Ti Baro a Naimbag a Damag Biblia (RIPV)

Ni Jefte

1 Natured a mannakigubat ni Jefte. Taga-Galaad ken anak ti maysa a balangkantis. Amana ni Galaad

2 nga addaan pay sabali nga annak a lallaki iti pudno nga asawana. Idi dimmakkel dagitoy nga annak, pinagtalawda ni Jefte. Kinunada kenkuana, “Awanto ti tawidem ken ni tatang, ta anaknaka iti sabali a babai.”

3 Pimmanaw ngarud ni Jefte iti sidong dagiti kakabsatna ket napan nagnaed idiay Tob. Sadiay, naawisna ti sumagmamano a lallaki a nadamsak a masansan a kaduana nga agsansaneb.

4 Iti saan a nabayag, idi rinaut dagiti Ammonita dagiti Israelita,

5 napan dagiti pangulo ti Galaad idiay Tob tapno ayabanda ni Jefte.

6 “Umaynakam ipanguloan,” kinunada kenkuana, “tapno mabalintayo ti makiranget kadagiti Ammonita.”

7 Ngem simmungbat ni Jefte, “Kasta unay ti gurayo kaniak idi, isu a pinapanawdak iti balay ni tatang. Apay nga umaykay ita ta agpeggadkayo?”

8 Kinunada kenkuana, “Sika ti pangnamnamaanmi itan. Sumurotka kadakami ta gubatentayo dagiti Ammonita. Sikanto ti pangulo dagiti amin a taga-Galaad.”

9 Kinuna ni Jefte kadakuada, “No ikuyogdak a manggubat kadagiti Ammonita ket ipalubos tiAponga agballigiak, siakto ngarud ti mangituray kadakayo.”

10 “Wen, umanamongkami. TiApoti makasaksi,” insungbatda.

11 Iti kasta, kimmuyog ni Jefte kadagiti pangulo ti Galaad ket pinagbalinda nga agturay ken panguloda. Idiay Mizpa, imbaga ni Jefte iti imatang ni Yahweh dagiti kondision iti panangawatna iti pagrebbenganna.

12 Nangibaon ni Jefte kadagiti mangibaga iti ari dagiti Ammonita iti kastoy, “Ania ti guraenyo kadakami? Ania ti panggapuanyo a mangraut kadakami?”

13 Sinungbatan ti ari ti Ammon dagiti imbaon ni Jefte, “Kayatmi a maisubli kadakami dagiti dagdagami. Idi rimmuar dagiti Israelita idiay Egipto, inagawda dagiti dagdagami manipud Karayan Arnon agingga iti Karayan Jabbok ken Karayan Jordan.”

14 Nangibaon manen ni Jefte kadagiti tattaona a mangibaga iti sungbatna iti ari ti Ammon.

15 Kinunada, “Saan a pudno nga inagaw dagiti Israelita ti daga ti Moab wenno ti daga ti Ammon.

16 Idi pimmanawda idiay Egipto, limmasatda iti let-ang nga agturong iti Baybay Aqaba agingga a dimtengda idiay Kades.

17 Kalpasanna,nangibaonda kadagiti tattao a mangkiddaw iti ari ti Edom a palubosanna koma ida a lumasat iti dagana. Ngem saan a pinalubosan ti ari ida. Dinawatda met ti pammalubos ti ari ti Moab, ngem uray isu dina impalubos. Iti kasta, nagyan dagiti Israelita idiay Kades.

18 Impatuloydati limmasat iti let-ang. Linikawda ti daga ti Edom ken ti Moab, agingga a dimmanonda iti akindaya a paset ti Moab, iti ballasiw ti Karayan ti Arnon. Nagkampoda sadiay ngem dida bimmallasiw iti Arnon ta isu ti nagbeddengan ti Moab.

19 Nangibaonmanen dagiti Israelita kadagiti mapan ken ni Sihon nga Amorreo nga ari ti Hesbon, ket dinawatda a palasatenna ida iti sakupna ta mapanda iti dagada.

20 Ngem saan a pinalubosan ida ni Sihon. Inummongna ketdi ti entero nga armadana, nagkampoda idiay Jaaz ket rinautda ti Israel.

21 Ngem inyawat tiApoa Dios ti Israel ni Sihon ken dagiti tattaona iti pannakabalin ti Israel. Ngarud, tinagikua dagiti Israelita ti amin a sakup dagiti Amorreo nga agnaed sadiay.

22 Tinagikuada amin a daga dagiti Amorreo manipud Arnon iti abagatan agingga iti Jabbok iti amianan ken manipud iti let-ang iti daya agingga iti Jordan iti laud.

23 Iti kasta, tiApoa Dios ti Israel ti nangpapanaw kadagiti Amorreo tapno tagikuaen dagiti Israelita ti dagada.

24 Kayatmo a maisubli kenka dagitoy a daga? Kukuam laeng ti inted ni Kemos a diosmo, ngem kukuami met ti inted tiApoa Diosmi.

25 Nalalaingkaaya ngem ni Balac nga anak ni Sefor nga ari ti Moab? Uray isu dina kinarit ti Israel. Dinakam ginubat.

26 Tallo gasut a tawen a sinakup ti Israel ti Hesbon ken Aroer ken dagiti il-ili iti lawlawda ken dagiti amin a siudad iti igid ti Karayan Arnon. Apay a dimo innala ida bayat dagita a tawen?

27 Awan ti dakes nga inaramidko kenka. Sika ti adda basolna ta gubatennakami. TiApoti Ukom. Ita nga aldaw, ukomenna dagiti Israelita ken dagiti Ammonita.”

28 Ngem saan nga impangag ti ari dagiti Amorreo ti pinaibaga ni Jefte.

29 Ket dimteng ken ni Jefte ti pannakabalin ti Espiritu ni Yahweh. Linasatna ti Galaad ken Manases sa nagsubli idiay Mizpa ti Galaad. Manipud sadiay, napan idiay Ammon.

30 Inkari ni Jefte ken ni Yahweh: “No maparmekko dagiti Ammonita,

31 ket agsubliak, puorakto a kas daton kenka ti umuna a sumabat kaniak nga aggapu iti balayko.”

32 Binallasiw ngarud ni Jefte ti karayan tapno gubatenna dagiti Ammonita ket pinagballigi ni Yahweh.

33 Dinarup ni Jefte ida manipud Aroer agingga iti Mennit—20 nga il-ili amin agingga iti Abel-keramim. Pinarmek ida dagiti Israelita, ket adu ti napapatay kadagiti Ammonita.

Ti Babai nga Anak ni Jefte

34 Ket idi nagawid ni Jefte iti balayna idiay Mizpa, sinabat ti anakna a babai nga agsalsala ken agtuktokar iti pandereta. Isu ti kakaisuna nga anakna.

35 Idimakita ni Jefte ti anakna, rinay-abna ti pagan-anayna gapu iti ladingitna. Kinunana, “Ay, anakko! Pagladingitem ‘toy pusok. Apay a sika ti pakaigapuan ti panagleddaangko? Nagsapataak itiApoket diak maibabawi!”

36 “No nagsapataka itiApo,” kinuna ti anakna, “tungpalem ti karim, ta pinagballiginaka a nangparmek kadagiti Ammonita a kabusormo.”

