Category: Levitico

Dagiti Animal a Mabalin a Makan

1 Inted ni Yahweh kada Moises ken Aaron dagitoy nga alagaden

2 nga agpaay kadagiti Israelita. Mabalinyo a kanen ti aniaman nga animal iti rabaw ti daga

3 a nagpisi ti kukona ken agngatingat.

4-6 Ngem maiparit a sidaenyo ti kamelio, atap a koneho wenno amo a koneho. Maibilang dagitoy nga animal a narugit; agngatingatda ngem saan a nagpisi dagiti kukoda.

7 Dikay agsida iti baboy. Maibilangda a narugit; nagpisi ti kukoda ngem saanda nga agngatingat.

8 Diyo sidaen ti karne dagitoy nga animal wenno sagiden ti bangkayda; maibilangda a narugit.

9 Mabalinyo a sidaen ti amin a kita ti ikan nga adda pigar ken siksikna,

10 ngem maiparit a sidaenyo ti aniaman a sibibiag nga agnaed iti danum nga awan pigar ken siksikna.

11 Maibilang a narugit dagitoy ket diyo sidaen ida wenno sagiden ti bangkayda.

12 Dikay agsida iti aniaman nga agnaed iti danum nga awan pigar ken siksikna.

13-19 No maipapan kadagiti tumatayab, dikay agsida kadagitoy: agila, kullaaw, kali; gikgik, lumabaga a buitre, buitre, wak; abestrus, agila ti taaw, tikbaboy, kannaway, pelikano, kalamon abubilia; wenno panniki.

20 Maibilang a narugit dagiti amin a nagpayak nga insekto

21 malaksid dagiti aglagto.

22 Mabalinyo a sidaen ti dudon, kuriat, wenno paddudon.

23 Ngem maibilang a narugit dagiti amin a babassit nga insekto nga adda payakna ken agkarayam.

24-28 Maibilang a narugit agingga iti sardam ti tao a mangsagid iti bangkay dagiti sumaganad nga animal: amin nga adda kukona malaksid no nagpisi dagiti kuko ken agngatingat, ken amin nga uppat ti sakana nga addaan kadagiti natirad a kuko. Siasinoman a mangawit iti bangkay ti kastoy nga animal masapul a labaanna ti pagan-anayna ngem maibilang pay laeng a narugit ti tao agingga iti sardam.

29-30 Maibilang a narugit dagiti sangyo, marabutit, bao, alutiit.

31 Siasinoman a mangsagid kadakuada wenno kadagiti bangkayda maibilang a narugit agingga iti sumipnget.

32 Narugit ti aniaman a pagdissoan ti bangkayda a kas iti alikamen a kayo, pagan-anay, lalat, nakersang a lupot, uray ania ti pakaaramatanna. Masapul a maitaneb iti danum ngem maibilang a narugit latta agingga iti sumipnget.

33 Ket no matnagda iti banga, narugit amin a nagyanna ket masapul a buongen.

34 Narugit ti aniaman a taraon a matedtedan iti danum a naggapu iti banga, kasta met ti aniaman a mabalin nga inumen a naikarga.

35 Maibilang a narugit ti aniaman a pagdissoan dagiti bangkay; no urno wenno dalikan ti nagdissoanda, burakenyo.

36 Ngem maibilang a nadalus ti ubbog wenno pagurnongan iti danum a pakaisagidan dagiti bangkay uray no maibilang a narugit dagiti sabali a banag a pakaisagidanda.

37 No bin-i a maimula ti pagdissoan ti bangkay, agtalinaed a nadalus dayta a bin-i.

38 Ngem no nayuper ti bin-i ket agdisso ti bangkay iti dayta a bin-i, maibilang a narugit ti bin-i.

39 No matay ti animal a mabalin a sidaen, maibilang a narugit agingga iti rabii ti siasinoman a mangsagid iti bangkayna.

40 Ket ti siasinoman a mangan iti aniaman a paset ti animal, masapul a labaanna ti pagan-anayna ngem maibilang a narugit ti tao agingga iti sardam. Siasinoman a mangawit iti bangkay, masapul a labaanna ti pagan-anayna ngem maibilang a narugit dayta a tao agingga iti sumipnget.

41 Diyo sidaen ti aniaman kadagiti babassit nga animal nga aguyas iti daga,

42 dagiti agkarayam wenno magna nga addaan iti uppat wenno adu a saka.

43 Diyo pagbalinen ti bagiyo a maibilang a narugit babaen iti panagsidayo iti uray ania kadagitoy.

44 Siakni Yahweh a Diosyo; pagtalinaedenyo dagiti bagiyo a nasantoan gapu ta nasantoanak.

45 Siak ni Yahweh a nangiruar kadakayo idiay Egipto tapno agbalinak a Diosyo. Masapul a nasantoankayo agsipud ta nasantoanak.

46 Dagitoy ngarud dagiti linteg nga annuroten maipapan kadagiti animal, tumatayab, ken amin nga adda iti danum, ken amin nga agkarayam iti daga.

47 Masapul a mapaggiddiatyo ti nadalus ken ti saan a nadalus iti imatang ti linteg, dagiti animal a mabalin a sidaen ken dagiti saan a masida.

Ti Seremonia ti Pannakadalus ti Babai Kalpasan ti Panaganakna

1 Inted ni Yahweh ken ni Moises dagitoy nga alagaden

2 nga agpaay kadagiti Israelita. No lalaki ti ipasngay ti maysa nga ina, pito nga aldaw a maibilang a narugit kas iti pannakaibilangna bayat ti panagreglana.

3 Itimaikawalo nga aldaw, masapul a makugit ti ubing.

4 Palabsen pay ti babai ti 33 nga aldaw santo maibilang a nadalusan iti panagruar ti darana. Maiparit a sagidenna ti aniaman a nasantoan ket saan a makastrek iti nasagradoan a Tolda no di maturpos dagiti aldaw a pannakadalusna.

5 No met babai ti ipasngay ti maysa nga ina, maibilang a narugit iti las-ud ti 14 nga aldaw a kas iti pannakaibilangna bayat ti panagreglana. Palabsenna pay ti 66 nga aldaw santo maibilang a nadalusan iti panagruar ti darana.

6 No maturpos dagiti aldaw a pannakadalusna, lalaki man wenno babai ti anakna, masapul a mangidaton iti urbon ti karnero a maysa ti tawenna para iti daton a mapuoran ken maysa a sibong ti kalapati wenno pagaw para iti daton gapu iti basol. Ipanna dagitoy kadagiti papadi iti ruangan ti Tolda ti Dios.

7 Idatag ti padi dagitoy itiApoket aramidenna ti seremonia a mangikkat iti kinarugit; kalpasanna, maibilangton a nadalus. Daytoy ti rumbeng nga aramiden ti babai kalpasan ti panagpasngayna.

8 Nodi kabaelan ti babai ti mangidaton iti urbon a karnero, mangala iti dua a kalapati wenno pagaw; maysa ti daton a mapuoran ket daton gapu iti basol ti maysa. Annongen ti padi ti seremonia a mangikkat iti kinarugit ti babai ket maibilangton a nadalus.

