Category: Nehemias

1 Daytoy ti salaysay ni Nehemias nga anak ni Hacalias.

Madanagan ni Nehemias iti Jerusalem

Siak ni Nehemias. Addaak idi idiay Susa a kabesera a siudad, iti bulan ti Kislev, iti maika-20 a tawen a panagturay ni Artaxerxes nga emperador.

2 Immay sadiay ni Hanani a maysa kadagiti kakabsatko ken ti sumagmamano a lallaki. Naggapuda idiay Juda. Dinamagko kadakuada ti kasasaad dagiti nagsubli a Judio, isuda a naitalaw idi a kas balud, ken ti Jerusalem.

3 Imbagada nga agsagsagabada iti kasta unay ket lalaisen ida dagiti ganggannaet nga agnanaed iti kabangibang a lugar. Saan pay kano a nabangon dagiti bakud ti Jerusalem, ket di pay natarimaan dagiti nauram a ruanganna.

4 Idi mangngegko daytoy, nagtugawak ket nagsangitak.

Adu nga aldaw a nagladladingitak ket saanak a nangnangan. Nagkararagak iti Dios.

5 Kinunak, “Apoa Dios ti Langit! Naindaklanka, ket agbutengkami kenka. Mapagtalkanka ket tungpalem ti katulagam kadagiti tattao nga agayat kenka ken agtungpal kadagiti bilbilinmo.

6 Kitaennak, OApo, ket denggem ti kararagko iti aldaw ken rabii a panangidawdawatko kadagiti Israelita nga adipenmo. Ipudnok a nagbasolkami, dakami nga Israelita. Wen, nagbasolkami, siak ken dagiti kapuonak.

7 Dakes dagiti inaramidmi ket maibusorda kenka. Dimi tinungpal dagiti bilin ken linteg nga intedmo babaen ken ni Moises nga adipenmo.

8 Lagipemita ti imbagam ken ni Moises, ‘Dakayo nga Israelita, no saankayo nga agtalinaed a napudno kaniak, iwaraswaraskayto kadagiti amin a nasion.

9 Ngemno agsublikayo kaniak ket aramidenyo dagiti imbilbilinko kadakayo, isublikayto iti lugar a pinilik a pagdaydayawanyo kaniak, uray pay no naiwarawarakayo agingga iti ungto ti daga.’

10 “OApo, dagitoy dagiti adipenmo, wen, dagiti tattaom. Inispalmo ida babaen iti naindaklan a pannakabalin ken bilegmo.

11 Timudem koma ti kararagko ken dagiti kararag dagiti amin nga adipenmo a mayat nga agdayaw kenka. Pagballigiennak ita nga aldaw, ket tignayem ti ari tapno kaasiannak.”

Kadagidi nga aldaw, siak ti nangimaton iti pannakaiserbi ti arak iti lamisaan ti ari.

Mapan ni Nehemias idiay Jerusalem

1 Bulan idi ti Nisan, iti maika-20 a tawen a panagturay ni Artaxerxes. Iti maysa nga aldaw a mangmangan ti ari, impanko ti arak kenkuana. Idi pay laeng a nadlawna a nalidayak, isut’

2 gapuna a sinaludsodna, “Apay a nalidayka? Apay a saanka a naragsak idinto a saanka met a masakit?”

Nagdanagak iti daytoy,

3 ketkinunak, “Agbiag koma ti Natan-ok nga Ari iti agnanayon! Kasano a mailingedko ti lidayko? Rebba pay laeng ti siudad a nakaitaneman dagiti kapuonak ken di pay nabangon dagiti nauram a ruanganna.”

4 Sinaludsod ti ari, “Ania ngarud ti kayatmo?”

Nagkararagak iti Dios ti Langit

5 ket kalpasanna, kinunak iti ari, “No maragsakan kaniak ti Natan-ok nga Ari ket kayatna a patgan ti dawatko, palubosannak koma a mapan idiay Juda tapno bangonek manen ti siudad a nakaitaneman dagidi kapuonak.”

6 Agtugtugaw idi ti reyna iti abay ti ari. Sinaludsod ti ari no kasano ti kabayag ti kaawanko ken kaano nga agsubliak. Imbagak kenkuana ket immannugot iti dawatko.

7 Kalpasanna, dinawatko iti ari a pakuyogannak kadagiti suratna para kadagiti gobernador iti probinsia iti Laud-ti-Eufratesket ibilinna a kitaenda nga awan pakaan-anoak agingga a makadanonak idiay Juda.

8 Indawatko pay a suratanna ni Asaf, ti agay-aywan iti bakir a kukua ti ari tapno ikkannak kadagiti kayo a masapul kadagiti ruangan ti sarikedked ti Templo, kadagiti bakud ti siudad ken iti balay a pagnaedak. Pinatgan ti ari ti amin a dawatko agsipud ta adda ti Dios kaniak.

9 Pinakuyogannak ti ari iti sumagmamano nga ofisiales ti armada ken maysa a bunggoy dagiti mannakigubat a nagkabalio. Nagturongak iti Laud-ti-Eufrates ket intedko dagiti surat ti ari kadagiti gobernador.

10 Ngem nakapungtot ni Sanballat a taga-Bet Horon ken ni Tobias nga ofisial nga Ammonita idi nadamagda nga adda simmangpet nga agtrabaho iti pagimbagan dagiti Israelita.

11 Nagtarusak idiay Jerusalem ket nagyanak sadiay iti tallo nga aldaw.

12 Awan nangibagbagaak iti imbilin ti Dios kaniak nga aramidek iti Jerusalem. Iti tengnga ti rabii, bimmangonak, inayabak ti sumagmamano kadagiti kakaduak ket rimmuarkami. Ti la nagsakayak nga asno ti intugotmi nga animal.

13 Rabii pay laeng idi panawak ti siudad. Nagnaak iti Ruangan ti Tanap iti laud, ket nagpa-abagatanak iti Burayok ti Dragon saak nagturong iti Ruangan a Pagibellengan iti Rugit. Bayat ti ilalabasko, sinukimatko dagiti narba a bakud ti siudad ken dagiti ruangan a nauram.

14 Kalpasanna, nagpa-amiananak a napan iti Ruangan ti Ubbog ken iti Tangke ti Ari. Awan mabalin a pagnaan ti asno a pagsaksakayak kadagiti rebba,

15 isu a nagturongak iti tanap ket intultuloyko a sinukimat ti bakud. Kalpasanna, nagsubliak iti siudad, iti isu met laeng a nagnaak iti Ruangan ti Tanap.

16 Saan nga ammo dagiti agtuturay iti siudad no sadino ti napanak wenno ania ti ar-aramidek. Awan pay ngamin imbagbagak kadagiti Judio—kadagiti papadi, kadagiti papangulo, kadagiti ofisiales, wenno iti siasinoman a makipagtrabahonto.

17 Kinunak kadakuada, “Makitayo ti agdama a parikuttayo. Narba ti Jerusalem ket nauram dagiti ruanganna. Agtitinnulongtayo a mangbangon manen kadagiti bakud tapno saantayon a maibabain.”

18 Imbagak kadakuada no kasano ti panangtarabay ken panangtulong ti Dios kaniak. Imbagak met kadakuada ti sao kaniak ti ari.

