Category: Jonas

Itarayan ni Jonas ni Yahweh

1 Itimaysa nga aldaw, nagsao ni Yahweh ken ni Jonas nga anak ni Amittai.

2 Kinunana, “Inka idiay Nineve, ket ballaagam dayta agdindinamag a siudad, ta naipadamag kaniak ti kinadakes dagiti tattao.”

3 Ngem nagrubbuat ketdi ni Jonas ket sabali ti tinurongna tapno itarayanna ni Yahweh. Napan idiay Joppe ket nakasarak iti barko nga agturong idiay Tarsis.Kalpasan ti panagbayadna iti pletena, limmugan a kaduana dagiti tripulante tapno mapan sadiay, ket iti kasta, maadaywanna ni Yahweh.

4 Ngem imbulos ni Yahweh ti napigsa nga angin iti taaw. Napigsa ti bagio ket kasla marba ti barko.

5 Nagbuteng dagiti tripulante ket immawag ti tunggal maysa iti diosna. Tapno lumag-an ti barko, intappuakda dagiti karga.Ngem adda ni Jonas iti akimbaba a kadsaaran ti barko iti maysa a suli, ket nargaan ti turogna.

6 Sadiay ti nakasarakan kenkuana ti kapitan ti barko. “Apay a matmaturogka?” kinuna ti kapitan. “Bumangonka ketdi ket agpatulongka iti diosmo bareng no kaasiannatayo ket saantayo a matay.”

7 Iti kasta, kinuna dagiti tripulante iti tunggal maysa, “Agbibinnunottayo tapno maammoantayo no siasino ti mapabasol iti daytoy didigra a dimteng kadatayo.” Nagbibinnunotda ket rimmuar ti nagan ni Jonas.

8 Kinunada kenkuana, “Ita, ibagam kadakami no siasino ti mapabasol iti daytoy! Ania ti ar-aramidem ditoy? Taga-anoka? Ania ti ilim ken ania a tribu ti nagtaudam?”

9 Kinuna ni Jonas, “Maysaak a Hebreo. Agdaydayawak itiApoa Dios ti langit a namarsua iti taaw ken iti daga.”

10 Imbaga ni Jonas kadakuada nga itartarayanna ni Yahweh.

Idi naammoanda daytoy, nagbuteng dagiti tripulante ket kinunada, “Nakabutbuteng daytoy nga inaramidmo!”

11 Idi dumawel latta ti taaw bayat ti panaglabas ti oras, kinuna dagiti tripulante ken ni Jonas, “Ania ti aramidenmi kenka tapno sumardeng ti bagio?”

12 “Itappuakdak tapno agkalma,” insungbat ni Jonas. “Ammok a siak ti nakaigapuan ti idadateng kadakayo daytoy nadawel a bagio.”

13 Nupay kasta, kayat dagiti tripulante nga ipaigid ti barko. Inkabilda ti amin a kabaelanda nga aggaud ngem awan ti maaramidda ta pumigpigsa ti angin.

14 Isut’ gapuna nga immasugda ken ni Yahweh, “OApo, dawatenmi kenka a dinakami patayen a kas dusami gapu ta patayenmi daytoy a tao! Sika, OApo, ti makaammo iti daytoy. Sika ti akin-aramid.”

15 Kalpasanna, binagkatda ni Jonas sada intappuak iti taaw. Nagkalma a dagus ti bagio.

16 Kasta unay ti panagbuteng dagiti tripulante ken ni Yahweh ket nagidatagda iti daton ken nagkarida nga agserbi kenkuana.

17 Binilinni Yahweh ti maysa a dakkel nga ikan a mangalun-on ken ni Jonas. Tallo nga aldaw ken tallo a rabii nga adda ni Jonas iti tian ti ikan.

Ti Kararag ni Jonas

1 Kalpasanna, iti uneg ti tian ti ikan, nagkararag ni Jonas ken ni Yahweh a Diosna:

2 “Iti rigatko, OApo, immawagak kenka,

ket impangagnak.

Immasugak manipud iti tukot ti lubong dagiti natay,

ket nangngegmo ti timekko.

3 Intappuaknak ngamin iti kaadalman,

wen, iti lansad ti taaw.

Nalawlawak iti danum,

ket sinabbuagandak dadakkel a dalluyonmo.

4 Impagarupko a napagtalawak iti imatangmo,

ket diakton makita ti nasantoan a Templom.

5 Linikmutnak ti danum ket maangsanakon;

namimpinsan a linapunosnak ti taaw,

ket nakumotan ti ulok iti ruot.

6 Naipanak iti mismo a puon dagiti bantay,

iti daga a ti ruanganna naibalunet iti agnanayon.

Ngem iti daytoy a yuyeng, inaonmo ti biagko,

OApoa Diosko!

7 “Idi mariknak a matayakon,

nagkararagak kenka, OApo,

ket manipud iti nasantoan a Templom

nangngegmo ti asugko.

