Ti Baro a Naimbag a Damag Biblia (RIPV)

Ti Dios nga Ukom

1 Agyamankami kenka, O Dios,

wen, agyamankami.

Sika ti awaganmi,

ket dagiti nakaskasdaaw nga aramidmo saritaenmi.

2 Kuna ti Dios, “Iti tiempo nga intudingko,

diakto mangidumduma iti panangukomko.

3 Uray mapukawto ti daga ken amin a linaonna,

palagdaekto latta dagiti pamuonanna.

4 Ibagak kadagiti managdakdakes a dida agpalpalangguad.

5 Ibagak kadakuada a dida agpangpangas.”

6 Ti panangukom, saan nga aggapu iti daya wenno iti laud,

iti amianan wenno iti abagatan.

7 Ti Dios ti mangukom;

adda ipababana, adda met itan-okna.

8 Adda kopa nga iggem ni Yahweh;

napno iti naingel nga arak ti pungtotna.

Ibukbokna daytoy ket inumen dagiti managdakdakes,

inumenda agingga iti aridaedna.

9 Ngem saanakto a mamingga nga agsarsarita

maipapan iti Dios ni Jacob;

agkantaakto latta ti panagdayaw kenkuana.

10 Parmekennanto ti pannakabalin dagiti nadangkes,

ngem itedna ti ad-adu a pannakabalin kadagiti nalinteg.

Ti Sibaballigi a Dios

1 Nalatak ti Dios idiay Juda;

idiay Israel, madaydayaw ti naganna.

2 Adda idiay Salem ti balayna;

idiay Sion ti pagnanaedanna.

3 Sadiay tinukkolna dagiti pana dagiti kabusor,

dagiti kalasag ken kampilanda—

wen, amin nga armasda.

4 O Dios, anian a dayagmo,

anian a daeg ti panagsublim.

Naggapuka kadagiti bambantay

a nangparmekam kadagiti kabusormo.

5 Naagawen dagiti sinamsam

dagiti natured a mannakigubatda;

matmaturogdan iti turog ni patay;

awanen ti mangusar kadagiti armasda.

6 Idi nakapungtotka, O Dios ni Jacob,

napasag dagiti kabalio ken dagiti nagsakay.

7 Ngem sika, OApo, pagbutbutngandaka!

Siasino ti makaitured a tumakder

iti sangoanam no agpungtotka?

8 Manipud langit, impaulogmo ti sentensia;

nagbuteng ti daga ket adda kappia,

9 idi tumakderka a mangukom

tapno isalakanmo dagiti maidaddadanes ditoy daga.

10 Ti pungtot ti tao agbanag la a pakaidayawam;

ket dagiti nakalasat ngilinendanto dagiti fiestam.

11 Tungpalenyo dagiti kariyo itiApoa Diosyo.

Rebbeng dagiti tattao nga ipan dagiti sagutda kenkuana,

isu a pagbutngan dagiti tattao.

12 Pagpakumbabaenna dagiti natangsit a prinsipe,

ket butbutngenna dagiti ari.

Pannakaliwliwa iti Tiempo ti Riribuk

1 Yikkisko ti umasug iti Dios,

ipigsak ti umawag ket denggennak.

2 Agkararagak iti Apo

iti tiempo ti pannakariribukko;

agpatpatnag nga agkararagak a singangato dagiti imak

ngem awan pannakaliwliwak.

3 Lagipek ti Dios ket agasugak;

agammirisak ket maupayak.

4 Dina ipalubos a maalak ti turogko,

kasta unay ti danagko ket diak makasao.

5 Mapanunotko dagiti naikupin a panawen;

malagipko met dagiti limmabasen a tawen.

6 Agpatpatnag a nauneg dagiti pampanunotko;

agpampanunotak ket saludsodek itoy nakemko:

7 “Kanayonto la ngatan a ti Apo laksidennak?

Saanto ngata a mangaasi manen kaniak?