Dagiti Linteg maipapan kadagiti Sakit ti Kudil

1 Inted ni Yahweh kada Moises ken Aaron dagitoy nga alagaden.

2 No adda gaddil ti maysa a tao wenno letteg, wenno busali a mabalin nga agtinnag a kukutel, masapul a maidatag iti padi, ni Aaron wenno maysa kadagiti annakna.

3 Kitaen a naimbag ti padi ti timmubo iti kudil. No pimmuraw ti dutdot iti nagtuboanna ket kasla naun-uneg ti gaddil ngem iti kudil ti lawlawna, makaakar a sakit ti kudil ti timmubo. Iti kasta, ipakaammo ti padi a saan a nadalus daytoy a tao iti imatang ti linteg.

4 Ngem no puraw ti gaddil ket saan a naun-uneg ngem iti kudil iti lawlawna ken saan a pimmuraw dagiti dutdot, isina ti padi ti tao kadagiti dadduma a tattao iti las-ud ti pito nga aldaw.

5 Iti maikapito nga aldaw, kitaen manen ti padi ti saksakiten ket no awan namalbaliwan ken saan a nagwaras, maipaing manen ti tao iti sabali pay a pito nga aldaw.

6 Iti maikapito nga aldaw, kitaen manen ti padi ket no saan a nagwaras ti saksakiten, ipakaammo ti padi a maibilang a nadalus ti tao iti imatang ti linteg; gaddil laeng ti timmubo kenkuana. Labaan ti tao ti pagan-anayna ket maibilangen a nadalus.

7 Ngem no agwaras ti gaddil kalpasan ti panangkita ti padi, masapul a dumatag manen ti tao iti padi.

8 No makita ti padi a nagwaras ti gaddil, ipakaammona a saan a nadalus ti tao iti imatang ti linteg; kukutel ti kimpet kenkuana.

9 Ti siasinoman nga addaan iti kukutel ket maidatag iti padi,

10 a mangeksamen kenkuana. No adda puraw a gaddil iti kudilna a mangpapuraw kadagiti dutdot ken napno iti nana,

11 kukutel daytoy. Ipakaammo ti padi a saan a nadalus ti tao iti imatang ti linteg; saan a masapul a maipaing ta nalawag a narugit iti imatang ti linteg.

12 No nagwarasen ti saksakiten iti entero a bagina, manipud saka agingga iti ulo,

13 agpakita manen iti padi. No makita ti padi a nagwaras ti sakit ti kudil, ipakaammona a nadalus ti tao iti imatang ti linteg. No pimmuraw ti entero a kudilna, nadalus iti imatang ti linteg.

14 Ngem no bumtak ti gaddil, saan a nadalus ti tao iti imatang ti linteg.

15 Kitaen manen ti padi ket no adda makitana a bimtak a gaddil, ipakaammona a saan a nadalus ti tao iti imatang ti linteg. Makaakar a sakit ti kudil ti bimtak a gaddil ket maibilang a narugit ti tao.

16 Ngem no umimbag ti gaddil ket pumuraw manen ti nagtubboanna, mapan ti tao iti padi

17 a mangkita manen kenkuana. No pimmuraw ti gaddil, nadalus ti tao iti imatang ti linteg ket ipakaammo ti padi a nadalusen.

18 No immimbag ti letteg ti maysa a tao

19 ket kalpasanna adda puraw wenno lumabaga-a-pumuraw a paset ti ayan ti letteg, masapul a mapan ti tao iti padi.

20 No makita ti padi a naun-uneg ti timmubo ngem iti kudil iti aglawlawna ken pimmuraw ti dutdot, ipakaammona a saan a nadalus ti tao iti imatang ti linteg. Makaalis a kukutel ti nagtubo a letteg.

21 Ngem no makita ti padi a saan a pimmuraw dagiti dutdot ken saan a naun-uneg ngem iti kudil iti aglawlaw nupay immolandis ti kolorna, ipaingna ti tao iti las-ud ti pito nga aldaw.

22 No agwaras ti letteg, ipakaammo ti padi a saan a nadalus ti tao iti imatang ti linteg; pudno nga adda sakitna.

23 Ngem no saan a mamalbaliw ken saan a nagwaras, piglat laeng a gapuanan ti letteg, ipakaammo ti padi a nadalus ti tao iti imatang ti linteg.

24-25 No maipapan iti tao a nasinit, eksamenen ti padi no lumabaga wenno lumabaga-a-pumuraw ti nasinit a paset. No pimmuraw dagiti dutdot iti nasinit a paset ket naun-uneg ngem ti aglawlaw a kudil, makaalis a sakit ti kudil ti timmubo iti nasinit a paset ket ipakaammo ti padi a narugit ti tao iti imatang ti linteg.

26 Ngem no saan a pimmuraw dagiti dutdot ket saan a naun-uneg ti nasinit ngem ti kudil iti lawlawna ngem immolandis, maipaing ti tao iti las-ud ti pito nga aldaw.

27 Kitaen manen ti padi iti maikapito nga aldaw, ket no agwarwaras, nalawag a makaalis a sakit ti kudil, ket ipakaammo ti padi a narugit ti tao iti imatang ti linteg.

28 Ngem no awan pamalbaliwan ti nasinit ket saan a nagwaras ken immolandis, saan a makaalis ti timmubo. Ipakaammo ti padi a nadalus ti tao iti imatang ti linteg gapu ta piglat laeng ti nasinit.

29 No adda gaddil ti ulo wenno timid ti maysa a tao,

30 masapul nga agpakita iti padi. No naun-uneg ti gaddil ngem iti aglawlaw a kudil ket duyaw ken narasay dagiti buok, makaakar a sakit ti kudil daytoy, ket ipakaammo ti padi a narugit ti tao iti imatang ti linteg.

31 Ngem no masarakan ti padi a saan a naun-uneg ti letteg ngem ti aglawlaw a kudil ket awan pay nagtubo a buok, ipaingna ti tao iti las-ud ti pito nga aldaw.

32 Iti maikapito nga aldaw, sukimatenna manen ti gaddil ket no saan a nagwaras sa awanen dagiti duyaw a buok ken saan a naun-uneg ngem ti aglawlaw a kudil,

33 kuskosan ti tao ti buok iti lawlaw ti gaddil. Ipaing manen ti padi ti tao iti pito nga aldaw.

34 Iti maikapito nga aldaw, kitaen manen ti padi ti gaddil. No saan a nagwaras ken saan a naun-uneg ngem ti kudil iti lawlawna, ipakaammona a nadalus ti tao iti imatang ti linteg. Labaan ti tao ti pagan-anayna ket maibilang a nadalusen.

35 Ngem no agwaras ti gaddil kalpasan ti pannakaipakaammo a nadalus ti tao iti imatang ti linteg,

36 eksamenen manen ti padi. No nagwaras ti gaddil, saan a masapul nga birokenna ti duyaw a buok, ta nalawag a saan a nadalus ti tao.

37 Ngem no, iti kapanunotan ti padi, saan a nagwaras ti gaddil ket agtubtubo ti nasalun-at a dutdot, kaipapananna a naimbagen ti gaddil ket ipakaammo ti padi a nadalus ti tao iti imatang ti linteg.

38 No aglabanglabang ti kudil ti maysa a tao, lalaki man wenno babai,

39 kitaen ti padi dayta a tao. No nalitem a puraw dagiti gaddil, mansa la ti kudil ti timmubo; nadalus ti tao iti imatang ti linteg.