37 Ngem kinunana ken ni amana, “Adda la kiddawek kenka: palubosannak koma nga ikuyogko dagiti gagayyemko a mapan kadagiti bambantay tapno dung-awak iti dua a bulan ti ipapatayko a balasang.”

38 Pinalubosanna ti anakna a napan iti bambantay agraman dagiti gagayyemna ket nagdung-awda, agsipud ta matay a birhen.

39 Kalpasan ti dua a bulan, nagsubli ti balasang ken ni amana. Tinungpal ni Jefte ti inkarina ken ni Yahweh, ket natay a birhen pay laeng ti anakna. Daytoy ti nangrugian ti ugali idiay Israel

40 a tinawen a rummuar dagiti babbai nga Israelita ket uppat nga aldaw nga agdung-awda a kas panglagip iti anak ni Jefte.

Ni Jefte ken dagiti Efraimita

1 Nagsagana a makigubat dagiti Efraimita. Binallasiwda ti Karayan Jordan, napanda idiay Safon ket kinunada ken ni Jefte, “Apay a dinakam inayaban a kumuyog kenka idi bimmallasiwka a nanggubat kadagiti Ammonita? Puorandaka ken ti balaymo!”

2 Ngem kinuna ni Jefte, “Pinaayabankay idi adda ririmi kadagiti Ammonita ngem dikay immay timmulong.

3 Idi makitak a saankayo nga umay tumulong kaniak, impustak ti biagko ket bimmallasiwak a napan nanggubat kadagiti Ammonita. Pinagballiginak tiApo. Apay nga umaydak gubaten ita?”

4 Iti kasta, inummong ni Jefte dagiti amin a lallaki ti Galaad sada ginubat dagiti Efraimita, ket pinarmekda ida. Kinuna ngamin idi dagiti Efraimita, “Dakayo a Galaadita iti Efraim ken Manases, napagtalawkayo laeng iti Efraim!”

5 Tapno saan a makapaglibas dagiti Efraimita, sinakup dagiti Galaadita dagiti lugar a pagballasiwan iti Jordan. No adda Efraimita a dumawat iti palubos a bumallasiw tapno makalibas, saludsoden kenkuana dagiti Galaadita, “Efraimitaka kadi?” No “Saan,” kunana,

6 pabalikasda kenkuana ti “Shibbolet.” Ket no “Sibbolet,” kunana, saan a husto ti panangbalikasna. Tiliwenda ket patayenda iti pagballasiwan. Iti dayta a tiempo, 42,000 nga Efraimita ti napapatay.

7 Impanguloan ni Jefte a Galaadita ti Israel iti uneg ti innem a tawen. Kalpasanna, natay ket naitabon iti ilinaidiay Galaad.

Da Ibzan, Elon ken Abdon

8 Kalpasan ti ipapatay ni Jefte, simmublat ni Ibzan a taga-Betlehem a nangipangulo iti Israel.

9 Tallopulo a lallaki ken 30 a babbai ti annakna. Inyasawana dagiti 30 a babbai iti sabali a tribu. Nangisangpet iti 30 a babbai iti sabali a tribu a nangyasawaanna kadagiti 30 nga annakna a lallaki. Pito a tawen nga inturayan ni Ibzan ti Israel.

10 Idi natay, naitanem idiay Betlehem.

11 Kalpasan ti ipapatay ni Ibzan, ni Elon a taga-Zabulon ti nangipangulo iti Israel iti sangapulo a tawen.

12 Idi natay, naitanem idiay Aijalon iti sakup ti daga ti Zabulon.

13 Kalpasan ti ipapatay ni Elon, simmublat met ni Abdon a nangipangulo iti Israel. Isu ti anak ni Hilel a taga-Piraton.

14 Adda 40 a lallaki nga annakna ken 30 a lallaki nga appokona. Saggaysada iti asno a pagsaksakayan. Walo a tawen nga inturayanna ti Israel.

15 Idi natay, naitanem idiay Piraton iti katurturodan a daga ti Efraim nga ayan dagiti Amalekita.

Ti Pannakayanak ni Samson

1 Nagbasol manen dagiti Israelita ken ni Yahweh. Impalubosna nga iturayan ida dagiti Filisteo iti 40 a tawen.

2 Iti dayta a tiempo, adda lalaki nga agnagan iti Manoa a taga-Zora a nagtaud iti tribu ti Dan. Saan nga aganak idi ti asawa ni Manoa.

3 Nagparang ti anghel ni Yahweh iti babai. Kinunana, “Saanka a naganak idi ngem agsikogkanto ket ipasngaymonto ti maysa a lalaki.

4 Manipud ita, saankan nga uminum iti arak ken dika met mangmangan iti uray ania a maiparit a taraon.

5 Kalpasanti pannakaipasngay ti anakmo, dimonto pukpukisan, agsipud ta manipud iti aldaw a pannakayanakna, maidatonto iti Dios a kas maysa a Nazireo.Isunto ti mangispal kadagiti Israelita iti ima dagiti Filisteo.”

6 Napan ti babai iti asawana ket imbagana daytoy, “Immay kaniak ti maysa a tao ti Dios; napabutnganak ta kasla anghel ti Dios. Diak sinaludsod no sadino ti naggapuanna ket dina met imbaga ti naganna.

7 Ngem imbagana nga agsikogakto ket aganakakto iti lalaki. Imbagana pay a diak umin-inum iti arak wenno naingel nga inumen wenno mangan iti uray aniaman a maiparit a taraon, ta maidatonto ti ubing iti Dios a kas Nazireo bayat ti panagbiagna.”

8 Iti kasta, nagkararag ni Manoa ken ni Yahweh, ket kinunana, “Pagsubliem kadi,Apo, ti tao ti Dios nga imbaonmo kadakami ta ibagana no ania ti aramidenmi iti ubing inton mayanak.”

9 Pinatgan ti Dios ti dawat ni Manoa, ket napan ti anghel ni Yahweh iti babai idi adda nga agtugtugaw iti talon. Awan idi ni Manoa iti ayanna.

10 Dagus a nagtaray a napan ken ni asawana ket kinunana, “Adda manen ti lalaki a nagparang kaniak idi naminsan nga aldaw.”

11 Timmakder ni Manoa ket sinurotna ti asawana. Napan iti ayan ti lalaki ket sinaludsodna, “Sika kadi daydi lalaki a nakisao iti asawak?”

“Wen, siak,” insungbatna.

12 “Inton matungpal ti imbagam,” kinuna ni Manoa, “kasanonto ti pannakapatanor ti ubing? Anianto ti aramidenna?”

13 Kinuna ti anghel, “Masapul nga aramiden ni asawam ti amin nga imbagak kenkuana.

14 Maiparit a mangan iti uray ania nga agtaud iti ubas; saan nga uminum iti arak wenno naingel nga inumen wenno mangan iti aniaman a maiparit. Masapul a tungpalen ni asawam ti amin nga imbagak nga aramidenna.”

15-16 Gapu ta saan nga ammo ni Manoa nga anghel ni Yahweh ti kasasaona, kinunana kenkuana, “Pangngaasim ta dika pay pumampanaw ta isaganaandaka iti urbon a kalding.”

