Category: Josue

Dagiti Siudad a Naited kadagiti Levita

1-2 Idiaddada idiay Silo, iti daga ti Canaan, napan dagiti pangulo dagiti familia dagiti Levita ken ni Eleazar a padi, ni Josue nga anak ni Nun ken kadagiti pangulo ti tunggal familia ti amin a tribu ti Israel. Kinunada kadakuada, “Imbilin tiApoken ni Moises a maikkankami kadagiti siudad a pagnaedanmi agraman dagiti kabangibangda a daga a pagipastoranmi kadagiti animalmi.”

3 Ngarud, kas imbilin tiApo, inted dagiti Israelita kadagiti Levita dagitoy a siudad ken pagpastoran nga adda kadagiti sakupda.

4 Dagiti familia iti kaputotan ni Coat ti immuna a naikkan kadagiti siudad. Sangapulo ket tallo a siudad ti naited a tagikuaen dagiti Levita a nagtaud iti kaputotan ni Aaron a padi. Naggapu dagiti siudadda kadagiti sakup ti Juda, Simeon ken Benjamin.

5 Naikkan dagiti dadduma a familia iti kaputotan ni Coat iti sangapulo a siudad manipud kadagiti sakup ti Efraim, Dan ken kagudua ti Manases.

6 Sangapulo ket tallo a siudad ti naited a tagikuaen dagiti familia iti kaputotan ni Gerson. Nagtaud dagitoy iti sakup ti Issacar, Aser, Neftali ken akindaya a tribu ti Manases.

7 Sangapulo ket dua a siudad ti naited a tagikuaen dagiti familia iti kaputotan ni Merari. Nagtaud dagitoy a siudad iti sakup ti Ruben, Gad ken Zabulon.

8 Kas imbilin ni Yahweh ken ni Moises, inted dagiti Israelita kadagiti Levita dagitoy a siudad ken pagpaaraban babaen iti binnunot.

9 Dagitoy dagiti siudad iti sakup ti Juda ken Simeon a naituding

10 kadagiti kaputotan ni Aaron a nagtaud kadagiti familia iti kaputotan ni Coat a kamkameng dagiti Levita. Isuda ti immuna a naikkan.

11 Naited kadakuada ti siudad ti Arba (ni Arba ti ama ni Anak), nga isu itan ti Hebron, iti katurturodan ti Juda agraman dagiti pagpastoran iti lawlawna.

12 Nupay kasta, naited ken ni Caleb nga anak ni Jefone dagiti taltalon ti siudad agraman dagiti barriona.

13 Malaksid iti Hebron (maysa kadagiti siudad a pagkamangan), naited kadagiti kaputotan ni Aaron a padi dagiti sumaganad a siudad: Libna,

14 Jattir, Estemoa,

15 Holon, Debir,

16 Ain, Jutta ken Betsemes, agraman dagiti pagpastoranda—siam a siudad iti sakup dagiti dua a tribu.

17 Iti sakup ti Benjamin, naited kadakuada ti Gabaon, Geba,

18 Anatot ken Almon agraman dagiti pagpastoranda—uppat a siudad.

19 Sangapulo ket tallo a siudad amin agraman dagiti pagpastoranda ti naited a tagikuaen dagiti papadi a kaputotan ni Aaron.

20 Iti sakup ti Efraim, sumagmamano a siudad ti naited a tagikuaen dagiti dadduma a familia ti kaputotan ni Coat a kamkameng dagiti Levita.

21 Naited kadakuada ti Sikem agraman ti pagpastoranna iti katurturodan ti Efraim (maysa a siudad a pagkamangan), Gezer,

22 Kibsaim ken Bet-horon agraman ti pagpastoranna—uppat a siudad.

23 Iti sakup ti Dan, naited kadakuada ti Elteke, Gibbeton,

24 Aijalon ken Gatrimmon agraman dagiti paspastoranda—uppat a siudad.

25 Iti sakup ti Manases, naited kadakuada ti Taanac ken Gatrimmon agraman dagiti pagpastoranda—dua a siudad.

26 Sangapulo a siudad amin agraman dagiti pagpastoranda ti inawat dagitoy a familia iti kaputotan ni Coat.

27 Naited iti sabali a grupo dagiti Levita, ti familia ni Gerson, ti dua a siudad iti Akindaya a Manases: Golan, idiay Basan (maysa kadagiti siudad a pagkamangan) ken Borsa agraman dagiti pagpastoranda.