40-41 No agparut ti buok iti sango wenno likud ti ulo, saan a dayta ti mamagbalin iti tao a narugit iti imatang ti linteg.

42 Ngem no agparang ti lumabaga-a-puraw a gaddil iti nakaparutan dagiti buok, makaalis a sakit ti kudil ti timmubo.

43 Eksamenen ti padi ket no adda lumabaga-a-puraw a gaddil,

44 ipakaammona a narugit ti tao iti imatang ti linteg ta adda makaakar a sakit ti kudil iti ulona.

45 No addaan ti maysa a tao iti kukutel, masapul nga agkawes iti pigispigis, bay-anna a wakray ti buokna, abbonganna ti akimbaba a paset ti rupana sana ipukkaw, “Narugitak, narugitak!”

46 Maibilang a narugit no saan nga umimbag ti sakit ti kudil, ket agyan iti ruar ti kampo, iti adayo kadagiti tattao.

Dagiti Linteg maipapan iti Ratik

47 No adda ratikiti pagan-anay, de lana man wenno linen,

48 wenno iti lupot a linen wenno de lana, wenno iti lalat wenno aniaman a naaramid iti lalat,

49 no bumerde wenno lumabaga, agwaras daytoy a ratik, ket masapul a maipakita iti padi.

50 Kitaenna a naimbag daytoy sana ipakni iti las-ud ti pito nga aldaw.

51 Iti maikapito nga aldaw, no makitana a nagwaras ti ratik, maibilang a narugit ti nagratik.

52 Puoran daytoy ti padi agsipud ta agwaras daytoy a ratik a masapul a madadael iti apuy.

53 Ngem no masarakan ti padi a saan a nagwaras ti ratik,

54 ibilinna a malabaan ket ipaknina daytoy iti pito pay nga aldaw.

55 Kalpasanna, sukimatenna manen, ket no saan a nagbalbaliw ti kolorna, uray no saan a nagwaras, maibilang latta a narugit. Masapul a puoran ti nagratik, adda man ti marunrunot a paset iti pammarang wenno iti ballikidna.

56 Ngem no kitaen manen ti padi ket nagusaw ti ratik, ray-abenna ti lupot wenno lalat.

57 Ngem no agparang manen ti ratik, masapul a mapuoranen ti pagan-anay ta agwarwarasen ti ratik.

58 No malabaan ti nagratik ket maikkat ti ratik, masapul a malabaan manen tapno maibilang a nadalus iti imatang ti linteg.

59 Daytoy ngarud ti linteg nga annuroten iti ratik iti pagan-anay a de lana man wenno linen, wenno aniaman a linen wenno de lana a lupot, wenno aniaman a naaramid iti lalat tapno maammoan dagitoy no narugit wenno saan.

Seremonia ti Pannakadalus No Umimbag ti Sakit ti Kudil

1 Inted ni Yahweh ken ni Moises

2 dagitoynga alagaden iti seremonia ti pannakadalus ti tao a naimbagan iti makaakar a sakit ti kudil. Iti aldaw a maipakaammo a nadalus iti imatang ti linteg, masapul a maidatag iti padi,

3 ket ipan ti padi iti ruar ti kampo sana eksamenen. No naimbagen ti sakit,

4 agpaala ti padi iti dua a tumatayab a maibilang a nadalus, agraman kayo a sedro, nalabaga a lupot ken sanga ti hisopo.

5 Kalpasanna, ibilin ti padi a maparti ti maysa a tumatayab iti ngatoen ti maysa a banga a nakargaan iti kasasakdo a danum ti ubbog.

6 Alaenna ti sabali a tumatayab agraman ti kayo a sedro, ti nalabaga a lupot ken ti sanga ti hisopo sana itaneb ida iti dara ti naparti a tumatayab.

7 Mamimpito a warsianna ti tao a madalusan iti sakit ti kudil, ket kalpasanna, ipakaammona a nadalusen ti tao. Ibulosto ti padi ti sibibiag a tumatayab iti kataltalonan.

8 Labaanto ti tao dagiti pagan-anayna, agpakalbo sa agdigos, ket kalpasanna, nadalusen iti imatang ti linteg. Mapalubosanen a sumrek iti kampo ngem agyan iti ruar ti toldana iti las-ud ti pito nga aldaw.

9 Iti maikapito nga aldaw, agpakalbo manen ti ulona, kasta met a kiskisanna ti barbas, ti kiday ken ti amin a dutdot ti bagina. Labaanna dagiti pagan-anayna sa agdigos, ket nadalusen iti imatang ti linteg.

10 Iti maikawalo nga aldaw, mangala iti tallo nga urbon ti karnero—dua kadagitoy ti kalakian nga agtawen iti maysa ken awan depektoda. Mangala pay iti tallo a kilo nga arina a nalaokan iti lana ti olibo, ken maysa a kakatlo ti litro a lana ti olibo.

11 Ipanto ti padi daytoy a tao ken dagiti datonna iti ruangan ti Tolda.

12 Kalpasanna, alaento ti padi ti maysa kadagiti kalakian a karnero agraman ti kakatlo ti litro a lana ket idatagna a kas daton a pagsupapak. Idatagnanto dagitoy a kas naisangsangayan a sagut itiApo.

13 Patayennanto ti karnero iti nasantoan a lugar a pagpatayan kadagiti animal a maidatag a daton gapu iti basol ken daton a mapuoran. Aramidenna daytoy ta ti daton a pagsupapak, kas iti daton gapu iti basol, agpaay iti padi ket nasantoan unay.

14 Mangalanto iti dara ti karnero ket ipulagidna iti kannawan a piditpidit ti tao a madalusan, iti tangan ti kannawan nga ima ken sakana.

15 Mangalanto ti padi iti lana ti olibo ket ibukbokna iti kannigid a dakulapna,

16 sana isawsaw ti kannawan a tammudona iti lana iti dakulapna ket mamimpito nga iwarisna iti sangoanan tiApo.

17 Mangalanto iti lana nga adda iti dakulapna ken iti dara ti karnero ket ipulagidna iti kannawan a piditpidit ti tao a madalusan, iti tangan ti kannawan nga ima ken sakana.

18 Ikabilnanto ti nabati a lana nga adda iti dakulapna iti ulo ti tao a madalusan. Kastoy ti panangannong ti padi iti seremonia ti pannakadalus.

19 Kalpasanna, idatagto ti padi ti daton gapu iti basol ket annongenna ti seremonia ti pannakadalus. Isarunona a patayen ti animal a daton a mapuoran,

20 ket idatagna agraman ti daton a makan iti rabaw ti altar. Kastoy ti panangannong ti padi iti seremonia ti pannakadalus, ket nadalus ti tao iti imatang ti linteg.

21 No napanglaw ti tao ket dina kabaelan nga idatag dagitoy, umanayen ti maysa a kalakian a karnero a datonna a pagsupapak iti pannakadalusna, maysa a naisangsangayan a sagut itiApo. Mangidatag laeng iti maysa a kilo nga arina a nalaokan iti lana ti olibo a kas daton a makan ken kakatlo ti litro a lana ti olibo.