8 Limmammiis ngatan ti di agbalbaliw nga ayatna?

Saanna ngatan a tungpalen ti karina?

9 Nagpatingga ngatan ti kinamanagparaburna?

Pungtot kadin ti simmukat iti kinamanangngaasina?”

10 Ket kinunak, “Daytoy ti pagsakitan ti nakemko:

ti pannakabalin ti Dios, saanen a kas idi damo.”

11 Dagiti aramidmo, OApo, laglagipekto ida,

wen, dagiti impakitam a milagro idi un-unana.

12 Lagipekto dagiti amin a gapuanam;

utobekto dagiti aramidmo a naindaklan.

13 O Dios, nasantoan amin a gapuanam!

Awan dios a kas kenka a naindaklan.

14 Sika ti Dios nga agaramid kadagiti milagro;

impakitam kadagiti nasion ti bilegmo.

15 Babaen iti bilegmo, sinubbotmo dagiti bukodmo a tattao,

dagiti kaputotan da Jacob ken Jose.

16 Nakitadaka dagiti danum, O Dios, ket nagbutengda;

uray dagiti kaadalman a taaw nagpigergerda.

17 Imbuyat dagiti ulep ti tudo;

naggurruod iti tangatang

ket nagkimat iti agsasallupang.

18 Agallangogan ti uni ti gurruodmo,

ket ti lubong malawagan kadagiti kimatmo;

nagkintayeg ken nagpigerger ti daga.

19 Nagnaka iti baybay;

ti adalem a taaw binallasiwmo,

ngem saan a makita dagiti tugotmo.

20 Arigmo iti pastor a nangidalan kadagiti tattaom,

babaen iti panangidaulo da Moises ken Aaron.

Ti Kinapudno ti Dios kadagiti Nasukir a Tattaona

1 Dakayo a tattaok,

dumngegkay iti daytoy pannursurok,

ket ipamaysayo nga allingagen ti innak isao.

2 Pangngarigti innak aramaten;

ilawlawagko dagiti palimed idi ugma,

3 dagiti nangngeg ken naammoantayo

nga imbaga dagidi ammatayo.

4 Ditay ilimlimed ida kadagiti annaktayo,

no di ket isaritatayo kadagiti kaputotan a sumarsaruno

ti pannakabalin ken naindaklan a gapuanan tiApo,

agraman dagiti nakaskasdaaw nga aramidna.

5 Nangituyang iti linteg kadagiti Israelita;

nangipaulog iti bilin kadagiti kaputotan ni Jacob.

Imbilinna kadagiti kapuonantayo

nga isuroda dagitoy kadagiti annakda

6 tapno maammoan dagiti sumarsaruno a kaputotan a di pay nayanak,

ket isurodanto met kadagiti bukodda nga annak.

7 Iti kasta, agtalekda met iti Dios,

ket dida lipaten dagiti aramidna

no di ket kanayon a tungpalenda dagiti bilbilinna.

8 Saanda koma a kas kadagiti kapuonanda

a nasukir ken nasubeg a kaputotan.

Saan a natibker ti pammatida iti Dios,

ket saanda a nagtalinaed a napudno kenkuana.

9 Nagtagipana dagiti Efraimita,

ngem iti kaaldawan ti gubat, nagtatarayda.

10 Saanda a tinungpal ti katulagan ti Dios,

saanda a nagbiag a mayannurot iti lintegna.

11 Nalipatanda dagiti inaramidna,

dagiti milagro nga impakitana kadakuada.

12 Itiimatang dagiti kapuonanda nagaramid kadagiti milagro,

iti tanap ti Soan idiay Egipto.

13 Pinagbisngaynati baybay ket inlasatna ida;

pinagpangatona ti danum a kas pader bayat ti pannagnada.

14 Itialdaw, babaen iti ulep indalanna ida

iti rabii, ti naraniag nga apuy ti bagnosda.