8 Tinallikudandaka dagiti agdaydayaw

kadagiti awan serserbina a didiosen.

9 Ngem siak, agkantaakto iti pagdaydayaw kenka;

mangidatagakto kenka iti daton,

ket tungpalekto ti karik kenka.

Aggapu itiApoti pannakaisalakan!”

10 Kalpasanna, binilin ni Yahweh ti ikan, ket impugsona ni Jonas iti kadaratan iti igid ti baybay.

Agtungpal ni Jonas iti Bilin ni Yahweh

1 Nagsao manen ni Yahweh ken ni Jonas.

2 Kinunana, “Inka iti dayta agdindinamag a siudad ti Nineve, ket ipakaammom kadagiti tattao ti insaok kenka.”

3 Nagtungpal a dagus ni Jonas ket napan idiay Nineve. Nalawa daytoy a siudad. Tallo nga aldaw a sursoren ti masakupanna.

4 Rinugianni Jonas a sinursor ti siudad. Kalpasan ti agmalmalem a pannagnana, impakdaarna: “Uppat a pulo nga aldaw manipud ita, madadaelto ti Nineve!”

5 Namati dagiti taga-Nineve iti mensahe ti Dios. Ngarud, inkeddengda a masapul nga agayunar ti tunggal maysa ket nagkawes dagiti amin a tao iti nakersang a lupot, natan-ok man wenno nanumo, a mangipakita iti panagbabawida.

6 Idi madamag daytoy ti ari ti Nineve, timmakder iti tronona sana inuksob ti pagan-anayna. Nagkawes met iti nakersang a lupot ket nagtugaw iti nabunton a dapu.

7 Kalpasanna, impakaammona kadagiti tattao ti Nineve, “Daytoy ti bilin ti ari ken dagiti ofisialesna: Awan ti mangan iti uray ania. Maiparit a mangan wenno uminum ti amin a tao, animal ken karnero.

8 Masapul nga agkawes amin a tattao ken animal iti nakersang a lupot. Masapul nga agkararag ti tunggal maysa iti Dios. Nasken a laksiden ti tunggal maysa ti dakes a kababalin ken kinaranggasna.

9 Nalabit a baliwan ti Dios ti panunotna, ket saanen nga agpungtot tapno ditay matay!”

10 Nakita ti Dios ti inaramidda. Nakitana ti panangtallikudda kadagiti dakes nga ugalida. Isut’ gapuna a nagbaliw ti panunotna ket dina dinusa ida a kas iti imbagana.

Ti Pungtot ni Jonas ken ti Asi ti Dios

1 Saan a naragsakan ni Jonas iti daytoy, ket simged ti pungtotna.

2 Inkararagnaken ni Yahweh: “Daytoy ti kinabutengko, OApo, idi addaak iti bukodko a pagilian. Daytoy ti kinabutengko nga aramidem, isut’ gapuna a dinardarasko ti nagkamang idiay Tarsis. Ammok a managparabur ken manangngaasika a Dios. Ammok a naanuska iti amin a tiempo ken sidadaanka a mangibabawi iti panangdusam.

3 Ita,OApo, alaem ti biagko, naim-imbag laengen a matayak ngem ti sibibiagak.”

4 “Rumbeng kadi nga agpungtotka?” insungbat ni Yahweh.

5 Rimmuar ni Jonas idiay Nineve ket napan iti dayaen ti siudad. Nangaramid iti paglinonganna sadiay ket nagtugaw a manguray iti mapasamak iti siudad.

6 Pinagtubo ni Yahweh a Dios ti maysa a mula nga agpaay a linong ni Jonas tapno saan a mainitan. Kasta unay ti pannakaay-ayo ni Jonas iti mula.

7 Ngem iti agsapa ti sumuno nga aldaw, adda igges a nangkibkib iti mula ket natay. Aramid ti Dios daytoy.

8 Idi sumingising ti init, nangibaon ti Dios iti napudot nga angin a naggapu iti daya, ket uray la natalimudaw ni Jonas gapu iti makasinit a pudot ti init. Indawatna manen ti pannakatayna. “Naim-imbag la koman a matayakon!” kinunana.

9 Ngem kinuna ti Dios kenkuana, “Tumutop kadi nga agpungtotka gapu iti napasamak iti mula?”

Insungbat ni Jonas, “Wen, rumbeng nga agpungtotak. Saan a maep-ep ti pungtotko ket uray isun ti pakatayak.”

10 Kinuna tiApo: “Maasianka iti daytoy a mula? Nagtubo iti maysa a rabii sa met la napukaw iti sumuno a rabii. Awan ti nagbannogam iti daytoy ket saan a sika ti nangpadakkel ngem maasianka!

11 Saan kadi a rumbeng a maasianak met iti Nineve, daytoy agdindinamag a siudad nga addaan iti nasursurok a 120,000 a tattao a dida ammo ti naimbag ken dakes, agraman pay dagiti nakaad-adu nga animal?”