22 Mangisagana met iti dua a kalapati wenno dua a pagaw. Maysa ti agpaay a daton gapu iti basol, ket ti maysa a daton a mapuoran.

23 Iti maikawalo nga aldaw ti pannakadalusna, ipannanto dagitoy iti padi iti ruangan ti Tolda ti Dios.

24 Alaento ti padi ti karnero ken ti lana ket idatagnanto ida a naisangsangayan a sagut itiApo.

25 Patayennanto ti karnero, ket mangala iti dara sana ipulagid iti piditpidit ti kannawan a lapayag ti tao, iti tangan ti kannawan nga ima ken sakana.

26 Mangipakbo ti padi iti lana iti kannigid a dakulapna

27 sana isawsaw ti kannawan a tammudona, ket iwarisna iti mamimpito iti imatang tiApo.

28 Pulagidannanto iti lana dagiti pinulagidanna met iti dara: ti kannawan a piditpidit ti tao, ti tangan ti kannawan nga ima ken sakana.

29 Ikabilnanto ti natda a lana nga adda iti dakulapna iti ulo ti tao; kastoy ti panangannongna iti seremonia ti pannakadalus.

30 Kalpasanna, idatagna ti maysa kadagiti kalapati wenno pagaw

31 a daton gapu iti basol ket ti maysa a daton a mapuoran agraman ti daton a makan. Kastoy ti panangannong ti padi iti seremonia ti pannakadalus.

32 Daytoy ti linteg a maipakat iti addaan iti kukutel a saan a makabael a mangidatag kadagiti naituding a daton para iti pannakadalusna.

Ti Ratik kadagiti Balbalay

33 Inted ni Yahweh kada Moises ken Aaron

34-35 dagitoy nga alagaden maipapan kadagiti balay a kinaptan ti agwaras a ratik. (Annuroten dagitoy dagiti Israelita kalpasan ti isasangpetda idiay Canaan, ti daga nga ited ni Yahweh kadakuada.) Siasinoman a makasarak iti ratik iti uneg ti balayna, masapul nga ipakaammona daytoy iti padi.

36 Sakbay a mapan ti padi a mangeksamen iti ratik, paikkatna pay ti amin nga adda iti balay ta no saan, maibilang a narugit ti amin nga adda iti unegna. Kalpasanna, sumrek iti balay,

37 ket sukimatenna ti ratik. No adda makitana a garitgaritan a kasla mangrunrunot iti diding, bumerde man wenno lumabaga,

38 pumanaw sana parikpan ti balay iti las-ud ti pito nga aldaw.

39 Iti maikapito nga aldaw, agsublinto ket eksamenenna manen. No nagwaras ti ratik,

40 palikkabna dagiti bato a kinaptan ti ratik ket maibellengda iti lugar a saan a nadalus iti ruar ti siudad.

41 Kalpasanna, pakarusannanto ti amin a diding ti balay ket ibellengda ti palitada iti saan a nadalus a lugar iti ruar ti siudad.

42 Mangaladanto kadagiti sabali a bato ket suktanda dagiti bato a nalikkab sada pabaroen ti palitada.

43 No agparang manen ti ratik kalpasan ti pannakalikkab dagiti bato ken pannakakarus ti balay ken pannakapalitadana,

44 mapanto kitaen ti padi. No nagwaras ti ratik, saan a nadalus ti balay.

45 Masapul a marebba, ket maipan dagiti bato, tarikayo ken amin a palitadana iti ruar ti siudad iti lugar a saan a nadalus.

46 Maibilang a narugit agingga iti sardam ti siasinoman a sumrek iti balay bayat ti pannakarikepna.

47 Siasinoman nga agidda wenno mangan sadiay, masapul a labaanna dagiti pagan-anayna.

48 Ngem no makita ti padi nga awanen ti ratik kalpasan ti pannakapalitada ti balay, ipakaammonanto a nadalus ti balay iti imatang ti linteg, agsipud ta naan-anay a naikkaten ti ratik.

49 Mangalanto iti dua a tumatayab, sumagmamano a kayo ti sedro, nalabaga a lupot ken hisopo a pangdalus iti balay.

50 Patayenna ti maysa a tumatayab iti ngatoen ti damili a malukong a nakargaan iti kasakdo a danum ti ubbog.

51 Kalpasanna, alaennanto ti kayo ti sedro, ti hisopo, ti nalabaga a lupot ken ti sibibiag a tumatayab, ket itanebna ida iti dara ti tumatayab a naparti ken iti danum a naggapu iti ubbog. Warisannanto ti balay iti mamimpito.

52 Kastoyto ti panangdalusna iti balay babaen iti panangaramatna iti dara ti tumatayab, danum a naggapu iti ubbog, ti sibibiag a tumatayab, kayo ti sedro, hisopo ken ti nalabaga a lupot.

53 Ibulosnanto ti nabiag a tumatayab iti ruar ti siudad ken iti kataltalonan. Kastoy ti panangannong ti padi iti seremonia ti pannakadalus ti balay, ket agbalinto a nadalus iti imatang ti linteg.

54 Dagitoy dagiti linteg a maipakat iti makaakar a sakit ti kudil;

55-56 gaddil, letteg wenno dagiti aniaman a limteg; ratik kadagiti lupot wenno balay.

57 Dagitoy a linteg ti mangikeddeng no maibilang a narugit wenno nadalus ti maysa a banag.

Dagiti Narugit nga Agruar iti Mabagbagi ti Tao

1 Inted ni Yahweh kada Moises ken Aaron dagitoy nga alagaden

2 nga agpaay kadagiti Israelita. No adda agruar iti bagi ti maysa a lalaki, maibilang a narugit ti agruar,

3 agaruyot man wenno matiped.

4 Maibilang a narugit ti aniaman a pagtugawan wenno pagiddaanna.

5 Siasinoman a mangsagid iti nagiddaan

6 wenno agtugaw iti nagtugawan ti lalaki, masapul a labaanna ti pagan-anayna ken agdigos. Agtalinaed a narugit agingga iti sardam.

7 Siasinoman a mangsagid iti lalaki, masapul a labaanna ti pagan-anayna ken agdigos. Agtalinaed a narugit agingga iti sumipnget.

8 No matupraan dayta a lalaki ti siasinoman a maibilang a nadalus, masapul a labaan dayta a tao ti pagan-anayna ket agdigos. Agtalinaed a narugit agingga iti sumipnget.

9 Narugit ti aniaman a pasanga wenno tugaw a pagtugawan ti lalaki.

10 Narugit agingga iti rabii ti siasinoman a makasagid iti nagtugawanna. Siasinoman a mangbagkat iti aniaman a nagtugawan dayta a lalaki, masapul a labaanna ti pagan-anayna ket agdigos. Agtalinaed a narugit agingga iti sumipnget.

11 No ti tao nga adda agruar iti mabagbagina ket sagidenna ti maysa a tao a dina buggoan nga umuna dagiti imana, masapul a labaan ti tao a nasagid ti pagan-anayna ket agdigos. Agtalinaed a narugit agingga iti sumipnget.

12 Masapul a maburak ti banga a sagiden dayta a tao. Masapul met nga ugasan ti malukong a kayo a sagidenna.

13 No umimbag ti lalaki nga adda agruar iti bagina, masapul a palabsenna ti pito nga aldaw sananto labaan ti pagan-anayna ken agdigos iti agay-ayus nga ubbog, ket nadaluston iti imatang ti linteg.