“No agbatiak,” kinuna ti anghel kenkuana, “saanak a mangan iti isaganayo. Ngem no kayatmo ti mangisagana, puoram a kas daton itiApo.”

17 Kinuna ni Manoa iti anghel, “Ibagam man kadakami ti naganmo tapno padayawandakanto inton matungpal ti imbagam.”

18 “Apay a kayatmo a maammoan?” sinaludsod ti anghel. “Maysa a pagsidsiddaawan ti naganko.”

19 Nangala ni Manoa iti urbon a kalding ken daton a makan sana indaton iti altar ni Yahweh a nakaskasdaaw dagiti aramidna.

20-21 Idi agpangpangato ti apuy manipud iti altar, nakita ni Manoa ken ti asawana ti anghel ni Yahweh. Adda iti apuy nga agpangpangato nga agturong iti tangatang. Nabigbig ni Manoa nga anghel ni Yahweh ti lalaki ket nagpaklebda iti daga. Saandan a nakita ti anghel.

22 Kinuna ni Manoa iti asawana, “Mataytan, ta nakitata ti Dios!”

23 Ngem simmungbat ti asawana, “No agpayso a kayatnata a patayen tiApo, dina koma inawat dagiti datonta; dina koma impakita amin dagitoy wenno imbaga kadata dagitoy.”

24 Impasngay ti babai ti maysa a lalaki ket pinanagananna iti Samson. Dimmakkel ti ubing ket binendisionan ni Yahweh.

25 Rinugian ti Espiritu ni Yahweh a pinapigsa ni Samson idi adda iti Kampo ti Dan iti nagbaetan ti Zora ken Estaol.

Ni Samson ken ti Babai a Taga-Timna

1 Iti maysa nga aldaw, simmalog ni Samson idiay Timna a nakakitaanna iti maysa a Filistia.

2 Nagawid ket kinunana kadagiti nagannak kenkuana, “Adda nasirpatko a Filistia idiay Timna a magustoak unay. Kayatko nga asawaen, isu nga inkay koma kasao.”

3 Ngem kinuna dagiti nagannak kenkuana, “Apay a mangasawaka iti puli dagiti saan a kugit a Filisteo? Awan aya ti mapilim kadagiti kabagiantayo wenno maysa kadagiti kadaraantayo?”

Ngem kinuna ni Samson ken ni amana, “Isu ti kayatko nga alaenyo nga asawaek.”

4 Saan nga ammo dagiti nagannak kenkuana a ni Yahweh ti mangiturturong ken ni Samson iti daytoy nga aramidna. Agbirbirok ngamin ni Yahweh iti gundawayna a makigubat kadagiti Filisteo. Iti dayta a panawen, dagiti Filisteo ti mangituray iti Israel.

5 Iti kasta, napan ni Samson idiay Timna a kinakuyogna dagiti nagannak kenkuana. Idi magmagnada kadagiti kaubasan sadiay, nangngegna ti agngerngernger a bumaro a leon.

6 Pagammoan, bimmaba ti Espiritu ni Yahweh ken ni Samson. Pimmigsa ni Samson, ket babaen kadagiti imana, rinangrangkayna ti leon a kas iti panangrangkayna iti maysa nga urbon a kalding. Ngem dina imbaga kadagiti nagannak kenkuana ti inaramidna.

7 Napanna ngarud kinasarita ti babai, ket nagustoanna.

8 Kalpasan ti sumagmamano nga aldaw, nagsubli ni Samson a mangasawa kenkuana. Idi magmagna, simmiasi iti dalan tapno mapanna kitaen ti leon a pinatayna. Nasdaaw a nakakita iti adu nga uyokan ken diro iti uneg ti bangkay.

9 Inakuyna ti diro kadagiti imana ket nangan iti daytoy bayat ti pannagnana. Nagtarus iti ayan dagiti nagannak kenkuana ket inikkanna ida. Nanganda ngem dina imbaga nga innalana ti diro iti bangkay ti leon.

10 Napan ni amana iti balay ti babai ket nagpadaya ni Samson sadiay. Daytoy ti ugali dagiti babbaro idi.

11 Idi makita dagiti Filisteo ni Samson, nangipanda iti 30 a lallaki a mangadkadua kenkuana.

12 Kinuna ni Samson kadakuada, “Burburtiaankayo. No mapugtoanyo ti kaipapananna sakbay a malpas ti padaya, ikkankayo iti 30 a kawes a linen ken 30 a pagan-anay a pagsukatan.

13 Ngem no diyo mapugtoan ti kaipapananna sakbay a malpas ti boda, dakayo ti mangted iti 30 a kawes a linen ken 30 a pagan-anay a pagsukatan.”

“Ala ngarud,” insungbatda, “ibagamon ta denggenmi.”

14 Kinunana,

“Iti mangmangan, rimmuar ti makan;

iti napigsa, rimmuar ti nasam-it.”

Kalpasan ti tallo nga aldaw, dida pay la napugtoan ti kayat a sawen ti burburtia.

15 Iti maikapatnga aldaw, kinunada iti asawa ni Samson, “Sikapam ni asawam tapno ibagana kenka ti kaipapanan ti burburtiana. No madika, puorandaka ken ti balay ni amam. Inawisdakami kadi tapno pagpanglawendakami?”

16 Iti kasta, napan kenkuana ti asawana. Agsangsangit a nagkuna, “Dinak gayam ay-ayaten! Kagurguranak! Nagburburtiaka kadagiti gagayyemko ket dimo pay imbagbaga kaniak ti kaipapananna!”

Kinuna ni Samson kenkuana, “No diak pay imbaga kadagiti dadakkelko ti kaipapananna, apay ketdin nga ibagak kenka?”

17 Daytoy ti nagsangsangitan ti babai bayat ti boda. Ngem iti maikapito nga aldaw, imbaga ni Samson agsipud ta pinilit ni asawana nga ibagana. Ket imbaga ti asawana daytoy kadagiti kailianna.

18 Iti maikapito nga aldaw sakbay ti ipapan ni Samson iti kuarto,kinuna kenkuana dagiti lallaki ti siudad,

“Ania pay ti nasamsam-it ngem ti diro?

Ania pay ti napigpigsa ngem ti leon?”

Simmungbat ni Samson:

“No diyo pinagarado ti bakak,

diyo koma naammoan ti burburtiak.”

19 Pagammoan, bimmaba ti Espiritu ni Yahweh ken ni Samson ket pimmigsa. Simmalog a napan idiay Askelon. Sadiay, 30 a lallaki ti pinapatayna; innalana dagiti pagan-anayda sana inted kadagiti nangipatarus iti burburtiana. Gapu iti pungtotna iti inaramid ni asawana, nagawid iti balay ni amana.

20 Naited ti asawa ni Samson iti maysa kadagiti lallaki a bayabayna iti panagkasarda.

1 Iti saan a nabayag, iti panagani iti trigo, napan sinarungkaran ni Samson ti asawana. Insangpetanna iti urbon a kalding. Imbagana iti ama ti babai, “Kayatko ti sumrek iti kuarto ti asawak.” Ngem saan nga impalubos ti katuganganna.

