Ti Baro a Naimbag a Damag Biblia (RIPV)

Kanta iti Panagkasar ti Ari

1 Putarek daytoy a kanta a mairuknoy iti ari,

iti panunotko agubbog ti agkakapintas a balikas;

kas iti pluma ti maysa a nalaing a mannurat,

toy dilak maysa a daniw ti inna yebkas.

2 Sika ti kataeran a lalaki,

nalaingka unay nga agbitla;

binendisionannaka ti Dios iti awan inggana.

3 Ibarikesmo ta kampilanmo, nabileg nga ari;

nadayag ken nadaegka.

4 Iti naarian a kinadayagmo,

inka salakniban ti kinalintegken kinapudno.

Iti kinapigsam, naindaklanto dagiti balligi a magun-odmo.

5 Natirad dagiti panam,

salputenda ti puso dagiti kabusormo;

sumuko kenka dagiti pagilian.

6 Mataginayonnga awan inggana

ti pagariam, O Dios.

Iturayam dagiti tattaom babaen iti hustisia;

7 ayatem ti naimbag ket guraem ti dakes.

Isu a pinilinaka ti Dios; wen, ti Diosmo

ket ad-adu a bendision ti impaayna kenka

ngem ti uray siasinoman nga ari.

8 Agayamuom ti mirra, aloe, ken kasia iti amin a kawesmo;

iti uneg dagiti marfil a palasio linglingayendaka kadagiti nakuerdasan a pagtokaran.

9 Kadagiti bayabaymo, mairaman dagiti prinsesa;

iti makannawanmo, adda ti reyna

nga agkakapateg nga alahas a balitok ti arruatna.

10 Sika nga asawaen ti ari, denggem ti innak ibaga:

dagiti tattaom ken kakabagiam lipatemon ida.

11 Gapu iti pintasmo tarigagayannaka ti ari;

isun ti apom, tungpalem ngarud ti kayatna.

12 Yegandaka kadagiti sagut dagiti taga-Tiro;

kayat dagiti babaknang a gun-oden ti tulongmo.

13 Adda ti prinsesa iti palasio—nagpintasen!

Naibinggas ti balitok a sinulid iti trahena.

14 Rumimatrimat ti kawesna

ket maitulod iti ayan ti ari,

sarsarunoen dagiti bayabayna a babbai

ket mayasidegda met iti ari.

15 Sirarag-o ken siraragsakda a sumrek iti palasio.

16 Adunto ti annakmo a lallaki, sika nga arik,

a sumukatto kadagiti kapuonam,

ket pagturayemto ida iti daga.

17 Taginayonento ti kantak ti agdindinamag a naganmo,

ket iti amin a tiempo, idaydayawdakanto dagiti tattao.

Adda Kadatayo ti Dios

1 Ti Dios ti kamang ken pigsatayo;

sisasagana a tumulong iti nariribuk a tiempo.

2 Ditay ngarud agbuteng uray no agginggined,

ken margaay dagiti bantay a maigabor iti taaw,

3 uray no agdaranudor dagiti baybay,

ken magunggon dagiti turod gapu iti dawelna.

4 Adda karayan a mangted rag-o iti siudad ti Dios,

iti nasantoan a pagtaengan ti Kangatoan.

5 Iti daytoy a siudad, agnaed ti Dios;

awanto pakaan-anoanna, dinto marsuod,

parbangon pay laeng tulongannan.

6 Agkintayeg dagiti pagilian,

aglagaw dagiti pagarian,

aggurruod ti Dios ket marunaw ti daga.

7 Adda kadatayo tiApoa Mannakabalin-amin;

ti Dios ni Jacob ti kamangtayo.

8 Umayyo kitaen ti inaramid tiApo!

Imutektekanyo dagiti nakaskasdaaw nga inaramidna ditoy daga!

9 Pagsardengenna dagiti gubat iti sangalubongan;

dadaelenna dagiti pana, tukkolenna dagiti gayang,

ken puoranna dagiti lugan a pakigubat.