“Rugiantayo ngaruden,” insungbatda, isu a nagsaganada a mangirugi iti trabaho.

19 Ngem idi madamag da Sanballat, Tobias ken Gesem nga Arabo ti aramidenmi, kinatkatawaan ken linalaisdakami. Kinunada, “Ania ti kayatyo a paneknekan iti daytoy nga aramidenyo? Busorenyo kadi ti ari?”

20 “Pagballigiennakaminto ti Dios ti Langit,” insungbatko. “Dakami dagiti adipenna ket rugianmin ti agbangon. Awan ti kalinteganyo a mangtagikua iti aniaman iti Jerusalem, ket awan met pasetyo iti pakasaritaanna.”

Mabangon manen ti Bakud ti Jerusalem

1 Kastoy ti pannakabangon manen ti bakud ti siudad.Ni Eliasib a Nangato a Padi ken dagiti padana a papadi ti nangbangon iti Ruangan ti Karnero. Kinonsagrarda ti ruangan ket insublida dagiti ridaw iti lugarda. Binangonda manen ti bakud agingga iti Torre dagiti Sangagasut ken iti Torre ni Hananel.

2 Dagiti lallaki a taga-Jerico ti nangtarimaan iti sumaruno a paset.

Ni Zaccur nga anak ni Imri ti nangbangon iti sumaruno a paset.

3 Dagiti lallaki nga annak ni Hassenaa ti nangbangon iti Ruangan ti Ikan. Inkabilda dagiti aoanan ken dagiti ridaw, ket inkabilda dagiti pagibalunetan ken dagiti balunet a pangserra iti ruangan.

4 Ni Meremot nga anak ni Urias ken apoko ni Hakkoz ti nangbangon iti sumaruno a paset.

Ni Mesullam nga anak ni Barakias ken apoko ni Mesezabel ti nangbangon iti sumaruno a paset.

Ni Zadok nga anak ni Baana ti nangbangon iti sumaruno a paset.

5 Dagiti lallaki a taga-Tekoa ti nangbangon iti sumaruno a paset. Ngem di kayat dagiti mabigbigbig a lallaki iti ili ti agtrabaho iti nadagsen, ti trabaho nga inted dagiti mangimaton kadakuada.

6 Ni Joyada nga anak ni Pasea ken ni Mesullam nga anak ni Besodias ti nangbangon iti Ruangan ti Jesana.Inkabilda dagiti aoanan ken ridaw, kasta met dagiti pagibalunetan ken dagiti balunet a pangserra iti ruangan.

7 Ni Melatias a taga-Gabaon, ni Jadon a taga-Meronot ken dagiti lallaki a taga-Gabaon ken Mizpa ti nangbangon iti sumaruno a paset. Nagpatinggada iti pagtaengan ti gobernador ti Laud-ti-Eufrates.

8 Ni Uzziel nga anak ni Harhaias ken platero ti nangbangon iti sumaruno a paset.

Ni Hananias nga agar-aramid iti bangbanglo ti nangbangon iti sumaruno a paset agingga iti Akaba a Bakud.

9 Ni Refaias nga anak ni Hur, ti mangituray iti kagudua ti Distrito ti Jerusalem, ti nangbangon iti sumaruno a paset.

10 Ni Jedaias nga anak ni Harumaf ti nangbangon iti sumaruno a paset, nga adda iti asideg ti balayna.

Ni Hattus nga anak ni Hasabneyas ti nangbangon iti sumaruno a paset.

11 Ni Malkija nga anak ni Harim ken ni Hassub nga anak ni Pahat Moab ti nangbangon iti sumaruno a paset ken iti Torre dagiti Urno.

12 Ni Sallum nga anak ni Hallohes, ti mangituray iti sabali a kagudua ti Distrito ti Jerusalem, ti nangbangon iti sumaruno a paset. (Tinulongan dagiti babbai nga annakna.)

13 Ni Hanun ken dagiti agnaed iti siudad ti Zanoa ti nangbangon manen iti Ruangan ti Tanap. Inkabilda dagiti ridaw iti sigud a lugarda, inkapetda dagiti pagibalunetan ken dagiti balunet ti ruangan, ket tinarimaanda ti paset ti bakud a 1,500 a kadapan ti kaatiddog agingga iti Ruangan a Pagibellengan iti Rugit.

14 Ni Malkija nga anak ni Rekab, ti mangituray iti Distrito ti Bet Hakkerem, ti nangbangon iti Ruangan a Pagibellengan iti Rugit. Inkabilna dagiti ridaw iti sigud a lugarda kasta met dagiti pagibalunetan ken dagiti balunet ti ruangan.

15 Ni Sallum nga anak ni Colhoze, ti mangituray iti Distrito ti Mizpa, ti nangbangon iti Ruangan ti Ubbog. Ginaburanna ti pagnaan, inkabilna dagiti ruangan iti sigud a lugarda ket inkapetna dagiti pagibalunetan ken dagiti balunet ti ruangan. Iti asideg ti Tangke ti Sela, binangonna ti bakud a dumna iti hardin ti ari agingga iti agdan nga agpababa nga aggapu iti Siudad ni David.

16 Ni Nehemias nga anak ni Azbuk, ti mangituray iti kagudua ti Distrito ti Bet-zur, ti nangbangon iti sumaruno a paset, agingga iti tanem ni David, ti tangke ken ti kampo dagiti mannakigubat.

Dagiti Levita a Nakipagtrabaho iti Bakud

17 Dagitoy dagiti Levita a nangbangon manen kadagiti dadduma a paset ti bakud.

Ni Rehum nga anak ni Bani ti nangbangon iti sumaruno a paset.

Ni Hasabias a mangituray iti kagudua ti Distrito ti Keila ti nangbangon iti sumaruno a paset iti nagan ti distritona.

18 Ni Bavvai nga anak ni Henadad, ti mangituray iti sabali a kagudua ti Distrito ti Keila, ti nangbangon iti sumaruno a paset.

19 Ni Ezer nga anak ni Jesua, ti mangituray iti Mizpa, ti nangbangon iti sumaruno a paset, iti sangoanan ti pagiduldulinan iti armas agingga iti pagsikkoan ti bakud.

20 Ni Baruc nga anak ni Zabbai ti nangbangon iti sumaruno a paset agingga iti pagserkan ti balay ni Eliasib a Nangato a Padi.

21 Ni Meremot nga anak ni Urias ken apoko ni Hakkoz ti nangbangon iti sumaruno a paset, agingga iti ungto ti balay ni Eliasib.

Dagiti Papadi a Nakipagtrabaho iti Bakud

22 Dagitoy dagiti papadi a timmulong iti pannakabangon manen ti bakud.

Dagiti papadi nga agnaed iti lawlaw ti Jerusalem ti nangbangon iti sumaruno a paset.

23 Da Benjamin ken Hassub ti nangbangon iti sumaruno a paset, iti sangoanan dagiti balbalayda.

Ni Azarias nga anak ni Maaseias ken apoko ni Ananias ti nangbangon iti sumaruno a paset, iti sango ti balayna.

24 Ni Binnui nga anak ni Henadad ti nangbangon iti sumaruno a paset, manipud iti balay ni Azarias agingga iti suli ti bakud.