15 Pinagrengngatnati dakkel a bato idiay let-ang

imminumda iti danum a kasla nagburayok manipud kaunggan.

16 Pinagubbogna ti dakkel a bato

ket nagayus ti danum a kasla karayan.

17 Ngem, nagbasolda latta iti Dios,

ket binusorda ti Kangatoan idiay let-ang.

18 Inggagaradaa sinuot ti anus ti Dios

babaen iti panagdawatda iti taraon a magustoanda.

19 Nagsaoda iti maibusor iti Dios ket kinunada,

“Maikkannatayo ngata ti Dios iti taraon ditoy let-ang?

20 Agpayso a dinugsolna ti dakkel a bato

ket pimsuak ti danum a nagayus a kasla karayan.

Ngem maikkannatayo ngata iti tinapay ken karne?”

21 Nakapungtot ni Yahweh idi nangngegna daytoy;

dinusana dagiti tattaona babaen iti apuy,

ket rimmubrob ti pungtotna kadakuada,

22 agsipud ta awan ti panagtalekda iti Dios,

ken awan pammatida a maisalakanna ida.

23 Nupay kasta, binilinna ti tangatang

ket linuktanna dagiti ruangan ti langit.

24 Pinagtudonakadakuada iti mana a kanenda,

wen, ti mana a nagtaud sadi langit.

25 Nanganda iti taraon dagiti anghel;

inted ti Dios ti aglaplapusanan a kanenda.

26 Binulosanna ti angin nga aggapu iti daya

ket babaen iti pannakabalinna, dimteng ti angin-abagat.

27 Intedna ti adu a tumatayab kadakuada

a kas kaadu ti darat iti baybay.

28 Nagtinnagda iti tengnga ti kampoda

ken iti aglikmut dagiti toldada.

29 Nangan dagiti tattao ket nabsogda,

ta intedna ti taraon a kayatda.

30 Ngem idi mangmanganda pay laeng,

ken saanda pay a natilmon ti kanenda,

31 nakapungtot ti Dios kadakuada

ket pinatayna dagiti maingel iti Israel

ken dagiti kapipigsaan nga agtutuboda.

32 Iti laksid dagitoy, intuloy dagiti tattao ti panagbasolda;

adu a milagro ti inaramidna, dida nagtalek kenkuana.

33 Ngarud, kasla anges ti kaababa ti aldawda,

ginudasna ida iti kellaat a didigra.

34 Tunggal adda dagiti papatayenna kadakuada,

isu metten ti panagbirok kenkuana dagiti dadduma,

agbabawida ket sipapasnekda nga agkararag kenkuana.

35 Malagipda a ti Dios isut’ bato a salaknibda;

ti Kangatoan ti mangisalakan kadakuada.

36 Ngem pasig nga ulbod ti sasawenda,

saan a naimpusoan amin nga ibagbagada.

37 Didanagtalinaed a napudno kenkuana,

ket dida tinungpal ti nagtutulaganda.

38 Nupay kasta, kinaasian ti Dios dagiti tattaona,

pinakawanna dagiti basolda ket dina pinukaw ida.

Namin-adu a tinengngelna ti ungetna

ken minedmedanna ti pungtotna.

39 Nalagipna a tattaoda laeng,

kas angin a lumabas a di agsublin.

40 Namin-adu a nagsukirda iti Dios idiay let-ang!

Masansan met a pagladingitenda.

41 Masansan a suotenda ti kinaanusna.

Saem ti impalak-amda iti Nasantoan ti Israel.

42 Nalipatanda ti dakkel a pannakabalinna

idi inispalna ida iti kabusorda,

43 idi inaramidna dagiti milagro ken nakaskasdaaw a pagilasinan,

ken ti aldaw nga adda idiay Egipto iti tanap ti Soan.

44 Pinagbalinnaa dara dagiti karayan ken waig dagiti Egipcio;

naawanan dagiti Egipcio iti danum nga inumen.

