Category: Numero

Ti Lugar a Managan iti Tabera

1 Rinugian dagiti tattao ti agreklamo ken ni Yahweh gapu iti rigat a naglasatanda. Idi mangngeg ni Yahweh ti asugda, nakapungtot ket indissuorna ti apuy kadagiti tattao. Rimsua ti uram iti ayanda ket dinadaelna ti maysa a pungto ti kampo.

2 Nagpatulong dagiti tattao ken ni Moises, isu a nagkararag ken ni Yahweh ket naiddep ti apuy.

3 Gapu ta gimmil-ayab ti apuy ni Yahweh iti ayanda, napanaganan iti Taberadayta a lugar.

Mangpili ni Moises iti Pitopulo a Pangulo

4 Adda dagiti ganggannaet a simmurot kadagiti Israelita iti panagdaliasatda. Makasidsidada la unay iti karne. Timmulad met kadakuada dagiti Israelita ket inyasugda: “Kaano ngata a makaramantayo iti karne?

5 Idiay Egipto, agum-umatayo nga agsida iti ikan nga awan baybayadna. Malagipyo dagiti pipino, sandia, pako, lasona ken bawang a kinkinnantayo?

6 Ita, agkakapsuttayon ket pulos nga awan pay ti makan ditoy! Awan, malaksid iti daytoy mana nga inaldaw-aldaw a kankanentayo.”

(

7 Mayarigti mana iti babassit a bukel. Puraw a dumuyaw ti kolorna.

8-9 Noagtinnag ti linnaaw iti kampo iti rabii, agtinnag met dagiti mana. Iti bigat, rummuar dagiti tattao ket agurnongda iti mana. Gilingen wenno baywenda agingga nga agbalin nga arina nga aramidenda a bibingka. Kasla tinapay a nalaokan iti lana ti olibo ti ramanna.)

10 Nangngeg ni Moises ti panagreklamo dagiti amin a tattao bayat ti panagtakderda kadagiti ruangan dagiti toldada. Makaluksaw ni Moises gapu ta nalabes ti pungtot ni Yahweh kadakuada

11 ket kinunana kenkuana, “Apay a kastoy ti inaramidmo kaniak? Apay a kaguranak? Apay nga impabaklaymo kaniak daytoy a pagrebbengan nga agpaay kadagitoy a tattao?

12 Saan a siak ti nangyanak kadakuada! Apay a kiddawem nga agbalinak a paraaw-awir ket ubbaek ida a kas ubbing tapno ipanko ida iti daga nga inkarim nga ited kadagiti kapuonanda?

13 Sadino ti pangalaak iti karne a maipaay kadagitoy a kaadu ti tattao? Dida sumardeng a mangirengreng a maikkanda iti karne.

14 Diak kabaelan a sisiak ti mangaywan kadagitoy a tattao; nadagsenda unay nga ibaklayko!

15 No kastoy ti pamay-am kaniak, nasaysayaat laengen a patayennak tapno diakon agsagaba iti kinadagsen daytoy a pagrebbengan.”

16 Kinuna ni Yahweh ken ni Moises, “Mangummongka iti pitopulo a panglakayen a mabigbig a pangulo dagiti tattao. Idatagmo kaniak ida iti Tolda ket ibagam kadakuada nga agtakderda sadiay iti abaymo.

17 Bumabaakto sadiay tapno makisaoak kenka. Ikkak ida iti espiritu nga intedko kenka tapno tumulongdanto kenka a mangaywan kadagitoy a tattao ket saanton a siksika ti agbaklay.

18 Ita, ibagam kadagiti tattao, ‘Dalusanyo dagiti bagbagiyo ta addanto karne a sidaenyo inton bigat. Nangngeg tiApoti panagas-asugyo ken ti panangibagbagayo iti tarigagayyo nga agsida iti karne ken ti kunkunayo a nasaysayaat ti panagbiagyo idiay Egipto. Ita, ikkannakayo tiApoiti karne ket masapul a kanenyo.

19 Saan la a para iti maysa, dua, lima, sangapulo wenno uray duapulo nga aldaw ti maited kadakayo

20 no di ket makabulan. Pasigto a karne ti kankanenyo agingga a rummuar kadagiti agongyo ken agingga a marurusokkayo. Mapasamak daytoy gapu ta linaksidyo tiAponga adda kadakayo. Ket nagasugkayo kenkuana a dikay la koma pimmampanawen idiay Egipto.’”

21 Kinuna ni Moises ken ni Yahweh, “Aganay nga 600,000 a tattao ti idauloak ket kunam ketdin nga ikkam ida iti karne nga umanay a taraonda iti makabulan.

22 Umdas kadi dagiti baka ken karnero a maparti para kadakuada? Umdas kadi ti amin nga ikan ti baybay nga agpaay kadakuada?”

23 “Adda kadi saanko a mabalin nga aramiden?” insungbat ni Yahweh. “Makitamto iti mabiit no mapasamak ti imbagak wenno saan.”

24 Rimmuar ngarud ni Moises ket imbagana kadagiti tattao ti sao ni Yahweh. Nangayab iti 70 a pangulo ket pinagtakderna ida iti likmut ti Tolda ti Dios.

25 Ket bimmaba ni Yahweh iti maysa nga ulep. Nagsao ken ni Moises, nangala iti espiritu nga intedna idi kenkuana sana inted kadagiti 70 a pangulo. Idi simrek kadakuada ti espiritu, inrugidan ti agipadto ngem saan a nagbayag.

26 Dua kadagiti 70 a naayaban a panglakayen, da Eldad ken Medad, ti nagbati iti kampo, ket dida napan iti Tolda ti Dios. Nupay kasta, simrek met kadakuada ti espiritu ket rinugianda met ti nagipadto.

27 Nakita ti maysa nga agtutubo a lalaki ti ar-aramiden da Eldad ken Medad, ket nagtartaray a napan nangibaga ken ni Moises ti panagipadtoda iti kampo.

28 Kinuna ni Josue, ti anak ni Nun, a tumultulong ken ni Moises sipud pay idi ubing, “Pagsardengem ida, apo.”

29 Ngem insungbat ni Moises, “Madanaganka kadi gapu kaniak? Kaykayatko pay ketdi nga ited tiApoti espirituna kadagiti tattao tapno agbalinda amin a profeta.”

30 Kalpasanna, nagsubli ni Moises ken dagiti 70 a panglakayen ti Israel iti kampo.

Mangyeg ni Yahweh kadagiti Pogo

31 Pagammoan, nangibaon ni Yahweh iti angin a nangyeg iti adu a pogo manipud iti baybay. Maysa a metro ti kangato ti panagtayabda manipud iti daga. Nagdissoda iti kampo ket nalawa ti sinaknapanda iti aglikmut ti kampo.

32 Nagmalmalem ken nagpatpatnag a nagtiltiliw dagiti tattao iti pogo. Kasta manen ti inaramidda iti sumuno nga aldaw. Saan a nakurkurang ngem 1,000 a kiloti naurnong ti tunggal maysa. Pinindangda dagiti pogo sada imbilag iti lawlaw ti kampo.

33 Ngem sakbay a naibusda ti karne ken adu pay la ti sidada, simged ti pungtot ni Yahweh, ket inyegna ti nakabutbuteng a sakit a nagwaras kadagiti tattao.

34 Napanaganan dayta a disso iti Kibrot Hattava (wenno “Tantanem ti Panaggartem”) agsipud ta intanemda sadiay dagiti tattao a naggartem la unay iti karne.

