Category: Numero

Parmeken dagiti Israelita dagiti Cananeo

1 Idimadamag ti Cananeo nga ari ti Arad iti akin-abagatan a paset ti Canaan a magna dagiti Israelita iti Atarim, rinautna ida ket innalana a balud ti sumagmamano kadakuada.

2 Insapata dagiti Israelita itiApo: “No palubosannakami a mangparmek kadagitoy a tattao, idatonmi kenka ida ken dagiti siudadda ket dadaelenmi ida.”

3 Impangag ni Yahweh ti dawatda ket tinulonganna ida a mangparmek kadagiti Cananeo. Ngarud, dinadael ida dagiti Israelita kasta met dagiti siudadda sada pinanaganan ti lugar iti Horma.

Ti Sinan-uleg a Bronse

4 Pimmanawdagiti Israelita iti Bantay Hor; linikawda ti sakup ti Edom ket nagnada iti kalsada nga agturong iti Gulfo ti Aqaba. Ngem iti dalan, naibus ti anus dagiti tattao

5 ketnagsaoda iti maibusor iti Dios ken ni Moises. Inreklamoda, “Apay nga impanawnakami idiay Egipto? Tapno patayennakam iti daytoy a let-ang nga awan ti taraon wenno danum? Maumakamin iti kastoy a kanen nga awan serserbina!”

6 Gapu iti daytoy, nangibaon ni Yahweh kadagiti nagita nga uleg iti ayanda ket adu nga Israelita ti nakagat a puon ti nakatayanda.

7 Napan dagiti tattao ken ni Moises ket kinunada, “Nagbasolkami iti panagsaomi iti maibusor itiApokasta met kenka. Ikararagmo koma itiAponga ipanawna dagitoy nga uleg.” Iti kasta, inkararagan ni Moises dagiti tattao.

8 Imbaga ni Yahweh a mangaramid ni Moises iti sinan-uleg a bronse sana ibayog tapno ti siasinoman a makagat umimbag no kitaenna ti sinan-uleg.

9 Nangaramidngarud ni Moises iti sinan-uleg, ket inkabilna iti kayo. No adda kagaten ti uleg, umimbag no kitaenna ti sinan-uleg.

Ti Panagdaliasatda iti Tanap ti Moab

10 Intuloy dagiti Israelita ti nagdaliasat ket nagkampoda idiay Obot.

11 Pimmanawda iti dayta a lugar ket nagkampoda kadagiti rebba ti Abarim iti let-ang iti dayaen ti sakup ti Moab.

12 Pimmanawda sadiay ket nagkampoda iti Tanap ti Zered.

13 Manipud sadiay, intuloyda manen ti nagdaliasat ket nagkampoda iti ballasiw ti Karayan Arnon iti let-ang iti bangirna ti amianan a dumanon iti sakup dagiti Amorreo. (Ti Arnon ti nagbeddengan ti sakup dagiti Moabita ken ti sakup dagiti Amorreo.)

14 Daytoy ti gapuna nga iti Libro dagiti Pannakigubat ni Yahweh adda kastoy a nailanad: “…ti ili ti Waheb idiay Sufa, ken dagiti tanap; ti Karayan Arnon,

15 ken ti salogan dagiti tanap a dumanon iti ili ti Ar ken iti beddeng ti Moab.”

16 Manipud sadiay, napanda iti maysa a lugar a managan Bubbubon a nagkunaan ni Yahweh ken ni Moises: “Ummongem dagiti tattao ket ikkak ida iti danum.”

17 Iti dayta a tiempo, kinanta dagiti Israelita daytoy:

“Dakayo a bubon,

agipussuakkay iti danum

ket kantaanmi—

18 Bubon a kinali dagiti papangulo,

dagiti agtuturay dagiti tattao;

bubon a nakali babaen iti setro ken bastonda.”

Pimmanawda iti let-ang ket nagturongda idiay Matana.

19 Manipud sadiay, napanda idiay Nahaliel ket manipud Nahaliel, napanda idiay Bamot

20 ket manipud Bamot, napanda iti tanap iti sakup ti Moab, iti babaen ti Bantay Pisga a pakatannawagan iti let-ang.

Parmeken ti Israel ni Ari Sihon ken Ari Og

21 Nangibaon dagiti Israelita kadagiti pannakabagida a mapan ken ni Sihon nga ari dagiti Amorreo ket kinunada kenkuana:

22 “Palubosannakami koma a lumasat iti dagam. Surotenmi ti dalan, dakami ken dagiti animalmi; dikam sumrek kadagiti talonyo wenno kaubasanyo ket dikam uminum kadagiti bubonyo. Magnakami iti kangrunaan a kalsadaagingga a makaruarkami iti sakupmo.”

23 Ngem saan a palubosan ni Sihon a lumasat dagiti Israelita iti dagana. Inummongna ketdi ti armadana ket dinarupna dagiti Israelita. Nagrarangetda idiay Jaaz iti let-ang.

24 Nagballigi dagiti Israelita a nangparmek kadagiti kabusor ket sinakupda ti dagada, manipud Karayan Arnon iti amianan ti Jabbok agingga iti Jazer iti beddeng dagiti Ammonita.

25 Sinakup dagiti Israelita ti amin a siudad dagiti Ammonita, agraman ti Hesbon ken amin a kabangibangna nga ili ket nagnaedda sadiay.

26 Ti Hesbon ti kangrunaan a siudad ni Sihon nga ari dagiti Amorreo. Nakiranget ni Sihon iti sigud nga ari ti Moab ket sinakupna ti amin a dagana agingga iti Karayan Arnon.

27 Daytoy ti gapuna nga ikanta dagiti mannaniw:

“Umaykay iti Hesbon a siudad ni Ari Sihon!

Kayatmi a makita a mabangon manen ket matarimaan.

28 Naminsan,manipud iti siudad ti Hesbon,

kasla apuy a rimmuar ti armada ni Sihon.

Dinadaelna ti siudad ti Ar iti Moab

ken inkisapnadagiti turod ti akingngato nga Arnon.

29 Anian a kinadaksanggasatyo, dakayo a tattao ti Moab!

Dakayo nga agdaydayaw ken ni Kemos,

agturongkay iti pannakadadael.

Pinalubosan ti diosmo

a kinamat ti ari dagiti Amorreo dagiti lallaki,

ken tiniliwna a kas balud dagiti babbai.

30 Ngem nadadaelen dagiti kaputotanda,

manipud Hesbon agingga’t idiay Dibon,

manipud Nasim agingga’t idiay Nofa, iti asideg ti Medeba.”

