Category: Nahum

1 Daytoyti mensahe maipapan iti Nineve, ti pakasaritaan ti parmata ni Nahum a taga-Elkos.

Ti Pungtot ni Yahweh iti Nineve

2 Ni Yahweh managimon a Dios ken managibales;

dusaenna dagiti bumusor kenkuana.

Iti pungtotna, balsenna ida.

3 Saan a nalaka nga agpungtot ni Yahweh,

ngem dakkel ti pannakabalinna,

ket dusaenna a dusaen dagiti nakabasol.

Iti pagnaan ni Yahweh, tumaud dagiti bagio.

Dagiti ulep ti pannakatapok a patauden dagiti sakana.

4 Bilinenna ti baybay ket agmaga;

pagmagaenna ti amin a karayan.

Malaylay dagiti talon ti Basan,

matay amin a mula iti Bantay Carmel

ken magango dagiti sabong iti Bantay Libano.

5 Agkintayeg dagiti bantay iti imatang ni Yahweh;

marunaw dagiti turod iti sangoananna.

Agginggined ti daga no agparang ni Yahweh;

agtigerger ti lubong ken dagiti amin a tattao.

6 No agpungtot ni Yahweh,

siasino ti makalasat?

Siasino ti makalisi

iti gumilgil-ayab nga ungetna?

Idissuorna ti umap-apuy a pungtotna,

matumtumek dagiti bato iti imatangna.

7 Naimbag ni Yahweh;

salaknibanna dagiti tattaona iti tiempo ti riribuk;

aywananna dagiti agkamang kenkuana.

8 Mamimpinsan a dadaelenna dagiti kabusorna,

kas iti panangdadael ti nadawel a layus;

ipanna dagiti bumusor kenkuana iti pakatayanda.

9 Ania ti isiksikatyo nga aramiden itiApo?

Gibusannakayto amin;

awan ti makapidua a mangbusor kenkuana.

10 Mauramkayto agingga a dumapukayo, dakayo a mammartek,

a kas iti siitsiitan a mula ken garami a nagango.

11 Nineve, adda timmaud kenka a tao a pasig a dakes ti panggepna, ket insikatna tiApo.

12 Kastoy ti kuna tiApokadagiti tattaona nga Israelita: “Uray no napigsa ken adu dagiti taga-Asiria, madadael ken mapukawdanto. Pinagsagabakayo, dakayo a tattaok, ngem dikayton pagsagabaen.

13 Gibusakon ti pannakabalin ti Asiria kadakayo, ket pugsatek dagiti kawar a nangbalud kadakayo.”

14 Kastoy ti intuding tiApomaipapan iti Asiria: “Malipatandanton a mamimpinsan. Dadaelekto dagiti imahen nga adda kadagiti templo dagiti didiosenda. Mangisagsaganaak iti tanem dagiti taga-Asiria—saanda a maikari nga agbiag.”

15 Kitaenyo,adda babaonen a magmagna kadagiti tapaw dagiti bantay a mangyeg iti naimbag a damag! Umay tapno ipakaammona ti panagballigi. Dakayo a tattao ti Juda, selebraranyo dagiti naituding a fiestayo, ket itedyo iti Dios ti sinapataanyo nga ited kenkuana. Saanton a rauten dagiti managdakdakes ti dagayo. Nadadaeldan a namimpinsan!

Ti Pannakatnag ti Nineve

1 Nineve, madama a rarautendaka!

Addan ti pannakabalin a mangrebbek kenka!

Bantayam dagiti sarikedked!

Guardiaam ti dalan!

Agsaganaka a makigubat!

(

2 Isublin ni Yahweh ti dayag ti Israel,

ti dayagna sakbay ti panangsamsam kenkuana dagiti kabusorna.)

3 Siiiggem iti nalabaga a kalasag

dagiti soldado a kabusor;

siaarruatda iti nalabaga a pagan-anay.

Agsagsaganada a dumarup!

Gumilgil-ayab a kasla apuy

dagiti luganda a pakigubat.

Saan a makatalna dagiti kabalioda.

4 Napegges nga agtaray dagiti lugan kadagiti kalsada;

agsubli-sublida a sipapardas kadagiti lugar a nalawa.

Gumilgil-ayabda a kas iti sumsumged a silaw;

sumiwet-siwetda a kas iti kimat.

5 Maayaban dagiti ofisiales;

ipanguloanda dagiti soldadoda.

Agdardaras dagiti rumaut a mapan iti bakud,

ket ikabilda ti paglinged kadagiti pagrakrakda.

6 Aglukat dagiti ruangan iti igid ti karayan;

mapno ti palasio iti buteng.

7 Maitalaw a kas balud ti reyna;

agsangit ken aganug-og dagiti adipenna;

dandanogenda dagiti barukongda,

a mangipakita iti ladingitda.

8 Agtataray dagiti tattao ti Nineve,

kas iti danum ti nasawang a tambak ti karayan.

“Agsardengkayo! Agsardengkayo!” yik-ikkisda,

ngem awan ti agsubli uray maysa.

