Category: Levitico

Ti Kinasanto dagiti Papadi

1 Kinuna ni Yahweh ken ni Moises nga ibagana daytoy kadagiti papadi nga annak ni Aaron, “Saan a tulawan ti padi ti bagina babaen iti pannakipartisiparna iti seremonia ti pumpon,

2 malaksid no asideg a kabagianna ti natay: ina wenno amana, anak, kabsat a lalaki

3 wenno di naasawaan a kabsatna a babai a makipagnaed iti balayna.

4 Saanna a tulawan ti bagina iti ipapatay ti siasinoman a kabagianna iti matrimonio.

5 “Maiparita pultakan ti padi ti ulona wenno putdan ti barbasna, wenno sugaten ti bagina a mangipakita iti panagladingitna iti natay.

6 Masapul a nasantoan ti padi ket dina ibabain ti naganko. Agidatag kadagiti daton a mapuoran, ket masapul nga agbalin a nasantoan.

7 Saan a mapalubosan a mangasawa iti balangkantis a babai wenno iti saan a birhen wenno iti naisina a babai agsipud ta nasantoan ti padi.

8 Masapul nga ibilang dagiti tattao a nasantoan ti padi, agsipud ta agidatag kaniak kadagiti daton a mapuoran. Siak ni Yahweh. Nasantoanak, ket pasantoek dagiti tattaok.

9 No agbalin a balangkantis ti anak ti padi, ibabainna ti amana. Masapul a mapuoran agingga a matay.

10 “No ti Nangato a Padi a nabukbokan ti ulona iti lana ket nakonsagrar nga agaruat kadagiti sagrado a kawes dagiti papadi, saanna a baybay-an a wakray ti buokna wenno ray-aben ti pagan-anayna a mangipakita ti panagladingitna.

11-12 Naidaton nga agserbi kaniak ket masapul a pagtalinaedenna ti bagina a nadalus ken dina tulawan ti nasagradoan a Tolda babaen iti panangpanawna ket sumrek iti balay nga ayan ti bangkay, uray no bangkay ti ama wenno inana.

13 Masapul a balasang a dipay natulawan ti asawaenna

14 a saan ketdi a balo wenno nakisina iti asawana wenno nagbalangkantis. Masapul a katribuanna ti asawaenna.

15 Ta no saan, maibilang a narugit dagiti annakna a rumbeng koma a nasantoan. Siak ni Yahweh a nangilasin kenkuana nga agserbi a Kangatoan a Padi.”

16 Imbilin ni Yahweh ken ni Moises

17 nga ibagana daytoy ken ni Aaron, “Saan a mabalin ti siasinoman a kaputotam nga adda depekto ti bagina a mangidatag kaniak iti daton a mapuoran. Agpaay daytoy nga alagaden iti amin a tiempo iti masakbayan.

18 Maiparit nga agidaton dagitoy a tattao nga adda depekto ti bagina: bulsek, pilay, nadadael ti forma ti bagina wenno adda kurang ti bagina;

19 paralitiko ti ima wenno sakana;

20 kubbo wenno pandek; adda depekto ti matana wenno addaan iti sakit ti kudil; ken nakapon.

21 Awan ti kaputotan ni Aaron a padi nga adda depekto ti bagina ti mapalubosan a mangidatag kaniak iti daton a mapuoran.

22 Mabalin ti kasta a tao ti mangan iti taraon a naidaton kaniak, ti nasantoan a daton a mapuoran ken ti kasasantoan a daton,

23 ngem gapu ta adda depekto ti bagina, saan a mapalubosan nga umasideg iti nasagradoan a kurtina wenno mapan iti altar. Saanna a tulawan dagitoy nasantoan a banag gapu ta siak ni Yahweh a mamagbalin kadagitoy a nasantoan.”

24 Dagitoy ngarud ti imbaga ni Moises ken ni Aaron ken dagiti annakna ken amin nga Israelita.

Ti Kinasanto dagiti Daton

1 Kinuna ni Yahweh ken ni Moises

2 nga ibagana daytoy ken ni Aaron ken dagiti annakna, “Diyo ibabain ti nasantoan a naganko, isu a masapul a raemenyo dagiti nasagradoan a daton nga idatag kaniak dagiti Israelita. Siak ni Yahweh.

3 No adda kaputotanyo a maibilang a narugit nga umasideg kadagiti nasagradoan a daton nga idatag kaniak dagiti Israelita, saanton a mapalubosan nga agserbi iti altar. Alagaden daytoy iti amin a tiempo iti masakbayan. Siak ni Yahweh.

4 “Saan a mapalubosan a mangan kadagiti nasagradoan a daton ti siasinoman a kaputotan ni Aaron no addaan iti kukutel wenno adda agruar iti mabagbagina. Makapangan laeng kadagiti nasagradoan a daton no umimbag ket maibilang a nadalus. Maibilang a narugit ti padi a makasagid iti aniaman a maibilang a narugit iti panangsagidna iti bangkay wenno iti tao nga agparuar iti kissit,

5 wenno nakasagid iti animal wenno tao a maibilang a narugit.

6 Narugit agingga iti sardam ti siasinoman a padi a maibilang a narugit. Sa la mapalubosan a mangan kadagiti nasagradoan a daton no makadigos.

7 Maibilangen a nadalus no limneken ti init, ket mabalinnan ti mangan kadagiti nasagradoan a daton gapu ta para kenkuana dagitoy.

8 Saan a mapalubosan a mangan iti karne ti animal a natay wenno pinatay ti narungsot nga animal. No aramidenna ti kasta, agbalin a maibilang a narugit. Siak ni Yahweh.

9 “Masapul nga annuroten dagiti amin a papadi dagiti alagaden nga intuyangko. Ta no saan makabasolda ket matayda gapu ta sinalungasingda dagiti nasagradoan nga alagaden. Siak ni Yahweh a mangpasanto kadakuada.