2 Kinunana, “Impagarupko idi a kaguram ti asawam, isu nga intedko iti gayyemmo. Uray ta napimpintas ti adina. Isu laengen ti asawaem.”

3 “Ita,” kinuna ni Samson, “saankon a basol no ania ti aramidek kadagiti Filisteo.”

4 Iti kasta, napan nagtiliw iti 300 a musang. Sinagduduana a rineppet dagiti ipusda sa nangikabil iti aluten iti nagrinneppet nga ipus.

5 Pinasgedanna dagiti aluten sana binulosan dagiti musang iti katrigoan dagiti Filisteo. Napuoran amin a naani a trigo agraman dagiti saan pay a naani iti talon. Nauram pay dagiti kaoliboan.

6 “Siasino ti nangaramid iti daytoy?” sinaludsod dagiti Filisteo. Naammoanda a ni Samson ti akin-aramid agsipud ta innala ti katuganganna a taga-Timna ti asawa ni Samson ket impaasawana iti gayyem met laeng ni Samson. Napan ngarud pinuoran dagiti Filisteo ti babai agraman ti balay ni amana.

7 “Kastoy gayam ti aramidyo!” kinuna ni Samson kadakuada. “Isapatak a diakto sumardeng agingga iti maibalesko daytoy kadakayo.”

8 Pinarigat ni Samson dagiti Filisteo ket adu ti pinatayna kadakuada. Kalpasanna, napan nagnaed iti rukib iti rangkis ti Etam.

Parmeken ni Samson dagiti Filisteo

9 Dimteng idiay Juda dagiti Filisteo ket nagkampoda sadiay; rinautda ti ili ti Lehi.

10 Sinaludsod dagiti taga-Juda, “Apay a rinautdakami?”

“Umaymi baluden ni Samson ta ibalesmi ti inaramidna kadakami,” insungbatda.

11 Napan ti 3,000 a lallaki ti Juda iti rukib iti rangkis idiay Etam ket kinunada ken ni Samson, “Dimo aya ammo a dagiti Filisteo ti mangituray kadatayo? Kitaem ti inaramidmo kadakami?”

“Inaramidko laeng kadakuada ti kas iti inaramidda kaniak,” insungbatna.

12 “Immaykami ditoy tapno reppetendaka sadakanto yawat kadagiti Filisteo,” kinunada kenkuana.

“Ikariyo a saan a dakayo a mismo ti mangpatay kaniak,” kinuna ni Samson.

13 “Reppetendaka laeng ta yawatdaka kadagiti Filisteo,” kinunada. “Saandaka a patayen.” Rineppetda ni Samson iti dua a baro a tali ket inruarda iti rukib.

14 Idi sumangpet ni Samson idiay Lehi, sinabat dagiti Filisteo nga agtataray ken agririaw. Pagammoan, bimmaba kenkuana ti pannakabalin ti Espiritu ni Yahweh. Pimmigsa ni Samson; kasla napuoran a sinulid a pinugsapugsatna dagiti tali a nangreppet kadagiti ima ken takiagna.

15 Nakasarak iti pangal ti asno, a nabiit pay a natay ket pinidutna a pinangpapatay iti 1,000 a tattao.

16 Iti kasta, inkanta ni Samson,

“Iti pangal ti asno, pinatayko ti sangaribu a tattao;

iti pangal ti asno, pinempenkoida.”

17 Kalpasanna, imbellengna ti pangal. Napanaganan dayta a lugar iti Ramat Lehi.

18 Napalalo ti waw ni Samson. Immawag ken ni Yahweh ket kinunana, “Intedmo kaniak ti dakkel a balligi. Matayak kadi iti napalalo a waw ket kemmegendak dagitoy pagano a Filisteo?”

19 Pinagrengngat ti Dios ti lungog ti daga idiay Lehi ket pimsuak ti danum. Imminum ni Samson ket simmaranta ti riknana. Daytoy ti gapuna a napanaganan ti ubbog iti Enhacorre.Adda pay la ita idiay Lehi.

20 Duapulo a tawen nga impanguloan ni Samson ti Israel bayat ti panagturay dagiti Filisteo iti daga.

Ni Samson idiay Gaza

1 Iti maysa nga aldaw, napan ni Samson idiay Gaza, maysa a siudad dagiti Filisteo. Adda naam-ammona a balangkantis a babai ket kinaiddana.

2 Idi maammoan dagiti taga-Gaza nga adda ni Samson iti siudad, linakubda ti ayanna. Nagpatpatnag a nagurayda kenkuana iti ruangan ti siudad. Iti dayta a rabii, naulimekda ta kinunada iti nakemda, “Urayentayo nga aglawag satayto papatayen.”

3 Ngem naturog laeng ni Samson agingga iti tengnga ti rabii. Idi makariing, iniggamanna ti ruangan ti siudad sana pinarut agraman ridaw, poste, balunet ken amin-amin. Binaklayna ket insang-atna iti rabaw ti turod a tumannawag iti Hebron.

Da Samson ken Delila

4 Kalpasan daytoy a pasamak, nagayat ni Samson iti maysa a babai nga agnagan Delila nga agnaed iti Tanap ti Sorec.

5 Napan dagiti lima a pangulo dagiti Filisteo ken ni Delila ket kinunada, “Sikapam ni Samson tapno ibagana kenka no apay a napigsa, ken no kasano a maparmek ken mareppetmi ket iti kasta, awan ti maaramidna. Tunggal maysa kadakami, ikkandakanto iti 1,100 a bagi ti pirak.”

6 Iti kasta, kinuna ni Delila ken ni Samson, “Pangngaasim ta ibagam kaniak no apay a nakapigpigsaka. No adda mangreppet kenka tapno awan ti maaramidmo, kasano ti pamay-anna?”

7 “No reppetendak iti pito a di pay nagango a lubid ti bai ti pana, kumapuyak a kas iti kadawyan a tao,” insungbat ni Samson.

8 Nangyeg ngarud dagiti ari dagiti Filisteo iti pito a lubid ti bai a di pay nagango ket intedda ken ni Delila a pinangreppetna ken ni Samson.

9 Adda lallaki a pinaglemmeng ni Delila iti sabali a kuarto, isu nga impukkawna, “Samson, umayen dagiti Filisteo!” Ngem pinugsat ni Samson ti lubid a kasla nangpugsat iti panait. Iti kasta, dida pay la naammoan ti palimed ti pigsana.

10 Kinuna ni Delila ken ni Samson, “Apay a nagang-angawan ken inulbodnak? Pangngaasim ta ibagam no kasano ti pannakabalin ti siasinoman a mangreppet kenka.”

11 Kinuna ni Samson, “No reppetendak iti baro a tali a di pay naar-aramat, kumapuyak a kas iti kadawyan a tao.”

12 Nangala ngarud ni Delila kadagiti baro a tali ket rineppetna ni Samson sana impukkaw, “Samson, umayen dagiti Filisteo!” Ngem kasla panait a pinugsapugsat ni Samson dagiti tali.

13 Kinuna manen ni Delila, “Pagang-angawan ken ul-ulbodennak pay laeng. Ibagam man no kasano ti pannakabalin ti siasinoman a mangreppet kenka?”

Kinuna ni Samson, “No sallapidem iti pito a punggos ti buokko ket pairutam babaen iti pasok, kumapuyak a kas iti kadawyan a tao.”