31 Ngarud, nagnaed dagiti Israelita iti sakup dagiti Amorreo.

32 Kalpasanna, nangibaon ni Moises kadagiti tattao tapno ammoenda no kasano a serkenda ti siudad ti Jazer. Sinakup dagiti Israelita ti siudad ken dagiti kabangibang nga ili; pinagtalawda dagiti Amorreo nga agnaed sadiay.

33 Nagsikko dagiti Israelita ket nagnada iti dalan nga agpa-Basan. Rimmuar ni Og nga ari ti Basan agraman ti armadana ket dinarupna ida idiay Edrei.

34 Kinuna ni Yahweh ken ni Moises, “Dika agbuteng kenkuana. Yawatko kenka ti ari, agraman ti amin a tattaona ken ti dagana. Aramidem kenkuana ti inaramidmo ken ni Sihon, ti ari dagiti Amorreo a nagturay idiay Hesbon.”

35 Pinatay dagiti Israelita ni Og, dagiti annakna ken amin a tattaona—awan ti nakalasat kadakuada. Ket sinakupda ti dagana.

Paayaban ti Ari ti Moab ni Balaam

1 Intuloy dagiti Israelita ti panagdaliasatda ket nagkampoda kadagiti tantanap ti Moab iti daya ti Jordan iti ballasiw ti Jerico.

2 Nadamag ni Ari Balak nga anak ni Sefor ti inaramid dagiti Israelita kadagiti Amorreo.

3 Nagbuteng ti ari ken dagiti amin a tattaona gapu iti kaadu dagiti Israelita.

4 Kinuna dagiti Moabita kadagiti pangulo dagiti Midianita, “Iti mabiit, ibusen daytoy a bunggoy ti amin nga adda iti lawlawtayo, kas iti panangibus ti baka iti ruot iti pagaraban.” Iti kasta,

5 nangibaonni Ari Balak kadagiti tattao a mapan mangayab ken ni Balaam nga anak ni Beor idiay Petor iti asideg ti Karayan Eufrates iti daga ti Amaw. Pinaibagana: “Adda sibubukel a nasion a naggapu idiay Egipto; nagsaknap dagiti tattaona iti amin a lugar ket kayatda a sakupen ti daga nga iturayak.

6 Ad-aduda ngem dakami, isu nga umaymo koma ilunod ida, barbareng maparmekmi ida ket mapagtalawmi ida iti daga. Ammok a no mangbendisionka, mabendisionan dagiti tattao, ket no mangilunodka, mailunodda.”

7 Intugot dagiti panglakayen ti Moab ken dagiti pangulo ti Midian ti pagbayad iti panagilunod ni Balaam. Imbagada ken ni Balaam ti pinaibaga ni Balak.

8 Kinuna ni Balaam kadakuada, “Maturogkayo ditoy ita a rabii ket inton bigat, ibagak kadakayo ti aniaman nga ibaga tiApo.” Immian ngarud dagiti pangulo ti Moab iti balay ni Balaam.

9 Iti dayta a rabii, nagparang ti Dios ken ni Balaam ket kinunana, “Siasino dagitoy sangailim?”

10 Insungbat ni Balaam, “Imbaon ida ni Balak nga ari ti Moab; imbagada kaniak

11 nga adda tattao a naggapu idiay Egipto ket nagsaknapda iti daga. Kayatna nga ilunodko ida tapno kabaelanna a sarangten ken paksiaten ida.”

12 Kinuna ti Dios ken ni Balaam, “Dika sumurot kadagitoy a tattao ken dimo ilunod dagiti Israelita gapu ta binendisionak ida.”

13 Kabigatanna, napan imbaga ni Balaam kadagiti imbaon ni Balak, “Agawidkayon; dinak palubosan tiApoa kumuyog kadakayo.”

14 Iti kasta, nagsublida ken ni Balak ket imbagada kenkuana a madi ni Balaam a kumuyog kadakuada.

15 Nangibaon manen ni Balak iti ad-adu a panglakayen nga ad-adda a mararaem ngem dagiti immuna.

16 Napanda ken ni Balaam ket impakaammoda ti imbaga ni Balak: “Pangngaasim ta dimo ipalubos nga adda makalapped iti yaaymo kaniak!

17 Gunggonaanka iti adu ket aramidek ti aniaman nga ibagam. Umaymo koma ilunod dagitoy a tattao.”

18 Ngem insungbat ni Balaam, “Uray no ited kaniak ni Balak ti amin a pirak ken balitok iti palasiona, diak mabalin a sukiren ti bilin tiApoa Diosko iti uray kabassitan a banag.

19 Nupay kasta, umiankayo met ditoy ita a rabii tapno maammoak no adda pay ibaga tiApokaniak.”

20 Iti dayta a rabii, napan ti Dios ken ni Balaam ket kinunana, “No umaydaka ayaban dagitoy a tattao, kumuyogka kadakuada ngem ti laeng ibagak kenka ti aramidem.”

Ni Balaam ken ti Asnona

21 Iti sumuno a bigat, sinilyaan ni Balaam ti asnona ket kimmuyog kadagiti pangulo a taga-Moab.

22 Nakapungtot ti Dios gapu iti ipapan ni Balaam. Idi adda iti dalan a sisasakay iti asnona ken kinuyog ti dua nga adipenna, nagtakder ti anghel ni Yahweh iti kalsada tapno lapdanna.

23 Nakita ti asno ti agtaktakder nga anghel a nakaiggem iti kampilan ket simmina iti dalan sa nagturong iti taltalon. Inablatan ni Balaam ti asno tapno agsubli iti dalan.

24 Nagtakder ti anghel iti dana iti nagbaetan ti dua a kaubasan; nailet dayta a paset ti kalsada nga adda bakud iti agsumbangir.

25 Idi makita ti asno ti anghel, immampir iti bakud ket nalipit ti saka ni Balaam. Inablatan manen ni Balaam ti asno.

26 Binangenan manen ti anghel ti pagnaan; nagtakder iti disso a pulos nga awan makapagna iti agsumbangir.

27 Ita, nagidda ti asno apaman a nakitana ti anghel. Nakapungtot ni Balaam ket rinugianna nga ablatan ti asno.

28 Inikkan ni Yahweh ti asno iti pannakabalin nga agsao ket kinunana ken ni Balaam, “Ania aya ti nakabasolak kenka? Namitlon nga inablatannak.”

29 Insungbat ni Balaam, “Gapu ta pagbalbalinennak a maag! No adda la kampilanko, pinatayka koman.”

30 Kinuna ti asno, “Asnonak, saan kadi? Nabayagen a nagsaksakayannak. Napuotamon aya a sinukirka?”

“Saan pay,” insungbat ni Balaam.

