadi no mano a bulan ti panagsikogda

wenno ania nga aldaw ti panaganakda?

3 Ammom kadi no kaano ti panagrukobda

tapno agpasngayda?

4 Dumakkel dagiti urbonda iti kabakiran;

pumanawda ket dida agsubsublin.

5 Siasino ti nangted iti wayawaya dagiti atap nga asno?

Siasino ti nangibulos kadakuada tapno agturongda iti kaykayatda a papanan?

6 Intedko ti let-ang a pagtaenganda,

ket pinagnaedko ida iti naapgad a daga.

7 Adaywanda dagiti naarimbangaw a siudad,

ket awan ti makapaamo kadakuada tapno pagtrabahoenda ida.

8 Sursorenda dagiti bambantay a kas pastoda

ket agbirokda iti naraber a ruot nga arabenda.

9 Mapagtrabahom kadi ti atap a nuang?

Kayatna aya ti maturog iti koralmo iti rabii?

10 Mataliam aya tapno pagaradoem

wenno pagsagadem iti talonmo?

11 Makapagpannurayka kadi iti dakkel a pigsana?

Namnamaem kadi nga aramidenna ti trabahom?

12 Manamnamam kadi nga isangpetna ti apitmo,

ket ummongenna ti nairikmo?

13 Napardas ti panagpayakpak ti abestrus!

Ngem awan ti abestrus a makatayab a kas iti kannaway!

14 Panawan ti abestrus dagiti itlogna iti daga,

ket bay-anna ti pudot ti daga a mangpessa kadakuada.

15 Dina pampanunoten

no mabaddekan dagiti itlogna

wenno pis-iten dagiti atap nga animal.

16 Kasla saan a nagtaud dagiti itlog kenkuana;

kasla awan aniaman ti nagbannoganna.

17 Siak ti namagbalin kenkuana a maag,

ket saanko nga inikkan iti sirib.

18 Ngem no rugianna ti agtaray,

atiwenna ti kabalio ken ti nagsakay.

19 Sika aya, Job, ti namagbalin kadagiti kabalio a nakapigpigsa?

Sika aya ti nangted iti agal-allon a pargayen iti tengngedda?

20 Palagtoem kadi ida a kas kadagiti dudon?

Agbuteng dagiti tattao iti panagbang-esda.

21 Sigagagarda a mangkurob iti daga iti tanap;

kasta unay ti pardasda a mapan iti paggugubatan.

22 Dida ammo ti agbuteng, dida madanagan

ket dida itarayan ti kampilan.

23 Kumalangiking ken aggilapgilap

ti igam dagiti nagsakay kadakuada.

24 Gapu iti nalaus a gagarda,

agtarayda a dagus no mapuyot ti trumpeta.

25 Agbang-esda tunggal aguni ti trumpeta;

adayoda pay ngem maangotda ti gubat.

Mangngegda ti arimbangaw;

agbilin dagiti ofisiales ket matimudda dagiti pukkaw.

26 Sika aya ti pagsursuroan ti kali iti panagtayabna,

no yukradna dagiti payakna nga agpa-abagatan?

27 Agpannuray aya ti agila iti bilinmo

tapno agaramid iti umokna iti nangato a bantay?

28 Agtaeng kadagiti kangatoan a rangkis,

ket pagbalinenna a sarikedkedna

dagiti nangato a pantok.

29 Manipud sadiay, agsiput iti alun-onenna,

adayo pay laeng ngem makitana.

30 Aguummongdagiti buitre iti ayan dagiti bangkay,

ket inumen dagiti urbonda ti dara dagiti natay.

1-2 Job, kinaritmo ti Dios a Mannakabalin-amin;

sumukoka kadin wenno makisuppiatka pay laeng?

3-4 Minamaag ti panagsaok, OApo.

Ania pay ti maisungbatko kenka?

Awanen ti masaok.

5 Ad-adun ti naisaok ngem ti rebbengko.

6 Idi madama ti bagio, nagsao manen ni Yahweh ken ni Job.

7 Tumakderka ita a kas maysa a lalaki,

ket sungbatam dagiti saludsodko.

8 Kayatmo kadi a paneknekan a nakilloak?

Pagparangem kadi a nagbiddutak,

ket pagbalinem ti bagim a nalinteg?

9 Napigsaka kadi a kas kaniak?

Gumluong kadi ti timekmo a kas iti timekko?

10 No maaramidmo dagitoy, tumakderka ngarud a sidadayaw ken sidadaeg.

Agkaweska iti kinatan-ok ken iti kinadayag.

11 Kitaem dagiti natangsit;

idissuormo ti pungtotmo, ket ibabainmo ida.

12 Wen, kitaem dagiti napalangguad

ket pagpakumbabaem ida.

Dadaelem dagiti managdakdakes iti pagtaktakderanda.

13 Ikalim amin ida iti daga;

ibaludmo ida iti lubong dagiti natay.

14 Iti kasta, siakto ti umuna a mangdayaw kenka

ken mangannugot a nagballigika.

15 Kitaem ti Behemot;

pinarsuakayo a dua.

Mangan iti ruot a kas iti baka,

16 ngem anian a pigsana,

anian a bileg dagiti piskelna!

17 Tumakder a kas sedro ti ipusna;

napigsa ti piskel dagiti gurongna.

18 Kasla bronse ti kapigsa dagiti tulangna;

limmandok dagiti sakana.

19 Isu ti kangrunaan kadagiti aramid ti Dios.

Ti laeng Namarsua ti makaparmek kenkuana.

20 Agarab kadagiti ruot nga agtubo kadagiti bantay

a pagay-ayaman dagiti atap nga ayup.

21 Agidda iti sirok dagiti kayo a sisiitan,

ket aglemmeng kadagiti runo iti kadanuman.

22 Dagiti kayo a siitan

ken karawaweiti igid ti waig

ipaayda kenkuana ti linongna.

23 Saan nga agbuteng no aglayus ti Jordan.

Natalna latta uray no masabbuagan ti rupana.

24 Siasino ti makabulsek kenkuana tapno matiliwna?

Siasino ti makataldeng kenkuana?