45 Nangibaoniti pinangen a ngilaw a namarigat kadakuada;

nangyeg kadagiti tukak a nangdadael kadagiti talonda;

46 nangibaonkadagiti arabas a nangan kadagiti apitda

ken dudon a nangdadael kadagiti mulada.

47 Dinadaelnadagiti ubasda babaen iti yelo,

inkisapna dagiti sikamoro iti bumayakabak a tudo.

48 Pinatayna dagiti bakada babaen iti yelo;

inkisapna dagiti karneroda babaen iti kimat.

49 Bimtak ti pungtot ken ungetna;

inyegna kadakuada ti nakaro a didigra

a dimteng a kas babaonen ni patay.

50 Saanna nga inggawid ti pungtotna

wenno inkaluya ida iti pakatayanda

no di ket pinatayna ida iti didigra.

51 Pinataynadagiti inauna nga annak a lallaki,

iti amin a familia ti Egipto.

52 Kaslakarnero nga inakayna dagiti tattaona;

indalanna ida a naglasat iti let-ang.

53 Indalannaida a sitatalged ket awan nagbutnganda,

ngem nalmes iti baybay dagiti kabusorda.

54 Impannaida iti nasantoan a dagana,

kadagiti kabambantayan a sinakupna.

55 Pinapanawnadagiti agnaed iti daga a papananda

sana biningbingay ti dagada kadagiti tribu ti Israel

ket intedna dagiti balbalayda kadagiti tattaona.

56 Ngemti Mannakabalin-amin a Dios, sinukirda;

saanda a tinungpal dagiti bilbilinna.

57 Nasukir ken mangliliputda a kas kadagiti kapuonanda;

saanda a maiturong a kas iti killo a pana.

58 Pinagpungtotda gapu kadagiti altarda

ket pinagimonda gapu iti didiosen a nagdaydayawanda.

59 Nagpungtot ti Dios idi makitana daytoy

ket linaksidna a namimpinsan ti Israel.

60 Binaybay-annati toldana idiay Silo

a nagnaedanna iti sidong dagiti tattao.

61 Pinalubosannadagiti kabusor a mangsamsam,

iti Lakasa ti Tulag a pakakitaan iti bileg ken dayagna.

62 Kinapungtotna dagiti bukodna a tattao,

binaybay-anna ida a pinapatay dagiti kabusorda.

63 Napasag iti paggugubatan dagiti agtutuboda,

ket awan ti nangasawa kadagiti babbalasangda.

64 Nauloyan iti kampilan dagiti papadida,

ket di napalubosan nga

agdung-aw dagiti baloda.

65 Kamaudiananna, bimmangon

ti Apo a kasla nakaturog;

kasla napigsa a lalaki a pinatured ti arak.

66 Pinaksiatna dagiti kabusorna;

agnanayon ken nakababain ti pannakaabakda.

67 Ngem linaksidna dagiti kaputotan ni Jose

saanna a pinili ti tribu ni Efraim.

68 Pinilina ketdi ti tribu ni Juda

ken ti Bantay Sion nga ay-ayatenna.

69 Binangonna sadiay ti Templona

nga umasping iti taengna sadi langit;

impasdekna a di maisin a kas iti daga,

natalged ingganat’ inggana.

70 Pinilinani David nga agbalin nga adipenna,

innalana iti pagpastoran kadagiti karnero

71 ken pagtaraknan kadagiti urbon.

Pinagbalinna nga ari ti Israel,

ken pastor dagiti tattao ti Dios.

72 Iti kasta, sipapasnek nga inaywanan ni David ida,

ket nainsiriban ti panangipangulona kadakuada.

Kararag iti Pannakaispal ti Nasion

1 ODios, rinaut dagiti

pagano ti daga dagiti tattaom.

Tinulawanda ti nasantoan a Templom.

Ket rinebbekda ti Jerusalem.

2 Impakanda ti bangkay

dagiti tattaom kadagiti tumatayab,

ken ti bangkay dagiti adipenmo kadagiti animal nga atap.