31 Impalubos ni Yahweh a makita ni Balaam ti agtatakder nga anghel a nakaiggem iti kampilan. Nagpakleb ni Balaam iti daga.

32 Kinuna ti anghel kenkuana, “Apay a kasta ti inaramidmo iti asnom? Namitlon nga inablatam! Umayko lapdan ti ipapanmo gapu ta saan a rumbeng a mapanka.

33 Ngem nakitanak ti asnom, ket naglisi iti namitlo. No saan a naglisi, pinatayka koma ket naispal ti asno.”

34 Kinuna ni Balaam, “Nagbasolak. Diak ammo a nakatakderka iti kalsada tapno lapdannak. Agawidakon no saan a rumbeng a mapanak.”

35 Ngem kinuna ti anghel, “Kumuyogka kadagitoy a tattao, ngem ti laeng ibagak ti sawem.” Ket simmurot ni Balaam kadagiti imbaon ni Balak.

Sangailien ni Balak ni Balaam

36 Idi madamag ni Balak a sumangpet ni Balaam, napanna sinabat idiay Ar, maysa a siudad iti igid ti Karayan Arnon iti beddeng ti Moab.

37 Kinuna ni Balak ken ni Balaam, “Apay a dika immay idi damo a pinaayabanka? Impagarupmo kadi nga awan umdas a panggunggonak kenka?”

38 Insungbat ni Balaam, “Uray ket addaakon. Ngem awan bukodko a pannakabalin nga agsao. Ti laeng sawen kaniak ti Dios ti mabalinko nga ibaga.”

39 Simmurot ni Balaam ken ni Balak iti ili ti Husot.

40 Idi dumtengda sadiay, nagparti ni Balak iti baka ken karnero ket inikkanna iti karne ni Balaam ken dagiti pangulo a kinakuyogna.

Ti Umuna a Padto ni Balaam

41 Kabigatanna, simmang-at da Balak ken Balaam idiay Bamot Baal. Manipud iti ayanda, matannawagan ni Balaam ti dadduma a kampo dagiti Israelita.

1 Kinunana ken ni Balak, “Ibangonannak ditoy iti pito nga altar saka mangyeg iti pito a toro a baka ken pito a kalakian a karnero.”

2 Nagtungpal ni Balak, ket kaduana ni Balaam a nangidaton iti toro a baka ken kalakian a karnero iti tunggal altar.

3 Kinuna ni Balaam ken ni Balak, “Agbatika ditoy abay ti datonmo a mapuoran, ta innak kitaen no umaynak kasao tiApo. Ibagakto kenka ti aniaman a maipaltiing kaniak.” Napan ni Balaam iti kalbo a turod

4 ket nagparang ti Dios kenkuana. Kinuna ni Balaam kenkuana, “Nangbangonak iti pito nga altar ket nangidatonak iti baka ken karnero iti tunggal altar.”

5 Kinuna ni Yahweh, “Agsublika ken ni Balak ket ibagam kenkuana ti saok.”

6 Nagsubli ngarud ni Balaam iti ayan ni Balak. Nadanonna ni Balak ken dagiti amin a pangulo ti Moab; agtatakderda pay laeng iti ayan ti datonna a mapuoran.

7 Inyebkas ni Balaam daytoy a padto:

“Pinaalanak ni Balak nga ari ti Moab

idiay Syria, iti kabambantayan ti daya.

Inawisnak a mangilunod kadagiti Israelita.

8 Apay nga ilunodko ti di inlunod ti Dios?

Kasano nga isaok ti dakes a pagbanaganda

idinto a saan nga inyebkas tiApoti kasta?

9 Manipud nangato a kabatoan, makitak ida,

manipud katurturodan, maimatangak ida

maysa a nasion nga agbiag nga agmaymaysa,

naiduma a pagilian, naisalsalumina.

10 Kasla tapok ti kaadu dagiti kaputotan ti Israel—

di mabilang ti umariwekwek a kaaduda.

Ti ipapatayko kas koma ti ipapatay dagiti tattao ti Dios;

pumusayak koma a natalna a kas kadagiti nalinteg.”

11 Kinuna ni Balak ken ni Balaam, “Ania daytoy nga inaramidmo kaniak? Inyegka ditoy tapno ilunodmo dagiti kabusorko, ngem binendisionam ketdi ida.”

12 Insungbatna, “Ti laeng ibaga kaniak tiApoti mabalinko nga ibaga.”

Ti Maikadua a Padto ni Balaam

13 Kinuna ni Balak ken ni Balaam, “Inta iti sabali a lugar a pakatannawagam kadagiti dadduma nga Israelita. Sadiay, ilunodmo ida.”

14 Napanda iti tapaw ti Bantay Pisga. Iti talon ti Zofim, nangbangon manen ni Balak iti pito nga altar ket nangidatag iti toro a baka ken kalakian a karnero iti tunggal altar.

15 Kinuna ni Balaam ken ni Balak, “Agbatika ditoy iti abay ti datonmo a mapuoran ta innak makiuman iti Dios sadiay.”

16 Nakiuman ni Yahweh ken ni Balaam. Imbaga ni Yahweh ti sawenna sana pinagsubli tapno ibagana ken ni Balak ti saona.

17 Nagsubli iti ayan ni Balak a sitatakder pay laeng iti abay ti datonna a mapuoran a kaduana dagiti papangulo ti Moab. Sinaludsod ni Balak no ania ti imbaga ni Yahweh.

18 Kastoy ti padto nga inyebkas ni Balaam:

“Balak nga anak ni Sefor, dumngegka;

denggem ti innak ibaga kenka.

19 Saan a tao ti Dios tapno agulbod;

saan nga agbalbaliw ti panunotna.

Aramidenna ti aniaman nga ikarina.

20 Naibilin a mangbendisionak;

no mangbendision ti Dios, diak mabaliwan.

21 Iti Israel awan makitak a didigra,

awan kinadaksanggasat iti masakbayanna.

Adda kadakuada tiApoa Diosda

ket ipakaammoda nga isu ti arida.

22 Inruar ida ti Dios idiay Egipto;

makiranget gapu kadakuada a kasla atap a baka.

23 Awan buyon wenno padles

a maaramat a maibusor iti Israel.

Ita, kuna dagiti tattao maipapan iti Israel:

‘Kitaenyo ti inaramid ti Dios!’

24 Kasla nabileg a leon ti Israel.

Di agtalna no dina mapisangpisang ti kabusorna,

di agsardeng no dina mainum ti darana.”