35 Manipud sadiay, pimmanaw dagiti Israelita ket napanda nagkampo idiay Hazerot.

Madusa ni Miriam

1 Gapu ta nangasawa ni Moises iti maysa a Cusita,binabalaw da Miriam ken Aaron.

2 Kinunada, “Ni la Moises aya ti kinasao tiApo? Saan kadi a nakisao met kadata?” Nangngeg tiApoti kinunada. (

3 Napakumbaba ni Moises. Kinapudnona, napakpakumbaba ngem ti uray siasinoman a tao ditoy daga.)

4 Kellaat nga imbaga ni Yahweh kada Moises, Aaron ken Miriam, “Inkay idiay Tolda.” Ket napanda a tallo.

5 Bimmaba ni Yahweh iti monmon ti ulep ket nagtakder iti ruangan ti Tolda. Inayabanna da Aaron ken Miriam. Idi makaasideg dagiti dua,

6 kinuna ni Yahweh, “Denggenyo ti ibagak. No adda profeta kadakayoagpakitaak kadakuada iti parmata, ket kasaok ida iti tagtagainep.

7 Ngemsaan a kasta ti pannakisaok ken ni Moises nga adipenko. Dinutokak a mangaywan kadagiti amin a tattaok nga Israelita.

8 Iti kasta, makisaoak kenkuana iti rupanrupa. Nalawag ti pannakisaok kenkuana ket saan a kadagiti burburtia. Nakitana payen ti langak! Nagturedkayo ketdin a mangbabalaw ken ni Moises nga adipenko?”

9 Kasta unay ti pungtot ni Yahweh kadakuada. Idi pumanaw,

10 nagpukaw ti ulep iti Tolda, dagus a nalapunos ni Miriam iti kukutel ket nagbalin a puraw a kasla kapas ti kudilna. Nakita ni Aaron a nalapunos ni Miriam iti sakit,

11 isu a kinunana ken ni Moises, “Pangngaasim, apo, ta dinakam dusaen gapu iti minamaag nga inaramidmi.

12 Dimo koma ipalubos a maipada ni Miriam iti natay a nayanak a narunot ti kagudua ti bagina.”

13 Iti kasta, immawag ni Moises ken ni Yahweh ket kinunana, “O Dios, paimbagem kadi ni Miriam.”

14 Simmungbatni Yahweh, “No tinupraan ni amana ti rupana, masapul a sagabaenna ti pannakaibabainna iti las-ud ti pito nga aldaw. Ngarud, ipanyo ni Miriam iti ruar ti kampo ket agyan sadiay iti pito nga aldaw. Kalpasanna, mabalinnanto ti agsubli iti kampo.”

15 Napapanaw ngarud ni Miriam ket pito nga aldaw a nagyan iti ruar ti kampo. Saan a nagluas dagiti tattao agingga a nagsubli iti kampo.

16 Idi nagsubli, pimmanawda iti Hazerot, ket napanda nagkampo iti let-ang ti Paran.

Dagiti Napan Nangsiim iti Canaan

1 Kinuna ni Yahweh ken ni Moises,

2 “Mangpilika iti pangulo iti tunggal maysa kadagiti 12 a tribu, ket ibaonmo ida a mangkita iti daga ti Canaan nga itedko kadagiti Israelita.”

3-15 Nagtungpal ni Moises ket manipud iti let-ang ti Paran, imbaonna dagiti sumaganad:

Ruben Sammua nga anak ni Zakkur
Simeon Safat nga anak ni Hori
Juda Caleb nga anak ni Jefone
Issacar Igal nga anak ni Jose
Efraim Oseas nga anak ni Nun
Benjamin Palti nga anak ni Rafu
Zabulon Gaddiel nga anak ni Sodi
Manases Gaddi nga anak ni Susi
Dan Ammiel nga anak ni Gemalli
Aser Setur nga anak ni Micael
Neftali Nabi nga anak ni Vopsi
Gad Geuel nga anak ni Maki

16 Dagitoy dagiti imbaon ni Moises a mangsiim iti daga. Binaliwan ni Moises ti nagan ni Oseas nga anak ni Nun; Josue ti impanaganna kenkuana.

17 Kinuna ni Moises kadakuada idi ibaonna ida, “Agpa-amianankayo manipud ditoy ket magnakayo iti akin-abagatan a paset ti daga ti Canaan ket kalpasanna, agpatuloykayo iti katurturodan a pagilian.

18 Kitaenyo no ania a kita ti daga dayta, no mano dagiti tattao nga agnaed sadiay ken no kasano ti kapigsada.

19 Kitaenyo no nasayaat wenno saan ti daga ken no nabakudan wenno saan dagiti siudad a pagnaedanda.

20 Kitaenyo no nadam-eg ti daga wenno saan, no kabakiran wenno saan. Inton agsublikayo, mangisangpetkayo kadagiti bunga ti mula sadiay.” (Panawen idi ti panagluom dagiti ubas.)

21 Iti kasta, nagpa-amianan dagiti lallaki ket dinakiwasda ti daga manipud let-ang ti Zin iti abagatan agingga idiay Rehob iti asideg ti Bessang Hamat iti amianan.

22 Immuna a napanda iti akin-abagatan a paset ti daga ket dimtengda idiay Hebron a pagnaedan dagiti familia da Ahiman, Sesai ken Talmai, dagiti kaputotan dagiti higante a managan Anakim. (Pito a tawen a nabangon ti Hebron sakbay ti pannakabangon ti Zoan idiay Egipto.)

23 Dimtengda iti Tanap ti Escol, a nangalaanda iti inyawidda a sanga ti ubas a sangaraay ti bungana. Kasta unay ti dagsenna, ket kasapulan ti dua a tao a mangassiw. Nangyawidda pay kadagiti bunga ti granada ken igos. (

24 Napanaganan dayta a lugar iti Tanap ti Escolgapu iti sanga ti sangaraay nga ubas a sinep-ak dagiti Israelita sadiay.)

25 Kalpasan ti 40 nga aldaw a panagsukimat dagiti naibaon, nagawidda

26 idiay Kades iti let-ang ti Paran. Dimmatagda kada Moises, Aaron ken ti sangkagimongan ti Israel. Impakaammoda ti natakuatanda ket impakitada dagiti bungbunga nga insangpetda.

27 Kinunada ken ni Moises, “Sinukimatmi ti daga, ket nasarakanmi a nabaknang ken nadam-eg. Adtoy ti sumagmamano kadagiti bunga.

28 Ngem napipigsa dagiti tattao nga agnanaed sadiay. Dadakkel dagiti siudadda ket nalagda ti sarikedkedda. Nakitami pay sadiay dagiti kaputotan dagiti higante.

29 Agnaed dagiti Amalekita iti akin-abagatan a paset ti daga, dagiti Heteo, Jebuseo ken dagiti Amorreo iti katurturodan a pagilian, ket dagiti Cananeo iti igid ti Baybay Mediterranean ken iti igid ti Karayan Jordan.”

30 Pinagulimek ni Caleb dagiti tattao nga agrekreklamo kenni Moises. Kinunana, “Masapul a dumaruptayon, ket tagikuaentayo ti daga. Kabaelantayo a sakupen ta napigsatayo.”

31 Ngem kinuna dagiti lallaki a kinadua ni Caleb, “Saan! Ditay kabaelan ti dumarup. Nabilbileg ngem datayo dagiti tattao sadiay.”