28 Iti sakup ti Issacar, naited kadakuada ti Kision, Daberat,

29 Jaramut ken Engannim agraman dagiti pagpastoranda—uppat a siudad.

30 Iti sakup ti Aser, naited kadakuada ti Miseal, Abdon,

31 Helcat, ken Rehob agraman dagiti pagpastoranda—uppat a siudad.

32 Iti sakup ti Neftali, naited kadakuada ti Kedes idiay Galilea agraman ti pagpastoranda (maysa kadagiti siudad a pagkamangan), Hammotdor ken Cartan agraman dagiti pagpastoranda—tallo a siudad.

33 Sangapulo ket tallo amin a siudad agraman dagiti pagpastoranda ti naited kadagiti nadumaduma a familia ti kaputotan ni Gerson.

34 Iti sakup ti Zabulon, inawat dagiti dadduma a Levita, ti kapuonan ni Merari, dagiti siudad ti Jocneam, Carta,

35 Dimna ken Naalal agraman dagiti pagpastoranda—uppat a siudad.

36 Manipud iti sakup ti Ruben, uppat a siudad ti inawatda: Beser, Jahaz,

37 Kedemot, ken Mefaat agraman dagiti pagpastoranda.

38 Iti sakup ti Gad, naited kadakuada ti Ramot idiay Galaad agraman dagiti pagpastoranna (maysa kadagiti siudad a pagkamangan), Mahanaim,

39 Hesbon ken Jazer agraman dagiti pagpastoranda—uppat a siudad.

40 Sangapulo ket dua a siudad ti naited kadagiti dadduma a Levita, ti kaputotan ti Merari.

41 Iti daga dagiti Israelita, 48 a siudad amin agraman dagiti pagpastoranda ti naited kadagiti Levita.

42 Adda pagpastoran iti aglikmut ti tunggal siudad.

Sakupen ti Israel ti Daga

43 Iti kasta, inted ni Yahweh kadagiti Israelita ti amin a daga nga insapatana nga ited kadagiti kaputotanda. Kalpasan ti panangsakupda iti daga, impasdekda sadiay ti taengda.

44 Ket kas inkari ni Yahweh kadagiti kapuonanda, inyegna kadakuada ti kappia iti aglawlaw. Awan ti uray maysa kadagiti kabusorda ti makabael a sumango kadakuada, ta pinagballigi ni Yahweh dagiti Israelita kadagiti amin a kabusorda.

45 Tinungpal ni Yahweh ti amin nga inkarina kadagiti Israelita.

Agawid dagiti Tribu

1 Kalpasanna, inummong ni Josue dagiti tattao kadagiti tribu ti Ruben, Gad ken Akindaya a Manases.

2 Kinunanakadakuada, “Inaramidyo amin nga imbilin ni Moises nga adipen tiApo. Tinungpalyo met amin a bilinko.

3 Agpapan ita, pulos a diyo binaybay-an dagiti padayo nga Israelita. Sipapasnekkayo a nagtungpal kadagiti bilin tiApoa Diosyo.

4 Ita, kas inkarina, inyegna ti kappia kadagiti padayo nga Israelita. Agawidkayo ngarud iti ballasiw ti Jordan, iti daga nga inted kadakayo ni Moises nga adipen tiApo.

5 Ikagumaanyo a tungpalen ti bilin ken ti linteg nga inted kadakayo ni Moises nga adipen tiApo: ayatenyo tiApoa Diosyo, aramidenyo ti pagayatanna, agtungpalkayo kadagiti bilinna, agtalinaedkayo a napudno kenkuana ken agserbikayo kenkuana iti amin a puso ken kararuayo.”

6-8 Pinagawid ni Josue ida kalpasan ti panangbendisionna kadakuada a kunana: “Nabaknangkayo nga agawid. Adu ti animal, pirak, balitok, gambang, landok ken pagan-anayyo. Ibingayanyo dagiti padayo nga Israelita iti sinamsamyo kadagiti kabusoryo.” Ket nagawid dagiti Israelita.

Ita, ni Moises ti nangted iti daga iti daya ti Jordan iti kagudua ti tribu ti Manases, ngem ni Josue ti nangted iti daga nga adda iti laud ti Jordan iti sabali a kagudua ti tribu ken kadagiti dadduma pay a tribu.