25-26 Ni Palal nga anak ni Uzai ti nangbangon iti sumaruno a paset, manipud iti suli ken iti torre ti akingngato a palasio iti paraangan ti guardia.

Ni Pedaias nga anak ni Paros ti nangbangon iti sumaruno a paset agingga iti daya iti asideg ti Ruangan ti Danum ken ti torre a pagguardiaan iti Templo. (Asideg daytoy iti paset ti siudad, iti maysa a lugar a managan Ofel a pagnanaedan dagiti agtartrabaho iti Templo.)

Dagiti Dadduma a Timmulong

27 Dagiti lallaki a taga-siudad ti Tekoa ti nangbangon iti sumaruno a paset, manipud iti kasumbangir ti dakkel a torre a pagguardiaan iti Templo agingga iti bakud iti asideg ti Ofel. Daytoy ti maikadua a binangonda.

28 Maysa a grupo dagiti papadi ti nangbangon iti sumaruno a paset, manipud iti Ruangan ti Kabalio nga agpa-amianan. Binangon ti tunggal maysa ti bakud iti sangoanan ti balayna.

29 Ni Zadok nga anak ni Immer ti nangbangon iti sumaruno a paset, iti sango ti balayna.

Ni Semaias nga anak ni Secanias, ti agay-aywan iti Akindaya a Ruangan, ti nangbangon iti sumaruno a paset.

30 Ni Hananias nga anak ni Selemias ken ni Hanun a maikanem nga anak ni Zalaf ti nangbangon iti sumaruno a paset. Daytoy ti maikadua a binangonda.

Ni Mesullam nga anak ni Barakias ti nangbangon iti sumaruno a paset, iti sangoanan ti pagnanaedanna.

31 Ni Malkija a platero ti nangbangon iti sumaruno a paset agingga iti patakder nga us-usaren dagiti agtartrabaho iti Templo ken dagiti komersiante iti abay ti ruangannga agturong iti Templo, iti asideg ti kuarto iti ngatoen ti amianan-a-daya ti suli ti bakud.

32 Dagiti platero ken dagiti komersiante ti nangbangon iti sumaruno a paset, manipud iti kuarto iti suli agingga iti Ruangan ti Karnero.

Dagiti Bumusor iti Trabaho ni Nehemias

1 Kasta unay ti pungtot ni Sanballat idi nadamagna a bangbangonenmi manen ti bakud. Rinugianna ti nanglais kadakami a Judio.

2 Kinunana iti sangoanan dagiti kakaduana ken dagiti mannakigubat a Samaritano, “Ania ti kayat a paneknekan dagitoy nakakaasi a Judio iti daytoy nga ar-aramidenda? Kayatda kadi a bangonen manen ti siudad? Ipagarupda aya a babaen iti panagidatagda kadagiti daton, malpasda ti trabaho iti maysa nga aldaw? Mabalinda aya a pagbangon dagiti nauram ken naburburak a batbato?”

3 Agtaktakder idi ni Tobias nga Ammonita iti abay ni Sanballat. Innayonna, “Ania met ti bangbangonenda? Nalaka a matuang—uray musang laeng ti magna, marsuoden.”

4 Inkararagko, “O Dios, denggem ti panangrabrabakda kadakami. Agdissuor koma kadakuada ti pananglalaisda kadakami. Masamsam koma amin a sanikuada, ket maitalawda a kas balud iti sabali a daga.

5 Dimo pakawanen ti dakes nga aramidda, ket dimo liplipatan dagiti basolda, agsipud ta pabpabainandakami iti ar-aramidenmi.”

6 Intuloymi latta a binangon ti bakud, ket iti saan a nabayag, naguduamin ti katayagna, gapu ta napasnek dagiti tattao nga agtrabaho.

7 Kasta unay ti pungtot da Sanballat ken Tobias, kasta met dagiti taga-Arabia, Ammon ken Asdod, idi madamagda nga agtultuloy latta ti pannakabangon ti bakud ti Jerusalem, ket dandanin maserraan dagiti giwangna.

8 Iti kasta, nagtutulagda a rauten ti Jerusalem ken mangriribukda.

9 Ngem nagkararagkami iti Diostayo, ket nangdutokkami kadagiti lallaki nga agguardia iti aldaw ken iti rabii.

10 Kinuna dagiti taga-Juda,

“Kumapuykami nga agbagbagkat iti nadagsen.

Adu unay ti bato a bunagenmi.

Saanmi a kabaelan a bangonen ti bakud.”

11 Impagarup dagiti kabusormi a saanmi nga ammo wenno makita ti panggepda a mangraut ken agpapatay kadakami tapno agsardengen ti trabahomi.

12 Kanayon nga umay dagiti Judio nga agnaed kadagiti lugar dagiti kabusormi ket binallaagandakami iti naminsangapulo maipapan iti dakes a panggepda.

13 Inarmasak ngarud dagiti tattao iti kampilan, pika ken pana ket impuestok ida iti likudan dagiti bakud a di pay nalpas. Impuestok ida segun ti familiada.

14 Nadlawko a madanagan dagiti tattao, isut’ gapuna a kinunak kadakuada, kadagiti papangulo ken ofisialesda, “Dikay agbuteng kadagiti kabusortayo! Laglagipenyo a naindaklan ken makaam-amak ti Apo. Isu ti makigubat a mangsalaknib kadagiti kailianyo, kadagiti annakyo, kadagiti assawayo ken kadagiti balbalayyo.”

15 Nadamag dagiti kabusormi a naammoanmi ti gandatda ket nabigbigda a saan a pinagballigi ti Dios dagiti panggepda. Iti kasta, intuloymi a binangon ti bakud.

16 Manipud idin, kagudua ti bilang dagiti tattao ti nagtrabaho, ket ti kagudua ti nagguardia. Nakaarmas dagiti guardia iti gayang, kalasag, pana ken sikakabalda. Inted dagiti papangulo ti naan-anay a tulongda kadagiti taga-Juda

17 a mangtartarimaan iti bakud. Uray pay ti agbunag kadagiti materiales, iggemna dagitoy iti maysa nga imana idinto nga igam ti petpetpetan ti maysa.

18 Sibabarikes latta iti kampilan dagiti agbangbangon bayat ti panagtrabahoda. Adda iti abayko ti mangpuyot iti trumpeta a pangballaag kadagiti tattao.

19 Kinunak kadagiti tattao, kadagiti ofisiales ken papanguloda, “Atiddog ti bakud a tartrabahoentayo ket agaaddayotayo.

20 No mangngegyo ti trumpeta a mapuyot a kas ballaag, lawlawendak. Ti Diostayo ti makigubat a mangsalaknib kadatayo.”

21 Inaldaw a kasta ti aramidmi. Manipud parbangon agingga iti rabii nga agparang dagiti bituen, kagudua ti agtrabaho, ket ti kagudua agguardiada a nakaiggem iti gayang.

22 Kabayatan dayta a tiempo, imbagak kadagiti amin a lallaki a mangimaton nga agyanda idiay Jerusalem iti rabii, agraman dagiti amin a katulonganda, tapno maguardiaanmi ti siudad iti rabii ket agtrabahokami iti aldaw.

23 Diak uksoben dagiti pagan-anayko uray iti rabii, kasta met dagiti kakaduak, wenno dagiti adipenko, wenno dagiti guardiak. Iggemmi latta dagiti armasmi, uray no inkam sumakdo.