32 Iti kasta, saan a pudno ti impadamagda kadagiti Israelita maipapan iti daga a napanda sinukimat. Kinunada, “Saan nga umdas ti maapit iti dayta a daga a taraon dagiti tattao nga agnanaed sadiay. Natatayag amin a tattao a nakitami sadiay.

33 Nakitamipay dagiti higante a kaputotan ni Anak. Babassit a dudon ti kayariganmi kadakuada, ket nalabit a kasta met ti panangkitada kadakami.”

Agreklamo dagiti Tattao

1 Nagpatpatnag a nagsangsangit dagiti tattao gapu iti ladingitda.

2 Nagsaoda iti maibusor kada Moises ken Aaron. Kinunada, “Naim-imbag la koman a nataykam idiay Egipto wenno uray ditoy let-ang.

3 Apay nga ipannatayo tiApoiti dayta a daga? Patayendatayto dagiti kabusortayo ket tiliwenda dagiti assawa ken annaktayo. Nasaysayaat nga agsublitayo idiay Egipto.”

4 Iti kasta, nagsasaritaanda ti panangpilida iti mangipangulo kadakuada nga agsubli idiay Egipto.

5 Nagpakleb da Moises ken Aaron iti imatang dagiti amin a tattao.

6 Rinay-ab ti dua kadagiti napan nangsukimat iti daga ti pagan-anayda gapu iti ladingitda. Isuda da Josue ken Caleb nga anak ni Jefone.

7 Kinunada kadagiti tattao, “Nasayaat ti daga a napanmi kinita.

8 No maragsakan kadatayo tiApo, ipannatayto sadiay ket itedna kadatayo dayta a nabaknang ken nadam-eg a daga.

9 Diyobusoren tiApo, ket dikay agbuteng kadagiti tattao nga agnanaed sadiay. Nalaka a parmekentayo ida ta kaduatayo tiApoidinto nga awanen dagiti didiosen a mangsalsalaknib kadakuada. Ngarud, dikay agbuteng.”

10 Ranta dagiti tattao a batoen ida agingga a matayda, ngem pagammoan, nakitada ti makapurar a lawag ti dayag ni Yahweh iti ngatoen ti Tolda ti Dios.

Ikararagan ni Moises dagiti Tattao

11 Kinuna ni Yahweh ken ni Moises, “Kasano pay kabayag ti panangumsi kaniak dagitoy a tattao? Kasano pay kabayag ti dida panagtalek kaniak idinto a nagipakitaak kadakuada kadagiti adu a milagro?

12 Mangyegak iti angol ket dadaelek ida. Ngem pagbalinenka nga ama ti maysa a nasion a dakdakkel ken nabilbileg ngem isuda.”

13 Ngemkinuna ni Moises ken ni Yahweh, “Inruarmo dagitoy a tattao idiay Egipto babaen iti pannakabalinmo. Inton madamag dagiti Egipcio ti inaramidmo kadagiti tattaom,

14 ibagadanto kadagiti tattao nga agnaed iti daytoy a daga. Nadamagen dagitoy a tattao a sika ngaApoket addaka kadakami. Ammoda nga agparangka a silalatak no agsardeng ti ulepmo iti ngatoenmi, ket ammoda nga idaldalannakami babaen iti monmon nga ulep iti aldaw ken monmon nga apuy iti rabii.

15 Ita, no ikisapmo ida, ibaganto dagiti nasion a makaammo iti kinalatakmo

16 a pinapataymo dagiti tattaom iti let-ang, agsipud ta dimo kabaelan nga ipan ida iti daga nga inkarim nga ited kadakuada.

17 Dawatek ngarud, OApo, nga ipakitam a naindaklanka, kas inkarim idi kinunam,

18 ‘Siak,ni Yahweh, saanak a nalaka nga agpungtot. Ipakitak ti naindaklan nga ayat ken kinapudnok, ket pakawanek ti basol ken panagsukir. Nupay kasta, dusaek dagiti annak ken appoko agingga iti maikapat a kaputotan gapu kadagiti basol dagiti nagannak kadakuada.’

19 Ita ngarud, OApo, dawatek a pakawanem ti basol dagitoy a tattao a kas mayannatup iti kadakkel ti di agbalbaliw nga ayatmo, kas iti panangpakawanmo kadakuada manipud pay iruruarda idiay Egipto.”

20 Simmungbat ni Yahweh, “Pakawanek ida a kas iti dinawatmo.

21 Ngemisapatak iti naganko ken iti dayagko a mangpunno iti lubong,

22 nga awan kadagitoy a tattao ti makastrek iti dayta a daga. Nakitada ti makapurar a lawag ti dayagko ken dagiti milagro nga inaramidko idiay Egipto ken idiay let-ang, ngem namin-adu a sinuotda ti anusko, ket dida nagtulnog kaniak.

23 Pulos a didanto makastrek iti daga nga inkarik nga ited kadagiti kapuonanda. Awan ti uray maysa kadagiti nanglaksid kaniak ti makastrek iti dayta a daga.

24 Ngemagsipud ta maisupadi kadakuada ti rikna ni Caleb nga adipenko, ket nagtalinaed a napudno kaniak, ipankonto iti daga a nakitana. Tagikuaento dagiti kaputotanna ti daga

25 a dagiti tanapna pagnaedan ita dagiti Amalekita ken dagiti Cananeo. Inton bigat, agsublikayo ket inkay iti let-ang nga agturong iti Gulfo ti Aqaba.”

Dusaen ni Yahweh dagiti Tattao gapu iti Panagreklamoda

26 Kinuna ni Yahweh kada Moises ken Aaron,

27 “Kaanonto nga agsardeng ti panagrekreklamo dagitoy managdakdakes a tattao? Naumaakon kadagiti panagtantanabutobda!

28 Ibagam kadakuada daytoy a sungbatko: ‘Isapatak iti naganko a maaramidto ti dinawatyo. Siak, ni Yahweh a sibibiag, ti nagsao.

29 Mataykaytoket maiwalang dagiti bangkayyo ditoy let-ang. Agsipud ta nagsaokayo iti maibusor kaniak, awanto kadakayo nga agtawen iti nasursurok ngem duapulo ti makastrek iti dayta a daga.

30 Inkarik nga agnaedkayto sadiay, ngem awanto ti uray maysa a makagteng sadiay malaksid kada Caleb ken Josue.

31 Kinunayo a matiliwto dagiti annakyo, ngem ipankonto ida iti dayta a daga a linaksidyo, ket agyandanto sadiay.

32 Mataykayto ditoy let-ang.

33 Agalla-allantodagiti annakyo ditoy let-ang iti las-ud ti uppat a pulo a tawen. Agsagabadanto iti dusa ti kinasukiryo agingga iti ipapatay ti maudi kadakayo.

34 Uppat a pulonto a tawen nga ikaroyo dagiti basolyo. Uppat a pulo nga aldaw a sinukimatyo ti daga, ket maysa a tawen ti kaibatogan ti maysa nga aldaw. Maammoanyonto ti kaipapanan ti panangbusorko kadakayo.

35 Isapatak nga aramidek daytoy kadakayo a managdakdakes a tattao, dakayo a naguummong a bumusor kaniak. Mataykayto amin ditoy let-ang. Siak, ni Yahweh, ti nagsao.’”

36-37 Saan a pudno ti impadamag dagiti imbaon ni Moises a mangsukimat iti daga, ket gapu iti daytoy, nagsao dagiti tattao iti maibusor ken ni Yahweh. Iti kasta, pinagsakit ida ni Yahweh ket natayda.