3 Pinagayusda ti dara dagiti tattao iti Jerusalem;

iti entero a Jerusalem kasla danum a nagayus ti dara

ket awan natda a mangitabon kadakuada.

4 Nagbalinkami nga ang-angaw kadagiti nasion iti likmutmi,

katkatawaan ken um-umsiendakami.

5 Agnanayon kadi, OApo, ti ungetmo kadakami;

kasla apuy a simged ti pungtotmo, saan kadin a maiddep?

6 Idissuormo ti pungtotmo kadagiti nasion a pagano,

dida agdaydayaw kenka, dida umawag iti naganmo.

7 Ngamin, pinapatayda dagiti tattaom;

dinadaelda ti pagiliam ket naglangalang.

8 Dinakam kadi dusaen

gapu iti basol dagiti kapuonanmi.

Darasem ti umay ket kaasiannakami

ta napukawmi aminen a namnamami.

9 Tulongannakam, O Dios ket isalakannakami;

ispalennakami ket pakawanem dagiti basbasolmi

tapno ti dayawmo maitandudo.

10 Amangan ketdi no kuna dagiti pagilian,

“Sadino ti ayan ti Diosda?”

Kayatmi a makita ti panangdusam kadakuada

gapu iti pannakapapatay dagiti adipenmo.

11 Denggem ti asug dagiti balud,

ket wayawayaam dagiti naikeddeng a matay

babaen iti bilegmo a naindaklan.

12 O Apo, balsem dagiti pagilian;

dusaem ida iti mamimpito gapu iti amin a panangumsida kenka.

13 Dakami a tattaom, dakami a karnero iti arbanmo,

agnanayon nga agyamankamto kenka,

ket idaydayawdakanto iti amin a tiempo.

Kararag a Pagdawat iti Pannakaisubli ti Pagilian

1 Ipangagnakamikadi,

O Pastor ti Israel;

denggennakami, sika a mangidaldalan iti arbanmo.

Sika a situtugaw iti tronom iti rabaw dagiti kerubim,

2 ipakitam ti ayatmo kadagiti tribu ti Efraim, Benjamin ken Manases.

Ipakitam kadi ti pigsam kadakami;

umaynakami kadi isalakan!

3 Isublinakami kadi, O Dios.

Iparangarangmo ti panagayatmo tapno maisalakannakami!

4 OApoa Dios a Mannakabalin-amin,

kasano pay kabayag nga agtalinaed ti pungtotmo kadakami?

Kasano pay kabayag samonto ipangag dagiti kararagmi?

5 Tinaraonannakam iti lua,

adu a lua ti impainummo kadakami.

6 Pinalubosam dagiti nasion a mangumsi kadakami

ket pagang-angawandakami.

7 O Mannakabalin-amin a Dios, isublinakami kadi.

Ipakitam ti asim tapno maisalakannakami.

8 Maysa nga ubas ti inruarmo idiay Egipto;

pinaksiatmo dagiti sabsabali a nasion

ket immulam iti dagada.

9 Dinalusam ti maysa a disso a pakaimulaanna,

nagpauneg dagiti ramutna.

Dimmakkel ti ubas ket nagsaknap iti entero a daga.

10 Lininonganna dagiti turod,

ken dagiti natayag a sedro.

11 Dimmanon dagiti sangana iti Taaw Mediterranean;

rimmungbo agingga iti nakadanon iti Karayan.

12 Apay a rinebbam dagiti aladna?

Nawayan dagiti aglabas

a mangpuros iti bungana.

13 Subsoben ken baddebaddekan dagiti alingo,

dagiti atap nga animal, sumrekdan nga agkaan.

14 Kaasiannakami, O Mannakabalin-amin a Dios.

Tannawagannakami manipud langit ket umaymo salakniban toy kaubasam.

15 Umaymo ispalen daytoy mula nga intukitmo,

daytoy naganus nga ubas a pinadakkelmo a nalangto.