10 “Dagiti laeng kameng ti familia ti padi ti mabalin a mangan kadagiti nasagradoan a daton. Awanen ti sabali a mangan—uray pay ti makipagnaed iti padi wenno ti pagtartrabahoenna.

11 Ngem mabalin a mangan ti tagabuna, ginatangna man iti bukodna a kuarta wenno nayanak iti balayna.

12 No makiasawa ti anak ti padi iti saan a padi, saan a mapalubosan a mangan kadagiti nasagradoan a daton.

13 Ngem no mabalo wenno isina ti asawana ken awan annakna ket agsubli iti sidong ni amana, mabalinna ti mangan iti taraon nga awaten ni amana. Dagiti laeng kameng ti familia ti padi ti mapalubosan a mangan iti nasagradoan a daton.

14 “No mailaw-an ti saan a kameng ti familia ti padi ti mangan iti aniaman a nasagradoan a daton, masapul a sukatanna ti naan-anay a gatad ti taraon sana nayonan iti apagkalima ket itedna iti padi.

15-16 Tapno saan a matulawan dagiti nasagradoan a daton, masapul a saan nga ipalubos dagiti papadi a mangan dagiti tattao a saan a rumbeng a mangan kadagitoy a daton. Daytoy ti pakaigapuan ti panagbasol ken pannakadusa dayta a tao. Siak tiApoa mangpasanto kadagiti daton.”

17 Binilin ni Yahweh ni Moises

18 nga itedna ken ni Aaron, kadagiti annakna ken kadagiti amin nga Israelita dagitoy nga alagaden. No mangidatag ti siasinoman nga Israelita wenno ganggannaet a makipagnaed iti Israel iti daton a mapuoran, daton man a pagtungpal iti kari wenno daton nga agtaud iti nakemna, masapul nga awan ti depekto ti animal nga idatagna.

19 Tapno maawat, masapul a kalakian nga awan ti depektona.

20 Saannga awaten tiApoti animal nga adda depektona nga idatagyo.

21 No mangidatag ti siasinoman a tao iti daton a pakikappia itiApo, daton man a pagtungpal iti kari wenno daton nga agtaud iti nakemna, masapul nga awan pakapilawan ti animal tapno maawat.

22 Diyo idatag itiApoti animal a bulsek wenno pilay wenno puted ti sakana wenno aggaddil wenno agkurad wenno aggudgod. Diyo idatag ti kasta nga animal a daton a mapuoran iti altar.

23 Kas daton nga agtaud iti bukodyo a nakem, mabalinyo nga idatag ti animal a saan a nasayaat ti panagdakkelna, ngem saan a maawat a daton a pagtungpal iti kari.

24 Diyo idatag itiApoti uray ania nga animal a napis-it, napisi, nadunor wenno naikkat ti lategna. Saan a maipalubos daytoy iti dagayo.

25 Diyo idatag a daton a makan ti aniaman nga animal a naggapu iti ganggannaet. Maibilang nga adda depektona ti kasta nga animal ket saanda a maawat.

26-27 No mayanak ti urbon a baka, karnero wenno kalding, masapul a saan a mayadayo iti inana iti las-ud ti pito nga aldaw, ngem kalpasan dayta a tiempo, mabalinen nga idatag a daton a mapuoran.

28 Diyo paggiddanen nga idaton ti baka ken ti urbonna, wenno karnero ken ti urbonna, wenno ti kalding ken ti urbonna.

29 No mangidatagkay iti daton a pagyaman itiApo, surotenyo dagiti alagaden tapno awatennakayo tiApo.

30 Kanenyo ti daton iti dayta met la nga aldaw ket awan ti ipabigatyo.

31 Kinuna ni Yahweh, “Tungpalenyo dagiti bilinko. Siak ni Yahweh.

32 Diyo tulawan ti nasantoan a naganko. Masapul a bigbigen dagiti amin nga Israelita a nasantoanak. Siak ni Yahweh a mangpasanto kadakayo.

33 Inruarkay idiay Egipto tapno siak ti Diosyo. Siak ni Yahweh.”

Dagiti Nasantoan a Fiesta

1 Inted ni Yahweh ken ni Moises

2 dagitoy nga alagaden maipapan kadagiti nasantoan a fiesta a panaguummong dagiti Israelita tapno agdaydayawda.

3 Innemnga aldaw nga agtrabahokayo ngem laglagipenyo nga iti maikapito ket Aldaw a Panaginana. Dikay agtrabaho iti dayta nga aldaw ngem aguummongkayo nga agdaydayaw. Kukua tiApoti Aldaw a Panaginana uray sadino ti pagnaedanyo.

4 Ipakaammoyo dagitoy sumaganad a fiesta tapno mangilinda iti naituding a tiempo.

Fiesta ti Paskua ken ti Tinapay nga Awan Lebadurana

5 Mangrugia marambakan ti Fiesta ti Paskua a pammadayaw itiApoiti ilelennek ti init iti maika-14 nga aldaw iti umuna a bulan.

6 Itimaika-15 nga aldaw, mangrugi met ti Fiesta ti Tinapay nga Awan Lebadurana ket pito nga aldaw a masapul a dikay mangan iti nalebaduraan a tinapay.

7 Iti umuna nga aldaw, masapul nga aguummongkayo nga agdaydayaw ket dikay agtrabaho.

8 Pito nga aldaw nga idatagyo dagiti daton a mapuoran itiApo. Iti maikapito nga aldaw, aguummongkayo manen nga agdaydayaw ket dikay agtrabaho.

9-10 Inton dumtengkayo iti daga nga ited tiApokadakayo ket agapitkayo, ipanyo ti umuna a binettek iti padi.

11 Agpaay daytoy a naisangsangayan a daton itiApotapno maawatkayo ket idatag ti padi iti sumaruno nga aldaw kalpasan ti Aldaw a Panaginana.