9 Nagawid ngarud dagiti tattao kadagiti tribu ti Ruben, Gad ken ti Akindaya a Manases. Pinanawanda dagiti dadduma nga Israelita idiay Silo iti daga ti Canaan ket napanda idiay Galaad, ti bukodda a daga a tinagikuada idi kas imbilin ni Yahweh ken ni Moises.

Ti Altar iti Igid ti Jordan

10 Idi dumtengda idiay Gelilot a masakupan ti Canaan iti ballasiw ti Jordan, nangipatakderda iti dakkel ken nadaeg nga altar iti igid ti karayan.

11 Naipadamag kadagiti dadduma nga Israelita a nangipasdek dagiti tattao kadagiti tribu ti Ruben, Gad ken ti Akindaya a Manases, iti altar idiay Gelilot, iti masakupan ti Canaan, iti paset a kukuada idiay Jordan.

12 Apaman a nadamag dagiti Israelita daytoy, naguummongda amin idiay Silo tapno mapanda gubaten dagiti tribu ti daya.

13 Naibaon ni Finees nga anak ni Eleazar a padi a mapan kadagiti tattao iti tribu ti Ruben, Gad ken ti Akindaya a Manases idiay Galaad.

14 Sangapulo a tattao ti kimmuyog kenkuana, maysa iti tunggal tribu iti laud, a pangulo iti tunggal familia.

15 Dimtengda idiay Galaad, ket kinunada kadagiti tattao ti Ruben, Gad ken ti Akindaya a Manases:

16 Daytoyti kuna ti entero a gimong tiApo: “Apay nga inaramidyo daytoy a kinadakes a maibusor iti Dios ti Israel? Sinukiryo tiApoiti panangbangonyo iti daytoy nga altar a pagdaydayawanyo! Simminakayon itiApo!

17 Nalipatanyokadin ti basoltay idiay Peor idi nangyeg tiApoiti didigra a pinangdusana kadagiti tattaona? Agsagsagabatayo pay laeng gapu iti daydiay. Saan pay la kadi nga umanay ti nagbasolantayo?

18 Isardengyo kadin ti sumurot itiApo? No agsukirkayo kenkuana ita nga aldaw, agpungtotto kadagiti amin a tattao ti Israel inton bigat.

19 Ita, no ibilangyo a saan a maikari a pagdaydayawan ti dagayo, bumallasiwkayo iti daga tiApoa yan ti toldana a pagdaydayawan. Mangalakayo iti daga a tagikuaenyo iti sakupmi. Ngem dikay agsukir itiApowenno kadakami babaen iti panangaramidyo iti sabali nga altar iti laksid ti altar tiApoa Diostayo.

20 Laglagipenyoni Acan nga anak ni Zera: sinalungasingna ti bilin maipapan kadagiti banag a naikari a madadael, ket nadusa dagiti amin nga Israelita. Saan la a ni Acan ti natay gapu iti basolna.”

21 Insungbat dagiti tattao kadagiti tribu ti Ruben, Gad ken ti Akindaya a Manases kadagiti pangulo dagiti familia ti Israel:

22 “Ti Dios ti Mannakabalin-amin! Isu tiApo! Ti Dios ti Mannakabalin-amin! Isu tiApo! Ammona no apay nga inaramidmi daytoy, ket kayatmi a maammoanyo met! No nagsukirkami, ket tinallikudanmi tiApo, saankayon nga agtaktak a mangpatay kadakami!

23 No nagsukirkam iti Dios gapu iti panangaramidmi iti altar a pagidatonan iti mapuoran a daton wenno daton a makan wenno daton a pakikappia, bay-anyo a tiApoti mangdusa kadakami!

24 Inaramidmi ti kastoy amangan no iti masakbayan, kunanto dagiti kaputotanyo kadagiti annakmi, ‘Ania ti bibiangyo itiApoa Dios ti Israel?

25 Inkabil tiApoa kas beddengtayo ti Jordan, dakayo a tattao ti Ruben ken Gad. Wen, awan ti pakaibianganyo itiApo.’ Iti kasta, paritanto dagiti kaputotanyo dagiti kaputotanmi nga agdaydayaw kenkuana.