38 Kadagiti sangapulo ket dua a naibaon, da la Josue ken Caleb ti nakalasat.

Padasen dagiti Israelita a Rauten ti Daga

39 Kasta unay ti leddaang dagiti Israelita idi ipakaammo ni Moises ti sao ni Yahweh.

40 Kabigatanna, nasapada a nagrubbuat a mangsakup iti katurturodan a pagilian. Kinunada, “Ita, nakasaganakamin a mapan iti lugar nga imbaga tiApo. Bigbigenmi a nagbasolkami.”

41 Ngem kinuna ni Moises, “Apay ngarud a sukirenyo tiApo? Saankayto nga agballigi.

42 Dikayo mapmapan. Awan kadakayo tiApoket parmekendakayto dagiti kabusoryo.

43 Inton makigubatkayo kadagiti Amalekita ken kadagiti Cananeo, mataykayto. Awanto tiApokadakayo agsipud ta diyo kinayat ti sumurot kenkuana.”

44 Nupay kasta, napanda latta iti katurturodan a pagilian, uray no nagbati ti Lakasa ti Tulag ni Yahweh ken ni Moises iti kampo.

45 Dinarup dagiti Amalekita ken dagiti Cananeo nga agnanaed sadiay dagiti Israelita. Naparmek dagiti Israelita ket nasunsonda agingga idiay Horma.

Dagiti Linteg maipapan kadagiti Daton

1 Inted ni Yahweh ken ni Moises

2 dagitoy nga alagaden nga annuroten dagiti Israelita iti daga nga itedna kadakuada.

3 Mabalin a maidatag itiApoti toro a baka, kalakian a karnero, maysa nga urbon ti karnero wenno kalding, a kas daton a mapuoran wenno daton a pagtungpal iti kari wenno daton nga agtaud iti bukod a nakem wenno kas daton kadagiti naituding a nasantoan a fiestayo. Nabanglo dagitoy a daton itiApo.

4-5 Siasinoman a mangidatag iti karnero wenno kalding a kas daton a mapuoran itiApo, masapul a pakuyoganna ti tunggal animal iti sangakilo nga arina a nalaokan iti maysa a litro a lana ti olibo kas daton a makan, agraman sangalitro nga arak.

6 No kalakian a karnero ti maidatag, dua a kilo nga arina a nalaokan iti 1 1/2 a litro a lana ti olibo ti masapul a maidatag a kas daton a makan,

7 agraman sangalitro ket gudua nga arak. Nabanglo dagitoy a daton itiApo.

8 No toro a baka ti idatag itiApoa daton a mapuoran wenno kas daton a pagtungpal iti kari wenno kas daton a pakikappia,

9 masapul a maidatag a daton a makan ti tallo a kilo nga arina a nalaokan iti dua a litro a lana ti olibo

10 agraman dua a litro nga arak. Nabanglo daytoy a daton itiApo.

11 Dagitoyto ti maidatag a maipakuyog iti tunggal toro a baka, kalakian a karnero, urbon ti karnero wenno kalding.

12 No nasursurok ngem maysa ti animal a maidatag, manayonan met dagiti maipakuyog a makan ken inumen.

13 Kastoy ti aramiden ti tunggal puro nga Israelita no mangidaton iti makan, maysa a daton a nabanglo itiApo.

14 Kastoy met ti annuroten ti ganggannaet a makipagnaed kadakayo, iti apagbiit man wenno agnanayon, a mangidatag iti daton a mapuoran kas daton a nabanglo itiApo.

15 Iti amin a panawen, isu met laengnga alagaden ti masapul nga annurotenyo ken dagiti ganggannaet a makipagnaed kadakayo. Agpapadakayo iti imatang tiApo.

16 Maymaysalaeng a linteg ti annurotenyo, nayanak man nga Israelita wenno ganggannaet.

17 Inted ni Yahweh ken ni Moises

18 dagiti sumaganad nga alagaden nga annuroten dagiti Israelita iti daga nga itedna kadakuada.

19 Tunggal mangankayo iti taraon a maapit sadiay, masapul nga adda mailasin nga agpaay a naisangsangayan a sagut itiApo.

20 No agaramidkayo iti tinapay, ilasinyo ti umuna a tinapay kadagiti naaramid iti baro nga apit ket idatagyo a kas naisangsangayan a sagut itiApo. Maidatag daytoy a kas iti panangidatagyo iti naisangsangayan a sagut nga aramidenyo iti trigo nga irikenyo.

21 Iti amin a panawen, maited daytoy naisangsangayan a sagut itiAponga aggapu iti tinapay nga aramidenyo.

22 Ngem no adda saan a mangannurot iti uray ania kadagiti alagaden nga inted ni Yahweh ken ni Moises,

23 aniaman a bilin tiApokadakayo manipud idi damo,

24 ken no naaramid ti biddut gapu ta saan nga ammo ti gimong, masapul a mangidatag dagiti tattao iti toro a baka a kas daton a mapuoran, daton a nabanglo itiApo, agraman dagiti tumutop a daton a makan ken daton nga arak. Malaksid kadagitoy, mangidatagda pay iti kalakian a kalding a daton gapu iti basol.

25 Aramiden ti padi ti seremonia ti pannakadalus nga agpaay iti gimong ket mapakawandanto agsipud ta dida inggagara ti naaramid a biddut ket indatagda ti daton gapu iti basol a kas daton a makan nga agpaay itiApo.

26 Mapakawanto ti entero a gimong ti Israel ken dagiti ganggannaet nga agnaed iti dagada agsipud ta nairamanda amin iti biddut.

27 Noadda makabasol a dina ammo, masapul a mangidaton iti kabayan a kalding a maysa ti tawenna.

28 Iti altar, aramiden ti padi ti seremonia ti pannakadalus tapno madalusan ti tao iti basolna ket mapakawanto.

29 Agpada nga alagaden ti annuroten ti amin nga agbasol a dina igagara, puro man nga Israelita wenno ganggannaet nga agnaed iti dagayo.

30 Ngem mapapatay ti siasinoman a mangigagara nga agbasol, puro man nga Israelita wenno ganggannaet, ta maipakita ti panangbusorna itiApo.

31 Linaksidna ti sao tiApoken sinalungasingna ti maysa kadagiti bilinna. Isu ti akimbasol iti ipapatayna.

Ti Tao a Saan a Nangngilin iti Aldaw a Panaginana

32 Iti naminsan, idi adda pay laeng dagiti Israelita iti let-ang, adda lalaki a mangaykayo iti Aldaw a Panaginana.

33 Indatag dagiti nakasarak kenkuana kada Moises, Aaron ken iti entero a gimong.

34 Saan nga ammo no ania ti maipatay a dusana, isu a naipupok pay laeng.

35 Kinuna ni Yahweh ken ni Moises, “Masapul a mapapatay; iruaryo iti kampo ket kalpasanna batoen ti sangkagimongan agingga a matay.”

36 Iti kasta, naipan ti lalaki iti ruar ti kampo ket binato ti sangkagimongan agingga a natay, kas imbilin ni Yahweh.

Alagaden maipapan kadagiti Baruyboy

37 Imbilin ni Yahweh ken ni Moises

38 ngaibagana daytoy kadagiti Israelita: “Ikkanyo iti baruyboy ti gayadan dagiti pagan-anayyo; masapul nga adda asul a lubid iti tunggal baruyboy. Aramidenyo daytoy iti agnanayon.