12 Iti aldaw a panangidatagyo iti daton a trigo, mangidatonkayo met iti urbon ti karnero a daton a mapuoran. Kalakian daytoy, maysa ti tawenna ken awan depektona.

13 Pakuyoganyo iti dua a kilo nga arina a nagamay iti lana ti olibo a daton a naayamuom itiApo. Pakuyoganyo met iti maysa a litro nga arak.

14 Dikay mangan iti kaan-ani a trigo, naata man, iniruban wenno naaramid a tinapay no diyo pay naidaton iti Dios. Annuroten dagiti amin a kaputotanyo daytoy nga alagaden iti amin a tiempo iti masakbayan.

Ti Fiesta ti Apit

15 Palabsenyoti pito a lawas manipud iti aldaw kalpasan ti Aldaw a Panaginana sayo idatag ti binettek a trigo a kas datonyo itiApo.

16 Iti maika-50 nga aldaw, ti aldaw kalpasan ti maikapito nga Aldaw a Panaginana, idatagyo itiApoti sabali a baro a daton a makan.

17 Mangyeg ti tunggal familia iti dua a tinapay nga idatonda itiApoa kas naisangsangayan a sagut. Maaramid ti tunggal tinapay iti dua a kilo ti arina nga adda lebadurana ket maidatag itiApoa kas daton a nagtaud iti umuna nga apit a trigo.

18 Malaksid iti tinapay, mangidatag pay ti entero a gimong iti pito nga urbon ti karnero nga agtawen iti maysa, maysa a toro a baka ken dua a kalding nga awan ti depektona. Maidatagda a daton a mapuoran itiApo, agraman ti daton a makan ken ti daton a mainum. Nabanglo daytoy a daton itiApo.

19 Mangidatagkayo met iti kalakian a kalding a daton gapu iti basol ken dua a kalakian nga urbon ti karnero a maysa ti tawenna a daton a pakikappia.

20 Idaton ti padi ti tinapay agraman dagiti dua a karnero a naisangsangayan a sagut itiApopara kadagiti papadi. Nasantoan dagitoy a daton.

21 Iti dayta nga aldaw, dikay agtrabaho no di ket aguummongkayo nga agdaydayaw. Masapul nga annuroten a kankanayon dagiti kaputotanyo daytoy nga alagaden iti sadinoman a lugar a pagnaedanda.

22 Intonaganikayo, diyo gapasen dagiti adda iti igid dagiti talonyo wenno anien dagiti dawa a nalabsanyo; ibatiyo nga agpaay kadagiti napanglaw ken ganggannaet. TiApoti Diosyo.

Ti Fiesta ti Baro a Tawen

23-24 Iti umuna nga aldaw iti maikapito a bulan, ngilinenyo ti naisangsangayan nga aldaw a panaginana ket aguummongkayo nga agdaydayaw inton aguni dagiti trumpeta.

25 Dikay agtrabaho iti uray ania ket mangidatagkayo iti daton a mapuoran itiApo.

Ti Aldaw a Pannakapakawan ti Basol

26-27 Itimaika-10 nga aldaw iti maikapito a bulan, maaramid ti tinawen a seremonia a mangikkat kadagiti basol dagiti tattao. Iti dayta nga aldaw, dikay mangan iti uray ania; aguummongkayo nga agdaydayaw ket mangidatagkayo iti daton a mapuoran itiApo.

28 Dikay agtrabaho gapu ta dayta nga aldaw ti panangaramid iti seremonia a panangikkat iti basol.

29 Saan a maibilang a kas maysa kadagiti tattao ti Dios ti mangan iti aniaman iti dayta nga aldaw.

30 Ket no adda agtrabaho iti dayta nga aldaw, tiApoa mismo ti mangpatay kenkuana.

31 Agpaay daytoy nga alagaden kadagiti amin a kaputotanyo uray sadino ti pagnaedanda.

32 Manipud iti ilelennek ti inititi maikasiam nga aldaw iti bulan agingga iti ilelennek iti maika-10 nga aldaw, ngilinenyo daytoy a naisangsangayan nga aldaw ti panaginana ket dikay mangan iti uray ania.

Ti Fiesta dagiti Abong-abong

33-34 Mangrugiti Fiesta dagiti Abong-abong iti maika-15 nga aldaw iti maikapito a bulan. Agpaut daytoy iti pito nga aldaw.

35 Iti umuna nga aldaw, aguummongkayo nga agdaydayaw ket dikay agtrabaho iti uray ania.

36 Iti las-ud ti pito nga aldaw, inaldaw a mangidatagkayo iti daton a mapuoran. Iti maikawalo nga aldaw, aguummongkayo manen nga agdaydayaw ket mangidatagkay iti daton a mapuoran. Aldaw daytoy ti panagdaydayaw ket dikay agtrabaho iti uray ania.

(

37 Dagitoy dagiti fiesta nga intuding tiApoa panaguummongyo. Kadagita nga aldaw, agidatagkayo kadagiti daton a makan, daton a mapuoran, daton a trigo, daton nga arak ken sakrifisio kas naituding iti inaldaw.

38 Ngilinenyo dagitoy a fiesta a mainayon iti gagangay nga aldaw a Panaginana. Mainayon met dagitoy a daton kadagiti sigud nga isagsagutyo, dagiti datonyo a pagtungpal iti kari, ken dagiti daton nga agtaud iti nakemyo nga ited itiApo.)

39 Inton nalpasen ti panagapityo, pito nga aldaw a rambakanyo daytoy a fiesta a mangrugi iti maika-15 nga aldaw iti maikapito a bulan. Naisangsangayan nga aldaw a panaginana ti umuna ken maikawalo nga aldaw.

40 Iti dayta nga aldaw, mangalakayo kadagiti kasayaatan a bunga dagiti kayo, kadagiti sanga ti palma ken narukbos a kayo ket rambakanyo ti fiesta a pammadayaw itiApoa Diosyo.