26 Nangipatakderkami iti altar, saan a tapno pagpuoran iti daton wenno pagidatonan,

27 no di ket agpaay a pammaneknek iti dua a grupotayo ken kadagiti sumarsaruno a kaputotantayo nga agdaydayawkam itiApobabaen iti panagidatag kadagiti mapuoran a daton, dagiti sakrifisio ken daton iti kappia. Ngarud, dinto makuna dagiti kaputotanyo kadagiti kaputotanmi, ‘Awan ti bibiangyo itiApo.’

28 Napanunotmi a no kastoyto ti mapasamak, ipakitaminto daytoy inaramidmi nga altar a kaasping ti altar tiApo. Saan a pagpuoran iti daton wenno pagsakrifisioan, no di ket baton-lagip dagiti grupotayo.

29 Adayo a panggepmi ti bumusor itiApowenno sumiasi kenkuana iti panangbangonmi iti altar a pagidatagan iti mapuoran a daton wenno daton a makan wenno kadagiti sakrifisio. Dimi panggep ti mangipasdek iti sabali nga altar iti laksid ti altar tiApoa Diostayo nga adda iti sango ti nasagradoan a toldana.”

30 Napnek ni Finees a padi ken dagiti pangulo ti entero nga Israel a kimmuyog kenkuana, isuda a pangulo dagiti familia ti Israel, iti palawag dagiti tattao kadagiti tribu ti Ruben, Gad ken Akindaya a Manases.

31 Kinuna kadakuada ni Finees nga anak ni Eleazar a padi, “Ita makitamin nga adda kadatayo tiApoagsipud ta dikayo met gayam simmukir kenkuana. Insalakanyo dagiti Israelita iti pannusa tiApo.”

32 Manipud Galaad, nagsubli da Finees ken dagiti pangulo dagiti tattao idiay Canaan ket impakaammoda kadagiti Israelita ti napasamak.

33 Napnek dagiti Israelita iti naipadamag kadakuada ket nagdaydayawda iti Dios. Saanda nga intuloy ti panggepda a makigubat tapno dadaelenda ti daga a nangipasdekan dagiti tattao iti tribu ti Ruben ken Gad iti taengda.

34 Kinuna dagiti tattao ti Ruben ken Gad, “Daytoy nga altar ti mangipaneknek kadatay amin a tiApoket Dios.” Pammaneknek ti impanaganda iti altar.

Agsao ni Josue kadagiti Tattao

1 Adun a tawen ti napalabas manipud impaay ni Yahweh ti kappia iti Israel. Saanen a riniribuk dagiti kabusor iti aglikmutda. Lakay unayen ni Josue.

2 Inayabanna dagiti amin nga Israelita, dagiti panglakayen, pangulo, ukom ken ofisiales dagiti tattao, ket kinunana, “Lakayak unayen.

3 Nakitayon ti amin nga inaramid tiApoa Diostayo kadagitoy a pagilian gapu kadakayo. TiApoa Diosyo ti nakigubgubat iti agpaay kadakayo.

4 Intudingko a tagikuaen dagiti tribuyo ti daga dagiti tattao a pinarmekko ken amin a nabati pay a nasion manipud iti Jordan agingga iti Taaw Mediterranean.

5 Pagsanudento ida tiApoa Diosyo, ket mapaksiatdanto bayat ti idadarupyo. Kukuayonto ti dagada, kas inkari kadakayo tiApoa Diosyo.

6 Ngarud, ikagumaanyo a tungpalen ti amin a nailanad iti Linteg ni Moises. Diyo salungasingen ti uray maysa a pasetna.

7 Dikay makilangen kadagiti nabati a tattao iti dennayo wenno baliksen ti nagan dagiti diosda wenno pagsapata ti naganda wenno agserbi kadakuada wenno agdaydayaw kadakuada.

8 Agtalinaedkayo ketdi a napudno itiApoa kas iti inar-aramidyo agpapan ita.

9 Iti imatangyo, pinaksiat tiApoti dadakkel ken nabibileg a pagilian, ket awan pay ti makabael a mangparmek kadakayo.

10 Mabalina pagtarayen ti uray maysa kadakayo ti sangaribu a tattao, gapu ta tiApoa Diosyo ti makirupak iti biangyo a kas inkarina.

11 Isut’ gapuna nga ikagumaanyo nga ayaten tiApoa Diosyo.

12 No sumiasikayo, ket tumiponkayo kadagiti tattao nga adda pay la a nabati iti sidongyo, ken makiasawakayo kadakuada,

13 namnamaenyo a dinton paksiaten tiApoa Diosyo dagitoy a pagilian. Napeggaddanto a kas iti silo wenno palab-og a pakatinnaganyo, ken saplit kadagiti bukotyo wenno siit kadagiti matayo agingga a mapukawkay iti daytoy nasayaat a daga nga inted kadakayo tiApoa Diosyo.