16 Pinuoran dagiti kabusormi ket pinukanda;

ket iti pungtotmo, dadaelem ida.

17 Dagiti tattao a pinilim, taginayonen ken salaknibam.

Ti pinapigsam a nasion inka salakniban.

18 Saandakanton a panawan;

taginayonennakami ket idaydayawdaka.

19 OApoa Dios a Mannakabalin-amin, isublinakami kadi.

Iparangarangmo ti panagayatmo tapno maisalakankami.

Kanta iti Fiesta

1 Idir-iyo ti ragsakyo iti Dios a salaknibtayo;

iti Dios ni Jacob ikantayo ti pagdayawyo.

2 Agkantakayo a buyogan iti pandereta,

danggayanyo iti naaweng a lira ken arpa.

3 Pagunienyoti trumpeta no agfiestatayo,

tunggal dumteng ti lutuad, kasta met ti kabus.

4 Ta iti Israel, linteg daytoy a naipaulog,

maysa a bilin ti Dios ni Jacob.

5 Imbilinna ken Jose daytoy nga annongen

idi mapan Egipto nga inna gubaten.

Mangngegko ti timek ti diak am-ammo,

6 “Inikkatko ti nadagsen nga awit iti abagam;

innalak ti basket nga ig-iggamam.

7 Idiadda rigatmo, immawagka kaniak ket inlisika;

manipud gurruod a paglemlemmengak, sinungbatanka,

sinuotka idi addaka iti ubbog ti Meriba.

8 Denggem, O ilik, ti ballaagko kenka.

O Israel, ipangagnak la koma!

9 Awantoti sabali a dios iti nagtengngaanyo,

wen, saankayto nga agrukbab iti sabali a dios.

10 Siak ni Yahweh a Diosmo

a nangiruar kenka idiay Egipto;

agngangaka laeng ket itedko ti taraonmo.

11 “Ngem didak impangag dagiti tattaok;

saan a nagtulnog kaniak ti Israel.

12 Gapu iti kinasukirda binaybay-ak ida

nga agaramid iti aniaman a kayatda.

13 No dumngeg la koma kaniak ti ilik,

no agtulnog ti Israel kaniak,

14 nalaka a parmekek dagiti kabusorna,

ket abakek amin a bumusor kenkuana.

15 Agrukbab a sibubuteng dagiti gumurgura kaniak,

ket saan nga agpatingga ti pannakadusada.

16 Ngem taraonankanto iti kasayaatan a trigo,

ket pennekenkanto iti kasam-itan a diro.”

Ti Dios ti Kangatoan nga Agturay

1 Agtugaw ti Dios a mangukom iti nailangitan a taripnong;

iti ummong dagiti dios, ipaulogna ti pangngeddengna:

2 “Isardengyon ti nakillo a panangukomyo,

saanyo nga ayonan dagiti dakes a tattao!

3 Salaknibanyo ti kalintegan dagiti ulila ken nakurapay,

itedyo ti karbengan dagiti nakakaasi ken awanan gaway.

4 Alawenyo dagiti nakapuy ken marigrigat,

ikanawayo ida kadagiti managdakdakes.

5 “Dikay makaaw-awat ken awan ammoyo!

Napalalo ti kinasukiryo,

ket nagpukawen ti hustisia ditoy lubong.

6 Imbagakkadakayo a dioskayo,

annaknakay amin ti Kangatoan.

7 Nupay kasta, mataykayto a kas kadagiti tattao,

kas iti siasinoman a prinsipe, matnagkayto.”

8 Umayka, O Dios, ket iturayam ti lubong;

kukuam amin a nasion.

Kararag iti Pannakaparmek dagiti Kabusor

1 O Dios, agtignayka kadin;

dika kadi agulimek, dika agmayeng.

2 Kitaem ket umalsan dagiti kabusormo,

makigubaten dagiti gumurgura kenka.