Asikasoen ni Nehemias dagiti Parikut dagiti Tattao

1 Dimteng ti panawen a nagreklamo dagiti tattao, lallaki ken babbai, gapu iti aramid dagiti padada a Judio.

2 Adda dagiti nagkuna, “Adukami a sangafamiliaan. Masapulmi ti taraon tapno agbiagkami.”

3 Adda met dagiti nagkuna: “Kapilitan nga insaldami dagiti talon, kaubasan ken balaymi tapno adda igatangmi iti kanenmi ket dikam agbisin.”

4 Kinuna pay ti dadduma, “Immutangkami iti kuarta tapno adda pagbuismi kadagiti talon ken kaubasanmi.

5 Ti kasapulanmi kas met laeng iti kasapulan dagiti padami a Judio. Ania ti nakaigiddiatan dagiti annakmi kadagiti annakda? Ngem inkapilitan a patagabumi dagiti annakmi. Kinaagpaysona, nailakomin a tagabu dagiti sumagmamano nga annakmi a babbai. Awan ti maaramidmi ta sabalin ti agtagikua kadagiti taltalon ken kaubasanmi.”

6 Napalalo ti pungtotko a nakangngeg kadagiti reklamoda,

7 ketinkeddengko ti agtignay. Napanak kadagiti papangulo ken dagiti ofisiales ket binabalawko ida. Kinunak kadakuada: “Parparigatenyo dagiti kakabsatyo!”

Inummongko dagiti tattao tapno risutenmi dagiti parikut.

8 Kinunak, “Inaramidtayo amin a kabaelantayo a nangsubbot kadagiti kakabsat a Judio a nangilako iti bagbagida kadagiti ganggannaet. Ngem ita, apay a pilitenyo dagiti kakabsatyo a paadipenda kadagiti padatayo a Judio?” Nagulimek dagiti pangulo ket awan ti naisungbatda.

9 Kinunak pay: “Saan a nasayaat ti kasta nga aramidyo! Rebbengyo ti agbuteng iti Dios ket agaramidkayo iti naimbag tapno awan pakalaisantayo kadagiti Hentil a kabusortayo.

10 Pinautangak dagiti tattao iti kuarta ken taraon. Kasta met ti inaramid dagiti kaduak ken dagiti tattao nga agtartrabaho iti babaek. Ditay koman pampanunoten dagiti impautangtayo.

11 Ita met laeng, isubliyon dagiti talon, kaubasan, kaoliboan ken dagiti balbalayda. Pakawanenyon dagiti amin nga utangda—kuarta, taraon, arak wenno lana.”

12 “Tungpalenmi ti ibagam,” kinuna dagiti pangulo. “Isublimin ti sanikuada ken dimin singsingiren dagiti utangda.”

Inayabak dagiti papadi ket iti imatangda, pinagsapatak dagiti pangulo a tungpalenda dagiti karida.

13 Inikkatko ti barikesko,winagwagko ket kinunak: “Kastoyto ti panangwagwag ti Dios iti siasinoman a di mangtungpal iti karina. Alaento ti Dios dagiti balbalayyo ken amin a kukuayo ket awanto a pulos ti ibatina kadakayo.” Sangsangkamaysa dagiti amin nga adda sadiay ti nagkuna: “Sapay koma ta kasta!” Indaydayawda ni Yahweh ket tinungpalda ti inkarida.

Ti Kinamanagparabur ni Nehemias

14 Sangapulo ket dua a tawen a naggobernadorak iti Juda. Nangrugiak idi maika-20 a tawen a panagturay ni Artaxerxes agingga iti maika-32 a tawen iti akemna a kas emperador. Kabayatan dayta a tiempo, saankami a nangnangan kadagiti kakabagiak kadagiti taraon nga abastok a kas gobernador.

15 Pinadagsenan dagiti gobernador nga immun-una ngem siak dagiti tattao. Inaldaw nga agsingirda iti kagudua a kilo a pirak a maigatang iti taraon ken arak. Uray dagidi adipenda, pinarparigatda dagiti tattao. Ngem sabali ti inaramidko ta adda panagbutengko iti Dios.

16 Impanko amin a kabaelak a nangbangon manen iti bakud, ket awan nagamgamko a sanikua. Timmulong dagiti amin a tattaok.

17 Inaldaw a nagpakanak iti 150 a Judio ken dagiti papanguloda, malaksid pay kadagiti tattao a naggapu kadagiti kabangibang a nasion.

18 Inaldaw a nagpartiak iti maysa a baka, innem a napili a karnero ken adu a manok. Tunggal sangapulo nga aldaw, agpainumak iti baro nga arak. Nupay kasta, saanko nga innal-ala ti abastok a kas gobernador, ta madagsenan unay dagiti tattao.

19 Dawatek kenka, O Dios, nga ibilangmo a pakaidayawak dagiti amin nga inaramidko kadagitoy a tattao.

Mamin-adu a Maisikat ni Nehemias

1 Nadamag da Sanballat, Tobias, Gesem ken dagiti dadduma a kabusormi a nabangonmin ti bakud ket awanen ti giwangna, nupay di pay naikapet dagiti ruangan kadagiti pagserkan.

2 Pinaibaga da Sanballat ken Gesem nga agkikitakami iti maysa kadagiti barrio iti Tanap ti Ono. Ngem kunada laeng dayta ta kayatdak a dangran.

3 Nangibaonak kadagiti mangibaga kadakuada, “Adda nasken nga aramidek ket diak masango ti umay dita. Diak kayat a maisardeng ti trabaho gapu laeng iti umaykayo panangkita kadakayo.”

4 Namimpat a kasta ti pinaibagada kaniak, ngem isu met laeng ti insungbatko.

5 Nangipatulod ni Sanballat iti mensahe iti maikalima a daras. Silulukat daytoy a surat a pinaipanna kadagiti adipenna.

6 Kastoy ti nailanad:

“Kuna ni Gesem kaniak nga agwarwaras ti damag kadagiti kabangibang a nasion a panggepyo a Judio ti umalsa. Daytoy ti gapuna a bangbangonenyo manen ti bakud. Panggepmo kano ti agbalin nga ari,

7 ket nakitulagka kadagiti sumagmamano a profeta a mangipakdaar kenka nga ari ti Juda idiay Jerusalem. Awan duadua a madamagto daytoy ti Natan-ok nga Ari, isut’ gapuna nga isingasingko nga umayka ket pagsaritaanta daytoy a banag.”

8 Daytoy ti sungbatko kenkuana, “Awan ti kinapudno ti ibagbagam. Sika met laeng ti nangparbo kadagita a sasao.”

9 Butbutngendakami ta kayatda nga isardengmi ti trabaho. Ngem ita, O Dios, papigsaennak kadi!

10 Iti dayta a tiempo, sinarungkarak ni Semaias nga anak ni Delaias ken apoko ni Mehetabel, ta saanna a mapanawan ti balayna. Kinunana kaniak, “Inta aglemmeng iti santuario ti Templo, ket tulbekanta dagiti ridaw, agsipud ta umaydaka papatayen. Iti uray ania a rabii, umaydaka papatayen.”