39 Agpaay a palagip dagitoy a baruyboy; tunggal makitayo ida, malagipyo ti amin a bilinko ket tungpalenyo ida. Iti kasta, didakto tallikudan tapno surotenyo dagiti pagayatan ken tarigagayyo.

40 Palagip kadakayo dagitoy a baruyboy tapno tungpalenyo dagiti bilinko ket agbalinkayo a nasantoan nga agpaay kaniak.

41 Siak ni Yahweh a Diosyo; inruarkayo idiay Egipto tapno agbalinak a Diosyo. Siak ni Yahweh.”

Ti Ibubusor da Kora, Datan ken Abiram

1-2 Immalsani Kora nga anak ni Izar ken apoko ni Coat nga anak ni Levi a maibusor ken ni Moises. Kaduana ti tallo a kameng ti tribu ti Ruben: da Datan ken Abiram nga annak ni Eliab, ken ni On nga anak ni Pelet agraman 250 nga Israelita a nalalatak a papangulo a pinili dagiti tattao.

3 Naguummongda iti sango da Moises ken Aaron ket kinunada kadakuada, “Aglablabeskayon! Kukua tiApoti amin a kameng ti gimong ket adda tiApokadatay amin. Moises, apay nga insaadyo ti bagiyo a nangatngato ngem ti gimong tiApo?”

4 Apaman a nangngeg ni Moises daytoy, nagpakleb iti daga ket nagkararag.

5 Kalpasanna, kinunana ken ni Kora ken kadagiti pasurotna, “Inton agsapa no bigat, ipakaammonto kadatayo tiApono siasino dagiti tattao a pinilina nga umasideg kenkuana iti altar.

6-7 Inton agsapa no bigat, mangalakayto kadagiti insensario, kargaanyo iti beggang ken insenso ket ipanyo dagitoy iti altar. Kitaentayto no siasino kadatayo ti pinili tiApo. Dakayo ketdi a Levita ti aglablabes ti aramidna!”

8 Intuloy ni Moises ti nagsao ken ni Kora: “Dumngegkayo, dakayo a Levita!

9 Saankayo kadi a maragsakan a pinilinakayo ti Dios ti Israel tapno umasidegkayo kenkuana? Pinilinakayo nga agserbi iti Tolda ti Dios, aramidenyo ti pagrebbenganyo iti gimong ket agserbikayo kadakuada.

10 Intedna kenka ken kadagiti dadduma a Levita daytoy a pammadayaw. Ita, kayatyo pay a maisaadkayo a kas padi!

11 Iti panagsaoyo iti maibusor ken ni Aaron, tiApoti busorenyo, sika ken dagiti pasurotmo.”

12 Pinaayaban ni Moises da Datan ken Abiram ngem kinunada, “Saanmi a kayat ti umay!

13 Di pay la kadi umdas ti panangiruarmo kadakami iti nadam-eg a daga ti Egipto tapno papatayennakami ditoy let-ang? Masapul pay kadi nga iturayandakami?

14 Dinakam inyeg iti nadam-eg a daga wenno inikkan kadagiti talon ken kaubasan ket ita, kayatnakami pay nga allilawen. Dimi kayat ti umay!”

15 Nakapungtot ni Moises ket kinunana ken ni Yahweh, “Dimo awaten ti uray ania kadagiti sagut nga idatag dagitoy a tattao. Awan ti rinanggasak kadakuada; awan ti innalak uray la koma ti asno ti siasinoman kadakuada.”

16 Kinuna ni Moises ken ni Kora, “Inton bigat, masapul nga umayka iti Tolda ti Dios agraman dagiti 250 a pasurotmo; addanto met sadiay ni Aaron.

17 Tunggal maysa kadakayo, alaenna ti insensariona, kargaanna iti beggang ken insenso sana idatag iti altar.”

18 Iti kasta, nagitugotda kadagiti insensario a nakargaan iti beggang ken insenso ket napanda iti ruangan ti Tolda a Paguummongan a kaduada da Moises ken Aaron.

19 Kalpasanna, inummong ni Kora ti entero a gimong ket nagtakderda a sisasango kada Moises ken Aaron iti ruangan ti Tolda. Pagammoan, nakita ti entero a gimong ti makapurar a lawag a mangipakita iti kaadda tiApo.

20 Ket kinuna ni Yahweh kada Moises ken Aaron,

21 “Adaywanyo dagitoy a tattao ta dadaelek ida iti apagdarikmat.”

22 Ngem nagruknoy da Moises ken Aaron ket kinunada, “O Dios, sika ti pagtaudan ti amin a biag. No agbasol ti maysa a tao, apay a kapungtotmo ti entero a gimong?”

23 Kinuna ni Yahweh ken ni Moises,

24 “Ibagam kadagiti tattao nga adaywanda dagiti tolda da Kora, Datan ken Abiram.”

25 Kalpasanna, napan ni Moises a kaduana dagiti papangulo ti Israel iti ayan da Datan ken Abiram.

26 Kinunana kadagiti tattao, “Adaywanyo dagiti tolda dagitoy a managdakdakes! Diyo met sagiden ti aniaman a kukuada amangan no mairamankayo a mapukaw gapu kadagiti basolda.”

27 Ngarud, inadaywanda dagiti tolda da Kora, Datan, ken Abiram.

Nakaruaren da Datan ken Abiram ken dagiti assawa ken annakda ket agtatakderda iti ruangan dagiti toldada.

28 Kinuna ni Moises kadagiti tattao, “Maammoanyo ita nga imbaonnak tiApotapno aramidek amin nga impaaramidna kaniak a saan ket a ti bukodko a pagayatan.

29 No matay dagitoy a tattao iti kadawyan nga ipapatay, kayatna a sawen a dinak imbaon tiApo.

30 Ngem no adda naidumduma nga aramiden tiApo, no agungap ti daga ket alun-onenna ida a sibibiag agraman amin a kukuada, ket mapanda iti lubong dagiti natay, kayatna a sawen a sinukir dagitoy a tattao tiApo.”

31 Apaman a nalpas ti panagsao ni Moises, nagungap ti daga iti batog da Datan ken Abiram

32 ket inalun-onna ida ken dagiti familiada, agraman ti amin a pasurot ni Kora ken amin a sanikuada.

33 Iti kasta, sibibiagda a nagpababa iti lubong dagiti natay, agraman dagiti sanikuada. Nagkaem ti daga ket saanen a nakita ida dagiti tattao.

34 Nagtataray dagiti amin nga Israelita a nakangngeg iti ikkisda ket impukkawda, “Umadayotayo amangan no alun-onennatayo met ti daga!”

35 Kalpasanna, nangyeg ni Yahweh iti apuy a gimmil-ayab ken nangikisap kadagiti 250 a lallaki a nagpuor iti insenso.

Dagiti Insensario

36 Kinuna ni Yahweh ken ni Moises,

37 “Ibagam ken ni Eleazar nga anak ni Aaron a padi nga alaenna dagiti bronse nga insensario kadagiti bangkay dagiti napuoran a lallaki ket ibellengna dagiti beggang iti sabali a lugar.

38 Nagbalin a nasagradoan dagiti insensario idi naidatagda iti altarko. Alaenna ngarud dagiti insensario dagitoy a lallaki a napapatay gapu iti basolda ket pitpitenna agingga nga umingpis sana aramiden a kalub ti altar. Agserbi daytoy a ballaag kadagiti Israelita.”