14 Ngarud, pinaturog ni Delila ni Samson sa inabelna dagiti pito a punggos a buokna.Pinairutanna babaen iti pasok sana impukkaw, “Samson, umayen dagiti Filisteo!” Ngem nakariing ni Samson ket ginuyodna ti buokna iti pasok.

15 Kinuna manen ni Delila ken ni Samson, “Kasano a kunam nga ay-ayatennak ket di met pudno ti ibagbagam? Namitlon a nagang-angawannak. Dimo met la ipudnon no apay a napigsaka.”

16 Inaldaw a kastoy ti salsaludsoden ni Delila agingga a nauma ni Samson iti panangrengrengna kenkuana,

17 isut’ gapuna nga iti kamaudiananna, imbagana ti pudno. Kinunana, “Saanak a pulos a napukisan. Naidatonak iti Dios a kas Nazireo manipud pannakayanakko. No mapukisanak, mapukaw ti pigsak ket agbalinak a kas iti kadawyan a tao.”

18 Idi kapnekanen ni Delila nga imbagana ti pudno, nangibaon iti mapan kadagiti ari a Filisteo ket pinaibagana, “Agsublikayo pay iti maminsan ta imbagan ni Samson ti pudno.”

Dimteng dagiti ari a nangitugot iti kuarta nga ibayadda ken ni Delila.

19 Pinaturog ni Delila ni Samson iti saklotna. Kalpasanna, nangayab iti lalaki a mangkartib itipito a punggos a buok ni Samson. Ket rinugianna a pinarigat ta napukawen ni Samson ti pigsana.

20 Impukkaw ni Delila, “Samson! Adtoyen dagiti Filisteo!”

Nakariing ni Samson ket kinunana iti nakemna, “Makalapsutak ket mawayawayaanak a kas iti kallabes.”

Dina ammo a pinanawanen tiApo.

21 Tiniliw dagiti Filisteo, sinuatda dagiti matana, sada impan idiay Gaza. Kinawaranda iti bronse, impanda iti pagbaludan, ket nagbalin a para giling.

22 Ngem sadiay, in-inut a nagtubo manen ti buokna.

Ti Ipapatay ni Samson

23 Naguummong dagiti ari a Filisteo tapno agrambakda ken mangidatagda iti daton ken ni Dagon a diosda. Daytoy ti kantada,

“Impalubos ti diostayo

a maparmek ni Samson a kabusortayo.”

24-25 Kasta unay ti panagraragsakda, isu a kinunada, “Ayabanyo man ni Samson ta rayray-awennatayo!”

Idi nairuarda ni Samson iti pagbaludan, pinilitda a rayray-awenna ida sada pinagtakder iti baet ti dua nga adigi. Idi makita dagiti tattao ni Samson, nagkantada iti pagdaydayawda iti diosda. Kinunada, “Pinagballiginatayo ti diostayo iti kabusor, isu a mangdadael iti dagatayo ken nangpatay iti adu.”

26 Kinuna ni Samson iti ubing a mangkibkibin kenkuana, “Kayatko ti agsadag; ipaarikapmo man dagiti poste a nakaisaadan ti pasdek.”

27 Napno ti pasdek iti adu a tattao. Adda met sadiay dagiti lima nga ari dagiti Filisteo. Agarup 3,000 dagiti lallaki ken babbai iti tuktok ti pasdek a mangbuybuya iti panangrabrabakda ken ni Samson.

28 Nagkararag ni Samson: “ApoDios, laglagipennak kadi. O Dios, ikkannak pay maminsan iti pigsak tapno mabalesko dagiti Filisteo gapu iti panangikkatda kadagiti matak.”

29 Tinengngel ni Samson dagiti dua a poste a nagsaadan ti pasdek. Nagsinsinan dagiti dua nga imana dagiti adigi, impanna ti amin a pigsana,

30 sana impukkaw, “Dakayo a Filisteo, agkukuyogtayo amin a matay!” Induronna dagiti poste iti amin a pigsana. Narba ti pasdek ket natupakan dagiti lima a pangulo ken amin nga adda sadiay. Ad-adu ti napatayna iti daytoy a gundaway ngem dagiti pinatpatayna iti napalabas.

31 Dimteng dagiti kakabsat ken familia ni Samson. Inyawidda ti bangkayna, ket intabonda iti tanem ni Manoa nga amana, iti nagbaetan ti Zora ken Estaol. Duapulo a tawen nga impanguloan ni Samson ti Israel.

Dagiti Didiosen ni Mica

1 Adda idi lalaki nga agnagan Mica nga agnaed iti katurturodan ti Efraim.

2 Iti naminsan, kinunana ken ni inana, “Idi natakawanka iti 1,100 a bagi ti pirak, nangngegko nga inlunodmo ti nangtakaw. Siak ti nangala iti pirak ket adtoy nga isublik kadakayo.”

“Anakko,” kinuna ti inana, “bendisionannaka koma tiApo.”

3 Idi maited kenkuana dagiti bagi ti pirak, kinuna ti ina, “Tapno maikkat ti lunod kenka, anakko, idatonko daytoy a pirak itiApo. Agserbinto iti pannakaaramid iti imahen makalupkopan iti pirak. Isublik met la ngarud kenka.”

4 Idi maisubli ti kuarta, nangala ti inana iti 200 a bagi ti pirak, ket intedna iti agpampanday. Nangaramid ti agpampanday iti imahen. Kinalupkopanna iti pirak sana inkabil iti balay ni Mica.

5 Adda kabukbukodan ni Mica a lugar a pagdaydayawanna. Nagaramid kadagiti ladawan dagiti didiosen ken maysa nga efodket dinutokanna ti maysa kadagiti annakna a kas padina.

6 Kadagidia panawen, awan pay ari iti Israel, isu a nawaya ti tunggal maysa nga agaramid iti kaykayatna.

7 Iti dayta met la a tiempo, adda agtutubo a lalaki a Levita nga agnaed iti Betlehem idiay Juda.

8 Pimmanaw iti Betlehem tapno agsapul iti pagyananna iti sabali a lugar. Bayat ti panagdaliasatna, nakadanon iti balay ni Mica iti katurturodan ti Efraim.

9 “Taga-anoka?” sinaludsod ni Mica.

“Maysaak a Levita a taga-Betlehem idiay Juda,” insungbatna. “Agsapsapulak iti mabalinko a pagnaedan.”

10 Kinuna ni Mica kenkuana, “Agnaedka laengen ditoy, ta sikanto ti mammagbaga kaniakken padik. Ikkankanto iti sangapulo a bagi ti pirak iti tunggal tawen, agraman arruaten ken taraon.”

11 Inawat ti agtutubo ti awis ket imbilang ni Mica a maysa kadagiti annakna.

12 Dinutokan ni Mica a padina ket nagnaed iti balayna.

13 Kinuna ni Mica, “Ita, awan duaduak a parang-ayennakto tiApota adda padik a Levita.”

Ni Mica ken ti Tribu ti Dan

1 Awan ti ari ti Israel kadagidi a panawen. Agsapsapul idi ti tribu ti Dan iti sakup a tagikuaen ken pagnaedanda ta awan pay naited kadakuada a daga a kas kadagiti dadduma a tribu ti Israel.