11 “Saanak a takrot a lalaki nga agtaray ken aglemmeng,” insungbatko. “Ipagarupmo kadi nga aglemmengak iti Templo tapno maispal ti biagko? Diak aramiden dayta.”

12 Idi pampanunotek daytoy, naamirisko a saan a nagsao ti Dios ken ni Semaias no di ket pinasuksokan da Tobias ken Sanballat tapno ballaagandak.

13 Tinangdananda a mangbutbuteng kaniak tapno agbasolak ket madadael ti dayawko ken maibabainak.

14 Inkararagko, “O Dios, laglagipem ti inaramid da Tobias ken Sanballat, ket dusaem ida. Laglagipem met ti inaramid ni Nodias, dayta profeta a babai, ken dagiti dadduma pay a profeta a nangbutbuteng kaniak.”

Ti Pannakaileppas ti Trabaho

15 Iti maika-25 nga aldaw ti bulan ti Elul, nalpasmi a binangon ti bakud; 52 nga aldaw a nagtrabahokami.

16 Idi madamag daytoy dagiti kabusormi kadagiti kabangibang a nasion, nabigbigda a naibabainda gapu ta ammo ti amin a nalpas ti trabaho babaen iti tulong ti Dios.

17 Kabayatan dayta a tiempo, nakisinsinnurat dagiti papangulo a Judio ken ni Tobias.

18 Adu kadagiti taga-Juda ti kimmanunong ken ni Tobias agsipud ta manugang ni Secanias a Judio nga anak ni Ara. Maysa pay, inasawa ni Jehohanan nga anakna ti babai nga anak ni Mesullam nga anak ni Barakias.

19 Ipangpangngeg dagiti tattao kaniak dagiti amin a naimbag nga aramid ni Tobias. Ipulpulongda met kenkuana dagiti amin a saok. Kanayon a suratannak tapno butbutngennak.

1 Kalpasan a nabangon manen ti bakud ken naikabilen dagiti ruangan, natudingan dagiti agguardia iti Templo ken dagiti miembro ti nasagradoan a koro. Naikkan met dagiti Levita iti trabahoda.

2 Nangikabilak iti dua a tao a mangimaton iti siudad ti Jerusalem: ni Hanani a kabsatko ken ni Hananias a pangulo nga ofisial dagiti agbambantay iti sarikedked. Matalek ken managbuteng iti Dios ni Hananias ket awan pumada kenkuana.

3 Imbagak kaduada a sada la luktan ti ruangan ti Jerusalem iti bigat no makatangkayagen ti init, ket irikep ken balunetanda sakbay nga agawid dagiti guardia iti sumipnget. Imbagak pay a mangisaadda kadagiti agnanaed iti Jerusalem nga agguardia ket adda dagiti ipuestoda kadagiti naituding a lugar idinto nga agpatrulia dagiti dadduma iti asideg dagiti balbalayda.

Ti Listaan dagiti Tattao

4 Nalawa ti siudad, ngem bassit dagiti agnanaed, ket manmano pay laeng dagiti nabangon a balbalay.

5 Tinignaynak ti Dios a mangummong kadagiti tattao, kadagiti papangulo ken ofisialesda, tapno masukimat ti listaan ti familia ti tunggal maysa. Nabirokak ti libro a nakailanadan ti nagnagan dagiti immun-una a nagsubli kadagiti napagtalaw a kas balud. Daytoy ti nasarakak a nailanad:

6 Adu kadagiti napagtalaw ti pimmanaw iti probinsia ti Babilonia ket nagsubli ti tunggal maysa iti bukodna nga ili idiay Jerusalem ken Juda. Agnanaeden dagiti familiada a kas balud idiay Babilonia manipud impan ni Ari Nebucadnesar ida sadiay.

7 Adtoy dagiti papanguloda: Zerubbabel, Jesua, Nehemias, Azarias, Raamias, Nahamani, Mardokeo, Bilsan, Misperet, Bigvai, Nehum ken Baana.

8-25 Daytoy ti listaan dagiti familia dagiti Israelita agraman ti bilang ti tunggal familia a nagsubli:

Paros – 2,172

Sefatias – 372

Ara – 652

Pahat Moab (dagiti kaputotan da Jesua ken Joab) – 2,818

Elam – 1,254

Zattu – 845

Zakkai – 760

Binnui – 648

Bebai – 628

Azgad – 2,322

Adonikam – 667

Bigvai – 2,067

Adin – 655

Ater (managan pay Hezekias) – 98

Hasum – 328

Bezai – 324

Harif – 112

Gabaon – 95

26-38 Nagsubli met dagiti tattao a ti familiada nagnaed kadagitoy nga il-ili:

Betlehem ken Netofa – 188

Anatot – 128

Bet-Azmavet – 42

Kiriat Jearim, Kefira ken Beerot – 743

Rama ken Geba – 621

Mikmas – 122

Betel ken Ai – 123

Ti sabali a Nebo – 52

Ti sabali nga Elam – 1,254

Harim – 320

Jerico – 345

Lod, Hadid ken Ono – 721

Senaa – 3,930

39-42 Daytoy ti listaan dagiti nagsubli a familia dagiti papadi:

Jedaias (dagiti kaputotan ni Jesua) – 973

Immer – 1,052

Pashur – 1,247

Harim – 1,017

43-45 Dagiti nagsubli a familia dagiti Levita:

Jesua ken Kadmiel (dagiti kaputotan ni Hodavias) – 74

Dagiti kantores iti Templo (dagiti kaputotan ni Asaf) – 148

Dagiti guardia ti Templo (dagiti kaputotan da Sallum, Ater, Talmon, Akkub, Hatita ken Sobai) – 138

46-56 Dagiti familia dagiti agtartrabaho iti Templo a nagsubli:

Siha, Hasufa, Tabbaot,

Keros, Sia, Padon,

Lebana, Hagaba, Salmai,

Hanan, Giddel, Gahar,

Reayas, Resin, Nekoda,

Gazzam, Uzza, Pasea,

Besai, Meunim, Nefusesim,

Bakbuk, Hakufa, Harhur,

Bazlit, Mehida, Harsa,

Barkos, Sisera, Tema,

Nesias ken Hatifa.

57-59 Dagiti nagsubli a familia dagiti adipen ni Solomon:

Sotai, Soferet, Perida,

Jaala, Darkon, Giddel,

Sefatias, Hattil, Pokeret

Hazzebaim ken Amon.

60 Agdaup iti 392 dagiti kaputotan dagiti agtartrabaho iti Templo ken dagiti adipen ni Solomon a nagsubli.

61-62 Adda 642 a nagsubli a nagtaud iti familia da Delaias, Tobias ken Nekoda. Naggapuda kadagiti ili ti Tel Mela, Tel Harsa, Kerub, Addon ken Immer, ngem dida mapaneknekan a kaputotan ida dagiti Israelita.

63-64 Dagitoy dagiti familia dagiti papadi a saan a masapulan dagiti libro a mangpaneknek iti nagtaudanda a familia: Hobaias, Hakkoz ken Barzillai. (Naikamang iti familia ni Barzillai a Galaadita ti kapuonan ti familia dagiti papadi a nagtaudan ni Barzillai; tinawidna ti nagan ti familia ti katuganganna a lalaki.) Gapu ta dida mapaneknekan no siasino dagiti kapuonanda, dida naawat a kas papadi.