41 Pito nga aldaw nga agrambakkayo. Masapul a kankanayon nga annuroten dagiti kaputotanyo daytoy nga alagaden.

42 Pitonto nga aldaw nga agnaed dagiti Israelita kadagiti abong-abong

43 tapno maammoan dagiti kaputotanyo a nagnaed dagiti Israelita kadagiti nanumo nga abong-abong idi inruar ida tiApoidiay Egipto. Isu tiApoa Diosyo.

44 Kastoy ti pannangted ni Moises kadagiti Israelita kadagiti alagaden iti pannakangilin dagiti fiesta a pammadayaw ken ni Yahweh.

Ti Pannakaestimar dagiti Pagsilawan

1 Imbaga ni Yahweh ken ni Moises

2 a bilinenna dagiti Israelita a mangalada iti kasayaatan a lana ti olibo para kadagiti pagsilawan iti Tolda, tapno adda silaw a kanayon a sigagangat sadiay.

3 Rinabii a gangtan ida ni Aaron ket pagpatpatnagenna a sigagangat iti imatang tiApoiti ruar ti kurtina iti sangoanan ti Lakasa ti Tulag nga adda iti Kasasantoan a Lugar. Maannurot daytoy nga alagaden iti agnanayon.

4 Aywanan ni Aaron dagiti pagsilawan iti kandelero a puro a balitok tapno agtalinaedda a sigagangat iti imatang tiApo.

Ti Tinapay a Maidaton ti Dios

5 Mangalakayoiti 12 a kilo nga arina ket manglutokayo iti sangapulo ket dua a tinapay.

6 Maurnos dagitoy iti dua nga intar—innem a tinapay iti tunggal intar—iti rabaw ti lamisaan a nakalupkopan iti puro a balitok iti imatang tiApo.

7 Iti tunggal intar, mangikabilkayo iti puro nga insenso a nayon ti tinapay a kas daton a mapuoran a panglagip itiApo.

8 Masapul a maikabil a kankanayon ti tinapay iti imatang tiApoiti tunggal Aldaw a Panaginana. Agnanayon daytoy nga alagaden ti Israel.

9 Kukuani Aaron ken dagiti kaputotanna ti tinapay. Masapul a kanenda daytoy iti nasantoan a lugar agsipud ta nasantoan unay daytoy a paset ti daton a naidatag itiAponga agpaay kadagiti papadi.

Ti Nalinteg ken Umisu a Pannakaipatay ti Dusa

10-11 Adda maysa a lalaki nga Egipcio ti amana ken Israelita ti inana. Selomit ti nagan ti inana nga anak ni Dibri iti tribu ti Dan. Simrek ti lalaki iti kampo ket nakiriri iti maysa nga Israelita. Bayat ti panagririda, inlunodna ni Yahweh; iti kasta, indatagda ken ni Moises.

12 Pinaguardiaan ni Moises ket inurayda ti pangngeddeng ni Yahweh no ania ti maaramid kenkuana.

13 Kinuna ni Yahweh ken ni Moises,

14 “Iruaryo dayta a lalaki iti kampo. Amin a nakangngeg iti panangilunodna ipatayda ti imada iti ulona ket kalpasanna, batoen ti entero a gimong agingga a matay.

15 Ibagam kadagiti Israelita a no adda mangilunod iti Dios, masapul a sagabaenna ti dusa

16 ket mapapatay. Siasinoman a mangilunod ken ni Yahweh, Israelita man wenno ganggannaet, masapul a batoen ti entero a gimong agingga a matay.

17 “Mapapatayti siasinoman a pumatay iti padana a tao.

18 Ti siasinoman a mangpatay iti animal a kukua ti sabali a tao, masapul a suktanna ti pinatayna. Ta no biag ti inutangmo, biag met ti pagbayadmo.

19 “No dangran ti maysa a tao ti padana a tao, lak-amenna met laeng ti kas iti inaramidna.

20 Nonangtukkol iti tulang, masapul a matukkol met ti maysa kadagiti tulangna. No bulsekenna ti maysa a mata, masapul a mabulsek met ti maysa kadagiti matana; no mangpusi iti maysa a ngipen, masapul a mapusi met ti maysa a ngipenna. No ania ti inaramidna iti padana a tao, kasta met ti maaramid kenkuana.

21 Siasinoman a mangpatay iti animal, suktanna dayta nga animal ngem ti siasinoman a mangpatay iti tao, masapul a mapapatay.

22 Agpaaydaytoy a paglintegan kadakayo nga Israelita ken kadagiti ganggannaet a makipagnaed kadakayo, gapu ta siak ni Yahweh a Diosyo.”

23 Idi imbaga daytoy ni Moises kadagiti Israelita, inruarda ti lalaki iti kampo sada binato agingga a natay. Kastoy ti panangtungpal dagiti Israelita iti bilin ni Yahweh ken ni Moises.

Ti Maikapito a Tawen

1 Imbilinni Yahweh ken ni Moises idiay Bantay Sinai

2 nga itedna dagitoy nga alagaden kadagiti Israelita. Inton addakayon iti daga nga ited tiApokadakayo, diyo mulaan dagiti talonyo tunggal maikapito a tawen a kas pammadayawyo itiApo.

3 Innem a tawen a mulaanyo dagiti talonyo, arbasanyo dagiti ubasyo ken agapitkayo.

4 Ngem iti maikapito a tawen, paginanaenyo ti daga. Daytoy ti tawen a maidaton itiApo. Dikay agmula wenno agarbas.

5 Diyo met apiten ti bunga dagiti nagtubo a mula iti talonyo ken ti bunga ti saan a naarbasan a kaubasanyo; daytoy ti tawen a panaginana ti daga.