9 Samsamenyo dagiti pirak ken balitok!

Napno ti siudad kadagiti gameng.

10 Nadadaelen ti Nineve;

naglangalang ken nabaybay-anen.

Mapukawen ti namnama gapu iti buteng;

agtigerger dagiti tumeng,

mapukaw ti pigsa;

bumsag dagiti tattao.

11 Sadinot’ ayan ti siudad,

a mayarig iti rukib dagiti leon,

ti lugar a pakataraonan dagiti urbon a leon,

ti papanan ti kalakian a leon ken ti urbonna,

ket awan ti pakaan-anoanda?

12 Pinatay ti leon ti natiliwna,

ket rinangrangkayna a taraon

dagiti urbon ken asawana.

Pinunnona ti rukibna

kadagiti narangrangkay a karne.

13 “Siak ti kabusormo,” kuna ni Yahweh a Mannakabalin-amin. “Padapuekto dagiti luganmo a pakigubat. Matayto dagiti soldadom iti gubat, ket pukawekto dagiti amin a sinamsammo. Agpatingganton ti pannakabalinmo ditoy lubong.”

1 Asi pay ti Nineve, ti siudad

nga ulbod ken mammapatay!

Napno iti kinabaknang a sinamsam ken inagaw.

2 Denggenyo ti kanabsiit ti saplit,

ti karadakad dagiti pilid,

ti dalagudog dagiti kabalio,

ti darison dagiti lugan a pakigubat.

3 Dumarup dagiti nakakabalio,

sumilap dagiti kampilan, gumilap dagiti gayang!

Ginabsuon dagiti bangkay,

di mabilang dagiti natay.

Maitikleb dagiti tattao

kadagiti agkaiwara a naidasay.

4 Madusdusan ti balangkantis a Nineve,

makagargari ken makapatay ti pintasna.

Kinayawanna dagiti nasion,

ket ginargarina ida.

5 Kuna ni Yahweh a Mannakabalin-amin,

“Dusaenkanto, Nineve!

Labusankanto tapno makitadaka dagiti pagilian

ket maimatanganda ti amin a pakaibabainam.

6 Ipakitakto kenka ti gurak,

ket gaburankanto iti rugit;

maalliawto dagiti tattao a kumita kenka.

7 Itarayandakanto ti amin a kumita kenka.

Kunadanto, ‘Narban ti Nineve.

Siasino ti makipagrikna kenkuana?

Siasinonto ti mayat a mangliwliwa kenkuana?’”

8 Nineve, nasaysayaatka kadi ngem ti Tebes a kabesera ti Egipto? Adda met karayanna a mangsalaknib kenkuana a kas iti bakud—ti Karayan Nile ti sarikedkedna.

9 Awan patingga ti pannakabalinna, inturayanna ti Sudan ken Egipto. Kaduana idi ti Libia.

10 Ngem kaskasdi a naitalaw a kas balud dagiti taga-Tebes. Nakabkabil agingga a natay dagiti annakda iti amin a nagsulian ti kalsada. Naipanaw a sikakawar dagiti mararaem a tattaona, ket nagbibingayan dagiti nangitalaw kadakuada.

11 Uray sika, Nineve, mabartek ken agwasangwasangkanto. Agbirokkanto met iti pagkamangam manipud kadagiti kabusormo.

12 Mayarigto dagiti amin a sarikedkedmo kadagiti igos a naluomen ti bungada. No magunggonda, agtinnag dagiti bungada iti ngiwat ti mangan!

13 Kasla babbai dagiti soldadom, ket awan gaway ti pagiliam kadagiti kabusormo. Mauramto dagiti balunet dagiti ruanganmo.

14 Sumakdoka iti danum a pangsagana iti pannakalakub, ket pabilgem dagiti sarikedkedmo. Lutlotem ti daga, ket isaganam dagiti pagsukogan a pagaramid kadagiti ladrilio.

15 Uray agan-anoka, mauram wenno mapapataykanto iti paggugubatan. Maikisapkanto a kas kadagiti mula nga ibusen dagiti dudon.

Immaduka a kas iti pangen ti dudon!

16 Ad-adu dagiti pagtagtagilakoem ngem dagiti bituen sadi langit. Ngem ita, awandan a kas kadagiti dudon a tumayab ken pumanaw.

17 Dagiti ofisialesmo kasda la pangen ti dudon a kumpet iti bakud no nalam-ek. Ngem no aginiten, tumayabda ket awan ti makaammo iti pagturonganda.

18 Sika, ari ti Asiria, natayen dagiti gobernadormo, ket matmaturogen iti agnanayon dagiti natan-ok a tattaom! Nawarawara dagiti tattaom kadagiti bambantay, ket awanen ti mangyawid kadakuada.

19 Saanen a maagasan dagiti dunormo, ket saanen a maimbagan dagiti sugatmo. Maragsakanto dagiti amin a makadamag, iti pannakadadaelmo ket agsipatdanto iti ragsakda. Adda aya nakalibas iti saan nga agpatingga a kinaranggasmo?