Ti Baro a Naimbag a Damag Biblia (RIPV)

Kanta a Pagdayaw

1 Madaydayaw tiApo.

Idaydayawyo ti nagan tiApo,

dakayo nga adipenna,

2 dakayo nga agserserbi iti balayna,

iti Templo ti Diostayo!

3 Idaydayawyo tiApo,

ta isu ket managparabur.

Kantaanyo ti naganna,

ta isu ket manangngaasi.

4 Pinilina ni Jacob nga agpaay kenkuana

ken dagiti Israelita a kas kukuana.

5 Ammok a naindaklan tiApo,

ket naturturay ngem dagiti amin a didiosen.

6 Aramidenna ti aniaman a pagayatanna

sadi langit ken ditoy daga,

iti taaw wenno iti yuyeng.

7 Manipud pungto ti daga, alaenna dagiti ulep a mangyeg bagio;

parnuayenna ti kimat nga agpaay iti tudo,

ket iruarna ti angin iti pagiduldulinanna.

8 Pinatayna amin nga inauna nga annak idiay Egipto,

annak man ti animal wenno tao.

9 Sadiay, nakaskasdaaw dagiti inaramidna

a pangdusana iti Faraon

ken amin nga ofisialesna.

10 Adu a pagilian ti rinebbekna

ket nabibileg nga ari pinatayna ida:

11 Sihon nga ari dagiti Amorreo,

Og nga ari ti Basan,

ken amin nga ari ti Canaan.

12 Intedna ti dagada kadagiti tattaona;

wen, intedna dagitoy kadagiti Israelita.

13 OApo, agtalinaed nga agnanayon ti naganmo;

malaglagipdakanto dagiti amin a kaputotan.

14 Salaknibanto ni Yahweh dagiti tattaona,

ket wayawayaannanto dagiti adipenna.

15 Naaramiditi pirak ken balitok dagiti dios dagiti nasion,

sinukog ida dagiti tattao.

16 Adda ngiwatda, ngem dida makasao;

adda matada, ngem dida makakita.

17 Adda lapayagda, ngem dida makangngeg,

ket awan anges nga aggapu iti ngiwatda.

18 Sapay koma ta maipada kadagiti didiosen

dagiti nagaramid ken amin nga agtalek kadakuada.

19 Dakayo nga Israelita,

idaydayawyo tiApo.

Idaydayawyo tiApo,

dakayo a papadi ti Dios!

20 Dakayo a Levita,

itan-okyo tiApo.

Itan-okyo tiApo,

dakayo nga agdaydayaw kenkuana.

21 Idaydayawyo tiApoidiay Sion,

idiay Jerusalem a pagnaedanna.

Madaydayaw tiApo!

Kanta a Pagyaman

1 NaimbagtiApo,

ket agyamankayo ngarud kenkuana;

agnanayon ti di agbaliw nga ayatna.

2 Agyamankay iti Dios dagiti didios;

agnanayon ti di agbaliw nga ayatna.

3 Agyamankay itiApodagiti appo;

agnanayon ti di agbaliw nga ayatna.

4 Isu laeng ti makaaramid

kadagiti naindaklan a milagro;

agnanayon ti di agbaliw nga ayatna.

5 Inaramidnadagiti langit babaen iti kinasiribna;

agnanayon ti di agbaliw nga ayatna.

6 Impasdeknati daga iti rabaw dagiti danum;

agnanayon ti di agbaliw nga ayatna.

7 Pinarsuanati init ken ti bulan;

agnanayon ti di agbaliw nga ayatna.

8 Insaadna ti init a mangituray iti aldaw;

agnanayon ti di agbaliw nga ayatna.

9 Inkabilna ti bulan ken dagiti bituen a mangituray iti rabii;

agnanayon ti di agbaliw nga ayatna.

10 Pinataynadagiti inauna a lallaki nga annak dagiti Egipcio;

agnanayon ti di agbaliw nga ayatna.

11 Inruarnadagiti Israelita idiay Egipto;

agnanayon ti di agbaliw nga ayatna.