10 “Isardengyo ti aggugubat

ket ammoenyo a siak ti Dios,” kunana.

“Siak ti kangatoan kadagiti nasion,

katan-okan iti entero a lubong!”

11 Adda kadatayo tiApoa Mannakabalin-amin;

ti Dios ni Jacob ti kamangtayo!

Ti Kangatoan nga Agturay

1 Agtipatkayo gapu iti rag-o, dakay amin a tattao!

Idir-iyo ti naragsak a

kankanta a pagdaydayaw iti Dios!

2 Masapul a pagbutngan tiApoa Kangatoan,

ta naindaklan nga Ari a mangiturong iti sangalubongan.

3 Pinagballiginatayo kadagiti tattao;

pinagturaynatayo kadagiti pagilian.

4 Impiliannatay iti daga a pagnaedantayo,

ti sanikua a pagpannakkel dagiti tattao nga ay-ayatenna.

5 Umuli ti Dios iti tronona!

Adda dir-i ti rag-o ken napigsa nga uni ti trumpeta!

6 Kantaenyo ti pagdaydayaw iti Dios;

wen, kantaanyo iti pagdaydayaw ti aritayo!

7 Kantaanyo ti Dios kadagiti pagdaydayaw

ta isu ti Ari iti entero a daga!

8 Iturayan ti Dios dagiti pagilian;

agtugaw iti tronoda a nasantoan.

9 Agtataripnong dagiti turayen dagiti nasion,

agraman dagiti tattao ti Dios ni Abraham.

Nabilbileg ti Dios ngem dagiti amin nga armada;

iturayanna amin ida.

Ti Sion a Siudad ti Dios

1 Naindaklan tiApo,

ket maikari a maidaydayaw

iti siudad ti Diostayo, iti nasantoan a bantayna.

2 Nangatoken napintas

ti Bantay Sion a pagtaengan ti Dios;

ti siudad ti naindaklan nga

Ari mangyeg iti rag-o iti sangalubongan.

3 Impakita ti Dios nga adda talged iti kaaddana

iti uneg dagiti sarikedked ti siudad.

4 Nagmaymaysa dagiti ari a rimmaut iti Bantay Sion.

5 Ngem idi makitada ti siudad, nasdaawda,

nagbutengda ket nagtatarayda.

6 Sadiay nagpigergerda iti buteng ken danag,

a kas iti babai nga agpaspasikal,

7 ken kas kadagiti dadakkel a barko

a mayallo-allon iti nadawel a bagio.

8 Nadamagmi dagiti aramid ti Dios,

ket ita, nakitamin ida

iti siudad ti Diostayo, tiApoa Mannakabalin-amin;

salaknibanna nga agnanayon ti siudad.

9 Iti uneg ti Templom, O Dios,

ut-utobenmi ti di agbalbaliw nga ayatmo.

10 Idaydayawdaka dagiti tattao iti amin a lugar;

agdindinamag ti naganmo iti entero a daga.

Nalinteg ti panangituraymo;

11 agrag-o koma dagiti tattao ti Sion!

Nalinteg ti pangngeddengmo;

agrag-o koma dagiti siudad ti Juda!

12 Likmutenyo ti Bantay Sion, tattao ti Dios,

ket bilangenyo dagiti torrena.

13 Kitaenyo dagiti bakudna

ket sukimatenyo dagiti sarikedkedna

tapno maibagayo iti sumaruno a kaputotan

14 a daytoy a Dios, isu ti Diostayo iti agnanayon nga awan inggana;

idalannatay iti amin a tiempo.

Awan Serserbi ti Panagtalek iti Kinabaknang

1 Dumngegkayo, dakay amin a tattao!

Ipangagyo daytoy, tattao iti amin a disso,

2 natan-ok man wenno nanumo,

nabaknang man wenno napanglaw.