14 Iti maikawalo nga aldaw, mangala iti dua a kalapati wenno dua a pagaw ket ipanna iti ruangan ti Tolda ti Dios sana ited iti padi.

15 Idatag ti padi ti maysa a tumatayab a daton gapu iti basol ket ti maysa a daton a mapuoran. Kastoy ti panangannongna iti seremonia ti pannakadalus ti kasta a tao.

16 No agparuar iti kissit ti lalaki, masapul nga agdigos, ket agtalinaed a narugit agingga iti sumipnget.

17 Masapul a malabaan ti lupot wenno lalat a pagdissoan ti kissit. Agtalinaed a narugit dagitoy agingga iti sardam.

18 No agkanaig ti lalaki ken ti babai, masapul nga agdigosda kalpasanna ket agtalinaedda a narugit agingga iti sumipnget.

19 No agregla ti babai, pito nga aldaw a maibilang a narugit. Maibilang met a narugit agingga iti sumipnget ti siasinoman a mangsagid kenkuana.

20 Narugit ti amin a pagiddaan wenno pagtugawanna bayat ti panagreglana.

21-23 Ti siasinoman a makasagid iti pagiddaan wenno aniaman a nagtugawanna masapul a labaanna ti pagan-anayna ket agdigos. Agtalinaed a narugit agingga iti sardam.

24 No adda lalaki a makikaidda kenkuana no madama nga agregla, maalisan iti kinarugitna. Pito nga aldaw a maibilang a narugit. Narugit met ti aniaman a pagiddaanna.

25 No agbulos ti dara ti babai iti tiempo a saanna a panagregla wenno agbulos ti darana iti mabaybayag ngem ti panagreglana, maibilang a narugit kas iti pannakaibilangna a narugit bayat ti panagreglana.

26 Narugit ti aniaman a pagiddaanna wenno pagtugawanna bayat daytoy a tiempo.

27 Maibilang met a narugit ti tao a makasagid iti nagiddaan wenno nagtugawan ti babai. Masapul a labaanna ti pagan-anayna ken agdigos. Agtalinaed a narugit agingga iti sumipnget.

28 No agsardengen ti panagbulos ti darana, palabsenna ti pito nga aldaw ket maibilangton a nadalus.

29 Iti maikawalo nga aldaw, mangipan iti dua a kalapati wenno dua a pagaw iti padi iti ruangan ti Tolda ti Dios.

30 Idatag ti padi ti maysa a tumatayab a kas daton gapu iti basol ken ti maysa a kas daton a mapuoran. Kastoy ti panangannongna iti seremonia ti pannakadalus ti babai.

31 Imbaga ni Yahweh ken ni Moises a ballaaganna dagiti Israelita maipapan iti kinarugitda iti imatang ti Linteg tapno saan a matulawan ti Tolda ti Dios nga adda iti tengnga ti kampo. Mapapatayda no aramidenda dagiti maibilang a narugit.

32 Dagitoy dagiti alagaden iti lalaki nga adda agruar iti bagina wenno agparuar iti kissit;

33 iti babai bayat ti panagreglana wenno iti lalaki a mangkaidda iti babai a maibilang a narugit.

Ti Aldaw ti Seremonia ti Pannakapakawan ti Basol

1 Kinasao ni Yahweh ni Moises kalpasan ti ipapatay dagiti dua nga annak ni Aaron idi indatagda ti saan a nasantoan nga apuy ken ni Yahweh.

2 Kinunana,“Ibagam ken ni Aaron a mapanto laeng iti Kasasantoan a Lugar iti likudan ti kurtina iti naituding a tiempo agsipud ta sadiay ti pagparangak iti ulep iti ngatoen ti kalub ti Lakasa ti Tulag. Mapapatay ti kabsatmo no agsukir.

3 Mabalinnati sumrek iti Kasasantoan a Lugar kalpasan laeng iti panangidatagna iti bumaro a baka a daton gapu iti basol ken iti kalakian a karnero a daton a mapuoran.”

4 Kalpasanna, inted ni Yahweh dagitoy nga alagaden. Sakbay a mapan ni Aaron iti Kasasantoan a Lugar, masapul nga agdigos ket agkawesda a kas padi: ti linen a kagay, ken linen a kalsonsilio, ti barikes ken ti turban.

5 Ikkan dagiti umili ti Israel ni Aaron iti dua a kalakian a kalding a maidaton gapu iti basol ken maysa a kalakian a karnero a daton a mapuoran.

6 Mangidatag ni Aaron iti toro a baka a daton a pangikkat iti basolna ken iti basol ti familiana.

7 Kalpasanna, ipanna dagiti dua a kalding iti ruangan ti Tolda ti Dios.

8 Sadiay, pilien ni Aaron babaen iti panagbinnunot no ania kadagiti dua a bato ti “agpaay itiApo” ken ti “agpaay ken ni Azazel.”

9 Idatag ni Aaron ti kalding a nabunot nga agpaay itiApoa daton gapu iti basol.

10 Ngem ti kalding nga agpaay ken ni Azazel, sibibiag a maidatag itiAposanto maibulos iti let-ang para ken ni Azazel tapno maikkat dagiti basol dagiti tattao.

11 Patayen ni Aaron ti toro a baka ket idatagna a daton gapu iti basolna ken iti familiana.

12 Mangala iti insensario sana kargaan iti beggang nga adda iti altar. Mangala met iti dua a rakem iti nafino nga insenso. Ipanna dagitoy iti Kasantoan a Lugar.

13 Sadiay, iti imatang tiApo, ikabilna ti insenso iti apuy. Gapu iti asuk daytoy, mailinged ti kalub ti Lakasa ti Tulag tapno saanna a makita ket iti kasta saan a matay.

14 Mangala iti dara ti baka ket, babaen iti tammudona, warisanna ti sangoanan ti kalub ket mamimpito met a warisanna ti sangoanan ti Lakasa ti Tulag.

15 Kalpasanna,patayenna ti kalding a maidaton gapu iti basol dagiti tattao ket ipanna ti dara iti Kasasantoan a Lugar. Kas iti inaramidna iti dara ti baka, iwarisna met ti dara iti kalub ken iti sangoanan ti Lakasa ti Tulag.

16 Kastoy ti panangannongna ti seremonia ti pannakadalus ti Kasasantoan a Lugar gapu iti kinarugit dagiti Israelita ken gapu iti amin a basolda. Masapul nga aramidenna daytoy iti Tolda a Paguummongan agsipud ta adda daytoy a tolda iti tengnga ti kampo a maibilang a narugit.

17 Awan ti sumrek iti Tolda ti Dios no sumrek ni Aaron iti Kasasantoan a Lugar a mangannong iti seremonia ti pannakadalus agingga iti rummuar. Inton malpas ti seremonia ti pannakadalusna, ti familiana ken ti entero a gimong,

18 mapan iti altar a pagpuoran kadagiti daton ket annongenna ti seremonia ti pannakadalus: Mangala iti dara ti baka ken dara ti kalding ket pulagidanna dagiti sinan-sara ti altar.