12 Inruarna ida babaen iti nabileg

ken mannakabalin a takkiagna;

agnanayon ti di agbaliw nga ayatna.

13 Pinagbingaynati Nalabaga a Baybay;

agnanayon ti di agbaliw nga ayatna.

14 Ket indauloanna a nagna dagiti tattaona;

agnanayon ti di agbaliw nga ayatna.

15 Ngem linemmesna ti Faraon ken ti armadana;

agnanayon ti di agbaliw nga ayatna.

16 Impanguloanna dagiti tattaona iti ilalasatda idiay let-ang;

agnanayon ti di agbaliw nga ayatna.

17 Nagpapatay kadagiti nabibileg nga ari;

agnanayon ti di agbaliw nga ayatna.

18 Nagpapatay kadagiti agdindinamag nga ari;

agnanayon ti di agbaliw nga ayatna.

19 NiSihon nga ari dagiti Amorreo;

agnanayon ti di agbaliw nga ayatna.

20 Kenni Og nga ari ti Basan;

agnanayon ti di agbaliw nga ayatna.

21 Intedna ti dagada kadagiti tattaona;

agnanayon ti di agbaliw nga ayatna.

22 Wen, intedna ken ni Israel nga adipenna;

agnanayon ti di agbaliw nga ayatna.

23 Dinatay nalipatan idi naparmektayo;

agnanayon ti di agbaliw nga ayatna.

24 Ket inispalnatayo kadagiti kabusortayo;

agnanayon ti di agbaliw nga ayatna.

25 Ikkanna iti kanen ti amin a pinarsuana;

agnanayon ti di agbaliw nga ayatna.

26 Agyamankayo iti Dios ti langit;

agnanayon ti di agbaliw nga ayatna.

Ti Unnoy dagiti Naitalaw nga Israelita

1 Idi agin-inanakami iti igid dagiti karayan ti Babilonia,

nagsangitkami a nakalagip iti Sion.

2 Insab-itmi dagiti arpami

kadagiti kayo a karawawe iti asideg.

3 Imbaga dagiti nangitalaw kadakami, “Agkantakayo.”

Imbagada a ragragsakenmi ida a kunada,

“Kantaandakami iti kanta maipapan iti Sion.”

4 Kasano a kantaenmi ti kanta tiApo

iti sabali a daga?

5 Magango koma toy makannawan nga ima

no malipatanka, O Jerusalem!

6 Dumket koma ti dilak iti ngaresko,

no saanka a malagip, O Jerusalem,

no malipatanka nga alimpatok ti rag-ok.

7 Laglagipem kadi, OApo, ti inaramid dagiti Edomita,

idi pinarmekda ti Jerusalem.

Laglagipem ti inulit-ulitda nga imbaga,

“Rebbaentayo agingga a dumaga!”

8 Madadaelkanto,Babilonia,

nagasat daydiay mangbales kenka

gapu iti impalak-ammo kadakami.

9 Wen, nagasat daydiay mangrabsut

kadagiti maladaga nga annakmo,

ket itupakna ida iti bato!

Kararag a Pagyaman

1 Agyamanak kenka, OApo, iti amin a pusok.

Kantaanka iti pagdaydayaw

iti saklang dagiti didios.

2 Agrukbabak iti sangoanan ti nasantoan a Templom, ket agdaydayawak iti naganmo

gapu iti kinamanagayatmo ken kinapudnom,

ta impakitam a naturay ti naganmo ken dagiti bilbilinmo.

3 Impangagnak idi immawagak kenka,

pinapigsanak ti bilegmo.

4 OApo, itan-okdakanto dagiti amin nga ari ditoy daga

inton mangngegda dagiti karim.

5 Agkantadanto ti maipapan kadagiti aramidmo,

kasta met ti naindaklan a dayagmo.

6 Nupay natan-ok unay tiApo,

padayawanna dagiti nanumo,

ket saan a malemmengan dagiti natangsit a tattao.

7 Uray no aglasatak iti pannakasuot,

awanto ti pakaan-anoak.