3 Adda nalimed a panggepda kadagiti tattaom,

isikatda dagiti salsalaknibam.

4 “Umaykayo,” kunada, “ket dadaelentayo ti nasionda,

tapno mapukawen ti Israel, malipatanen ti naganna.”

5 Nagtutulagda a sangsangkamaysada a mangbusor kenka:

6 dagiti Edomita ken dagiti Ismaelita,

dagiti Moabita ken dagiti Agareno;

7 dagiti taga-Gebal, Ammon ken Amalec;

ken dagiti taga-Filistia ken Tiro.

8 Timmipon met kadakuada ti Asiria

tapno dagiti kaputotan ni Lot kaduaenda.

9 Ipalak-ammokadakuada ti impaaymo kadagiti Midianita,

kada Sisera ken Jabin iti Karayan Kison.

10 Pinarmekmo ida idiay Endor,

ket nagrupsa ti bangkayda iti daga.

11 Aramidemkadagiti panguloda

ti kas iti inaramidmo kada Oreb ken Zeeb;

parmekem dagiti amin nga agtuturayda

kas iti panangparmekmo kada Zeba ken Salmunna

12 isuda a nagkuna, “Tagikuaentayo ti daga ti Dios.”

13 O Diosko, inwarawaram ida a kas tapok,

kas taep nga ipalais ti angin.

14 Kas iti apuy a manguram iti kabakiran,

kas iti gil-ayab a mangpasged kadagiti turod,

15 kamatem ngarud ida babaen iti bagiom,

ket pagalinggagetem ida babaen iti alipugpogmo.

16 Lapunosem ida iti bain, OApo,

tapno bigbigenda ti pannakabalinmo.

17 Agnanayon koma a maparmek ken mabutbutengda;

matayda koma a naan-anay ti pannakaibabainda.

18 Maammoanda koma a siksika laeng tiApo,

Yahweh ti naganmo,

ti Kangatoan iti entero a daga.

Iliw iti Balay ti Dios

1 Anian a nagpintas ti Templom,

OApoa Mannakabalin-amin!

2 Kasta unay ti gagarko a mapan sadiay!

Kayatko ti sumrek iti Templo ni Yahweh.

Kantaak iti Dios a sibibiag;

agkantaak a siraragsak iti amin a puso ken kararuak.

3 Agumok dagiti billit ken ti sallapingaw,

ket aywananda dagiti sibongda iti asideg dagiti altarmo,

OApoa Mannakabalin-amin, Arik ken Diosko.

4 Naragsak dagiti agnaed iti balaymo.

Kanayon nga agkankantada iti pagdaydayaw kenka.

5 Naragsak dagiti tattao a sika ti pagtaudan ti pigsada,

a mailiw a mapan agdaydayaw idiay Bantay Sion.

6 Bayat ti panangdaliasatda iti natikag a tanap ti Baca,

agburayok dagiti ubbog iti dayta a daga,

agtinnag ti nasapa a tudo ket dagiti waig aglipiasda.

7 Pumigsada a pumigsa bayat ti pannagnada;

makitadanto ti Dios dagiti dios idiay Sion.

8 OApoa Dios a Mannakabalin-amin,

denggem ti kararagko,

dumngegka, O Dios ni Jacob.

9 Bendisionam ti arimi, O Dios,

ti ari a pinilim.

10 Naim-imbag ti maysa nga aldaw a kaaddak iti Templom,

ngem ti sangaribu nga aldaw iti sabali a disso.

Kaykayatko ti agbantay iti ruangan ti balay ti Dios,

ngem ti agtaeng iti balay dagiti managdakdakes.

11 OApoken Diosmi, arigmo iti init ken kalasag;

mangipaayka iti parabur ken dayaw.

Dimo ipaidam ti nasayaat a banag

kadagiti agaramid iti naimbag.

12 OApoa Mannakabalin-amin, nagasat ti tao nga agtalek kenka.