65 Imbagati gobernador kadakuada a dida mabalin ti mangan kadagiti taraon a naidaton iti Dios agingga nga adda padi a makiuman babaen iti Urim ken Tummim.

66 Agdagup iti 42,360 dagiti amin a nagsubli kadagiti napagtalaw a kas balud.

67-69 Dagiti adipenda a lallaki ken babbai – 7,337

Dagiti kantores a lallaki ken babbai – 245

Dagiti kabalio – 736

Dagiti mulo – 245

Dagiti kamelio – 435

Dagiti asno – 6,720

70-72 Adu kadagiti tattao ti nangted iti tulongda iti pannakabangon manen ti Templo:

Ti gobernador

270 nga onsa a balitok

50 a malukong a mausar iti seremonia

530 a pagan-anay dagiti papadi

Dagiti papangulo dagiti kapuonan

5,400 nga onsa a balitok

51,450 nga onsa a pirak

Dagiti dadduma a tattao

5,400 nga onsa a balitok

46,770 nga onsa a pirak

67 a pagan-anay dagiti papadi

73 Dagitipapadi, dagiti Levita, dagiti guardia ti Templo, dagiti musiko, ti adu kadagiti kadawyan a tattao, dagiti agtartrabaho iti Templo—amin nga Israelita—nagnaedda kadagiti il-ili ken siudad ti Juda.

Ibasa ni Ezra ti Linteg kadagiti Tattao

1 Idi dumteng ti maikapito a bulan, agnanaeden dagiti Israelita kadagiti il-ili ken siudadda. Iti umuna nga aldaw iti dayta a bulan, naguummongda amin iti plasa iti uneg ti Ruangan ti Danum idiay Jerusalem. Dinawatda ken ni Ezra a padi ken masirib iti Linteg nga alaenna ti libro ti Linteg nga inted ni Yahweh ken ni Moises para kadagiti Israelita.

2 Innala ni Ezra ti libro. Napan iti sangoanan ti ummong a buklen dagiti lallaki ken babbai agraman ubbing nga addan umdas a tawenda a makaawat iti sao.

3 Manipud iti agsapa agingga iti agmatuon, imbasa ni Ezra ti Linteg kadagiti tattao a nagtitipon iti plasa iti asideg ti ruangan. Sipapasnekda amin a dimngeg.

4 Agtaktakder ni Ezra iti kayo a plataforma a naaramid para iti daytoy nga aldaw. Iti makannawanna, nakatakder da Mattitias, Sema, Anaias, Urias, Hilkias ken Maaseias ket iti makannigidna, da Pedaias, Misael, Malkija, Hasum, Hasbaddana, Zacarias ken Mesullam.

5 Linuktan ni Ezra ti libro. Agtaktakder ni Ezra iti plataforma ket makita dagiti amin a tattao. Nagtakderda apaman a naluktan ti libro.

6 Kinuna ni Ezra, “Madaydayaw tiApo, ti naindaklan a Dios!”

Ingngato dagiti amin a tattao dagiti imada sada kinuna, “Sapay koma ta kasta! Sapay koma ta kasta!” Kalpasanna, nagpaklebda a nagdaydayaw.

7 Timmakder dagiti tattao, ket impalawag dagitoy a Levita ti Linteg: Jesua, Bani, Serebias, Jamin, Akkub, Sabbetai, Hodias, Maaseias, Kelita, Azarias, Josabad, Hanan ken Pelaias.

8 Impatarusda ti Linteg ti Dios sada inlawlawag tapno maawatan dagiti tattao.

9 Nagsasangit dagiti tattao idi mangngegda ti ipaannurot ti Linteg. Ket kinuna ni Nehemias a gobernador, ni Ezra a padi ken eskriba, ken dagiti Levita a mangipalpalawag iti Linteg kadagiti tattao, “Nasantoan daytoy nga aldaw itiApoa Diosyo. Saankayo nga agladingit wenno agsangit.

10 Agawidkayon ket agfiestakayo. Ibingayanyo iti taraon ken arak dagiti agkurkurang iti agserbi kadakuada. Nasantoan daytoy nga aldaw iti Apotayo. Dikay agladingit, ta ti rag-o tiApoti mangpapigsa kadakayo.”

11 Nagwaras dagiti Levita iti ummong dagiti tattao ket pinakiredda ti pakinakemda. Imbagada a dida agladladingit ta nasantoan daytoy nga aldaw.

12 Nagawid ngarud dagiti amin a tattao, ket siraragsakda a nagpapangan ken nagiinum ket nagibingayda kadagiti kanenda ta naawatanda ti naibasa kadakuada.

Ti Fiesta dagiti Abong-abong

13 Iti sumuno nga aldaw, napan dagiti ulo ti familia agraman dagiti papadi ken Levita ken ni Ezra tapno adalenda ti pannursuro ti Linteg.

14 Natakuatandaa naibilin kadagiti Israelita nga agnaedda kadagiti abong-abong kabayatan ti Fiesta ti Abong-abong, kas sagudayen ti Linteg nga inted ni Yahweh ken ni Moises.

15 Iti kasta, intedda dagiti annuroten iti entero a Jerusalem ken kadagiti dadduma a siudad ken il-ili: “Inkayo kadagiti turturod ket agalakayo kadagiti sanga ti olibo, kadagiti saleng, mirto, palma ken dadduma pay a kayo, ket agaramidkayo iti paglinonganyo, kas mayannurot iti alagaden iti Linteg.”

16 Nagala ngarud dagiti tattao kadagiti sangsanga ket nagaramidda kadagiti paglinongan kadagiti tuktok dagiti balbalayda, kadagiti paraanganda, iti paraangan ti Templo, iti plasa iti abay ti Ruangan ti Danum ken iti abay ti Ruangan ni Efraim.

17 Kasta met ti inaramid dagiti amin a nagsubli manipud kadagiti pagilian a nakaipananda a kas balud. Nagipatakderda kadagiti abong-abong a nagyananda. Daytoy ti damo a pannakaaramid ti fiesta manipud idi tiempo ni Josue nga anak ni Nun. Adda rag-o ken ragsak ti tunggal maysa kadakuada.

18 Manipud iti umuna nga aldaw ti fiesta agingga iti maudi, inaldaw nga adda mabasa a paset ti Linteg ti Dios. Pito nga aldaw a nagrarambakda, ket iti maikawalo nga aldaw, adda naangay a seremonia a panggibus iti fiesta, kas mayannurot iti alagaden.

Ipudno dagiti Tattao dagiti Basbasolda

1 Iti maika-24 nga aldaw ti isu met la a bulan, naguummong dagiti Israelita tapno agayunarda. Nagkawesda iti nakersang a lupot ken inikkanda dagiti uloda iti dapu. Daytoy ti mangipakita iti panagladingitda ken panagbabawida kadagiti basbasolda.

2 Simminada idin kadagiti ganggannaet. Nagtakderda ket rinugianda ti nagipudno kadagiti basbasolda kasta met iti basol dagiti kapuonanda.

3 Agarup tallo nga oras a naibasa kadakuada ti Linteg ni Yahweh a Diosda. Tallo nga orasda met a nagipudpudno kadagiti basbasolda ken nagdaydayaw ken ni Yahweh a Diosda.