2 Iti kasta, pimmili dagiti kaputotan ti Dan iti lima a natured a lallaki manipud iti amin a familia ti tribu ket naibaonda a mangsukimat ken mangsiim iti daga. Manipud kadagiti ili ti Zora ken Estaol, napanda kadagiti katurturodan ti Efraim ket nagdagusda iti balay ni Mica.

3 Idi addada sadiay, nailasinda ti bengngat ti agtutubo a Levita ket sinaludsodda kenkuana, “Apay nga addaka ditoy? Ania ti ar-aramidem ditoy?”

4 “Agtartrabahoak ken ni Mica a kas padina,” insungbat ti Levita.

5 Kinunada kenkuana, “Pangngaasim ta saludsodem iti Dios no agbanagto a naimbag ti biahemi.”

6 “Dikay agdanag,” insungbat ti padi. “Aywanannakayto tiApoiti panagdaliasatyo.”

7 Iti kasta, pimmanaw dagiti lima a lallaki ket napanda iti ili ti Lais. Nakitada a natalged ti panagbiag dagiti tattao a kas kadagiti Sidonio. Natalna ken naulimekda ket awan ti agririri kadakuada. Adda amin a masapulda. Adayoda iti ili ti Sidon ket awan ti pannakilangenda kadagiti sabali a tattao.

8 Idi agsubli dagiti lima idiay Zora ken Estaol, sinaludsod dagiti kailianda no ania ti nasarakanda.

9 Kinunada, “Nakitami ti daga ket nasayaat. Umaykayo, ta intay rauten ida. Dikay agyan ditoy nga awan ti ar-aramidenna; darasenyo, intayo tagikuaen ti daga.

10 Makitayonto a naulimek ken natalna dagiti tattao. Nalawa ti daga ket adda amin a masapul ti tao. Inyawat ti Dios kadakayo dayta a lugar.”

11 Ngarud, nagrubbuat ti 600 a mannakigubat iti tribu ti Dan a naggapu idiay Zora ken Estaol.

12 Napanda nagkampo iti laud ti Kiriat Jearimidiay Juda. Isut’ gapuna a napanaganan dayta a lugar iti Mahane-Danagingga ita.

13 Manipud sadiay, simmang-atda iti katurturodan ti Efraim, ket dimtengda iti balay ni Mica.

14 Kinuna kadakuada dagiti lima a lallaki a napan nagsiim idi iti lawlaw ti Lais, “Ammoyo kadi nga adda iti maysa kadagiti balbalay ti efod ken terafim ken ti nasukog a ladawan a nakalupkopan iti pirak? Adda pay dadduma a ladawan a nasukog. Ania ti aramidentayo?”

15 Iti kasta, napanda iti balay ni Mica a pagnaedan ti agtutubo a Levita. Sinaludsodda no kasano ti kasasaad daytoy.

16-17 Kabayatanna, adda iti ruangan dagiti 600 a mannakigubat agraman ti Levita. Nagtartarus iti balay dagiti lima nga espia ket innalada ti nasukog a ladawan, efod, terafim ken dagiti dadduma pay a ladawan a nasukog.

18 Idi alaen dagiti lallaki dagiti nasagradoan a banag, kinuna ti padi, “Ania ti ar-aramidenyo?”

19 Insungbatda, “Dika agtagtagari. Dika agsasao. Surotennakami ketdi ta sikanto ti padimi ken mammagbaga kadakami. Dimo kayat aya a sika ti padi ti maysa a tribu ti Israel a saan ket a ti familia ti maymaysa a tao?”

20 Naragsakan ti padi iti daytoy, isu nga innalana dagiti nasukog a ladawan ket simmurot kadakuada.

21 Nagrubbuatda agraman dagiti baka ken al-alikamenda; immuna a nagna dagiti ubbing.

22 Dida pay unay nakaadayo idi inummong ni Mica dagiti kaarrubana tapno makigubatda. Nakamakamda dagiti Danita

23 ket pinukkawanda ida. Timmalliaw dagiti Danita ket sinaludsodda ken ni Mica, “Apay, ania ti napasamak? Apay nga adda dagitoy a tattao?”

24 Kinunana kadakuada, “Apay a saludsodenyo pay laeng idinto ta innalayo ti padik ken dagiti didiosen nga inaramidko? Ania pay ti natda kaniak?”

25 Imbaga kenkuana dagiti Danita, “Naim-imbag laengen nga agulimekka amangan no makapungtot dagitoy a lallaki ket darupendaka. Awan duadua a matayka agraman ti familiam.”

26 Nabigbig ni Mica a dina kabaelan ida isut’ gapuna a nagawid. Intuloy met dagiti Danita ti panagdaliasatda.

27-28 Kalpasan ti panangala dagiti Danita iti padi ken dagiti nasukog a ladawan a kukua ni Mica, napanda rinaut ti Lais. Natalna dagiti umili ti Lais nga adda iti isu met laeng a tanap ti Betrehob. Pinatayda amin a tattao ket pinuoranda ti siudad. Awan ti mangsalaknib kadakuada ta adayoda iti Sidon ken awan pannakainaigda kadagiti sabali a nasion. Binaliwan dagiti Danita a binangon ti siudad ket nagnaedda sadiay.

29 Binaliwanda ti nagan ti siudad ket pinanagananda iti Dan a nagan ti kapuonanda ken maysa kadagiti annak ni Israel.

30 Impasdek dagiti Danita ti pagdaydayawan a nangikabilanda iti imahen. Ni Jonatan nga anak ni Gersom ken apoko ni Moises ti nagserbi a padida. Dagiti met kaputotan ni Jonatan ti nagserbi a padi agingga a naitalaw dagiti tattao.

31 Nagtalinaed sadiay ti nasukog a ladawan nga inaramid ni Mica kabayatan ti kaadda ti Templo ti Dios idiay Silo.

Ti Levita ken ti Kabbalayna

1 Kadagidi nga aldaw nga awan ari ti Israel, adda maysa a Levita nga agnanaed iti katurturodan ti Efraim. Nangala iti kabbalayna a babaia taga-Betlehem iti Juda.

2 Naminsan, gimmura ti babai ket nagsubli iti balay ni amana idiay Betlehem. Uppat a bulan a nagyan sadiay.

3 Napanunot ti Levita a suroten ti kabbalayna tapno ay-aywenna nga agsubli kenkuana. Inrubbuatna ti dua nga asnona ket napan a kaduana ti maysa a tagabu. Idi sumangpet idiay Betlehem, pinadanon ti babai iti balay, ket siraragsak ti katuganganna a nangpasangbay kenkuana.

4 Agawidda koman ngem inggawid ti katuganganna, isu a nagyanda pay sadiay iti tallo nga aldaw. Nangan dagiti agassawa ken naturogda sadiay.

5 Iti kabigatan ti maikapat nga aldaw, nasapada a bimmangon ket nagrubbuatda nga agawid. Ngem kinuna ti ama ti babai iti Levita, “Mangankayo pay tapno adda pamigsayo iti dalan. Inkayto inton madamdama.”