6 Nupay saan a namulaan ti daga iti dayta a tawen, addanto latta taraonyo, dagiti tagabuyo, dagiti tangtangdananyo nga agtrabaho, dagiti ganggannaet nga agnaed kadakayo,

7 dagiti tarakenyo ken dagiti atap nga animal iti talonyo. Mabalin a kanen ti amin a maapit iti dayta a daga.

Ti Tawen a Panagisubli kadagiti Sanikua

8 Bumilangkayo iti mamimpito a sagpipito a tawen nga agdagup iti 49 a tawen.

9 Iti maika-10 nga aldaw iti maikapito a bulan, iti Aldaw a Pannakapakawan ti Basol, mangibaonkayo iti mangpuyot iti trumpeta iti entero a pagilian.

10 Kastoy ti panangngilinmo iti maika-50 a tawen ket ipakaammoyo ti pannakawayawaya dagiti amin nga agnaed iti daga. Iti daytoy a tawen, masapul a maisubli kadagiti sigud nga akinkukua wenno kadagiti kaputotanna ti amin a sanikua a nailako. No adda nailako a kas tagabu, masapul nga agsubli iti familiana.

11 Diyo mulaan dagiti talonyo wenno apiten dagiti dawa dagiti sagibo wenno burasen dagiti ubas kadagiti saan a naarbasan a kaubasan.

12 Nasagradoan kadakayo ti entero a tawen; dagiti laeng maapit kadagiti nagtubtubo iti talonyo ti mabalinyo a kanen.

13 Iti daytoy a tawen, maisubli ti amin a nalako a sanikua iti sigud nga akinkukua.

14 Isut’ gapuna a no aglakokayo iti daga iti padayo nga Israelita wenno gumatangkayo iti daga kenkuana, dikay agsisinnaur.

15 No kayatmo a gatangen ti daga ti kaarrubam, bilangem ti tawen manipud iti naudi a Tawen ti Panagisubli kadagiti Sanikua.

16 No ad-adu ti tawen, nanginngina ti bayadna ngem no bassit laeng ti bilang ti tawen, nalaklaka gapu ta ti mailako isu ti bilang ti maapit iti dayta a daga.

17 Diyo sauren ti padayo nga Israelita, ngem tungpalenyo a siraraem tiApoa Diosyo.

Ti Parikut iti Maikapito a Tawen

18 Tungpalenyo ti amin a linteg ken bilin tiApotapno natalged ti panagnaedyo iti daga.

19 Nawadwadto ti apit iti daga, saankayto a mabisinan ket natalgedto ti panagbiagyo.

20 Ngem nalabit nga addanto agsaludsod no anianto ti kanenyo iti maikapito a tawen idinto ta dikay agmula wenno agapit.

21 Bendisionan tiApoti daga iti maikanem a tawen tapno adda apitenyo nga umanay iti dua a tawen.

22 Inton agmulakayo iti maikawalo a tawen, addanto pay la matda iti inapityo iti maikanem a tawen ket umanayto ti taraonyo agingga nga apitenyo dagiti immulayo iti dayta a tawen.

Ti Pannakaisubli dagiti Sanikua

23 Saan a mailako ti dagayo a tagikuaen nga agnanayon ti gumatang. Ngamin, saan a dakayo ti akinkukua iti daga no di ti Dios ket mayarigkayo kadagiti ganggannaet a mapalubosan a mangtalon iti daytoy.

24 No mailako ti daga, masapul a mabigbig ti kalintegan ti sigud nga akinkukua a manggatang met laeng dayta a daga.

25 No pumanglaw ti maysa nga Israelita ket kapilitan nga ilakona ti daga, masapul a ti kaasitgan a kabagianna ti mangsaka.

26 No awan ti kabagianna a manggatang, isunto met la ti manggatang inton rumang-ay manen ti panagbiagna.

27 Isublina iti gimmatang ti gatad a kaibatogan ti maapit kadagiti nabati a tawen sakbay ti Tawen ti Panagisubli kadagiti Sanikua; iti kasta, agsubli met laeng kenkuana ti dagana a saanen a nasken a sakaenna.

28 Ngem no awan ti umanay a kuartana a mangsaka iti daga, agtalinaed ti daga iti gimmatang agingga a madanon ti sumaruno a Tawen ti Panagisubli kadagiti Sanikua. Iti dayta a tawen, maisubli ti daga iti sigud nga akinkukua.

29 No ilako ti maysa a tao ti balayna nga adda iti uneg ti siudad a nabakudan, adda kalinteganna a manggatang manen iti las-ud ti makatawen.

30 Ngem no dina gatangen iti las-ud ti makatawen, agnanayonen a kukua ti gimmatang ken dagiti kaputotanna ti balay ket saanen a maisubli ti balay uray pay iti Tawen ti Panagisubli kadagiti Sanikua.

31 Ngem no dagiti balay nga adda kadagiti ili nga awan bakudna ti mailako, maitulad a kas kadagiti talon a mabalin a gatangen ket masapul a maisublida iti Tawen ti Panagisubli kadagiti Sanikua.

32 Nupay kasta, kadagiti siudad dagiti Levita, adda kalintegan dagiti Levita a mangsaka iti uray ania a tiempo iti aniaman a sanikua nga ilakoda.

33 No ilako ti Levita ti balay a nabangon iti uneg ti nabakudan a siudad, no saan a masaka, masapul a maisubli iti Tawen ti Panagisubli kadagiti Sanikua.Ngamin, agnanayon a kukua dagiti Levita dagitoy a balay a tawidda iti ili nga Israel.

34 Ngem saan a mabalin a mailako dagiti pagpastoran iti lawlaw dagiti siudadda, ta sanikuada dagitoy iti agnanayon.

Pautang kadagiti Napanglaw

35 Nopumanglaw ti padayo nga Israelita nga agnaed iti asidegyo ket dina kabaelan a biagen ti bagina, masapul a tulonganyo a kas iti ganggannaet tapno maituloyna ti agnaed iti asidegyo.