4 Adda plataforma a naisagana a pagtakderan dagiti Levita, ket sadiay ti nagtakderan da Jesua, Bani, Kadmiel, Sebanias, Bunni, Serebias, Bani ken Kenani. Nagkararagda iti napigsa ken ni Yahweh a Diosda.

5 Dagitoy a Levita ti nangted iti pagilasinan iti panangrugi ti panagdaydayaw: Jesua, Kadmiel, Bani, Hasabneyas, Serebias, Hodias, Sebanias ken Petahias. Kinunada:

“Tumakderkayo ket idaydayawyo tiApoa Diosyo;

idaydayawyo iti agnanayon nga awan inggana.

OApo, idaydayaw koma ti amin ti nagloriaan unay a naganmo;

nupay no awan tao a makaited iti naan-anay a pagdaydayaw kenka.”

Ti Kararag ti Panagbabawi

6 Daytoy ti inkararagda:

“OApo, siksika laeng tiApo;

sika ti namarsua kadagiti langit ken kadagiti bituen iti tangatang.

Pinarsuam ti daga ken ti baybay ken ti amin nga adda sadiay.

Sika ti nangted iti biag ti amin,

agtamed ken agdaydayaw kenka dagiti nailangitan a pannakabalin.

7 OApoa Dios, pinilim ni Abram,

ket inruarmo idiay Ur iti Babilonia;

Abraham ti insukatmo iti naganna.

8 Napaneknekama napudno kenka,

ket nakitulagka kenkuana.

Inkarim nga itedmo kenkuana ti daga ti Canaan,

ti daga dagiti Heteo ken Amorreo,

ti daga dagiti Perezeo, Jebuseo ken Gergeseo,

tapno pagnaedan dagiti kaputotanna.

Tinungpalmo ti karim,

agsipud ta mapagtalkanka.

9 “Nakitamti panagsagaba dagiti kapuonanmi idiay Egipto;

nangngegmo ti panagpatulongda idi addada idiay Baybay a Nalabaga.

10 Nakaskasdaawdagiti milagro nga inaramidmo a maibusor iti ari ti Egipto,

kasta met kadagiti ofisialesna, ken dagiti tattao iti pagilianna.

Ammom ngamin ti panangidadanesda kadagiti tattaom.

Nagun-odmo idi ti dayaw,

wen, ti dayaw nga adda pay laeng kenka ita.

11 Nangaramidkaiti pagnaan dagiti tattaom iti baybay,

ket indalanmo ida iti namaga a daga.

Ngem inlemmesmo dagiti mangkamkamat kadakuada,

batbato a limned iti nadawel a baybay ti arigda.

12 Itialdaw, indalanmo ida babaen iti ulep,

iti rabii, linawagam ti dalanda babaen iti apuy.

13 Manipudlangit, bimmabaka, napanka idiay Bantay Sinai

ket sadiay nakisaoka kadagiti tattaom.

Inikkam ida kadagiti naimbag a linteg ken nasayaat a pannursuro.

14 Imbagam a ngilinenda ti Aldaw a Panaginana.

Intedmo kadakuada dagiti lintegmo babaen ken ni adipenmo a Moises.

15 “Idimabisinda, inikkam ida iti tinapay a naggaput’ langit.

Idi mawawda, inikkam ida iti danum a naggapu iti bato.

Imbagam kadakuada nga iturayanda ti daga,

ti daga nga inkarim nga ited kadakuada.

16 Ngemtimmangsit ken simmukir dagiti kapuonanmi,

ket dida kinayat a tungpalen dagiti bilinmo.

17 Didakinayat ti agtulnog,

nalipatanda dagiti amin nga inaramidmo;

nalipatanda dagiti pinarnuaymo a milagro.

Iti kinatangsitda, pimmilida iti pangulo

a mangisubli kadakuada idiay Egipto

tapno agbalinda manen a tagabu.

Ngem sika ti Dios a mamakawan,

naasi ken naayatka,

ket saanka a nalaka nga agpungtot.

Naindaklan unay ti panangngaasim,

saanmo a binaybay-an ida.

18 Nangsukogdaiti didiosen a sinan-baka,

kinunada nga isu ti dios a nangiruar kadakuada idiay Egipto!

OApo, anian a panangpabainda kenka.

19 Ngemsaanmo a binaybay-an ida idiay let-ang,

agsipud ta naindaklan ti asim.

Dimo impanaw ti ulep wenno ti apuy

a nangidalan kadakuada iti aldaw ken rabii.

20 Naimbagka ket imbagam

dagiti masapul nga aramidenda.

Pinakanmo ida iti mana,

ket inikkam ida iti danum nga ininumda.

21 Iti 40 a tawen a panagyanda idiay let-ang,

intedmo kadakuada ti amin a masapulda.

Saan a narunot dagiti pagan-anayda,

saan met a limteg dagiti sakada.

22 “Impalubosmoa sakupenda dagiti nasion ken pagarian,

dagiti daga nga adda iti beddengda.

Pinarmekda ti daga ti Hesbon, nga iturayan ni Sihon.

Pinarmekda pay ti Basan,

ti pagarian nga iturayan ni Og.

23 Adunga annak ti imparaburmo kadakuada,

kas kadagiti bituen sadi langit ti kaaduda.

Pinalubosam ida a mangparmek ken agnaed iti daga

nga inkarim nga ited kadagiti kapuonanda.

24 Pinarmekdati daga ti Canaan;

pinagtalawmo dagiti agnaed sadiay.

Inikkam dagiti tattaom iti pannakabalin nga agaramid iti kaykayatda

kadagiti tattao ken ar-ari iti daga ti Canaan.

25 Sinakupdagiti tattaom dagiti siudad a nasarikedkedan

ken dagiti nadam-eg a daga, balbalay a napno iti kinabaknang,

dagiti bubon a nakalin,

dagiti kayo ti olibo, kayo nga agbunga ken dagiti kaubasan.

Kinnanda amin a kinaykayatda ket limmukmegda,

linak-amda dagiti amin a naimbag nga intedmo kadakuada.

26 “Ngemimmalsa dagiti tattaom, ket saanda a nagtulnog kenka;

tinallikudanda ti Lintegmo.

Pinatayda dagiti profeta a nangballaag kadakuada,

a nangibaga kadakuada nga agsublida kenka.

Masansan a laisendaka.

27 Isut’ gapuna a pinalubosam dagiti kabusorda

a mangparmek ken mangituray kadakuada.

Iti tiempo ti pannakariribukda, nagpatulongda kenka

ket manipud langit, sinungbatam ida.

Gapu iti naindaklan nga asim,

inikkam ida kadagiti pangulo

a nangispal kadakuada kadagiti kabusorda.

28 No agsublin ti talna, agbasolda manen,

ket ipalubosmo a parmeken manen ida dagiti kabusorda.

Nupay kasta, no agbabawida

ket dawatenda nga isalakanmo ida,

mangngegmo ida dita langit,

ket gapu iti asim kanayon nga isalakanmo ida.

29 Binallaagamida nga agtulnogda iti bukodmo a pannursuro,

ngem dida inawat dagiti lintegmo gapu iti kinatangsitda,

nupay no agturong iti biag ti panangtaginayon iti Lintegmo.