25 Kinuna ni Balak ken ni Balaam, “No dimo kayat nga ilunod dagiti Israelita, dimo koma ngarud bendisionan ida!”

26 Insungbat ni Balaam, “Diak aya imbaga kenka a masapul nga aramidek amin a sawen tiApo?”

Ti Maikatlo a Padto ni Balaam

27 Kinuna ni Balak, “Sumurotka ket ipanka iti sabali a lugar. Nalabit a palubosannaka ti Dios a mangilunod kadakuada manipud sadiay.”

28 Iti kasta, impanna ni Balaam iti Bantay Peor a pakatannawagan ti let-ang.

29 Kinuna ni Balaam kenkuana, “Ibangonannak iti pito nga altar ditoy ket yegannak iti pito a toro a baka ken pito a kalakian a karnero.”

30 Inaramid ni Balak ti naibaga kenkuana ket nangidaton iti baka ken karnero iti tunggal altar.

1 Awanen duadua ni Balaam a kayat ni Yahweh a bendisionanna dagiti Israelita, isu a saanen a napan nagbirok kadagiti pagilasinan iti panagipadtona. Nagturong iti let-ang

2 ket nakitana dagiti Israelita a nagkampo a nabunggo-bunggoy iti tunggal tribu. Inturayan ti espiritu ti Dios

3 ket inyebkasna daytoy a padto:

“Sao daytoy ni Balaam nga anak ni Beor,

padto ti tao a nalawag ti makitana

4 Ken mangngegna ti ibagbaga ti Dios.

Simumulagatak ket makitak ti parmata

nga aggapu iti Dios a Mannakabalin-amin.

5 Napintas dagiti tolda ti Israel.

6 Kasda la atiddog nga intar ti palma

wenno minuyongan iti igid ti karayan.

Kasda la aloe nga immula tiApo

wenno sedro iti igid ti waig.

7 Addaandanto iti tudo a nabuslon

agmuladanto kadagiti mapadanuman a taltalon.

Nabilbilegto ngem ni Agag ti arida,

lumawanto ti sakupen ti pagturayanna.

8 Inruar ti Dios ida idiay Egipto.

Makiranget gapu kadakuada a kasla atap a baka.

Alun-onenda dagiti kabusorda,

bungbungtolenda dagiti tultulangda

ket tukkotukkolenda dagiti panada.

9 Mayarigti nasion iti nabileg a leon

a no matmaturog awan makaitured a mangriing kenkuana.

Mabendisionan ti mangbendision iti Israel

ket mailunod ti mangilunod kenkuana.”

10 Nangmesmes ni Balak gapu iti pungtotna ket kinunana ken ni Balaam, “Pinaayabanka a mangilunod kadagiti kabusorko. Apay a binendisionam ida? Ket namitlo pay!

11 Agawidkan! Inkarik a gunggonaanka ngem saan nga impalubos tiApo.”

12 Kinuna ni Balaam, “Imbagak kadagiti imbaonmo nga

13 uray itedmo kaniak ti amin a pirak ken balitok iti palasiom, diak mabalin a sukiren tiApo; diak mabalin nga aramiden ti saanna a paaramid. Ti laeng ibaga kaniak tiApoti ibagak.”

Dagiti Maudi a Padto ni Balaam

14 Kinuna ni Balaam ken ni Balak, “Agawidakon kadagiti tattaok ngem sakbay nga agawidak, ballaaganka maipapan iti aramiden dagiti Israelita kadagiti tattaom iti masakbayan.”

15 Ket inyebkasna daytoy a padto:

“Sao daytoy ni Balaam nga anak ni Beor,

padto ti tao a nalawag ti makitana

16 ken mangngegna ti ibagbaga ti Dios,

ket awatenna ti pannakaammo nga agtaud iti Kangatoan.

Simumulagatak ket makitak ti parmata nga aggapu iti Dios a Mannakabalin-amin.

17 Makitak ti Israel iti masakbayan

Addanto ari a tumaud iti dayta a pagilian,

Kaslanto naraniag a bituen.

Manipud iti Israel, tumpuarto a layap

Burakennanto ti ulo ti Moab,

ket parmekennanto dagiti amin a tattao ti Set.

18 Agballiginto kadagiti kabusorna iti Edom,

ket tagikuaennanto ti dagada

ket pumigpigsa latta dagiti Israelita.

19 Ibaddebaddekto ida ti nasion ti Israel,

ket ikisapnanto dagiti makalasat.”

20 Iti parmata ni Balaam, nakitana dagiti Amalekita ket impadtona daytoy:

“Ti Amalec ti kabilgan iti amin a pagilian,

ngem iti kamaudiananna mapukawto iti agnanayon.”

21 Iti parmatana, nakitana dagiti Kineo ket impadtona daytoy:

“Natalged ti lugar a pagnaedanyo,

natalged a kas iti umok iti nangato a rangkis.

22 Ngem madadaelkayto, dakayo a Kineo,

inton italawdakayo a kas balud dagiti Asirio.”

23 Impadto daytoy ni Balaam:

“Siasino dagitoy a tattao nga aguummong iti amianan?

24 Manipud Chipre, sumangpet dagiti bapor

Lugan dagiti umay mangraut;

parmekendanto ti Asiria ken Babilonia,

ngem uray isuda mapukawdanto iti agnanayon.”

25 Kalpasanna, nagawid ni Balaam ket nagturong met ni Balak iti papananna.

Dagiti Israelita idiay Peor

1 Bayat ti panagkampo dagiti Israelita idiay Settim, nakikakaiddada kadagiti babbai a Moabita.

2 Masansan nga awisen dagitoy a babai dagiti Israelita a dumar-ay kadagiti fiesta a pagidataganda kadagiti datonda iti didiosen ti Moab. Nakipangpangan dagiti Israelita kadagiti taraon, ket nagdaydayawda ken ni didiosen

3 a Baal idiay Peor. Nakapungtot tiApokadakuada,

4 bket kinunana ken ni Moises, “Ummongem dagiti amin a papangulo ti Israel ket papatayem ida iti imatang dagiti tattaotapno agbaaw ti pungtotko iti Israel.”

5 Kinuna ni Moises kadagiti ofisiales, “Papatayenyo dagiti amin a tattao iti tribuyo a nagdaydayaw ken ni Baal iti Peor.”

6 Bayat ti panagdungdung-aw ni Moises ken ti sangkagimongan iti ruangan ti Tolda ti Dios, dimteng ti maysa nga Israelita. Adda kaduana a babai a Midianita ket iti imatangda amin, simrekda a dua iti tolda ti lalaki.