36 Diyo paanakan ti uray ania nga ipabulodyo kenkuana; agbutengkayo iti Dios ket ipalubosyo nga agnaed ti padayo nga Israelita iti asidegyo.

37 Diyopaanakan ti kuarta nga ipautangyo kenkuana ket diyo pagganansiaan ti taraon nga ilakoyo kenkuana.

38 Daytoy ti bilin tiApoa Diosyo a nangiruar kadakayo idiay Egipto tapno itedna kadakayo ti daga ti Canaan ken tapno agbalin a Diosyo.

Ti Pannakawayawaya dagiti Tagabu

39 Nopumanglaw ti padayo nga Israelita nga agnaed iti asidegyo ket ilakona kadakayo ti bagina a kas tagabu, diyo pagbalinen a tagabu nga agserbi kadakayo.

40 Agnaed iti sidongyo a kas mangmangged ket agserbi agingga iti sumaruno a Tawen ti Panagisubli kadagiti Sanikua.

41 Iti dayta a tawen, wayawayaanyo agraman dagiti annakna tapno agsublida iti nagtaudanda ken iti sanikua dagiti kapuonanda.

42 Adipen tiApodagiti Israelita ket isu ti nangiruar kadakuada idiay Egipto. Saanda a mailako a kas tagabu.

43 Diyo parigaten ida. Agbutengkayo ketdi iti Diosyo.

44 No masapulyo ti tagabu, mabalinyo ti gumatang manipud kadagiti pagilian iti likmutyo.

45 Mabalinyo met a gatangen dagiti annak dagiti ganggannaet a makipagnaed kadakayo. Mabalinyo a tagikuaen dagiti kasta nga ubbing a mayanak iti dagayo;

46 mabalinyo nga ipatawid ida kadagiti annakyo ket agserbida kadakuada bayat ti panagbiagda. Ngem diyo parigaten ti siasinoman a padayo nga Israelita.

47 No adda bumaknang a ganggannaet nga agnaed iti dagayo, no pumanglaw met ti padayo nga Israelita ket ilakona ti bagina a tagabu iti dayta a ganggannaet wenno iti kameng ti familiana,

48-49 kalpasan ti pannakailakona, adda pay laeng kalintegan a magatang manen tapno mawayawayaan. Mabalin a gatangen ti maysa kadagiti kakabsatna wenno ti ulitegna wenno ti kasinsinna wenno ti siasinoman nga asideg a kabagianna. Wenno, no adu ti matgedanna, mabalinna a gatangen met laeng ti pannakawayawayana.

50 Makiuman iti gimmatang kenkuana ket bilangenda dagiti tawen manipud pannakailakona agingga iti masungad a Tawen ti Panagisubli kadagiti Sanikua sada ituding ti bayadanna iti pannakawayawayana kas maibatay iti sueldo ti mangmangged.

51-52 Masapul nga isublina ti inggatangna a maksayan segun ti bilang ti nabati a tawen

53 a kasla mangmangged a masueldoan iti tinawen. Masapul a saan a parigaten ti apona a kas maysa a tagabu.

54 No saan a mawayawayaan iti aniaman kadagitoy a pamuspusan, masapul a mawayawayaan iti masungad a Tawen ti Panagisubli kadagiti Sanikua, agraman dagiti annakna.

55 Saan a mabalin a tagabu iti agnanayon ti maysa nga Israelita agsipud ta adipen tiApodagiti tattao ti Israel. Inruarna ida idiay Egipto; isu tiApoa Diosda.

Mabendisionan dagiti Natulnog

1 Kinunani Yahweh, “Dikay agaramid kadagiti imahen wenno mangipasdek kadagiti estatua, adigi a bato wenno nasukog a bato a pagrukbaban. Siak ni Yahweh a Diosyo.

2 Ngilinenyo dagiti fiestaken raemenyo ti nasagradoan a lugar a pakadaydayawak. Siak ni Yahweh.

3 “Noannurotenyo dagiti lintegko ken tungpalenyo dagiti bilinko,

4 pagtudoekto iti umisu a panawen tapno adda maapit iti daga ken agbunga dagiti kayo.

5 Nawadwadto ti apityo ket agap-apitkayto pay laeng iti trigo uray no panagburasen iti ubas; agburburaskayto pay laeng iti ubas uray no panagmumulan iti trigo. Addanto amin a taraon a kayatyo a kanen ket natalgedto ti panagbiagyo iti dagayo.

6 “Agturayto ti kappia iti daga ket mabalinyonto ti maturog nga awan ti pagbutnganyo. Pukawekto dagiti narungsot nga animal iti daga ket awanton ti gubat sadiay.

7 Parmekenyonto dagiti kabusoryo;

8 kabaelanto ti lima kadakayo a parmeken ti sangagasut ket ti sangagasut mabalindanto a parmeken ti sangapulo ribu.

9 Bendisionankayto ket paraburankayto iti adu nga annak; tungpalekto ti karik iti tulagantayo.

10 Nawadwadto unay ti apityo ket umanayto a taraonyo iti makatawen; wen, adunto pay la ti sobrayo, ket masapul nga ibellengyo ti nabati iti baak nga apit a pempenyo tapno adda pangikabilan iti baro nga apit.

11 Makipagnaedakto kadakayo iti Toldak ket pulos a dikayto tallikudan.

12 Kaduakaytoiti sadinoman a papananyo; siakto ti Diosyo ket dakayto dagiti tattaok.

13 Siak, ni Yahweh a Diosyo, ti nangiruar kadakayo idiay Egipto tapno saankayon a matagabu. Inikkatko ti sangol a nangimameg kadakayo, isu a mabalinyo ti magna nga awan ti kabainyo.”