19 Isawsawna ti tammudona iti dara sa mamimpito a warisanna ti altar tapno madalusan ti altar kadagiti basol dagiti Israelita ket agbalin a nasantoan.

Ti Kalding a Maibulos idiay Let-ang

20 Apaman a malpas ni Aaron ti panangannongna iti seremonia ti pannakadalus ti Kasasantoan a Lugar, ti dadduma a paset ti Tolda a Paguummongan ken ti altar, idatonna itiApoti sibibiag a kalding a napili nga agpaay ken ni Azazel.

21 Ipataynati dua nga imana iti ulo ti animal ket ipakaammona dagiti amin a kinadakes, basol ken kinasukir dagiti Israelita tapno mayakarda iti ulo ti kalding. Kalpasanna, itedna ti kalding iti a natudingan a mangibulos iti let-ang.

22 Awiten ti kalding ti amin a basolda ket ipanna iti awan matagtagitao a lugar.

23 Mapanni Aaron iti Tolda ti Dios, ket ikkatenna ti kawesna a kas padi nga inyarruatna sakbay a simrek iti Kasasantoan a Lugar sana ibati sadiay.

24 Masapul nga agdigos iti lugar a nasantoan ket yarruatna dagiti bukodna a kawes. Rummuar ket idatagna ti daton a mapuoran tapno maikkat ti basolna ken ti basol dagiti tattao.

25 Puoranna iti altar ti taba ti animal a maidaton gapu iti basol.

26 Masapul a labaan ti tao a nangibulos iti kalding ti pagan-anayna sa agdigos sakbay nga agsubli iti kampo.

27 Maipaniti ruar ti kampo ti baka ken ti kalding a naidaton gapu iti basol ken naipan ti darada iti Kasasantoan a Lugar a pangikkat iti basol, ket mapuoranda agraman lalat, lasag ken dagiti bagis.

28 Masapul a labaan ti tao a nangpuor kadagitoy ti pagan-anayna ket agdigos sakbay nga agsubli iti kampo.

Pannakangilin ti Aldaw a Pannakapakawan ti Basol

29 Annurotenyoiti agnanayon dagiti sumaganad nga alagaden. Iti maikasangapulo nga aldaw ti maikapito a bulan, masapul nga agayunar dagiti Israelita ken dagiti ganggannaet a makipagnaed kadakuada. Saanda nga agtrabaho.

30 Iti dayta nga aldaw, maaramid ti seremonia ti pannakadalusda iti amin a basolda tapno maibilangda a nadalus.

31 Nasantoan unay dayta nga aldaw ket masapul nga agayunarda ken naan-anay nga aginanada. Maannurot dagitoy nga alagaden iti amin a tiempo.

32 Ti Kangatoan a Padi a naordenan ken nakonsagrar a sumukat iti amana ti mangannong iti seremonia ti pannakadalus. Agaruat iti sagrado a pagan-anay,

33 ket annongenna ti seremonia ti pannakadalus ti Kasasantoan a Lugar, ti dadduma a paset ti Tolda a Paguummongan, ti altar, dagiti papadi ken amin a tattao iti gimong.

34 Masapul a maannurot dagitoy nga alagaden iti amin a tiempo. Tinawen a maannurot daytoy a seremonia tapno madalusan dagiti Israelita iti amin a basolda.

Natungpal ngarud amin dagitoy kas imbilin ni Yahweh ken ni Moises.

Ti Kinasagrado ti Dara

1 Binilin ni Yahweh ni Moises

2 nga itedna ken ni Aaron, kadagiti annakna ken amin nga Israelita dagitoy nga alagaden.

3-4 Salungasingen ti maysa nga Israelita ti Linteg no partienna ti baka wenno karnero wenno kalding nga idatonna itiApoiti sabali a lugar a saan nga iti ruangan ti Tolda ti Dios. Nangiparukpok iti dara ket saanen a maibilang kadagiti tattao ti Dios.

5 Kastoy ti kayat a sawen ti bilin: Manipud ita, idatag dagiti Israelita itiApodagiti animal a masansan a partienda iti away. Ipanda ida iti padi iti ruangan ti Tolda ti Dios ket partienda a daton a pakikappia.

6 Ibuyat ti padi ti dara iti aglawlaw ti altar iti ruangan ti Tolda sada puoran ti taba tapno mangted iti nabanglo nga ayamuom itiApo.

7 Iti kasta, saanda nga idaton kadagiti demonio a pagdaydayawanda dagiti partienda nga animal iti away. Masapul a tungpalen dagiti Israelita dagitoy nga alagaden iti amin a tiempo.

8-9 Mailaksid kadagiti tattao ti Dios ti siasinoman nga Israelita wenno ganggannaet nga agnaed iti Israel a mangidatag iti daton a mapuoran wenno aniaman a daton itiApoiti sabali a lugar a saan nga iti ruangan ti Tolda ti Dios.

10 KabusortiApoti siasinoman nga Israelita wenno ganggannaet nga agnaed iti Israel nga agsida iti dara; ilaksidna iti gimong dagiti tattaona.

11 Addaiti dara ti biag ti tunggal parsua, isu nga imbilin tiApoa maibuyat ti amin a dara iti altar tapno maikkat dagiti basol dagiti tattao. Ti dara nga isu ti biag ti mangikkat kadagiti basbasol.

12 Daytoy met ti gapuna nga imbilin tiApoa dida agsida iti dara. Maiparit kadakuada ti dara, Israelita man wenno ganggannaet nga agnaed iti lugarda.

13 No adda Israelita wenno ganggannaet nga agnaed iti Israel a makatiliw iti animal wenno tumatayab a maibilang a nadalus, masapul nga ibukbokna ti dara dayta a tumatayab wenno animal iti daga ket gaburanna iti tapok.

14 Adda iti dara ti biag iti tunggal parsua, isu nga imbilin tiApokadagiti Israelita a dida agsida iti laeng dara; ilaksidna kadagiti tattaona ti siasinoman a mangsalungasing iti daytoy a bilin.

15 Siasinoman nga Israelita wenno ganggannaet nga agsida iti karne ti animal a natay wenno pinatay dagiti atap nga animal masapul a labaanna ti pagan-anayna ken agdigos. Agtalinaed a narugit iti imatang ti linteg agingga iti sardam.

16 No dina aramiden daytoy, agbasol ket masapul a sagabaenna ti dusa a maipatay kenkuana.

Dagiti Maiparit a Seksual nga Aramid

1 Binilin ni Yahweh ni Moises

2 nga ibagana daytoy kadagiti Israelita, “Siak ni Yahweh a Diosyo.

3 Diyo tuladen ti ugali dagiti tattao idiay Egipto a nagnaedanyo idi wenno ti ugali dagiti tattao iti Canaan a pangipanak kadakayo.