Sangoem dagiti makapungtot a kabusorko,

ket isalakannak babaen iti bilegmo.

8 OApo, aramidem ti amin nga inkarim;

agnanayon nga awan inggana ti ayatmo.

Dimo baybay-an dagiti pinarsuam.

Ti Naan-anay nga Ammo ken Panaripato ti Dios

1 OApo, inusignak ket ammonak.

2 Ammom amin nga aramidko;

ammom dagiti pampanunotko

uray addaka iti adayo.

3 Agtartrabahoak man wenno agin-inanaak,

ammom amin a gunayko, makitanak.

4 Uray sakbay nga agsaoak,

ammomon ti innak ibalikas.

5 Addaka latta iti lawlawko,

ket salaknibannak iti pannakabalinmo.

6 Diak matukod daytoy a pannakaammom kaniak;

nauneg unay ket saanko a magaw-at.

7 Sadino ti papanak

tapno malisianka?

Sadino ti pagkamangak

tapno maadaywanka?

8 No umuliak sadi langit,

addaka met sadiay.

No agiddaak iti lubong dagiti natay,

masarakanka met sadiay.

9 No agtayabak a mapan iti

labes ti leleggakan ti init,

wenno agnaedak iti ngarab ti taaw iti laud,

10 addaka sadiay a mangiturong kaniak,

ti kannawan nga imam kibinennak.

11 Mabalinko a dawaten iti sipnget nga ilemmengnak

wenno agbalin a rabii ti lawag a manglikmut kaniak.

12 Ngem uray ti sipnget saan a sipnget kenka,

ket ti rabii naraniag a kas iti aldaw;

ta agpada kenka ti sipnget ken lawag.

13 Pinartuatmo ti amin a paset ti bagik,

sinukognak iti tian ni inak.

14 Idaydayawka, ta rumbeng a kabutengka;

datdatlag ken nakaskasdaaw dagiti aramidmo.

Ammok daytoy iti amin a pusok.

15 Nakitam ti pannakabukel dagiti tulangko;

naannad ti panagkakamangda iti tian ni inak,

idi masuksukogak iti nalimed.

16 Nakitanak sakbay a mayanakak.

Dagiti naituding nga aldawko

nailanadda amin iti librom,

uray awan pay nangrugi kadakuada.

17 Diakmatukod dagiti pampanunotmo, O Dios;

saan a mabilang ti kaaduda.

18 Mabilangko kadi ida?

Saan, ta ad-aduda ngem ti darat.

No makariingak addaakto pay laeng kenka.

19 O Dios, gudasem la koman

dagiti managdakdakes!

Panawandak la koman

dagita a naranggas!

20 Padpadaksendaka dagitoy a tattao;

agsaoda iti maibusor iti naganmo!

21 OApo, kagurak unay

dagiti manggura kenka!

Kasta unay ti pananglaisko

kadagiti bumusor kenka!

22 Saan a maikkat ti gurak kadakuada;

ibilangko a kabusorko ida.

23 Usigennak, O Dios,

ket ammoem ti adda iti pusok.

Suotennak tapno makitam

ti adda iti panunotko.

24 Wen, sukimatem no adda kinadakeskaniak,

ket iturongnak iti nagkauna a dana.

Kararag a Pagdawat iti Pannakasalaknib

1 Isalakannak kadi,

kadagiti managdakdakes, OApo.

Salaknibannak kadagiti naranggas a tattao.

2 Kanayon a dakes ti panggepda,

ket kanayon a mangirugida iti riri.

3 Kaslamakapatay nga uleg dagiti dilada,

kasla gita ti karasaen dagiti saoda.

4 Salaknibannak kadi,

iti ima ti nadangkes, OApo.

Ilisinak kadagiti naranggas a tattao

nga agpanggep iti pannakadadaelko.

5 Nangipakat dagiti natangsit

iti pakaipalab-ogak.

Nangibatengda iti naiket a tali,

ket iti dana, nangikabilda iti paggugubatan.

6 Kunak ken ni Yahweh,

“Sika ti Diosko.”