39 Innala ni Eleazar a padi dagiti insensario. Pinapitpitna iti naiingpis ket inaramidda a kalub ti altar.

40 Ballaag daytoy kadagiti Israelita nga awan ti mapalubosan nga agpuor iti insenso iti imatang ni Yahweh no saan a padi wenno agtaud iti kaputotan ni Aaron. No saan, mapapatay a kas ken ni Kora ken dagiti tattaona. Inaramid amin dagitoy ni Eleazar kas imbilin tiApoken ni Moises.

Isalakan ni Aaron dagiti Tattao

41 Iti sumuno nga aldaw, nagsaosao manen ti entero a gimong iti maibusor kada Moises ken Aaron. Kinunada, “Pinapatayyo ti sumagmamano a tattao tiApo.”

42 Nagmaymaysada a bumusor kada Moises ken Aaron, ngem idi kumitada iti Tolda ti Dios, naimatanganda ti ulep a nangkumot iti Tolda ket timpuar ti makapurar a lawag a mangipakita iti dayag ni Yahweh.

43 Nagtakder da Moises ken Aaron iti sango ti Tolda.

44 Kinunani Yahweh ken ni Moises,

45 “Adaywanyo dagitoy a tattao ta pukawek ida iti apagdarikmat!”

Nagpaklebda a dua

46 ket kinuna ni Moises ken ni Aaron, “Alaem ti insensariom, kargaam iti beggang iti altar samo parabawan iti insenso. Dagdagusem nga ipan kadagiti tattao ket annongem ti seremonia ti pannakadalusda. Darasem! Bimtaken ti pungtot tiApoket nangrugin ti didigra.”

47 Nagtungpal ni Aaron. Innalana ti insensariona ket nagtartaray a napan iti tengnga dagiti naummong a tattao. Nakitana nga adun ti natay ta nangrugin ti didigra; inkabilna ti insenso iti beggang sana inaramid ti seremonia tapno mapakawan dagiti tattao.

48 Simmardeng ti didigra ket natda ni Aaron a sitatakder iti nagbaetan dagiti sibibiag ken dagiti natay.

49 Agdagup iti 14,700 dagiti natay, malaksid dagiti napapatay iti panagsukir ni Kora.

50 Idi awanen ti didigra, nagsubli ni Aaron iti ayan ni Moises iti ruangan ti Tolda ti Dios.

Ti Sarukod ni Aaron

1 Kinuna ni Yahweh ken ni Moises,

2 “Ibagam kadagiti Israelita nga ikkandaka iti 12 a sarukod, maysa ti aggapu iti pangulo ti tunggal tribu. Isuratmo ti nagan ti tunggal tao iti sarukodna

3 ket isuratmo ti nagan ni Aaron iti sarukod a mangibagi iti tribu ti Levi. Iti kasta, adda sarukod ti tunggal pangulo ti tribu.

4 Ikabilmo dagitoy iti Tolda ti Dios iti sango ti Lakasa ti Tulag a pagkitkitaanta.

5 Agsaringitto ti sarukod ti tao a piliek. Kastoy ti panangpasardengko kadagiti reklamo dagiti Israelita a maibusor kadakayo.”

6 Nakisao ngarud ni Moises kadagiti Israelita ket nangted ti tunggal pangulo ti tribu iti maysa a sarukod—sangapulo ket dua amin, agraman ti sarukod ni Aaron.

7 Inkabil ni Moises dagiti sarukod iti Tolda ti Dios iti sangoanan ti Lakasa ti Tulag ni Yahweh.

8 Idisumrek ni Moises iti Tolda iti sumuno nga aldaw, nakitana a nagsaringit ti sarukod ni Aaron a mangibagi iti tribu ni Levi. Malaksid kadagiti bulong, nagsabong pay ket nagbunga iti naluluom nga almendras!

9 Innala ni Moises dagiti amin a sarukod ket imparangna kadagiti Israelita. Nakitada ti napasamak ket kalpasanna, innala ti tunggal pangulo ti bukodna a sarukod.

10 Kinuna ni Yahweh ken ni Moises, “Isublim ti sarukod ni Aaron iti sangoanan ti Lakasa ti Tulag. Masapul a maidulin a kas ballaag kadagiti nasukir nga Israelita a matayda no dida isardeng ti panagsasaoda iti maibusor kaniak.”

11 Tinungpal ni Moises ti imbilin ni Yahweh.

12 Kinuna dagiti Israelita ken ni Moises, “Daytoyen ti kanibusananmi!

13 No matay ti umasideg iti Tolda ti Dios, kayatna a sawen a mataytayo amin!”

Dagiti Annongen dagiti Papadi ken Levita

1 Kinuna ni Yahweh ken ni Aaron, “Sika, dagiti annakmo ken dagiti Levita masapul a dakay ti agsagaba iti dusa iti aniaman a basol a maaramid iti panagserbi iti Tolda; ngem sika ken dagiti annakmo laeng ti agsagaba no adda pakabasolanyo iti panagserbi a kas padi.

2 Alaem dagiti kabagiam, ti tribu ni Levi, a tumulong kadakayo bayat ti panagserbiyo iti Tolda.

3 Aramidenda ti pagrebbenganda kadakayo ken iti Tolda ngem di maipalubos nga umasidegda kadagiti nasagradoan nga alikamen iti santuario wenno iti altar. No aramidenda ti kasta, agpapadakayo amin a mapapatay.

4 Masapul a makipagtrabahoda kadakayo ket tungpalenda dagiti annongenda iti amin a panagserbi iti Tolda. Saan a makipagtrabaho kadakayo dagiti saan a mapalubosan a tattao.

5 Dakay laeng kadagiti annakmo ti mangannong kadagiti trabahoyo iti Nasantoan a Lugar ken iti altar tapno saan nga agdissuor ti pungtotko kadagiti Israelita.

6 Pinilik dagiti kabagianyo a Levita kadagiti Israelita a sagutko kadakayo. Naidatonda kaniak tapno mabalinda ti agannong iti Tolda.

7 Ngem dakayo laeng kadagiti annakmo ti mangaramid kadagiti pagrebbengan ti padi iti altar ken kadagiti alikamen iti Kasasantoan a Lugar. Dagitoy dagiti annongenyo agsipud ta intedko kadakayo ti sagut a kinapadi. Mapapatay ti siasinoman nga awan karbenganna nga umasideg kadagiti nasagradoan nga alikamen.”

Ti Bingay dagiti Papadi

8 Kinuna ni Yahweh ken ni Aaron, “Itedko kadakayo ken kadagiti kaputotanyo ti amin a naisangsangayan a sagut a maidatag kaniak a di mapuoran, kas bingayyo iti agnanayon.

9 Kadagiti nasagradoan a daton a saan a mapuoran iti altar, dagitoy ti kukuayo: dagiti daton a makan, dagiti daton a maipaay iti basol, ken dagiti daton a pagsupapak. Agpaay kenka ken dagiti annakmo ti amin a maidatag kaniak a nasagradoan a daton.

10 Ibilangyo a nasagradoan dagitoy ket iti laeng nasantoan a lugar ti pangananyo. Dagiti laeng lallaki ti mabalin a mangan kadagitoy a taraon.

11 “Kukuayo pay dagiti dadduma a naisangsangayan a daton dagiti Israelita kaniak. Itedko ida kenka ken kadagiti annakmo a lallaki ken babbai iti agnanayon. Mapalubosan a mangan ti tunggal kameng ti familiam a nadalus iti imatang ti linteg.