14 “Ita, dandaniakon sumina iti daytoy a biag. Ammoyo iti amin a puso ken kararuayo nga inted tiApoa Diosyo ti amin nga agkakaimbag a banag nga inkarina. Naaramid amin; awan ti saan a natungpal.

15-16 Wen, tinungpal tiApoa Diosyo ti amin a naimbag a banag a kinunana nga aramidenna. Ngem no salungasingenyo ti tulag tiApoa Diosyo nga imbilinna a tungpalenyo, no agserbi ken agdaydayawkayo kadagiti didiosen, dusaennakayto gapu iti pungtotna ket iti saan a mabayag, awanton ti matda kadakay iti daytoy nasayaat a daga nga intedna kadakayo.”

Agpakada ni Josue kadagiti Tattao idiay Sikem

1 Inummong ni Josue dagiti amin a tribu ti Israel idiay Sikem. Inayabanna dagiti panglakayen, dagiti papangulo, dagiti ukom ken dagiti ofisiales ti Israel, ket dimmatagda iti imatang ti Dios.

2 Kinunani Josue kadagiti amin a tattao, “Daytoy ti kuna tiApoa Dios ti Israel: ‘Idi un-unana nga aldaw, nagnaed dagidi kapuonanyo iti ballasiw ti karayan Eufrates ket nagdaydayawda kadagiti didiosen. Maysa kadakuada ni Tera nga ama da Abraham ken Nahor.

3 Innalakni Abraham a kapuonanyo iti ballasiw ti karayan ket impanko iti daga ti Canaan. Inikkak iti adu a kaputotan. Intedko kenkuana ni Isaac.

4 Intedkomet ken ni Isaac da Jacob ken Esau. Intedko ken ni Esau ti katurturodan ti Edom ngem napan ni Jacob ken dagiti annakna idiay Egipto.

5 Itidi mabayag, imbaonko da Moises ken Aaron ket inyegko ti dakkel a riribuk idiay Egipto. Ngem inruarkayo;

6 inruarkodagiti kapuonanyo idiay Egipto ket kinamat ida dagiti Egipcio a nakasakay kadagiti luglugan a pakigubat ken dagiti mannakigubat a nakakabalio. Idi dumtengda iti Nalabaga a Baybay,

7 immasugda kaniak ket nangikabilak iti sipnget iti nagbabaetanda kadagiti Egipcio. Imbuangko ti danum ti baybay a pinanglemmes kadagiti Egipcio. Ammoyo ti inaramidko iti Egipto.

“‘Nabayag a nagnaedkay iti let-ang.

8 Kalpasanna,impankay iti daga dagiti Amorreo a nagnaed iti daya ti Jordan. Ginubatdakayo, ngem pinagballigikayo. Sinakupyo ti dagada, ket dinadaelko ida bayat ti idadarapyo.

9 Kalpasanna,nagparang ni Balak nga anak ni Sefor nga ari ti Moab, ket ginubatna ti Israel. Pinaibagana ken ni Balaam nga anak ni Beor nga ilunodnakayo.

10 Ngem diak impangag ni Balaam. Binendisionannakayo ketdi ket inispalkayo iti pannakabalin ni Balak.

11 Binallasiwyoti Jordan ket dimtengkayo idiay Jerico. Ginubatdakayo dagiti taga-Jerico kasta met dagiti Amorreo, dagiti Perezeo, dagiti Cananeo, dagiti Heteo, dagiti Gergeseo, dagiti Heveo ken dagiti Jebuseo. Ngem pinagballigikayo.

12 Sakbaya dimtengkayo, nangibaonak kadagiti alimbubuyog a nangdarup kadagiti dua nga ari nga Amorreo ket pinaksiatko ida. Saan a ti kampilan wenno bai ken panayo ti nangparmek kadakuada.

13 Inikkankayoiti daga a diyo nagbannogan ken kadagiti siudad a diyo impasdek. Agnanaedkayo sadiay itan; mangmangankay iti ubas ken iti olibo a diyo immula.’