3 Nalawag dagiti innak ibalikas,

nainsiriban dagiti innak isawang.

4 Yallingagko ti lapayagko iti maysa a pagsasao

ket ilawlawagko ti kaipapananna

bayat ti panagtokarko iti arpa.

5 Saanak nga agbuteng iti tiempo ti peggad,

no kadagiti dakes a kabusor, malawlawak

6 wenno kadagiti tattao nga agtalek iti kinabaknangda,

ket pagpasindayagda ti adu a sanikuada.

7 Pulos a dinto masubbot ti tao ti bagina;

saanna met a mabayadan ti biagna iti Dios,

8 ta nangina unay ti subbot ti biag ti tao.

Ti kabaelanna nga ibayad dinto makaanay

9 tapno mabalinna ti agbiag nga agnanayon,

ket mailisi iti tanem.

10 Makitati siasinoman nga uray dagiti masirib matayda,

kasta met ti mapasamak kadagiti maag ken nengneng,

ket mabati ti kinabaknangda kadagiti kaputotanda.

11 Dagiti tanemdati taengda nga agnanayon,

sadiay ti pagnaedanda iti amin a tiempo,

uray pay no adda idi bukodda a daga.

12 Ti kinadaeg dina mailisi ti tao iti patay;

matayto a kas kadagiti animal.

13 Kastoy ti pagbanagan dagiti agtalek iti bagida,

Kastoy ti pagtungpalan dagiti mapnek iti kinabaknangda;

14 naitudingda a matay a kas karnero,

ket ni Patay ti pastordanto.

Parmekento ida dagiti nalinteg

bayat ti panagrupsa ti bagida iti lubong dagiti natay,

adayoda kadagiti pagtaenganda!

15 Ngem isalakannakto ti Dios;

iti pannakabalin ni patay, alawennakto.

16 Dika agbuteng no bumaknang ti maysa a tao,

no dagiti sanikuana, umadu la nga umadu,

17 ta inton matay dinanto maitugot ida;

dinanto maikuyog iti tanem ti kinabaknangna.

18 Uray no mapnek ti tao iti agdama a biag,

wenno maidaydayaw gapu iti kinarang-ayna,

19 matayto met laeng a kas kadagiti kapuonanna,

ket maitiponto kadakuada iti sipnget nga awan inggana.

20 Ti kinadaeg dina mailisi ti tao iti patay;

matayto a kas kadagiti animal.

Ti Pudno a Panagdaydayaw iti Dios

1 Agsao tiApoa Dios a Mannakabalin-amin;

ayabanna ti entero a lubong, manipud daya agingga iti laud.

2 Agraniag ti Dios manipud iti Sion,

ti nagpaidumat’ pintasna a Sion, awan pagkuranganna.

3 Umay ti Diostayo, ngem saan a di madlaw;

adda apuy a gumilgil-ayab iti sangoananna,

ken nadawel a bagio iti lawlawna.

4 Awaganna ti langit ken daga a mangsaksi iti panangukomna iti ilina.

5 Kunana: “Ummongenyo iti sangok

dagiti napudno a tattaok a nakitulag kaniak

babaen iti panangidatonda iti sakrifisio.”

6 Ibunannag ti langit a nalinteg ti Dios,

ket isu met laeng ti ukom.

7 “Tattaok, dumngegkayo ket innak agsao;

maibusor kenka, Israel, ti pammaneknekko.

Siak ti Apo a Diosmo.

8 Saanka a tubngaren gapu kadagiti sakrifisiom,

kadagiti daton a mapuoran a kanayon nga idatagmo.

9 Maysa pay, diak masapul dagiti baka

wenno kalding kadagiti arbanmo;

10 kukuak ngamin dagiti animal iti kabakiran,

ken dagiti baka iti rinibu a katurturodan.

11 Kukuak met amin a tumatayab iti tangatang,

kasta met amin nga adda biagna iti kataltalonan.