Ipangagmo kadi, OApo,

ti panagdawatko iti tulong.

7 O Apok a Kangatoan,

sika a nabileg a Mannubbotko,

sinalaknibannak tapno diak maan-ano.

8 OApo, dimo patgan

ti kalikagum dagiti managdakdakes.

Dimo pagballigien

dagiti dakes a panggepda.

9 Dimo pagballigien dagiti kabusorko;

idissuormo met laeng kadakuada

dagiti pammutbutengda kaniak.

10 Agtinnag koma kadakuada

dagiti umap-apuy a beggang.

Maitappuakda koma iti abut

ket dida makaruaren.

11 Saan koma nga agballigi

dagiti mamadpadakes.

Ti kinadakes dagus koma a tiliwenna

ti naranggas a tao ket dadaelenna.

12 Ammok, OApo,

nga ikaluyam dagiti mairurumen,

ket ikalintegam dagiti napanglaw.

13 Kinapudnona, idaydayawdakanto dagiti nalinteg;

agtaengdanto iti imatangmo.

Kararag iti Rabii

1 Umawagak kenka, OApo;

darasem kadi ti tumulong kaniak.

Denggennak kadi no umawagak kenka.

2 Awatemkoma kadi toy

kararagko a kas maysa nga insenso

ken toy sitatag-ay nga imak a kas maysa a daton iti rabii.

3 Paguardiaam kadi, OApo, ti ngiwatko,

ket paaywanam ti ruangan dagiti bibigko.

4 Ilisinak kadi iti tarigagay nga agaramid iti dakes,

wenno makikadua kadagiti tattao nga agaramid iti kinakillo.

Diakto koma dumar-ay kadagiti fiestada.

5 Mabalinnak a dusaen ken babalawen a sikakaasi ti naimbag a tao,

ngem diak itulok a lanaan ti managdakdakes ti ulok,

ta kanayon nga ikarkararagko ti maibusor kadagiti dakes nga aramidna.

6 Inton maitinnag dagiti turayenda manipud kadagiti rangkis

awatento dagiti tattao a pudno dagiti innak insao.

7 Kas iti kayo a mabalbalsig ken masigsigit,

kasta koma a maiwarawara dagiti tulangda iti ngarab ti tanem.

8 Ngem siak, O Apok a Kangatoan,

agtalekak latta kenka.

Birokek ti panangsalaknibmo;

dimo kadi ipalubos a matayak.

9 Ilisinak kadi kadagiti impakatda a pangsilo kaniak;

wen, kadagiti palab-og dagiti managdakdakes.

10 Sapay koma ta matnag dagiti managdakdakes iti mismo a palab-ogda,

idinto a saanak a maan-ano.

Kararag a Pagdawat iti Tulong

1 Agdawatakiti tulong itiApo;

agpakpakaasiak kenkuana.

2 Yumanko kenkuana dagiti amin a sakit ti nakemko.

Ibagak kenkuana dagiti amin a parikutko.

3 Ammona ti rumbeng nga aramidek,

no mapukawko ti namnamak.

Nangikabil dagiti kabusorko

iti pangsiloda kaniak.

4 Tumalliawak iti sikigak,

ket makitak nga awan tumulong kaniak.

Awan mangsalaknib

ken mangisakit kaniak.

5 OApo, umasugak kenka iti tulong.

Sika, OApo, ti salaknibko,

ditoy a biag sika laeng ti masapulko.

6 Ipangagmo koma ti asugko,

ta awanen a pulos ti namnamak.

Isalakannak kadagiti kabusorko

a napigpigsa nga adayo ngem siak.

7 Ispalennak iti pakarigatak,

ket idaydayawkanto iti gimong dagiti tattaom,

agsipud ta naimbagka kaniak.

Kararag a Pagdawat iti Tulong

1 Denggem, OApo, ti kararagko;

ipangagmo toy asugko.

Nalinteg ken mapagtalkanka;

patgam ngarud ti dawatko kenka.