7 Idi nakita daytoy ni Finees nga anak ni Eleazar ken apoko ni Aaron a padi, pimmanaw iti tallaong. Nangala iti pika,

8 ket sinurotna ti lalaki ken ti babai iti tolda a simrekanda. Dinuyokna ida a dua ket nagsalput ti pika iti bagida. Gapu iti inaramid ni Finees, nagsardeng ti didigra a mangdaddadael kadagiti Israelita.

9 Nupay kasta, aganayen a 24,000 a tattao ti natay.

10 Kinuna ni Yahweh ken ni Moises,

11 “Gapu iti inaramid ni Finees, awanen ti pungtotko kadagiti Israelita. Dina impalubos nga agdaydayaw dagiti tattao iti sabali a didiosen—siak laeng ti pagdaydayawanda. Daytoy ti gapuna a diak dinadael ida gapu iti pungtotko.

12 Ibagam ngarud kenkuana a makitulagak kenkuana iti tulag a mataginayon iti amin a tiempo.

13 Isu ken dagiti kaputotanna ti maisaad a padi iti agnanayon, agsipud ta dina impalubos nga adda sabali a didiosen a pagdaydayawan dagiti tattao, ket inyegna ti pannakapakawan ti basol dagiti tattao.”

14 Zimri ti nagan ti Israelita a napapatay a nairaman iti babai a Midianita. Isu ti anak ni Salu a pangulo ti maysa a familia ti tribu ti Simeon.

15 Cozbi ti nagan ti Midianita. Isu ti anak ni Zur a pangulo met ti maysa a kapuonan iti Midian.

16 Binilin ni Yahweh ni Moises,

17 “Rautenyo dagiti Midianita ket papatayenyo ida

18 gapu iti panangallilawda kadakayo idiay Peor ken gapu ken ni Cozbi a napapatay idi inyegko ti didigra sadiay.”

Ti Maikadua a Sensus

1 Kalpasanti didigra, kinuna ni Yahweh kada Moises ken Eleazar nga anak ni Aaron,

2 “Bilangenyo amin nga Israelita nga agtawen iti 20 wenno nasursurok pay a mabalin nga agsoldado segun ti familia a nagtaudan ti tunggal maysa.”

3-4 Nagtungpal da Moises ken Eleazar ket inummongda dagiti amin a lallaki nga agtawen iti 20 ken nasursurok pay. Naguummongda iti tanap ti Moab iti ballasiw ti Karayan Jordan a sumango iti Jerico.

Dagitoy dagiti Israelita a pimmanaw idiay Egipto:

5 Ti tribu ni Ruben (isu ti inauna nga anak ni Jacob): dagiti familia ni Hanoc, Pallu,

6 Hezron ken Carmi.

7 Agdagup iti 43,730 dagitoy a kapuonan.

8 Dagiti kaputotan ni Pallu isuda da Eliab

9 ken dagiti annakna a Nemuel, Datan ken Abiram. (Da Datan ken Abiram ti pinili idi ti sangkagimongan. Binusorda da Moises ken Aaron ket simmurotda kadagiti pasurot ni Kora idi sinukirda tiApo.

10 Nagrengngat ti daga ket inalun-onna ida. Nairamanda a natay ken ni Kora agraman dagiti pasurotna idi naikisap ti 250 a lallaki babaen iti apuy. Nagserbi dagitoy a pasamak a ballaag kadagiti tattao.

11 Ngem saan a napapatay dagiti annak ni Kora.)

12 Ti tribu ni Simeon: dagiti familia da Nemuel, Jamin, Jakin,

13 Zera ken Saul.

14 Agdagup iti 22,200 dagitoy a kapuonan.

15 Ti tribu ni Gad: dagiti familia da Sefon, Haggi, Suni,

16 Ozni, Eri,

17 Arod ken Areli.

18 Agdagup iti 40,500 dagitoy a kapuonan.

19 Ti tribu ni Juda (dua kadagiti annak ni Juda, da Er ken Onan ti natay idiay Canaan):

20 dagiti familia da Sela, Perez, Zera,

21 Hezron ken Hamul.

22 Agdagup iti 76,500 dagitoy a kapuonan.

23 Ti tribu ni Issacar: dagiti familia da Tola, Puva,

24 Jasub ken Simron.

25 Agdagup iti 64,300 dagitoy a familia.

26 Ti tribu ni Zabulon: dagiti familia da Sered, Elon ken Jaleel.

27 Agdagup iti 60,500 dagitoy a kapuonan.

28 Dagiti tribu ni Jose nga ama da Manases ken Efraim.

29 Ti tribu ni Manases: Ni Makir nga anak ni Manases ti ama ni Galaad. Dagitoy a kapuonan ti nagtaud ken ni Galaad:

30 dagiti familia ni Jezer, Helek,

31 Asriel, Sekem,

32 Semida ken Hefer.

33 Awan lalaki nga anak ni Zelofehad nga anak ni Hefer. Pasig a babbai ti annakna: Maala, Noa, Hogla, Milca ken Tirza.

34 Agdagup iti 52,700 dagitoy a kapuonan.

35 Ti tribu ni Efraim: dagiti familia da Sutela, Beker ken Tahan.

36 Nagtaud ken ni Sutela ti familia ni Eran.

37 Agdagup iti 32,500 dagitoy a kapuonan.

Dagitoy ti familia a nagtaud ken ni Jose.

38 Ti tribu ni Benjamin: dagiti familia da Bela, Asbel, Ahiram,

39 Sefufam ken Hufam.

40 Nagtaud ken ni Bela dagiti familia da Ard ken Naaman.

41 Agdagup iti 45,600 dagitoy a familia.

42 Ti tribu ni Dan: ti familia ni Husim

43 nga agdagup iti 64,400.

44 Ti tribu ni Aser: dagiti familia da Imna, Isvi ken Beria.

45 Nagtaud ken ni Beria dagiti familia da Heber ken Malkiel.

46 Adda babai nga anak ni Aser. Sera ti naganna.

47 Agdagup iti 53,400 dagitoy a familia.

48 Ti tribu ni Neftali: dagiti familia da Jazeel, Guni,

49 Jezer ken Sillem.

50 Agdagup iti 45,400 dagitoy a familia.

51 Agdagup amin dagiti Israelita a lallaki iti 601,730.

52 Kinunani Yahweh ken ni Moises,

53 “Bingbingayem ti daga, ket itedmo kadagiti tribu segun ti kaaduda.

54-56 Bingbingayem ti daga babaen iti binnunot. No dakkel ti tribu, dakkel met ti bingayna ket no bassit ti tribu, bassit met ti bingayna.”