14 “Ita,” intuloy ni Josue, “agbutengkayo ngarud itiApoket agserbikayo kenkuana a sipupudno ken iti amin a pusoyo. Iwaksiyo dagiti didiosen a nagdaydayawan dagidi kapuonanyo idiay Mesopotamia ken Egipto. Ti laengApoti pagserbianyo.

15 No diyo kayat ti agserbi kenkuana, ikeddengyo itan no siasino ti pagserbianyo: agserbikayo kadagiti didiosen a nagserbian dagidi kapuonanyo idiay Mesopotamia wenno kadagiti didiosen dagiti Amorreo nga akindaga iti pagnanaedanyo iti agdama. Ngem no maipapan kaniak ken ti familiak, agserbikami itiApo.”

16 Simmungbat dagiti tattao, “Adayo a mapanunotmi a panawan tiApotapno agserbikami kadagiti didiosen!

17 TiApoa Diostayo ti nangiruar kadatayo ken kadagidi kapuonantayo a naadipen idiay Egipto, ket nakitatayo dagiti milagro nga inaramidna. Sinalaknibannatay iti sadinoman a napanantayo, kadagiti amin pagilian a nagdaliasatantayo.

18 Idi sumungadtayo iti daytoy a daga, pinaksiat tiApodagiti Amorreo ken dagiti amin a tattao a nagnaed iti daga. Ngarud, agserbikami itiApo, ta isu ti Diostayo.”

19 Kinuna ni Josue kadagiti tattao, “Ngem diyo mabalin ti agserbi itiApota nasantoan a Dios ket dina ipalubos nga adda kasalisalna. Dinanto pakawanen dagiti basol ken salungasingyo.

20 No suminakayo kenkuana ket agserbikayo kadagiti ganggannaet a didiosen, busoren ken dusaennakayto. Pukawennakayto uray no naimbag idi kadakayo.”

21 “Saan! Agserbikami itiApo,” kinuna dagiti tattao.

22 Imbaga ngarud ni Josue kadakuada: “Dakayo met laeng ti mangsaksi iti bagbagiyo a piniliyo ti agserbi itiApo.”

“Wen, dakami ti saksi,” kinunada.

23 Kinuna ni Josue, “Idianyo ngarud dagiti didiosen nga adda kadakayo, ket isapatayo nga agtalinaedkayo a napudno itiApoa Dios ti Israel.”

24 “Agserbikam itiApoa Diostayo, ket tungpalenmi dagiti bilinna,” insungbatda.

25 Iti kasta, iti dayta nga aldaw idiay Sikem, nangaramid ni Josue iti katulagan nga agpaay kadagiti tattao. Inikkanna ida kadagiti paglintegan ken pagannurotan.

26 Insuratna dagitoy a bilin iti libro ti Linteg ti Dios, nangala iti dakkel a bato ket inkabilna sadiay, iti sirok ti kayo a lugo iti asideg ti santuario ni Yahweh.

27 Kinunana kadagiti amin a tattao: “Saksitayo daytoy a bato! Nangngeg daytoy a bato ti amin nga imbaga kadatayo tiApo. Ngarud, daytoyto ti agtestigo kadakayo no agsukirkay iti Diosyo.”

28 Pinagawid ni Josue dagiti tattao, ket nagsubli iti tunggal maysa iti daga a naited kenkuana.

Pumusay da Josue ken Eleazar

29 Kalpasan dagitoy, natay ni Josue nga anak ni Nun, ti adipen ni Yahweh idi 110 ti tawenna.

30 Intabondaiti dagana idiay Timnatsera, iti katurturodan ti Efraim, iti amianan ti Bantay Gaas.

31 Nagserbi dagiti Israelita ken ni Yahweh iti unos ti panagbiag ni Josue. Kalpasan ti ipapatayna, intuloyda ti nagserbi ken ni Yahweh iti unos ti panagbiag dagiti panglakayen a nakakita iti amin nga impaay ni Yahweh iti Israel.

32 Naikalimet idiay Sikem dagiti tultulang ni Jose nga innala idi dagiti Israelita idiay Egipto. Inkalida iti sakup ti daga a ginatang ni Jacob kadagiti annak ni Hamor, ti tatang ni Sikem, iti sangagasut a bagi ti pirak. Tinawid dagiti kaputotan ni Jose ti daga.

33 Natay met ni Eleazar nga anak ni Aaron, ket naitanem idiay Gibea, maysa nga ili iti katurturodan ti Efraim, a naited idi ken ni Finees nga anakna.