Dida kinayat ti agtulnog kenka gapu ta natangken ti uloda ken nasukirda.

30 Tinawennga inan-anusam a binallaagam ida,

ngem tuleng dagiti tattaom, uray no nagsao dagiti profeta.

Ngarud, impalubosmo nga iturayan ida dagiti pagilian iti likmutda.

31 Nupay kasta, gapu ta naindaklan ti asim,

dimo binaybay-an wenno dinadael ida.

Naasika a Dios, naparaburka.

32 “ODios a Diosmi, naindaklanka unay!

Nakabutbuteng ken mannakabalinka!

Salimetmetam a sipupudno

dagiti karim iti katulagam.

Manipud iti tiempo a panangidadanes kadakami dagiti ar-ari ti Asiria,

adun ti sinagsagabami agpapan ita.

Nagsagaba dagiti ar-arimi,

dagiti papangulo, papadi ken profetami,

dagiti kapuonanmi ken amin a tattaomi.

Lagipem kadi ti adu unay a sinagabami.

33 Nalinteg ti inaramidmo iti panangdusam kadakami,

napudnoka ngem nagbasolkami.

34 Sinukir dagiti kapuonanmi ti Lintegmo,

kasta met dagiti ar-ari, papangulo ken papadimi.

Saanda met nga impangag

dagiti bilbilin ken ballaagmo.

35 Gapu iti bendisionmo

inturayan dagiti ar-ari dagiti tattaom,

idi nagnaedda iti nalawa ken nadam-eg a daga nga intedmo kadakuada;

ngem dida tinallikudan dagiti basolda tapno agserbida kenka.

36 Ita, tagabukamin iti daga nga intedmo kadakami,

iti daytoy nadam-eg a daga a pagtaudan ti taraonmi.

37 Maited ti amin nga apit kadagiti ari

nga insaadmo gapu ta nagbasolkami.

Aramidenda ti kaykayatda kadakami ken kadagiti bakami,

ket napalalo ti pannakaparigatmi.”

Firmaan dagiti Tattao ti Katulagan

38 Gapu kadagiti amin a napasamak, mangaramidkami iti maysa a kasuratan a masapataan ken patalgedan dagiti papangulo, Levita ken papadimi.

1 Ni Gobernador Nehemias nga anak ni Hacalias ti immuna a nagfirma. Simmaruno ni Zedekias kenkuana.

2-8 Dagitoy dagiti papadi a nagfirma:

Seraias, Azarias, Jeremias,

Pashur, Amarias, Malkija,

Hattus, Sebanias, Malluk,

Harim, Meremot, Obadias,

Daniel, Ginneton, Baruc,

Mesullam, Abias, Mijamin,

Maasias, Bilgai ken

Semaias.

9-13 Dagiti Levita:

Jesua nga anak ni Azanias,

Binnui iti kapuonan ni Henadad,

Kadmiel, Sebanias, Hodias,

Kelita, Pelaias, Hanan,

Mica, Rehob, Hasabias,

Zakkur, Serebias, Sebanias,

Hodias, Bani ken Beninu.

14-27 Dagiti papangulo dagiti tattao:

Paros, Pahat Moab,

Elam, Zattu, Bani,

Bunni, Azgad, Bebai,

Adoniha, Bigvai, Adin,

Ater, Hezekias, Azzur,

Hodias, Hasum, Bezai,

Harif, Anatot, Nebai,

Magpias, Mesullam, Hezir,

Mesezabel, Zadok, Jaddua,

Pelatias, Hanan, Anaias,

Oseas, Hananias, Hassub,

Hallohes, Pilha, Sobek,

Rehum, Hasabna, Maaseias,

Ahias, Hanan, Anan,

Malluk, Harim ken Baana.

Ti Tulag

28 Dakami iti entero nga Israel—papadi, Levita, guardia ti Templo, kantores iti Templo, trabahador iti Templo ken amin a simmina kadagiti ganggannaet iti pagilian gapu iti Linteg ti Dios, agraman dagiti assawa ken amin nga annakmi a nataenganen a makaawat

29 makipagsapatakami kadagiti nalatak a kakabsatmi a madusakami iti pannakailunod no saanmi a tungpalen ti sapata, ket agbiagkami kas mayannurot iti Linteg ti Dios nga intedna babaen ken ni Moises nga adipenna. Tungpalenmi dagiti amin a linteg nga ibilin kadakami tiApoa Diosmi.

30 Saankamia makiinnasawa kadagiti ganggannaet nga agnanaed iti dagami.

31 Noadda ilakoda a trigo wenno uray ania kadakami iti Aldaw a Panaginana wenno iti uray ania nga aldaw a nasantoan, dikami gumatang kadakuada.

Iti tunggal maikapito a tawen, dimi mulaan dagiti taltalon, ket pakawanenmi amin nga utang.

32 Tinawena mangtedkami iti apagkawalo nga onsa a pirak a kas tulongmi iti Templo.

33 Itedmi dagitoy a kasapulan nga agpaay iti panagdaydayaw iti Templo: ti nasagradoan a tinapay, ti inaldaw a daton a makan, dagiti animal a mapuoran a kas daton iti inaldaw, dagiti nasagradoan a sagut iti Aldaw a Panaginana, iti Fiesta ti Lutuad ken dadduma pay a fiesta, dagiti dadduma a nasagradoan a daton, dagiti daton a pakapakawanan dagiti basol ti Israel ken aniaman a kasapulan iti Templo.

34 Dakami a tattao, papadi ken Levita, tinawen nga agbibinnunotkami tapno maammoan ti familia a mangted iti kayo a pagpuor iti daton a maidatag itiApoa Diosmi, kas mayannurot iti bilin ti Linteg.

35 Tinawennga ipanmi iti Templo dagiti daton nga agtaud iti umuna nga apitmi ken ti umuna a maluom a bunga dagiti kayomi.

36 Kassagudayen ti Linteg, ipanmi kadagiti papadi nga agserserbi iti Templo dagiti sumaganad: ti inauna nga anakmi a lalaki tapno maidaton iti Dios; ti inauna nga urbon ti bakami; ti inauna nga urbon ti karneromi ken ti inauna nga urbon ti kaldingmi.

37 Ipanmimet kadagiti papadi iti Templo ti bellaay a maaramid iti umuna nga apit iti tinawen, kasta met dagiti dadduma a datonmi nga arak, lana ti olibo ken amin a kita ti frutas.

Ipanmi kadagiti Levita, isuda nga agur-urnong kadagiti apagkapullo dagiti maapit iti dagami, dagiti apagkapullo dagiti apit iti talonmi.

38 Tunggalmakolekta dagiti apagkapullo, kumuyog dagiti papadi a kaputotan ni Aaron kadagiti Levita. Ikabil dagiti Levita ti maurnongda iti pagiduldulinan iti Templo tapno mausar iti Templo ti amin a maurnongda.

39 Ipan dagiti Israelita ken dagiti Levita dagiti maited a makan, arak ken lana ti olibo iti pagiduldulinan kadagiti alikamen ti Templo ken iti pagyanan dagiti papadi a madama nga agserserbi, dagiti guardia ti Templo ken dagiti kamkameng ti koro ti Templo.

Diminto baybay-an ti balay ti Diosmi.