57 Buklen dagiti familia da Gerson, Coat ken Merari ti tribu ni Levi.

58 Nagtaud dagiti dadduma a familia dagiti Levita kada Libni, Hebron, Mali, Musi ken Kora. Ni Coat ti ama ni Amram

59 a nangasawa ken ni Jocabed a nayanak idiay Egipto ken anak ni Levi. Annak da Amram ken Jocabed da Aaron, Moises ken Miriam.

60 Uppatti lallaki nga annak ni Aaron: Nadab, Abiu, Eleazar ken Itamar.

61 Natayda Nadab ken Abiu idi nangidatonda ken ni Yahweh iti saan a nasagradoan nga apuy.

62 Agdagup iti 23,000 dagiti Levita nga adda makabulanna wenno nasursurok pay. Dida nairaman iti listaan dagiti Israelita agsipud ta awan tawidda iti Israel.

63 Inlista da Moises ken Eleazar dagitoy a familia idi binilangda dagiti Israelita iti tanap ti Moab iti ballasiw ti Karayan Jordan a sumango iti Jerico.

64 Kadagiti lallaki a binilang idi da Moises ken Aaron iti Let-ang ti Sinai, awanen ti uray maysa a natda.

65 Imbagani Yahweh a matayda amin idiay let-ang ket pudno a natayda amin malaksid ni Caleb nga anak ni Jefone, ken ni Josue nga anak ni Nun.

Dagiti Babbai nga Annak ni Zelofehad

1 Da Mala, Noa, Hogla, Milca ken Tirza dagiti babbai nga annak ni Zelofehad nga anak ni Hefer nga anak ni Galaad nga anak ni Makir nga anak ni Manases nga anak ni Jose.

2 Dimmatagda kada Moises, Eleazar a padi, kadagiti papangulo ken iti sangkagimongan iti ruangan ti Tolda ti Dios, ket kinunada,

3 “Natay daydi amami nga awan anakna a lalaki. Saan a nairaman iti bunggoy ni Kora a bimmusor itiApo. Natay gapu iti basolna.

4 Gapu ta awan lalaki nga anakna, rumbeng kadi a mapukaw ti naganna iti familiana? Ibingayandakam iti sanikua dagiti kabagian ni amami.”

5 Inyuman ni Moises ti parikutda ken ni Yahweh.

6 Kinuna ni Yahweh kenkuana,

7 “Nainkalinteganti dawat dagiti annak ni Zelofehad. Patawidam met ida iti sanikua dagiti kabagian ni amada. Itedmo ti tawiden koma ni amada.

8 Ibagam kadagiti Israelita a no matay ti maysa a tao nga awan anakna a lalaki, ti anakna a babai ti agtawid iti sanikuana.

9 Ngem no awan ti anakna a babai, dagiti lallaki a kakabsatna ti agtawid iti sanikuana.

10 No awan ti ulitegna, dagiti lallaki a kabsat ti amana ti agtawid.

11 No awan lallaki a kakabsatna wenno ulitegna, ti kaasitgan a kabagianna ti agtawid ket alaenna a kas kukuana. Annuroten dagiti Israelita daytoy a linteg kas imbilinko. Siak ni Yahweh.”

Madutokan ni Josue a Sumukat ken ni Moises

12 Kinunani Yahweh ken ni Moises, “Sumang-atka iti Bantay Abarim, ket tannawagam ti daga nga itedko kadagiti Israelita.

13 Kalpasanna, mataykanto a kas ken ni kabsatmo nga Aaron,

14 agsipud ta sinukiryo a dua ti bilinko idiay let-ang ti Zin. Idi nagsao dagiti tattao iti maibusor kaniak idiay Meriba, diyo binigbig ti nasantoan a pannakabalinko iti imatang dagiti tattao.” (Ti Meriba isu ti ubbog idiay Kades iti let-ang ti Zin.)

15 Nagkararag ni Moises,

16 “OApoa Dios, a pagtaudan ti amin a biag, dawatek a mangdutokka iti lalaki a makaidalan kadagiti tattao,

17 kenmakabilin kadakuada a makigubat, tapno saan a maipada ti ilim kadagiti karnero nga awan pastorda.”

18 Kinunani Yahweh ken ni Moises, “Ayabam ni Josue nga anak ni Nun, maysa a tao a makabael, ket ipataymo ti imam iti ulona.

19 Pagtakderem iti sangoanan ni Eleazar a padi ken ti sangkagimongan ket iwaragawagmo nga isu ti sumukat kenka.

20 Itedmo kenkuana ti dadduma a turaymo tapno dagiti amin nga Israelita agtulnog kenkuana.

21 Agpannuraytoken ni Eleazar a padi a makiuman kaniak babaen iti panangaramatna iti Urim ken Tummim. No ania ti ibaga ni Eleazar ken ni Josue, isunto ti aramiden ti gimong ti Israel.”

22 Tinungpal ni Moises ti imbilin kenkuana ni Yahweh. Pinagtakderna ni Josue iti sangoanan ni Eleazar a padi ken ti sangkagimongan.

23 Impataynati imana iti ulo ni Josue ket inwaragawagna nga isu ti kasukatna.

Dagiti Inaldaw a Maidaton

1 Binilin ni Yahweh ni Moises

2 nga ibagana kadagiti Israelita a masapul nga idatagda iti Dios iti naituding a tiempo dagiti inaldaw a daton a mapuoran a nabanglo kenkuana.

3 Dagitoy dagiti daton a mapuoran a masapul a maidatag itiApo. Para iti daton a mapuoran iti inaldaw, dua a kalakian nga urbon ti karnero a maysa ti tawenda ken awan depektoda.

4 Maidatag ti maysa a karnero iti bigat, ket ti maysa iti sumipnget.

5 Mapakuyogan ti tunggal karnero iti daton a makan a naaramid iti sangakilo nga arina a nagamay iti sangalitro ti kasayaatan a lana ti olibo.

6 Daytoy ti inaldaw a daton nga immuna a naidatag idiay Bantay Sinai a daton a mapuoran a nabanglo itiApo.

7 Mapakuyogan ti umuna a karnero iti daton a sangalitro nga arak a maibuyat iti altar.

8 Iti sumipnget, maidaton ti maikadua nga urbon ti karnero ket pakuyogan met iti arak, kas iti daton iti bigat. Daton met a mapuoran daytoy a nabanglo itiApo.