12 “Itedko kadakayo ti amin a kasayaatan nga umuna a maapit nga ited kaniak dagiti Israelita iti tunggal tawen: lana ti olibo, arak ken trigo.

13 Kukuayo amin dagitoy ket mabalin a kanen ti tunggal kameng ti familiam a nadalus iti imatang ti linteg.

14 “Agpaaykadakayo ti amin a maidaton kaniak iti Israel.

15 “Kukuayo amin nga inauna nga anak ti tao wenno animal nga idaton kaniak dagiti Israelita. Ngem masapul a subboten ti inauna nga anak ti tao ken ti inauna nga anak ti animal a narugit iti imatang ti linteg.

16 Lima a bagi ti pirak, segun ti naituyang a pagtimbangan, ti pangsubbot kadagiti ubbing nga adda makabulandan.

17 Ngem saan a mabalin a subboten ti inauna nga anak ti baka, karnero ken kalding; kukuak ida ket masapul a maidatonda. Ibuyatyo ti darada iti altar ket puoranyo ti tabada a daton nga agpaay kaniak.

18 Kukuayo ti karne, agraman ti barukong ken kannawan a luppo ti naisangsangayan a daton.

19 “Itedko kenka ken kadagiti annakmo, lallaki man wenno babbai, ti amin a naisangsangayan a daton dagiti Israelita kaniak, kas bingayyo iti agnanayon. Saan a mawaswas daytoy a nakitulagak kadakayo ken kadagiti kaputotam.”

20 Kinuna ni Yahweh ken ni Aaron, “Awan ti sanikua a mabalinmo a tawiden ket awan met bingaymo iti daga ti Israel. Siak, ni Yahweh, ti bingay ken tawidmo.”

Ti Bingay dagiti Levita

21 Kinunani Yahweh, “Intedko kadagiti Levita ti amin nga apagkapullo nga idatag dagiti Israelita kaniak. Daytoy ti tangdanda iti panagserbida iti Tolda.

22 Saanen a mapalubosan dagiti gagangay nga Israelita nga umasideg iti Tolda tapno dida agbasol a pakaigapuan ti pannakapapatayda.

23 Manipud ita, dagiti Levita laeng ti mangaywan iti Tolda ket isuda ti makaammo iti aniaman a maaramid iti unegna. Agnanayon daytoy nga alagaden a masapul a tungpalen dagiti amin a kaputotam. Awan ti daga a tawiden dagiti Levita iti Israel.

24 Kukuada ti apagkapullo nga idatag kaniak dagiti Israelita a naisangsangayan a sagut, isu nga imbagak kadakuada nga awan permanente a dagada iti Israel.”

Ti Apagkapullo

25 Binilin ni Yahweh ni Moises

26 nga ibagana daytoy kadagiti Levita: “No awatenyo ti apagkapullo nga ited dagiti Israelita, masapul nga idatagyo ti apagkapullona kas naisangsangayan a sagut itiApo.

27 Maibilang daytoy naisangsangayan a sagut a kaibatogan ti daton a naggapu iti baro a trigo ken baro nga arak ti mannalon.

28 Kastoy met ti panangidatagyo iti naisangsangayan a sagut a kukua tiApokadagiti amin nga apagkapullo nga awatenyo kadagiti Israelita. Manipud kadagiti awatenyo, masapul nga itedyo ti naisangsangayan a sagut tiApoken ni Aaron a padi.

29 Masapul nga itedyo dagiti kasayaatan iti awatenyo.

30 Inton naidatagyon ti kasayaatan, mabalinyo nga alaen ti natda a kas iti panangala ti mannalon ti nabati iti sagutna nga idatagna.

31 Mabalinyo a kanen a sangafamiliaan iti sadinoman a lugar gapu ta dagitoy ti tangdanyo iti panagserbiyo iti Tolda.

32 Saankay a makabasol no kanenyo, no la ketdi idatagyo ti kasayaatan itiApo. No saanyo pay nga idatag daytoy, kayatna a sawen a matulawan ti sagut ket mapapataykayo.”

Dapu ti Nalabaga a Baka

1 Binilin ni Yahweh da Moises ken Aaron

2 nga itedda kadagiti Israelita dagitoy nga alagaden. Ipanyo kada Moises ken Aaron ti maysa a kabaian a nalabaga a baka nga awan depektona ken di pay naipako.

3 Maipan met laeng daytoy nga animal ken ni Eleazar a padi tapno maparti iti ruar ti kampo iti imatangna.

4 Mangala ni Eleazar iti dara, isawsawna ti ramayna, sumango iti Tolda ket warsianna iti mamimpito.

5 Masapul a mapuoran ti sibubukel a baka iti imatang ti padi, agraman ti lalat, lasag, dara ken bagbagisna.

6 Mangala ti padi iti sumagmamano a kayo ti sedro, saringit ti hisopo ken nalabaga a lupot sana ipurruak dagitoy iti apuy.

7 Kalpasanna, labaanna ti pagan-anayna ken buyatanna ti bagina iti danum sakbay nga agsubli iti kampo; nupay kasta, agtalinaed a narugit iti imatang ti linteg agingga iti rabii.

8 Masapul met a labaan ti tao a nangpuor iti baka ti pagan-anayna sana buyatan ti bagina iti danum ngem agtalinaed met a narugit iti imatang ti linteg agingga iti rabii.

9 Kalpasanna,maummong dagiti dapu ti napuoran a baka sa maikabil iti lugar a maibilang a nadalus iti ruar ti kampo. Annongen daytoy ti tao a maibilang a nadalus. Aramaten dagiti Israelita ti dapu a pangisagana iti danum iti seremonia ti panangikkat iti kinarugit, gapu ta naidaton ti baka a maipaay iti basol.

10 Ti tao a nangummong iti dapu masapul a labaanna ti pagan-anayna ngem agtalinaed a narugit agingga iti rabii. Agtalinaed iti agnanayon daytoy nga alagaden kadagiti Israelita ken dagiti ganggannaet a makipagnaed kadakuada.

Ti Mangsagid iti Bangkay

11 Maibilang a narugit iti pito nga aldaw ti siasinoman a mangsagid iti maysa a bangkay.

12 Iti maikatlo ken maikapito nga aldaw, masapul a dalusanna ti bagina babaen iti danum a maar-aramat iti seremonia ti pannakadalus ket kalpasanna maibilangen a nadalus. Ngem no dina dalusan ti bagina iti maikatlo ken maikapito nga aldaw, saan a nadalus iti imatang ti linteg.

13 Agtalinaed a narugit ti mangsagid iti maysa a bangkay a dina dalusan ti bagina agsipud ta saan a nabuyatan iti danum a maaramat iti seremonia ti pannakadalus. Tulawanna ti Tolda ti Dios ket mailaksid kadagiti tattao ti Dios.

14 No adda matay iti uneg ti maysa a tolda, maibilang a narugit iti las-ud ti pito nga aldaw ti siasinoman nga adda iti uneg wenno sumrek sadiay iti tiempo nga ipapatayna.

15 Agbalin met a narugit iti imatang ti linteg ti amin a karamba wenno banga nga awan kalubna.

16 Maibilang met a narugit iti las-ud ti pito nga aldaw ti siasinoman a mangsagid iti bangkay ti tao a napapatay wenno natay iti ruar wenno ti siasinoman a mangsagid iti tulang ti tao wenno iti tanem.