6 Iti kasta, nagtugaw dagiti dua a lallaki a nangan ken imminum. Kalpasanna, imbaga kenkuana ti katuganganna, “Pangngaasim ta ummiankayo pay ket agragragsaktayo.”

7 Nagrubbuat ti Levita ngem inuyotan ti katuganganna ket immian manen.

8 Iti maikalima nga aldaw, nasapada a bimmangon ngem kinuna manen ti ama ti babai, “Pangngaasiyo ta mangankay pay. Inkayto la no malemen.” Nagkalanglang manen dagiti dua a lallaki.

9 Idi agrubbuat manen ti Levita, ti babai ken ti tagabuna, kinuna ti ama ti babai, “Mumalemen! Ummiankayo pay ita a rabii, ket aglang-aykayo. Sapaenyonto laengen ti agawid inton bigat.”

10-11 Ngem saandan a kayat ti ummian, isu a nagrubbuatda ket napandan agraman ti tagabuda ken dagiti dua nga asnoda. Rumabiin idi makadanonda iti asideg ti Jebus (isu ti Jerusalem) ket kinuna ti tagabuna, “Apay a ditay pay la ummian ditoy siudad dagiti Jebuseo?”

12-13 Ngem kinuna ti apona, “Saantayo a mabalin ti agdagus iti siudad a saan nga Israelita dagiti agnaed. Agtuloytayo laengen ta intay ummian idiay Gabaa wenno idiay Rama.”

14 Iti kasta, linabsanda ti Jebus ket intuloyda ti nagna. Sumipngeten idi makadanonda idiay Gabaa a masakupan ti tribu ti Benjamin.

15 Simmiasida iti dalan tapno umianda sadiay. Simrekda iti ili ket napanda nagtugaw iti plasa. Ngem awan ti siasinoman a nangawis kadakuada nga umian iti balayna.

16 Idi addada sadiay, adda lakay a limmabas. Kagapgapuna iti talon a nagtrabahoanna a nagmalem. Nagnaed idi ti lakay iti katurturodan ti Efraim ngem agnanaeden iti Gabaa. Kameng ti tribu ti Benjamin dagiti tattao sadiay.

17 Nadlawna a biahero dagiti adda iti plasa ket sinaludsodna, “Sadino ti naggapuanyo? Sadino ti papananyo?”

18 “Naggapukam idiay Betlehem ti Juda,” insungbat ti Levita. “Agsublikaminiti katurturodan ti Efraim a pagnaedak. Ngem awan mangpadagus kadakam ita a rabii,

19 uray no adda ruot ken garami para kadagiti asnomi, agraman tinapay ken arak a para kaniak ken iti kabbalayko ken iti tagabuk. Adda amin a masapulmi.”

20 Kinuna ti lakay, “Umaykay agdagus idiay balay. Siak ti makaammo kadakayo. Dikay maturog ditoy plasa.”

21 Innalana ngarud ida iti balayna ket pinakanna ti asnoda. Binuggoan dagiti sangaili ti sakada sada nangan.

22 Madamadanga agraragsak idi pagammoan la ta dimteng dagiti derrep a lallaki iti ili. Linawlawda ti balay ket nagtugtogda iti ruangan. Kinunada iti lakay, “Iruarmo ti lalaki a nagdagus ditoy balaymo ta kayatmi a kaiddaen.”

23 Ngem rimmuar ti lakay ket kinunana, “Saan, kakabsatko! Pangngaasiyo ta dikay agaramid iti kasta a kinadakes ken kinaderrep. Sangailik daytoy a lalaki.

24 No kayatyo, adtoy ti kabbalayna ken ti balasang nga anakko. Paruarek ida ket aramidenyo kadakuada ti kaykayatyo. Ngem diyo koma aramiden ti kasta a nakababain a banag iti daytoy a tao.”

25 Ngem saan nga inkaskaso dagiti lallaki ti sao ti lakay. Pinaruar ngarud ti Levita ti asawana ket intedna kadakuada. Nagpatnag a rinamesda ti babai.

26 Idi pumarbangon, nagsubli ti babai iti balay ti lakay a yan ti Levita. Napasag iti sango ti ruangan ket sadiayna agingga iti aglawag.

27 Bimmangon ti Levita ket idi luktanna ti ruangan tapno ituloyna ti agbiahe, nakitana ti kabbalayna a napasag sadiay a kasla gumawgaw-at iti ruangan.

28 Kinunana, “Bumangonkan ta intayon.” Ngem saan a simmungbat, isu nga insakayna ti bangkay iti asno ket intuloyna ti panagdaliasatna.

29 Idisumangpet iti balayna, nangala iti buneng, sana innala ti bangkay ket rinangrangkayna iti nagkasangapulo ket dua sana pinaiwaras iti amin a lugar iti Israel.

30 Kinuna ti amin a nakakita iti daytoy, “Awan pay nadamagmi a kastoy nga aramid manipud ipapanaw ti Israel iti Egipto. Ania aya ti nasayaat nga aramidentayo?”

Agsagana ti Israel a Makigubat

1 Impangag ti amin nga Israelita ti ayab a makigubat ket naguummongda iti imatang ni Yahweh idiay Mizpa. Naggapuda idiay Dan iti amianan agingga iti Beerseba iti abagatan ken idiay Galaad iti daya.

2 Adda dagiti pangulo ti amin a tribu ti Israel iti daytoy a panaguummong dagiti tattao ti Dios. Adda 400,000 a mannakigubat.

3 Kabayatanna, naammoan dagiti tattao ti Benjamin a napan dagiti dadduma nga Israelita idiay Mizpa. Kinuna dagiti Israelita iti Levita a kabbalay ti babai a napapatay, “Kasano a naaramid daytoy a kinadakes?”

4 Insungbat ti Levita, “Dimmagaskami a dua iti kamalalak idiay Gabaa iti Benjamin tapno ummiankami sadiay.

5 Iti rabii, immay dagiti lallaki a taga-sadiay ket linawlawda ti balay a yanko. Kayatdak a patayen; rinamesda ketdi ti kabbalayko ket natay.

6 Innalak ti bangkayna, rinangrangkayko ket pinaikkak ti tunggal maysa kadagiti 12 a tribu ti Israel agsipud ta dakes ken dinederrep ti inaramidda kadatayo.

7 Israelitatayo amin ditoy. Ania ti nasayaat nga aramidentayo?”

8 Sangsangkamaysa a timmakder dagiti amin a tattao ket kinunada, “Awan agaw-awid kadatayo, agnaed man iti tolda wenno balay.

9 Daytoy ti aramidentayo: Agbibinnunottayo tapno ammoentayo no siasino dagiti mapan mangraut iti Gabaa.

10 Maysa nga apagkapullo kadagiti tattao ti Israel ti matudingan a mapan agala iti abasto ti buyot a mapan idiay Gabaa tapno dusaenda ida iti dinederrep nga inaramidda iti Israel.”

11 Iti kasta, nagtitipon amin a lallaki ti Israel a maymaysa ti panggepda: ti panangrautda iti siudad.

12 Nangibaon dagiti tribu ti Israel kadagiti mangipakaammo iti amin a masakupan ti tribu ti Benjamin. Kinunada, “Apay nga inaramidyo daytoy a kinadakes?