Ti Daton a Maidatag iti Aldaw a Panaginana

9 Iti Aldaw a Panaginana, maidatag ti dua a kalakian a karnero a maysa ti tawenna ken awan depektoda agraman dua a kilo nga arina a nagamay iti lana ti olibo a daton a makan ken ti daton nga arak.

10 Maidatag daytoy a daton a mapuoran iti tunggal Aldaw a Panaginana a mainayon iti inaldaw a daton agraman ti daton nga arak.

Ti Daton a Maidatag iti Umuna nga Aldaw ti Bulan

11 Iti umuna nga aldaw ti tunggal bulan, dagitoy ti idatagyo a daton a mapuoran itiApo: dua a bumaro a baka, maysa a kalakian a karnero, pito a kalakian a karnero nga agtawen iti maysa ken awan ti depektoda.

12 Kas daton a makan, mangidatagkayo iti arina a nagamay iti lana ti olibo. Maipakuyog iti tunggal baka ti tallo a kilo nga arina, iti tunggal karnero, dua a kilo,

13 ket iti tunggal urbon ti karnero, maysa a kilo. Dagitoy dagiti daton a mapuoran a nabanglo itiApo.

14 Ti daton nga inumen: dua a litro nga arak iti tunggal baka; maysa ket kagudua a litro iti karnero, ket maysa a litro iti tunggal urbon ti karnero. Daytoy ti maannurot iti daton a mapuoran iti umuna nga aldaw ti tunggal bulan.

15 Malaksid ti inaldaw a daton a mapuoran agraman ti daton nga arak, mangidatagkayo met iti kalakian a kalding a daton gapu iti basol.

Dagiti Daton iti Fiesta ti Tinapay nga Awan Lebadurana

16 Marambakaniti maika-14 nga aldaw ti umuna a bulan ti Fiesta ti Paskua a pammadayaw itiApo.

17 Itimaika-15 nga aldaw, mangrugi ti nasantoan a fiesta nga agpaut iti pito nga aldaw. Iti las-ud daytoy a tiempo, dagiti laeng tinapay nga awan lebadurana ti mabalin a kanen.

18 Iti umuna nga aldaw ti fiesta, aguummongkayo nga agdaydayaw, ket awan ti agtrabaho.

19 Mangidatagkayo iti mapuoran a daton a makan itiApo: dua a bumaro a baka, maysa a kalakian a karnero ken pito a kalakian nga urbon ti karnero a maysa ti tawenda ken awan depektoda.

20 Pakuyoganyo dagitoy iti daton a makan a naaramid iti arina a nagamay iti lana ti olibo: tallo a kilo iti tunggal baka, dua a kilo iti tunggal karnero,

21 ken maysa a kilo iti tunggal urbon ti karnero.

22 Mangidatagkayo met iti kalakian a kalding a daton a mangpunas iti basol. Kastoy ti seremonia ti pannakadalus dagiti tattao.

23 Idatagyo dagitoy a mainayon iti binigat a daton a mapuoran.

24 Kasta met nga iti las-ud ti pito nga aldaw, mangidatagkayo itiApoiti daton a makan a nabanglo kenkuana. Idatonyo daytoy malaksid ti inaldaw a daton a mapuoran ken ti daton nga arak.

25 Iti maika-7 nga aldaw, aguummongkayo manen nga agdaydayaw ket awan ti agtrabaho.

Dagiti Daton iti Fiesta ti Apit

26 ItiFiesta ti Apit, no idatagyo dagiti baro nga apit a datonyo itiApo, aguummongkayo nga agdaydayaw, ket awan ti agtrabaho.

27 Mangidatagkayo iti daton a mapuoran a nabanglo itiApo: dua a bumaro a baka, maysa a kalakian a karnero ken pito nga urbon ti karnero a maysa ti tawenda ken awan depektoda.

28 Pakuyoganyo dagitoy iti daton a makan a naaramid iti arina a nagamay iti lana ti olibo: tallo a kilo iti tunggal baka, dua a kilo iti tunggal karnero,

29 maysa a kilo iti tunggal urbon ti karnero.

30 Mangidatagkayo met iti kalakian a kalding a daton a mangpunas iti basol. Kastoy ti seremonia ti pannakadalus dagiti tattao.

31 Idatagyo dagitoy agraman ti daton nga arak malaksid laeng ti inaldaw a daton a mapuoran ken daton a makan.

Dagiti Daton iti Fiesta ti Baro a Tawen

1 Iti umuna nga aldaw ti maika-7 a bulan, aguummongkayo nga agdaydayaw ket awan ti agtrabaho. Iti dayta nga aldaw, mapuyot dagiti trumpeta.

2 Mangidatagkayo iti daton a mapuoran a nabanglo itiApo: maysa a bumaro a baka, maysa a kalakian a karnero ken pito a kalakian nga urbon ti karnero a maysa ti tawenda ken awan depektoda.

3 Pakuyoganyo daytoy iti daton a makan a naaramid iti arina a nagamay iti lana ti olibo: tallo a kilo iti tunggal baka, dua a kilo iti tunggal karnero

4 ken maysa a kilo iti tunggal urbon ti karnero.

5 Mangidatagkayo met iti kalakian a kalding a daton a mangpunas iti basol. Kastoy ti seremonia ti pannakadalus dagiti tattao.

6 Idatagyo daytoy agraman ti inaldaw a daton a mapuoran iti umuna nga aldaw ti bulan agraman ti daton a makan. Idatagyo met ti inaldaw a daton a mapuoran agraman ti daton a makan ken ti daton nga arak. Mapuoran daytoy a mangted iti nabanglo nga ayamuom itiApo.

Dagiti Daton iti Aldaw a Pannakapakawan ti Basol

7 Aguummongkayonga agdaydayaw iti maika-10 nga aldaw iti maika-7 a bulan; dikay mangan ken agtrabaho.

8 Mangidatagkayo iti daton a mapuoran a nabanglo itiApo. Adtoy dagiti idatonyo: maysa a bumaro a baka, maysa a kalakian a karnero ken pito nga urbon a karnero a maysa ti tawenda ken awan depektoda.

9 Pakuyoganyo dagitoy iti daton a makan a naaramid iti arina a nagamay iti lana ti olibo: tallo a kilo iti tunggal baka, dua a kilo iti tunggal karnero

10 ken maysa a kilo iti tunggal urbon ti karnero.

11 Mangidatagkayo met iti kalakian a kalding a daton a mangpunas iti basol, malaksid laeng iti daton a kalding iti seremonia ti pannakadalus dagiti tattao ken dagiti inaldaw a daton agraman ti daton a makan ken ti daton nga arak.