Ti Dusa ti Nasukir

14 Kinunani Yahweh, “No diyo tungpalen dagiti bilinko,

15 no diyo ipangag dagiti bilin ken lintegko ket salungasingenyo ti tulagko,

16 kellaatto nga idissuorko dagiti didigra kadakayo—dagiti saan a maagasan a sakit ken gurigor a mamagbulsek kadakayo a pakaigapuan ti main-inut a pannakagudas ti biagyo. Diyonto pakairanudan dagiti immulayo gapu ta kanento dagiti kabusoryo.

17 Busorenkayto tapno parmekendakayto dagiti kabusoryo; iturayandakayto dagiti manggurgura kadakayo. Iti butengyo, agtataraykayto uray no awan mangkamkamat kadakayo.

18 “No iti laksid amin dagitoy ket didak pay la ipangag, mamimpitonto ti kadagsen ti dusa nga ipatayko kadakayo kadagiti basolyo.

19 Ikkatekto ti kinatangsityo; awanto ti tudo ket natikag ken natangkento ti dagayo a kas iti landok.

20 Awanto ti serserbi ti pagbambannoganyo, agsipud ta awanto ti maapit kadagiti dagayo ken dinto agbunga dagiti mulayo a kayo.

21 “No itultuloyyo latta ti mangsukir kaniak ket didak ipangag, nayonakto manen iti mamimpito ti dusayo.

22 Bulosakto dagiti narungsot nga animal nga umay kadakayo, ket patayendanto dagiti annakyo ken rangrangkayendanto dagiti animalyo. Bassitto la ti matda kadakayo agingga nga awan matagtagitao kadagiti kalsadayo.

23 “No kalpasan amin dagitoy a dusa ket didak pay la ipangag no di ket itultuloyyo ti mangsukir kaniak,

24 busorenkayto ket mamimpitonto a nadagdagsen ngem ti immuna ti dusa nga ipatayko kadakayo.

25 No salungasingenyo ti tulagantayo, yegkonto ti gubat a pangdusak kadakayo; no agkamangkayo kadagiti siudadyo, mangyegakto kadagiti sakit a di maagasan ket kapilitanto a sumukokayo kadagiti kabusoryo.

26 Kissayakto ti taraonyo agingga a maymaysanto la nga urno ti paglutoan ti sangapulo a babbai iti amin a tinapay nga adda kadakuada; in-inutendanto nga ited ti kanenyo, ngem saankayonto a mabsog.

27 “No iti laksid amin dagitoy, itultuloyyo latta ti mangsukir kaniak ket didak ipangag,

28 bumtakto ti pungtotko kadakayo ket mamimpitonto a nadagdagsen ngem ti immuna nga idissuorko kadakayo a dusa.

29 Kasta unayto ti panagbisinyo ket kanenyonto dagiti mismo nga annakyo.

30 Dadaelekto dagiti lugar a pagdaydayawanyo kadagiti turod, rebbaekto dagiti altar a pagpupuoranyo iti insenso ket ipurruakkonto dagiti bangkayyo kadagiti natumba a didiosenyo. Iti kasta unay a gurak,

31 rebbaekto dagiti siudadyo, dadaelekto dagiti lugar a pagrukrukbabanyo ket diakto awaten dagiti idatonyo.

32 Dadaelekto a maminpinsan ti dagayo ket urayto la makigtot dagiti kabusor a makakita iti napasamak. Sakupendanto ti daga.

33 Yegkonto ti gubat kadakayo ket iwarawarakayto kadagiti nadumaduma a pagilian. Awanton ti matagtagitao iti dagayo ket aglangalangto dagiti siudadyo.

34-35 Iti kasta, adunto a tawen nga aginana ti daga; wen, aginananto bayat ti pannakabaludyo iti daga dagiti kabusoryo.

36 “Dakayo nga adda iti daga dagiti kabusoryo, natakrotkayto ket agtataraykayo uray karasakas laeng ti bulong a mayang-angin ti mangngegyo. Kasla kamkamatendakayto iti paggugubatan ket mapasagkayto uray no awan ti kabusor iti asidegyo.

37 Agdidinnungparkayto uray no awan ti mangkamkamat kadakayo ket diyonto kabaelan a sarangten ti kabusoryo.

38 Mataykayto iti daga a nakaibellenganyo ket alun-onennakayto ti daga dagiti kabusoryo.

39 Dakayo a sumagmamano a makalasat iti daga dagiti kabusoryo, main-inutkayto a mapukaw gapu iti basolyo ken gapu iti basol dagidi kapuonanyo.

40 “Ngem ipudnonto dagiti kaputotanyo dagiti basbasolda ken dagiti basbasol dagidi kapuonanda a nangsalungasing ken nangbusor kaniak

41 a nakaigapuan ti panangbusorko kadakuada ket imbellengko ida iti daga dagiti kabusorda. Inton agpakumbaba dagiti kaputotanyo ket naikarodan ti dusa ti basolda ken ti panangsukirda,

42 lagipektoti tulagko kada Jacob, Isaac ken Abraham ket pabaroekto ti karik nga itedko ti daga kadagiti tattaok.

43 Ngem umuna pay a mapapanaw dagiti tattao tapno naan-anay nga aginana ti daga ken masapul nga ikaroda ti naan-anay a dusa iti pananglaksidda kadagiti linteg ken bilinko.

44 Ngem uray no kasta, diakto baybay-an wenno dadaelen a mamimpinsan ida bayat ti kaaddada pay laeng iti daga dagiti kabusorda. Ta no kasta ti mapasamak, mawaswas ti pannakitulagko kadakuada. Siak ni Yahweh a Diosda.

45 Pabaroekto ti tulagko kadagidi kapuonanda idi impakitak ti bilegko kadagiti amin a pagilian babaen iti panangiruarko kadagiti tattaok idiay Egipto tapno siak ni Yahweh, agbalinak a Diosda.”

46 Dagitoy ti amin a linteg ken bilin nga inted ni Yahweh ken ni Moises idiay Bantay Sinai nga annuroten dagiti Israelita.