13 Yawatyo dagiti nakarimrimon a lallaki ti Gabaa ta patayenmi ida tapno mapukaw daytoy a kinadakes iti Israel.”

Ngem saan nga inkaskaso dagiti Benjaminita dagiti naibaon.

14 Naguurnong ketdi idiay Gabaa dagiti amin a lallaki a naggapu iti amin a siudad ti Benjamin ket napanda ginubat dagiti dadduma nga Israelita.

15 Iti dayta nga aldaw, naayaban ti 26,000 a mannakigubat kadagiti siudadda. Adda pay napili a 700 a lallaki a taga-Gabaa.

16 Pasigda a kattigid ket nalaingda nga agpallatibong; saanda nga agmintis iti aniaman a puntaanda, uray buok.

17 Malaksid dagiti Benjaminita, adda met 400,000 a nasanay a mannakigubat ti Israel.

Maraut dagiti Benjaminita

18 Napan dagiti Israelita iti pagdaydayawan idiay Betel ket nakiumanda iti Dios. “Ania a tribu ti umuna a manggubat kadagiti Benjaminita?” sinaludsodda.

“Ti tribu ti Juda,” insungbat ni Yahweh.

19 Ngarud, iti agsapa ti sumuno a bigat, napan nagkampo dagiti Israelita iti asideg ti Gabaa.

20 Pinagpuestoda dagiti mannakigubat iti sango ti siudad tapno rautenda ti tribu ti Benjamin.

21 Manipud iti siudad, rimmuar ti armada ti Benjamin, ket sakbay ti ilelennek ti init, pinatayda ti 22,000 a mannakigubat ti Israel.

22-24 Nagkamang dagiti Israelita iti pagdaydayawan idiay Betel ket nagmalmalemda a nagdungdung-aw iti imatang ni Yahweh. “Rumbeng kadi nga inkam man gubatenen dagiti kakabsatmi a Benjaminita?” sinaludsodda.

“Wen,” kinuna ni Yahweh.

Iti kasta, napatured ti armada ti Israel ket iti sumaruno nga aldaw, napanda nagpuesto iti isu met laeng a lugar a nagyananda tapno gubatenda dagiti Benjaminita.

25 Nagrarangetda manen iti ruar ti Gabaa ket iti daytoy a gundaway, napapatay ti 18,000 a mannakigubat ti Israel.

26 Nagsubli dagiti amin nga Israelita idiay Betel ket nagdung-awda. Nagtugawda iti imatang ni Yahweh ket dida nangnangan agingga iti rabii. Nangidatagda iti daton a pakikappia ken daton a mapuoran.

27-28 Gapu ta adda sadiay ti Lakasa ti Tulag nga ay-aywanan ni Finees nga anak ni Eleazar ken apoko ni Aaron, sinaludsod dagiti tattao ken ni Yahweh: “Inkam kadi gubaten manen dagiti kakabsatmi a Benjaminita wenno saanen?”

Kinuna ni Yahweh, “Inkay rumaut ta inton bigat, agballigikayto a mangparmek kadakuada.”

29 Nangibaon dagiti Israelita kadagiti mannakigubat nga aglemmeng iti likmut ti Gabaa.

30 Iti maikatlo nga aldaw, simmang-atda a manggubat kadagiti Benjaminita. Nagpuesto dagiti soldado iti sango ti Gabaa a kas met la idi.

31 Rimmuar a makigubat dagiti Benjaminita, ket nayadayoda iti siudad. Kas iti napalabas a pannakigubatda, nagpapatayda kadagiti tattao iti dalan nga agpa-Betel, agpa-Gabaa ken iti tay-ak. Pinatayda ti agtallopulo nga Israelita.

32 Impagarup dagiti Benjaminita a nagballigida manen a nangparmek iti Israel.

Ngem plano dagiti Israelita ti agpakamat tapno mayadayoda dagiti Benjaminita iti siudad.

33 Isut’ gapuna nga idi nagsanud ti kadakkelan a bunggoy ti armada ti Israel ket naguummongda idiay Baaltamar, rimmuar met dagiti mannakigubat a nanglikmut iti siudad kadagiti rukib a naglemmenganda iti laud ti Gabaa.

34 Agdagup iti 10,000 a napili a mannakigubat ti Israel ti dimmarup iti Gabaa. Napinget ti dangadang. Saan nga ammo dagiti Benjaminita a ngannganidan agkanibusanan.

35 Pinagballigi ni Yahweh dagiti Israelita; iti dayta nga aldaw, naparmek dagiti Benjaminita, ket 25,100 kadakuada ti napapatay.

36 Ket nabigbig dagiti Benjaminita a pinarmek dagiti Israelita idan.

Agballigi ti Israel

Nagsanud dagiti Israelita ta mangnamnamada kadagiti pinaglemmengda nga agsaneb iti ruar ti Gabaa. Inalistoan dagitoy ti rimmuar iti puestoda.

37 Dinagdagusda ti simrek iti Gabaa, nagwarasda ket pinatayda amin nga adda iti siudad.

38 Adda pagilasinan a nagnunumoan ti kadakkelan a bunggoy ti Israel ken dagiti aglemlemmeng a mannakigubat: no adda napuskol nga asuk nga agpangato manipud iti siudad,

39 agsubli dagiti Israelita nga adda iti paggugubatan. Tallopulo idin kadakuada ti napapatay, isu nga impagarup dagiti Benjaminita a naparmekda dagiti Israelita a kas iti damo.

40 Ket nagparang ti napuskol nga asuk nga agpangpangato manipud iti siudad. Idi tumalliaw dagiti Benjaminita, nasdaawda a nakakita a maur-uram metten ti entero a siudad.

41 Nagsubli dagiti Israelita ket nagbuteng dagiti Benjaminita ta ammoda nga agkanibusanandan.

42 Panggepda ti aglibas ket nagtatarayda a nagturong iti tay-ak ngem awan paglisianda. Dinarundon ida ti kadakkelan a bunggoy ti armada ti Israel ken dagiti naggapu iti siudadket nagpapatayda.

43 Awan ti paglisian dagiti Benjaminita ket saan a nagsardeng dagiti Israelita a nangsunson ken nagpapatay kadakuada agingga iti dayaen ti Gabaa.

44 Sangapulo ket walo a ribu kadagiti kalalaingan a mannakigubat a Benjaminita ti napapatay.

45 Nagturong dagiti nakalasat idiay let-ang, ket nagkamangda iti lugar a maaw-awagan iti Bato ti Rimmon; 5,000 kadakuada ti napapatay iti daldalan. Intuloy dagiti Israelita a sinunson ida agingga iti Gidom ket 2,000 pay ti pinatayda kadakuada.

46 Agdagup iti 25,000 dagiti napasag a soldado a Benjaminita iti dayta nga aldaw—maingelda amin.

47 Ngem nakalibas ti 600 kadakuada. Napanda iti let-ang, ket nagkamangda iti lugar a maaw-awagan iti Bato ti Rimmon. Nagyanda sadiay iti uppat a bulan.

48 Sinublian dagiti Israelita ti nangpapatay kadagiti dadduma a Benjaminita—inkisapda amin a tao ken animal a nasarakanda. Pinuoranda amin nga il-ili iti dayta a deppaar.