12 “Uray no mabisinak, diak agkiddaw kenka,

ta kukuak ti lubong ken amin a linaonna.

13 Agsidsidaak aya iti baka?

Umin-inumak aya iti dara ti kalding?

14 Ti panagyamanmo isu komat’ sakrifisiom iti Dios;

itedmo iti Kangatoan ti amin nga inkarim.

15 No umay ti riribuk, awagannak;

ispalenkanto ket idaydayawnakto.”

16 Ngem kuna ti Dios iti managdakdakes:

“Awan serserbina a balbaliksem dagiti bilinko.

Awan kapapay-an ti panangsarsaritam iti tulagko.

17 Ngamin, kaguram ti disiplina,

dimo dengdenggen dagiti patigmaanko kenka.

18 No makakitaka iti mannanakaw, agbalinka a gayyemna,

ket makipulpulapolka kadagiti mannakikamalala.

19 “Madadaanka nga agsao iti dakes;

saanka nga agalikaka nga agulbod.

20 Madadaanka a mangidarum iti kabsatmo,

ket parnuayem ti pammabasolmo.

21 Inaramidmo amin dagitoy

ngem diak nagtagtagari;

iti kasta, impagarupmon a kaslaak met kenka.

Ngem ita, babalawenka,

ket ilawlawagko ti amin kenka.

22 “Utobenyo daytoy, dakay a di mangikankano kaniak,

ta no saan, dadaelenkayo,

ket awan ti makaisalakan kadakayo.

23 Ti mangipaay iti sakrifisio mangted iti pannakapadayawko

ket awan duadua a ti agtulnog kaniak isalakanko.”

Kararag a Pagdawat iti Pammakawan

1 Gapuiti di agbalbaliw

nga ayatmo

kaasiannak kadi, O Diosko.

Gapu iti kinamanangngaasim, punasem kadi dagiti basolko.

2 Ugasam a mamimpinsan ti kinadakesko,

ket dalusannak kadagiti basbasolko!

3 Bigbigek a nagbiddutak,

ket kadagiti basbasolko silalagipak.

4 Nagbasolakkenka, wen, sika laeng ti nagbasolak,

nagaramidak iti dakes iti imatangmo.

Iti kasta, nalinteg ti panangukommo kaniak,

ket nainkalintegan ti pannakadusak.

5 Adtoy a naipasngayak iti kinadakes,

ket iti basol nainawak.

6 Tarigagayam ti kinapudno ken nadalus a puso;

punnoem ti panunotko iti siribmo.

7 Ugasannak iti basolko tapno nadalusak;

buggoannak ket napudpudawakto ngem kapas.

8 Kayatko a mangngeg ti rag-o ken ragsak;

agragsakak manen nupay rinumek ken tinuktukkolnak.

9 Dimo koma ikaskaso dagiti basolko;

punasem amin a kinadakesko.

10 Parsuaem kaniak, O Dios, ti nadalus a puso,

ket ikkannak iti baro ken napudno nga espiritu;

11 dinak pagtalawen iti imatangmo;

dimo ipanaw kaniak ti Espiritu Santo.

12 Isublim kaniak ti rag-o ti panangisalakanmo,

ket ikkannak iti natulnog nga espiritu.

13 Iti kasta, isurokto dagiti bilinmo kadagiti managbasol

tapno agsublida kenka.

14 O Dios, ispalem ti biagko,ket isalakannak;

iti kasta, naragsakakto a mangipakaammo iti kinalintegmo.

15 Apo, luktam dagiti bibigko

ket ipaduyakyakkonto ti pannakaidaydayawmo.

16 Dimo kayat dagiti daton a sakrifisio;

ta no kayatmo koma, isuda ti idatonko;

dika met maay-ayo iti daton a mapuoran.

17 O Dios, ti napakumbaba nga espiritu ti sakrifisiok kenka;

dimonto laksiden ti puso a napakumbaba ken nagbabawi.