Dagiti Annuroten kadagiti Sagut a Maited ken ni Yahweh

1 Inted ni Yahweh ken ni Moises

2 dagiti sumaganad nga alagaden nga agpaay kadagiti Israelita. No naited ti maysa a tao itiApoa kas pagtungpal iti naisangsangayan a kari, mabalin a mawayawayaan babaen iti pannakaited dagitoy a gatad a kas bayad,

3-7 segun ti naituyang a pagtimbangan:

–nataengan a lalaki, agtawen iti duapulo agingga iti innem a pulo: limapulo a bagi ti pirak

–nataengan a babai: tallopulo a bagi ti pirak

–agtutubo a lalaki, agtawen iti lima agingga iti duapulo: duapulo a bagi ti pirak

–agtutubo a babai: sangapulo a bagi ti pirak

–maladaga a lalaki, lima a tawen nga agpababa: lima a bagi ti pirak

–maladaga a babai: tallo a bagi ti pirak

–lakay nga agtawen iti nasursurok ngem innem a pulo: sangapulo ket lima a bagi ti pirak

–baket nga agtawen iti nasurok nga innem a pulo: sangapulo a bagi ti pirak

8 No napanglaw ti nagkari ket dina kabaelan a bayadan ti naituyang a gatad, idatagna iti padi ti tao a nagkari ket ikeddeng ti padi ti nababbaba a gatad, segun ti kabaelanna nga ibayad.

9 No animal a mabalin nga idaton itiApoti naikari, maibilang ngarud a nasantoan ti amin a sagut a maited itiApo,

10 ket saan a mabalin a suktan dayta a tao iti sabali nga animal. No sukatanna, kukua tiApodagiti dua nga animal.

11 No animal a maibilang a narugit ket saan a mabalin nga idaton itiApo, ipan ti tao daytoy iti padi.

12 Ituding ti padi ti gatad ti animal, kas maibatay iti kalidadna ket saanen a mabaliwan.

13 No kayat ti tao a gatangen ti animal, masapul nga itedna ti naituding a gatadna a manayonan iti apagkalima ti gatad ti animal.

14 No balay ti maidaton itiApo, ikeddeng ti padi ti gatadna segun ti klase ti balay, ket saanen a mabaliwan ti naituding a gatadna.

15 No kayat a gatangen met laeng ti nangidaton iti balay, bayadanna ti naituding a gatad ket nayonanna iti apagkalima ti gatad ti balay.

16 No idaton ti maysa a tao ti maysa a paset ti dagana itiApo, maikeddeng ti gatadna segun ti kaadu ti bukel a maimula. Sangapulo a bagi ti pirak ti gatad ti 20 a kilo ti bin-i ti sebada.

17 No idatonna ti talon ti Tawen ti Panagisubli kadagiti Sanikua, saan a maksayan ti naikeddeng a gatad.

18 Ngem no naladladaw ngem iti daytoy ti panangidatonna, pattapattaen ti padi ti gatad ti talon segun ti bilang dagiti nabati a tawen sakbay ti Tawen ti Panagisubli kadagiti Sanikua ket ikeddengna ti nalaklaka a gatad.

19 No kayat ti tao a nangidaton a sakaen ti daga, masapul a bayadanna ti naikeddeng a gatad a manayonan iti apagkalima ti gatad ti daga.

20 No ilakona ti talon a dina umuna a subboten itiApo, mapukawna ti kalinteganna a manggatang manen.

21 Iti sumaruno a Tawen ti Panagisubli kadagiti Sanikua, agbalin ti daga a kukua tiApoiti agnanayon; tagikuaen dagiti papadi.

22 No maidaton itiApoti nagatang a talon,

23 pattapattaen ti padi ti gatadna segun ti bilang ti tawen sakbay ti Tawen ti Panagisubli kadagiti Sanikua, ket masapul nga itedna ti gatad iti dayta met la nga aldaw; kukua tiApoti kuarta.

24 Iti Tawen ti Panagisubli kadagiti Sanikua, maisubli ti talon iti sigud nga akinkukua wenno kadagiti kaputotanna.

25 Maibatay ti amin a gatad iti naituyang a pagtimbangan.

26 Sigud a kukua tiApoti inauna nga anak dagiti animal isut’ gapuna a saan a mabalin a maited kenkuana a daton iti bukod a nakem. Kukua tiApoti urbon ti baka, karnero wenno kalding

27 ngem ti inauna nga anak ti animal a maibilang a narugit mabalin a masubbot segun ti naituding a gatad a mainayon iti apagkalima iti gatadna. No saan a masubbot, mabalin nga ilako iti siasinoman iti naikeddeng a gatad.

28 Saana mabalin nga ilako wenno subboten ti naidaton itiApoa saan a naibaga no ania a gapu,tao man, animal wenno daga. Kukua tiApodaytoy iti agnanayon.

29 Saan a mabalin a subboten, uray ti tao a naidatag a daton a di naibaga no ania a gapu; masapul a mapapatay.

30 KukuatiApoti amin nga apagkapullo a maapit iti daga, trigo man wenno frutas.

31 No kayat ti tao a subboten ti apagkapullo, masapul nga itedna ti naituding a gatad a manayonan iti apagkalima ti gatad dagitoy.

32 Kukua tiApoti maysa iti tunggal sangapulo a taraken nga animal. No mabilang dagiti animal, kukua tiApoti tunggal maikasangapulo nga animal.

33 Saan a mabalin ti akinkukua nga urnosen dagiti animal tapno mapili dagiti saan a nasayaat nga animal ken dina met mabalin a sukatan ti animal a napili. No suktanna ti maikasangapulo nga animal iti sabali nga animal, kukua tiApodagiti dua nga animal ket dida mabalin a subboten.

34 Dagitoy dagiti bilin nga inted ni Yahweh ken ni Moises idiay Bantay Sinai nga agpaay nga annuroten dagiti Israelita.