4 Tungpalenyo dagiti paglintegak ket aramidenyo ti ibagak. Siak ni Yahweh a Diosyo.

5 Agbiagkayono annurotenyo dagiti alagaden ken linteg nga itedko kadakayo. Siak ni Yahweh.”

6 Inted ni Yahweh dagitoy nga alagaden. Diyo kainaig ti kabagianyo.

7 Diyo kainaig ni inayo tapno saan a maibabain ti amayo. Diyo ibabain ti bukodyo nga ina.

8 Diyoibabain ti amayo iti panagkainnaigyo iti maysa kadagiti assawana.

9 Diyokainaig ti kabsatyo wenno ti kabsatyo iti ama wenno ina, dimmakkel man wenno saan iti balay a dimmakkelanyo met.

10 Diyo kainaig ti apokoyo; daytoy ti pakaibabainanyo.

11 Diyo kainaig ti siuman ni amayo agsipud ta kabsatyo met.

12-13 Diyokainaig ti ikityo, kabsat man ti amayo wenno kabsat ti inayo.

14 Diyo kainaig ti asawa ti ulitegyo agsipud ta ikityo met.

15 Diyokainaig ti manugangyo

16 wennoti ipagyo.

17 Diyokainaig ti anak wenno apoko ti babai a nalpasmo a kinaidda; mabalin a kabagianyo ida ket maibilang a kinadakes ken maisalungasing iti linteg.

18 No sibibiag pay laeng ti asawayo, diyo asawaen ti ipagyo.

19 Diyokainaig ti babai nga agregla gapu ta narugit iti imatang ti Linteg.

20 Diyokainaig ti asawa ti sabali a tao tapno saankayo a narugit iti imatang ti linteg.

21 Diyoited ti anakyo a mausar iti panagdaydayaw ken ni didiosen a Moloc ta daytoy ti pakaibabainan ti nagan ti Dios ngaApo.

22 Maiparita kainaig ti lalaki ti padana a lalaki; kagura ti Dios dayta nga aramid.

23 Maiparita kainaig ti babai wenno lalaki ti maysa nga animal; maisalungasing daytoy iti nakaparsuaan ket pagbalinennakayo a narugit.

24 Diyo tulawan ti bagiyo iti uray ania kadagitoy nga aramid. Daytoy ti ugali dagiti tattao a nagnaed iti daga sakbay nga immaykayo ket ita pagtalawen ida tiApotapno makastrekkayo.

25 Gapu kadagiti aramidda, nagbalin a makarimon ti daga, isu a dusdusaen tiApoti daga ket ipampamuspusanna a pagtalawenna dagiti agnaed sadiay.

26-27 Inaramidda amin dagitoy makarimon a banag a nangmulit iti daga. Ngem diyo tuladen ida. Dakayo amin, Israelita man wenno ganggannaet a makipagnaed kadakayo, masapul a tungpalenyo dagiti linteg ken bilin tiApo

28 tapno dinakay yula ti daga a kas iti napasamak kadagiti tattao nga immun-una ngem dakayo a nagnaed sadiay.

29 Ammoyo a mailaksid kadagiti tattao ti Dios ti siasinoman nga agaramid kadagitoy makarimon a banag.

30 Ket kinuna ni Yahweh, “Tungpalenyo dagiti bilinko ket diyo tuladen dagiti aramid dagiti tattao a nagnaed iti daga sakbay iti yaayyo. Dikay agaramid iti uray ania kadagitoy a banag tapno saankayo a matulawan. Siak ni Yahweh a Diosyo.”

Dagiti Bilbilin maipapan iti Kinasanto ken Kinalinteg

1 Binilin ni Yahweh ni Moises

2 ngaibagana daytoy iti sangkagimongan ti Israel, “Agbalinkayo a nasantoan agsipud ta nasantoan ni Yahweh a Diosyo.

3 Masapula raemen ti tunggal maysa dagiti nagannak kenkuana ket ngilinenyo ti Aldaw a Panaginana a kas imbilinko. Siak ni Yahweh a Diosyo.

4 “Dikayagrukbab kadagiti didiosen wenno agaramid iti imahen a pagrukbabanyo. Siak ni Yahweh a Diosyo.

5 “No agpartikayo iti animal nga idatonyo a pakikappia, annurotenyo dagiti alagaden nga intedko kadakayo tapno awatek ti daton.

6 Masapul a maibus amin a karne iti aldaw a pannakaidaton, ti animal wenno iti sumuno nga aldaw. Mapuoran ti karne a matda iti maikatlo nga aldaw

7 agsipud ta maibilang a narugit. No adda agsida iti karne a matda, diak awaten ti daton.

8 Agbasol ti siasinoman nga agsida iti kasta ta tinulawanna ti nasantoan a banag a naidaton kaniak; rumbeng a mailaksid kadagiti tattaok.

9 “Noaganikayo, diyo anien dagiti adda iti igid ken dagiti nalabsanyo.

10 Diyo sublienen a burasen dagiti ubas a nalabsanyo wenno piduten dagiti naregregyo; ibatiyo ida nga agpaay kadagiti napanglaw ken ganggannaet. Siak ni Yahweh a Diosyo.

11 “Dikayagtakaw wenno agsuitik wenno agulbod.

12 Dikayagkari iti naganko no diyo panggep a tungpalen ti kariyo, ta maibabain ti naganko. Siak ni Yahweh a Diosyo.

13 “Diyogundawayan wenno takawan ti siasinoman. Diyo ipabigat ti pannangtedyo iti tangdan ti pinagtrabahoyo.

14 Diyoilunod ti tuleng wenno bangenan ti pagnaan ti bulsek. Agbutengkayo kaniak. Siak ni Yahweh a Diosyo.

15 “Diyoballikugen ti linteg iti panangyetnagyo iti sentensia; dikay mangipakita iti panangidumduma iti napanglaw wenno panagtamed iti nabaknang.

16 Diyo padpadaksen ti uray siasinoman. No adda agpeggad ti biagna, agsaoka a mangisakit kenkuana. Siak ni Yahweh.

17 “Diyoipempen ti gurayo iti siasinoman ngem makilinnawagkayo kenkuana tapno dikay agbasol gapu kenkuana.

18 Dikayagibales wenno agipempen iti gura ngem ayatenyo ti kaarrubayo a kas iti panagayatyo iti bagiyo. Siak ni Yahweh.

19 “Tungpalenyodagiti bilinko. Diyo ipamanada ti maysa nga animal iti sabali a kita ti animal. Diyo paggiddanen nga imula ti dua a kita ti bukel iti talonyo. Dikay agaruat iti kawes a naaramid iti dua a kita.

20 “No ti maysa a tagabu a babai a mabigbig nga inkabbalay ti maysa a lalaki ngem saan pay a nasubbot wenno nawayawayaan ket kinaidda ti sabali a lalaki, agpadada a madusa ngemdida mapapatay, ta tagabu ti babai.

21 Ngem mangidatag ti lalaki iti kalakian a karnero a daton a pagsupapak. Ipanna ti animal iti Tolda a Paguummongan

22 ket aramiden ti padi ti seremonia ti pannakadalus tapno maikkat ti basol ti lalaki ket pakawanen ti Dios.

23 “Inton dumtengkay idiay Canaan ket agmulakay iti uray ania a kita ti kayo nga agbunga iti makan, ibilangyo a saan a nadalus ti bunga iti umuna a tallo a tawen. Diyo kanen dagiti bunga bayat iti dayta a tiempo.

24 Iti maikapat a tawen, maidaton dagiti amin a bunga a mangipakita iti panagyamanyo kaniak,ni Yahweh.

25 Ngem iti maikalima a tawen, mabalinyo a kanen ti bunga dagiti kayoyo tapno ad-adunto ti bungada nga agpaay kadakayo. Siak ni Yahweh a Diosyo.