18 Kaasiam ti Sion, O Dios, ket tulongam,

bangonem dagiti narba a bakud ti Jerusalem.

19 Iti kasta, maragsakankanto kadagiti tumutop a sakrifisio,

ken amin a mapuoran a daton,

ket mapuoranto dagiti toro a baka iti altarmo.

Ti Pangngeddeng ti Dios ken ti Kaasina

1 Apaya pagpasindayagmo, tao a maingel, ti kinaulpitmo kadagiti nalinteg a tattao?

Saan nga agbalbaliw ti ayat ti Dios.

2 Agmalmalem nga agpampanunotka iti pannakadadael,

ti dilam kasla labahas a natadem.

Ti agparbo iti ulbod kanayonem.

3 Ad-adda nga ayatem ti dakes ngem ti naimbag;

kaykayatmo ti agulbod ngem ti agsao iti pudno.

4 Pagay-ayatmo ti mamadpadakes, sika nga ulbod.

5 Ngem agnanayonto ti pannakadadaelmo;

manipud iti toldam, ti Dios rabsutennakanto;

ikkatennakanto iti daga dagiti sibibiag.

6 Makitanto dagiti nalinteg ket agbutengdanto;

ngem katawaandakanto a kunkunada,

7 “Kitaenyo ti tao a di nagkamang iti Dios,

nagtalek iti adu a sanikuana,

nagtalged iti kinabaknangna!”

8 Ngem siak, mayarigak iti nalangto nga olibo iti balay ti Dios.

Agtalekak iti di agbalbaliw nga ayatna iti agnanayon nga awan ingganna.

9 Kanayon nga agyamanak kenka, O Dios, gapu iti inaramidmo.

Itan-okkanto iti sango dagiti tattaom

ket ipakdaarkonto ti kinaimbagmo.

Ti Kinadakes ti Tao

1 Kunadagiti maag,

“Awan Dios.”

Rinukerda amin, ket dakes unay dagiti aramidda;

awan uray maysa ti naimbag ti aramidna.

2 Manipud langit, tannawagan ti Dios ti sangkataoan,

ta kitaenna no adda masirib,

ken no adda agdaydayaw kenkuana.

3 Ngem timmalikudda amin,

dakesda amin a padapada;

awan naimbag uray maysa.

4 “Awan kad ammo dagiti agaramid iti dakes?

Pagbiaganda ti pananggundawayda kadagiti tattaok,

ket pulos a dida agkararag kaniak.”

5 Ngem napalalo ti panagbutengda;

saan pay a napasamak ti kastoy kadakuada!

Ngamin, iwarawaranto ti Dios dagiti tultulang ti kabusor ti ilina.

Nailaksidda isut’ gapuna a parmeken ti Israel ida.

6 Aggapu koma iti Sion ti pannakaisalakan ti Israel!

Inton parang-ayen manen ti Dios dagiti tattaona,

agrag-onto ti kaputotan ni Jacob,

agragsakto dagiti tattao ti Israel.

Kararag iti Pannakasalaknib kadagiti Kabusor

1 Isalakannak,O Dios,

babaen iti pannakabalinmo;

wayawayaannak babaen iti bilegmo!

2 Denggem, O Dios, toy kararagko;

timudem dagitoy balikasko!

3 Dagiti natangsit a tattao umaydak rauten;

dagiti naranggas a tattao panggepdak a patayen,

tattao a saan a mangikankano iti Dios.

4 Ngem ti Dios ti tumulong kaniak,

ti Apo ket salaknibannak!

5 Agballatekto kadagiti kabusorko ti mismo a kinadakesda.

Agsipud ta mapagtalkan ti Dios, dadaelennanto ida.

6 Siraragsakakto a mangipaay iti datonko kenka;

OApo, agyamanakto kenka ta naimbagka.

7 Inispalnak kadagiti amin a parikutko,

ket nakitak ti pannakaparmek dagiti kabusorko.