Dagiti Daton iti Fiesta dagiti Abong-abong

12 Aguummongkayonga agdaydayaw iti maika-15 nga aldaw iti maika-7 a bulan. Pito nga aldaw a rambakanyo daytoy a fiesta a pammadayaw itiApoket dikay agtrabaho.

13 Iti daytoy umuna nga aldaw, mangidatagkayo iti daton a makan a nabanglo itiApo: 13 a bumaro a baka, dua a kalakian a karnero ken 14 nga urbon a karnero a maysa ti tawenda ken awan ti depektoda.

14 Pakuyoganyo dagitoy iti daton a makan a nagamay iti lana ti olibo: tallo a kilo nga arina iti tunggal baka, dua a kilo iti tunggal karnero

15 ken maysa a kilo iti tunggal urbon ti karnero, agraman dagiti naituding a daton nga arak.

16 Mangidatagkayo met iti kalakian a kalding a daton a mangpunas iti basol. Idatagyo dagitoy a mainayon iti inaldaw a daton a mapuoran agraman naituding a daton a makan ken ti daton nga arak.

17 Iti maikadua nga aldaw, mangidatagkayo iti 12 a bumaro a baka, dua a kalakian a karnero ken 14 nga urbon ti karnero a maysa ti tawenda ken awan ti depektoda.

18-19 Ipakuyogyo nga idaton dagiti amin a daton a naituding a maidatag iti umuna nga aldaw.

20 Iti maikatlo nga aldaw, mangidatagkayo iti 11 a bumaro a baka, dua a kalakian a karnero ken 14 nga urbon ti karnero a maysa ti tawenda ken awan ti depektoda.

21-22 Ipakuyogyo nga idaton dagiti amin a daton a naituding a maidatag iti umuna nga aldaw.

23 Iti maikapat nga aldaw, mangidatagkayo iti sangapulo a bumaro a baka, dua a kalakian a karnero, ken 14 nga urbon ti karnero a maysa ti tawenda ken awan ti depektoda.

24-25 Ipakuyogyo dagiti amin a daton a naituding ti umuna nga aldaw.

26 Iti maikalima nga aldaw, mangidatagkayo iti siam a bumaro a baka, dua a kalakian a karnero ken 14 nga urbon ti karnero a maysa ti tawenda ken awan ti depektoda.

27-28 Ipakuyogyo nga idaton dagiti amin a daton a naituding a maidatag iti umuna nga aldaw.

29 Iti maika-6 nga aldaw, mangidatagkayo iti walo a bumaro a baka, dua a kalakian a karnero ken 14 nga urbon ti karnero a maysa ti tawenda ken awan ti depektoda.

30-31 Ipakuyogyo nga idaton dagiti amin a daton a naituding a maidatag iti umuna nga aldaw.

32 Iti maika-7 nga aldaw, mangidatagkayo iti pito a bumaro a baka, dua a kalakian a karnero ken 14 nga urbon ti karnero a maysa ti tawenda ken awan ti pakapilawanda.

33-34 Ipakuyogyo nga idaton dagiti amin a daton a naituding a maidatag iti umuna nga aldaw.

35 Iti maika-8 nga aldaw, aguummongkayo nga agdaydayaw ket dikay agtrabaho.

36 Mangidatagkayo iti daton a mapuoran a kas daton a makan a nabanglo itiApo: maysa a bumaro a baka, maysa a kalakian a karnero ken pito nga urbon ti karnero a maysa ti tawenda ken awan ti depektoda.

37-38 Ipakuyogyo dagiti amin a daton a naituding iti umuna nga aldaw.

39 Dagitoy dagiti annurotenyo kadagiti daton a mapuoran, daton a makan, daton nga arak ken daton a pakikappia nga idatagyo itiApotunggal rambakanyo dagiti naituding a fiesta. Mairaman ditoy dagiti daton a pangtungpal iti kariyo wenno kas daton nga agubbog iti nakemyo.

40 Imbaga ni Moises kadagiti Israelita ti amin nga imbilin kenkuana tiApo.

Dagiti Alagaden iti Panagkari

1 Inted ni Moises dagiti sumaganad a bilin kadagiti pangulo dagiti tribu ti Israel.

2 Noagkari ti maysa a tao nga adda itedna itiApowenno isapatana a dina aramiden ti maysa a banag, masapul a tungpalenna ti karina ket aramidenna ti amin nga imbagana.

3 No maysa a balasang nga adda pay la iti sidong dagiti nagannak kenkuana ti agkari wenno agsapata itiApo,

4 masapul nga aramidenna ti inkari wenno insapatana, malaksid no madi ti amana apaman a maammoanna.

5 Ngem no iparit ti amana a tungpalenna ti karina apaman a maammoanna, saan a maipapilit a tungpalenna. Awan ti sungsungbatanna itiApoagsipud ta imparit ti amana a matungpal ti karina.

6 No balasang ti agkari, inggagarana man wenno dina napuotan, wenno ikarina a dina aramiden ti maysa a banag ket kalpasanna makiasawa,

7 masapul nga aramidenna ti karina wenno sinapataanna, malaksid no madi ti asawana apaman a maammoanna daytoy.

8 Ngem no iparit ti asawana a tungpalenna ti sapatana apaman a maammoanna, saan a mapilit a mangtungpal iti karina. Pakawanento tiApo.

9 Masapul a tungpalen ti balo a babai, wenno ti babai a naisina iti asawana, ti insapatana nga aramidenna ken ti insapatana a dina aramiden.

10 No agkari wenno agsapata ti naasawaan a babai,

11 masapul nga aramidenna amin nga insapata wenno inkarina, malaksid no madi ti asawana no maammoanna.

12 Ngem no paritan ti asawana a tungpalenna ti karina no maammoanna, saan a mapilit a mangtungpal iti karina. Pinaritan ti asawana a mangtungpal iti karina; pakawanento tiApo.

13 Adda kalintegan ti asawana a mangpatalged wenno mangwaswas iti kari wenno sapata ti babai.

14 Ngem no awan ti masao ti asawana iti aldaw a maammoanna ti karina, masapul nga aramidenna ti amin nga inkarina. Pinatalgedanna ti sapata iti saanna a panangiparit kalpasan a maammoanna daytoy.

15 Ngem no waswasenna ti kari kalpasan ti sumagmamano nga aldaw a pannakaammona, isu ti agsagaba iti dusa ti babai iti dina panangtungpal iti karina.

16 Dagitoy dagiti alagaden nga inted ni Yahweh ken ni Moises maipapan kadagiti sapata ti naasawaan a babai wenno ti awan asawana a babai nga agnanaed iti balay ni amana.