17 Tapno maikkat ti kinarugit, masapul ti dapu ti baka a napuoran a pangikkat iti basol; ikabil iti banga a nakargaan iti kasaksakdo a danum.

18 Mangala ti siasinoman a maibilang a nadalus iti saringit ti hisopo, itanebna iti danum sana warsian ti tolda, dagiti amin nga alikamen iti unegna ken dagiti tattao nga adda sadiay. Kasta met a tao a nadalus iti imatang ti linteg ti mangwarsi iti tao a nangsagid iti tulang ti tao wenno tanem wenno bangkay.

19 Iti maikatlo ken maikapito nga aldaw, warsian ti tao a nadalus iti imatang ti linteg ti siasinoman a maibilang a saan a nadalus. Iti maikapito nga aldaw, dalusan ti tao a narugit iti imatang ti linteg ti pagan-anayna sana buyatan ti bagina iti danum. Kalpasanna, ti tao a maibilang a nadalus ti mangannong iti seremonia ti pannakadalusna, ket maibilangen a nadalus iti sumipnget.

20 Agtalinaed a saan a nadalus ti tao a nagbalin a narugit iti imatang ti linteg no dina annongen ti pannakadalusna, agsipud ta saan a naibuyat kenkuana ti danum ti pannakadalus. Tulawanna ti Tolda ti Dios ket saanen a maibilang a maysa kadagiti tattao ti Dios.

21 Agtalinaed iti agnanayon daytoy nga alagaden. Masapul a labaan met ti tao a mangiwarsi iti danum ti pannakadalus ti pagan-anayna; agtalinaed a narugit agingga iti rabii ti siasinoman a mangsagid iti danum.

22 Maibilang a narugit ti aniaman a sagiden ti tao a maibilang a saan a nadalus ket agtalinaed a saan a nadalus agingga iti rabii ti siasinoman a mangsagid iti daytoy.

Dagiti Pasamak idiay Kades

1 Iti umuna a bulan, dimteng ti sibubukel a gimong dagiti Israelita iti let-ang ti Zin ket nagkampoda idiay Kades. Sadiay ti nakatayan ken nakaitabonan ni Miriam.

2 Awandanum iti nagkampoanda, isut’ gapuna a naguummong dagiti tattao iti sangoanan da Moises ken Aaron

3 ket nagreklamoda. “Naim-imbag la koman no nairamankami kadagiti padami nga Israelita a napapatay iti sangoanan ti Tolda ti Dios.

4 Apay nga inyegnakami iti daytoy a let-ang? Tapno mataykami ditoy, agraman dagiti animalmi?

5 Apay nga impanawnakam idiay Egipto ket inyegnakam iti daytoy nakapangpanglaw a lugar a pulos nga awan ti agtubo a mula? Awan ti trigo, igos, ubas, ken granada; awan pay danum nga inumen!”

6 Pimmanaw da Moises ken Aaron ket napanda nagpakleb iti daga iti ruangan ti Tolda ti Dios. Nagparang kadakuada ti makapurar a lawag ti dayag ni Yahweh.

7 Kinuna ni Yahweh ken ni Moises,

8 “Alaem ti sarukod iti sango ti Lakasa ti Tulag ket kalpasanna, ayabanyo ken ni Aaron ti entero a gimong. Iti imatangda amin, agsaoka iti dayta a bato ket pumsuak ti danum nga agpaay kadakuada ken dagiti animalda.”

9 Napan innala ni Moises ti sarukod kas imbilin ni Yahweh kenkuana.

10 Inummongda ken ni Aaron ti entero a gimong iti sango ti bato ket kinuna ni Moises, “Dumngegkayo, dakayo a nasukir! Masapul kadi a mangalakam iti danum iti daytoy a bato nga agpaay kadakayo?”

11 Ingngatoni Moises ti sarukod sana impang-or iti namindua ket pimsuak ti aglablabonan a danum. Ket imminum dagiti tattao ken dagiti animalda.

12 Ngem inungtan ni Yahweh da Moises ken Aaron, “Gapu ta nakapsut ti pammatiyo a mangipakaammo iti nasantoan a pannakabalinko iti imatang dagiti Israelita, saanyonto a maidanon ida iti daga nga inkarik nga ited kadakuada.”

13 Napasamak daytoy idiay Meriba,ti lugar a nagreklamoan dagiti Israelita iti maibusor ken ni Yahweh; ditoy a naiparang ti kinasantona.

Iparit ti Ari ti Edom a Lumasat dagiti Israelita

14 Manipud Kades, nangibaon ni Moises kadagiti mapan iti ari ti Edom. Kinunada: “Naggapu daytoy a pakaammo kadagiti kakabagiam, dagiti tribu ti Israel. Ammom amin a rigat a sinagabami,

15 no kasano ti ipapan dagiti kapuonanmi idiay Egipto, ket nagyankami sadiay iti adu a tawen. Pinarparigat dagiti Egipcio dagidi kapuonanmi ken uray dakami.

16 Gapu iti daytoy, immawagkami itiApoiti tulong. Nangngegna ti asugmi ket nangibaon iti anghel a nangiruar kadakami idiay Egipto. Ita, addakami ditoy Kades, maysa nga ili iti beddeng ti dagam.

17 Pangngaasim ta palubosannakami a lumasat iti dagam. Magnakami iti kangrunaan a kalsada;agingga a makaruarkami iti sakupmo. Saankami a sumiasi wenno sumrek kadagiti talonyo wenno kaubasanyo ket dikam met uminum kadagiti bubonyo.”

18 Ngem insungbat dagiti Edomita, “Saankayo a lumasatkayo iti sakupmi. No padasenyo, rummuarkami a manggubat kadakayo.”

19 Kinuna dagiti Israelita, “Itinto laeng dakkel a kalsada ti pagnaanmi. Ket no uminumkami wenno dagiti animalmi iti danumyo, bayadanminto. Daytoy laeng ti dawatenmi: papagnaendakami.”

20 Inulit dagiti Edomita, “Saan a mabalin.” Ket nabukel ti nabileg nga armadada a mangdarup kadagiti Israelita.

21 Gapu ta iparit dagiti Edomita a magnada iti sakupda, nagna dagiti Israelita iti sabali a dalan.

Ti Ipapatay ni Aaron

22 Manipud Kades, nagdaliasat ti entero a gimong ti Israel agingga a nakadanonda iti Bantay Hor

23 iti beddeng ti Edom. Sadiay, kinuna ni Yahweh kada Moises ken Aaron,

24 “Saan a sumrek ni Aaron iti daga nga inkarik nga ited iti Israel; matay ni Aaron gapu ta sinukiryo a dua ti bilinko idiay Meriba.

25 Alaem ni Aaron ken ni Eleazar nga anakna ket sumang-atkayo iti Bantay Hor.

26 Inton dumanonkayo sadiay, uksobem ti pagan-anayna a kas padi samo ikawes ken ni Eleazar. Ket sadiayen ti pakatayan ni Aaron.”

27 Tinungpal ni Moises ti bilin ni Yahweh. Nakita ti sibubukel a gimong ti isasang-atda iti Bantay.

28 Ididumtengda iti tapaw ti bantay, inuksob ni Moises ti pagan-anay ni Aaron ket inkawesna ken ni Eleazar. Sadiay a natay ni Aaron ket simmalog da Moises ken Eleazar.

29 Idi maammoan ti amin a gimong a natay ni Aaron, tallopulo nga aldaw a dinungdung-awanda.