2 Dinakkadi ukomen nga adipenmo;

awan ti saan a nagbasol iti imatangmo.

3 Sinarsaraknak ti kabusorko,

ket namimpinsan a pinarmeknak.

Iti nasipnget a pagbaludan, impisoknak,

ket awan dumak kadagiti natay idi un-unana.

4 Isut’ gapuna a ti anusko awanen,

ket ti namnamak napukawen.

5 Malagipko dagiti naglabas nga aldaw,

ut-utobek dagiti amin nga inaramidmo,

ket dagiti amin a gapuanam adda iti panunotko.

6 Ingatok dagiti imak nga agkararag kenka

kasla natikag a daga toy kararuak a mawaw kenka.

7 OApo, inka kadin ipangag ti dawatko;

ti amin a namnamak napukawko.

Dinak kadi ilemmengan

amangan no maipadaak kadagiti bumaba

iti lubong dagiti natay.

8 Agtalekak kenka; binigat nga ipalagipmo kaniak

ti di agbalbaliw nga ayatmo.

Dumanon kenka dagiti kararagko;

isurom kadi kaniak ti rumbeng a dalanko.

9 Kenka, OApo, kumamangak,

pangngaasim kadi ta salaknibannak;

ispalennak iti ima dagiti kabusorko.

10 Sika ti Diosko;

isuronak a mangaramid iti pagayatam.

Naimbagka koma kaniak,

ket iturongnak iti natalged a dalan.

11 Kas inkarim, OApo, isalakannak;

gapu iti kinaimbagmo,

ispalennak kadagiti pakariribukak.

12 Gapu ta ay-ayatennak, patayem dagiti kabusorko;

pukawem dagiti mangparparigat kaniak ta siak ti adipenmo.

Agyaman ti Ari iti Dios iti Panagballigina

1 Madaydayaw tiApo,

isu a bato a salaknibko;

iti pannakibakal, sansanayennak,

ket isagananak a makigubat.

2 Isu ti salaknib ken sarikedkedko,

ti salinong ken salakanko,

ti natalged a kamangko.

Pinagbalinnak a mangituray kadagiti tattaomi.

3 OApo, ania ti tao ta isu ketdi ti pampanunotem?

Ania aya ti anak ti tao

ta isu ketdi ti asikasoem?

4 Mayarig ti tao iti pul-oy ti angin;

dagiti aldawna lumabas a kas anniniwan.

5 Luktam ti tangatang, OApo, ta bumaba ka;

sagidem dagiti bambantay ket umasukda.

6 Pagkimatem ket warawaraem dagiti mangbusor kenka;

ibiatmo dagiti panam tapno agtatarayda.

7 Manipud ngato nga ayanmo, gaw-atennak,

iti adalem a danum, alawennak,

iti bileg dagiti ganggannaet, isalakannak.

8 Pasig nga ulbod ti sasawenda,

ket uray ti ulbod sapataanda.

9 O Dios, kantaanka, iti baro a kanta

agtokarak iti arpa ket kantaanka.

10 Ta dagiti ar-ari pagballigiem,

ket ni David nga adipenmo, ispalem.

11 Ikanawanak kadagiti naranggas a kabusorko;

ispalennak kadagiti ganggannaet a tattao.

Pasig nga ulbod ti sasawenda,

ket uray ti ulbod sapataanda.

12 Agtutubo dagiti lallaki nga annakmi;

sapay koma ta kasda la mula a dumakkel ken pumigsa.

Dagiti babbai nga annakmi, kasda la koma estatua

a kadagiti suli ti palasio, mayarkosda.

13 Mapno koma dagiti kamaligmi iti amin a kita ti maapitmi.

Dagiti karneromi kadagiti pagpastoran,

aganakda koma iti inar-arban.

14 Dagiti bakbakami, agaduda koma;

awan koma ti maalisan wenno matay kadakuada.

Awan koma met ikkis ti panagbuteng kadagiti kalsadami.

15 Nagasat ti ili a pangibukbokanna iti bendisionna;

wen, nagasat ti ili a tiApoti Diosna.