26 “Dikayagsida iti karne nga adda pay laeng darana. Diyo aramiden ti uray ania a kita ti panaganito.

27 Diyopukisan ti sikigan ti uloyo; diyo putdan ti barbasyo.

28 Diyo markaan wenno sugaten ti bagiyo a mangipakita iti panangdung-awyo iti natay. Siak ni Yahweh.

29 “Diyoibabain dagiti annakyo a babbai iti panamagbalinyo kadakuada a balangkantis iti templo.Ngamin, daytoyto ti pakaigapuan ti panagrukbabyo kadagiti didiosen ket agsaknapto ti immoralidad iti daga.

30 Ngilinenyoti Aldaw a Panaginana ket raemenyo ti lugar a pagdaydayawan kaniak dagiti tattao. Siak ni Yahweh.

31 “Dikaymapan makiuman kadagiti agan-anito wenno espiritista tapno saankayo a maibilang a narugit. Siak ni Yahweh a Diosyo.

32 “Ipakitayo ti panagraemyo kadagiti lallakay ken babbaket. Respetarenyo ida ket agbutengkayo iti Dios. Siak ni Yahweh.

33 “Diyoidadanes dagiti ganggannaet nga agnaed iti dagayo.

34 Ibilangyo ida nga Israelita a kas kadakayo, ket ayatenyo ida a kas iti panagayatyo iti bagiyo. Laglagipenyo a ganggannaetkayo met idi idiay Egipto. Siak ni Yahweh a Diosyo.

35 “Dikayagsaur babaen iti panangusaryo iti saan a husto a pagrukod, pagtimbang ken pagsukat.

36 Aramatenyo ti husto a pagrukod, husto a pagtimbangan, ken husto a pagsukatan. Siak ni Yahweh a Diosyo a nangiruar kadakay idiay Egipto.

37 Tungpalenyo dagiti amin a linteg ken bilinko. Siak ni Yahweh.”

Dagiti Dusa ti Kinasukir

1 Kinuna ni Yahweh ken ni Moises

2 nga ibagana daytoy kadagiti Israelita, “Mapapatay ti siasinoman nga Israelita wenno ganggannaet a makipagnaed kadakayo a mangtediti anakna ken ni didiosen a Moloc; ti sangkagimongan ti mangbato kenkuana.

3 Busorek ti mangted iti anakna ken ni didiosen a Moloc ket laksidek kadagiti tattaok; gapu iti inaramidna, tinulawanna ti nasagradoan a toldak ken imbabainna ti nasantoan a naganko.

4 Ngem no di ikaso ti sangkagimongan ti inaramid dayta a tao ket dida papatayen,

5 siak a mismo ti mangbusor kenkuana ken iti entero a familiana ken amin a kumanunong kenkuana a nangtallikud kaniak ken nagrukbab ken ni didiosen a Moloc. Diakon ibilang ida a tattaok.

6 “Ti siasinoman a mapan kadagiti agan-anito wenno espiritista, diakton ibilang a maysa kadagiti tattaok.

7 Ipaayyo ti biagyo kaniak tapno agbalinkayo a nasantoan ta siak ni Yahweh a Diosyo.

8 Tungpalenyo dagiti paglintegak agsipud ta siak ni Yahweh ket siak ti mangpasanto kadakayo.”

9 “Mapapatayti siasinoman a mangilunod iti ama wenno inana. Isu ti akimbasol iti ipapatayna.

10 “Mapapatayti lalaki a mangkaidda iti asawa ti padana nga Israelita, mapapatay pay ti babai.

11 Nokaiddaen ti maysa a lalaki ti asawa ni amana, ibabainna ni amana, ket agpada a mapapatay ti lalaki ken ti babai, isuda met laeng ti akimbasol iti bukodda nga ipapatay.

12 Nokaiddaen ti maysa a lalaki ti manugangna, agpadada a mapapatay ta maisalungasing iti linteg; isuda met laeng ti akimbasol iti bukodda nga ipapatay.

13 Nokaiddaen ti maysa a lalaki ti padana a lalaki, agpadada a mapapatay ta nakarimrimon ti inaramidda, isuda met laeng ti akimbasol iti bukodda nga ipapatayda.

14 Noasawaen ti maysa a lalaki ti maysa a babai ken ti ina daytoy a babai, mapuoranda a tallo tapno awanen ti kasta a nakababain nga aramid iti sidongyo.

15 Nokaiddaen ti maysa a lalaki ti maysa nga animal, mapapatayda a dua.

16 Kasta met ti mapasamak no kaiddaen ti babai ti maysa nga animal—agpadada a mapapatay, isuda met laeng ti akimbasol iti bukodda nga ipapatayda.

17 “Noasawaen ti maysa a lalaki ti kabsatna a babai wenno ti kabsatna iti ama wenno ina, maibabainda iti sangoanan dagiti tattao ket mapapanawda iti ili. Kinaiddana ti kabsatna a babai ket masapul a sagabaenna ti dusa ti basolna.

18 Nokaiddaen ti maysa a lalaki ti maysa a babai a madama nga agregla, agpadada a mapagtalaw iti ili agsipud ta sinalungasingda ti alagaden ti seremonia ti kinarugit.

19 “Nokaiddaen ti maysa a lalaki ti ikitna, masapul a sagabaenda ti dusa ti kinadakesda ken panangsalungasingda iti linteg.

20 No kaiddaen ti maysa a lalaki ti asawa ti ulitegna, ibabainna ti ulitegna. Sagabaendanto ti dusa, ket awanto kadakuada ti maaddaan iti anak.

21 Noasawaen ti maysa a lalaki ti ipagna, matayda nga awanan iti anak. Narugit ti inaramidna ket imbabainna ti kabsatna.

22 “Tungpalenyo dagiti amin a linteg ken bilinko tapno dinakay paksiaten ti daga a pangipanak kadakayo.

23 Diyo tuladen ti ugali dagiti agnaed sadiay. Pagtalawek dagita a tattao tapno makastrekkayo iti daga. Pinagpungtotdak gapu kadagiti dakes nga aramidda.

24 Ngem inkarik a tagikuaenyo daytoy nabaknang ken nadam-eg a daga, ket siak ti mangted iti daytoy a daga kadakayo. Siak ni Yahweh a Diosyo, ket pinilikayo kadagiti sabali a pagilian.

25 Ngarud, masapul nga ammoyo a bigbigen no ania dagiti animal ken tumatayab a maibilang a nadalus ken dagiti maibilang a narugit. Dikay agsida iti karne dagiti animal wenno tumatayab a maibilang a saan a nadalus. Imbilangko ida a narugit, ket agbalinkayo a narugit no sidaenyo ti karneda.

26 Agbiagkayo a nasantoan ket siak laeng ti pagpaayanyo, ta siak ni Yahweh ket nasantoanak. Pinilikayo kadagiti sabali a tattao tapno siak laeng ti pagpaayanyo.

27 “Siasinoman nga agan-anito wenno makiuman kadagiti espiritu dagiti natay, babai man wenno lalaki, batoenyo agingga a matay, isu met laeng ti akimbasol iti bukodda nga ipapatay.”